KIET ke otu ediwak n̄kpọ emi anamde nnyịn ika iso idu uwem edi nte idem nnyịn esikemede ndinam unan akpa. Emi esitọn̄ọ ke ndondo oro owo adade unan.

Kere ise: Ata ediwak n̄kpọ ẹsitịbe ke esịt idem owo mbemiso unan akpa. Se se isitịbede mi:

• Nsen iyịp emi ẹsinamde iyịp oboho esifụk enyịn unan, anam iyịp etre, onyụn̄ ọdiọn̄ usan̄a-iyịp emi unan oro akabiatde.

• Nde unan oro esifụt mbak udọn̄ọ edidụk, emi n̄ko esinam n̄kpọ ekededi emi ekemede ndinam unan oro okûsọp ukpa ọwọrọ.

• Ke ufan̄ usen ifan̄, idem owo esitọn̄ọ ndidiọn̄ mme n̄kpọ emi unan oro akabiatde, anam enyịn unan oro ọtọn̄ọ ndifrọ, onyụn̄ ọdiọn̄ mme usan̄a-iyịp oro ẹkebiarade.

• Ke akpatre, enyịn unan oro esitọn̄ọ ndidiana ikpa tutu unan oro akpa ofụri ofụri.

Ntaifiọk ẹse nte idem owo esisan̄ade anam unan akpa ẹnyụn̄ ẹda emi ẹsio ọkpọ emi ekemede ndifiak nsịri idemesie. Enyene mmọn̄ibọk iba emi mmọ ẹsisịnde ke ini ẹnamde ọkpọ emi, ndien edieke ọkpọ emi asiahade m̀mê obomode, mmọn̄ibọk emi ẹsibuaha onyụn̄ akabade itai ndien itai emi esiwọrọ nsịt nsịt esịri nde oro akasiahade m̀mê obomode do. Nte ini akade, ọkpọ emi esifiak eketie nte eketiede. Ataifiọk kiet ọdọhọ ke se ntaifiọk ẹsụk ẹn̄wanade ndinam emi etie nte se isikụtde ke n̄kpọ-obot.

Afo ekere didie? Ndi idem owo emi ekemede ndinam unan akpa okofoforo? Mîdịghe ndi ẹkebobot enye?