Ndinyene Ima Nnọ Mmọ Ẹmi “Ẹtode ke Ufọk Mme Andinịm ke Akpanikọ”

MME ata Christian ẹnyene mbọbọ oro ebietde eke ubon ke otu idemmọ. Ke akpanikọ, toto ke akpa isua ikie E.N., mmọ ẹsikot kiet eken “eyen-ete.” (Mark 3:31-35; Philemon 1, 2) Mmọ ẹmi idịghe ikpîkpu ikọ; mmọ ẹtịn̄ nte mme andituak ibuot nnọ Abasi ẹdade kiet eken. (Men 1 John 4:7, 8 domo.) Jesus ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.”—John 13:35.

Ẹma ẹkụt utọ ima oro ke July 1997 ke ini unana edịm oro ekebịghide ke anyan ini akayakde ufan̄ ọnọ akamba edịm ye ukwọ ke Chile. Ke mbuari, ediwak owo ẹma ẹnana udia, ọfọn̄, ye mme n̄kpọ eken. Ke mme idaha afanikọn̄, Mme Ntiense Jehovah ẹsidomo ndinam item oro Paul ọkọnọde mbon Galatia ete: “Mmọdo ndien, adan̄a nte ikụtde ifet, ẹyak nnyịn ifọn ido ye kpukpru owo, akpan-akpan ye mmọ ẹmi ẹtode ke ufọk mme andinịm ke akpanikọ.”—Galatia 6:10.

Ntem, Mme Ntiense Jehovah ẹma ẹsọsọp ẹtịm idemmọ ndinam n̄kpọ mban̄a. Ẹma ẹtan̄ udia, ọfọn̄, ye mme n̄kpọ ntre, ẹsat, ẹbọp, ndien ekem ẹnọ ẹka ikpehe afanikọn̄ oro. Nditọwọn̄ ẹma ẹkam ẹnọ mme n̄kpọmbre! Idem ama akpa eyenete an̄wan kiet ke ini enye okokụtde nte mme n̄kpọ un̄wam ẹyọhọde Ufọkmbono Obio Ubọn̄. “N̄kekemeke ndisioro uyo, n̄kọfiọkke m̀mê n̄kpasasak m̀mê n̄kpatatua,” ntem ke enye ọdọhọ. “Enye ekedi kpa mme n̄kpọ oro nnyịn ikoyomde.”

Ekem, ke unana idotenyịn, unyekisọn̄ ama etịbe ke itie kiet kpasụk ke ikpehe oro ukwọ ọkọtọde odụk. Ediwak ufọk ẹma ẹwụre. Man  ẹnọ mme n̄kpọ oro ẹkeyomde, ẹma ẹsiak mme kọmiti unọ n̄kpọ un̄wam efen efen. Mme Kọmiti Ubọpufọk eke Ikpehe ke Ikpehe, ẹmi nte ido edide ẹsisede ẹban̄a edibọp mme itie usopidem Mme Ntiense Jehovah, ẹma ẹtọn̄ọ utom ẹnyụn̄ ẹnọ un̄wam mmọ. Nso ikedi utịp? Ẹma ẹyak mme ukeuke ufọk—oro nditọete ẹketịmde ẹnyụn̄ ẹbọpde—ẹnọ mbon oro ẹketabade ufọkidụn̄ mmọ. Ke adan̄aemi mme ufọk ẹmi mîkokponike, mmọ ẹma ẹnen̄ede ẹnyene ukpụhọde ye mbon oro mme andinọ n̄kpọ un̄wam eke ukara ẹkenọde ebuọt ẹda ẹbọp ẹmi owo mîkesịnke isọn̄ ye window m̀mê ndiyet ndom mbakara.

Ndusụk nditọete ẹma ẹnam isan̄ ẹto anyan usụn̄ man ẹken̄wam. Etieibuot Kọmiti Ubọpufọk eke Ikpehe ke Ikpehe kiet ama anam isan̄ akanade ese ikpehe oro ke usen iba—kpa ye oro okodude ke n̄kpọitie mbon n̄kpọnnam. Eyenete kiet edide nnan ama enen̄ede esịn ifịk anam utom, atan̄de obukpọk ọsọk mme anamusọ oro ẹkekpokde mmọ ke udomo oro ẹkeyomde. Eyenete oro edide inan ama atan̄ mme obukpọk oro aka itie oro ẹkeyomde mmọ.

Un̄wam oro nditọete ẹkenọde ama otụk ediwak mme andida nse. Ke obio kiet ẹkenịm ubomisọn̄ mme bodisi ẹkpere ufọk eyenete an̄wan oro ẹkediọn̄de ke ubọk. Mme bodisi oro ẹma ẹnyene ọkpọsọn̄ udọn̄. Kiet ama obụp eyenete kiet ete: “Mme anamutom ẹmi ẹtiede nte ẹnen̄ede ẹkop inemesịt mi ẹdi mmanie, ndien okụk ifan̄ ke ẹkpe mmọ?” Eyenete oro ama anam an̄wan̄a nte ke kpukpru mmọ ẹkedi mme anamutom unyịmesịt. Kiet ke otu ikpọ owo oro ama anam an̄wan̄a ete ke imọ imesinọ ọyọhọ mbak duop ke ufọkabasi imọ kpukpru ọfiọn̄, edi pastọ imọ ikakam idịghe idise imọ tọn̄ọ nte unyekisọn̄ oro eketịbe! Ke ndan̄nsiere eyenete an̄wan oro ama ọbọ ikot oto akwa owo bodisi ke urụk ukopikọ. Enye n̄ko ama okụt mme anamutom oro. Enye ọkọdọhọ ete ke edu ifiopesịt mme anamutom oro ama otụk imọ tutu imọ iyom nditiene mbuana!

Ke akpanikọ, edinam unọ n̄kpọ un̄wam ke Chile ekedi idara idara ifiọkutom ọnọ mme anamutom unyịmesịt oro ye eti n̄kpọ ntiense ọnọ mme andida nse.