Nnyịn Imoyom Esop Jehovah

NTE akanam omokop owo ọdọhọde ete, “Mmenịm Abasi ke akpanikọ edi nnịmke ido ukpono oro ẹtịmde-tịm”? Mbon ẹmi ẹkedide ifịk ifịk mme aka ufọkabasi ini kiet ko edi ẹkekabarede ẹnana udọn̄ ke ntak emi ido ukpono mmọ okpude ndiyụhọ mme udọn̄ eke spirit mmọ ẹsiwak ndinyene ukem ekikere oro. Okposụkedi mme esop ido ukpono ẹkpude mmọ ke ofụri ofụri, ediwak ẹsọn̄ọ ẹyịre nte ke mmimọ iyom ndituak ibuot nnọ Abasi. Nte ededi, mmọ ẹnịm ke akpanikọ ẹte ke ọfọn ndituak ibuot nnọ enye ke usụn̄ idem mmimọ akan ndinam ntre ke ebuana ye ufọkabasi m̀mê esop en̄wen.

Nso ke Bible ọdọhọ? Nte Abasi oyom mme Christian ẹbuana ye esop?

Mme Akpa Christian Ẹma Ẹbọ Ufọn Ẹto Edidu ke Esop

Ke Pentecost 33 E.N., Jehovah ikan̄wan̄ake edisana spirit esie iduọk mme andinịm ke akpanikọ ifan̄ ẹmi ẹkedude nsannsan, edi akan̄wan̄a ọduọk otu iren ye iban ẹmi ẹkesopde idem “ọtọ kiet,” ke ubet enyọn̄ ke obio Jerusalem. (Utom 2:1) Ke ini oro, ẹma ẹtọn̄ọ esop Christian emi akakabarede edi esop ofụri ererimbot. Emi ekedi ata edidiọn̄ ọnọ mme akpa mbet oro. Ntak-a? Akpa n̄kpọ edi nte ke ẹma ẹnọ mmọ akpan utom—ndikwọrọ eti mbụk Obio Ubọn̄ Abasi “ke ofụri ekondo” nte ini akade. (Matthew 24:14) Ke esop oro, mbon ẹmi ẹkabarede esịt obufa ẹma ẹkpep nte ẹkpekwọrọde ikọ ẹto mme ekemmọ andinịm ke akpanikọ ẹmi ẹnyenede mbufiọk.

Ikebịghike etop Obio Ubọn̄ ama asuana ebe adan̄a Jerusalem aka anyan. Ke ufọt 62 ye 64 E.N., apostle Peter ama ewet akpa leta esie ọnọ ẹsọk mme Christian ẹmi “ẹsuanade ẹdụn̄ọ ke Pontus ye Galatia ye Cappadocia ye Asia ye Bithynia,” kpukpru ẹdude ke Turkey eyomfịn. (1 Peter 1:1) Mme andinịm ke akpanikọ ẹma ẹdu n̄ko ke Palestine, Lebanon, Syria, Cyprus, Greece, Crete, ye Italy. Nte Paul ekewetde ọnọ ẹsọk mbon Colossae ke 60-61 E.N., ẹma ẹkwọrọ eti mbụk “ẹnọ kpukpru owo ke idak ikpa-enyọn̄.”—Colossae 1:23.

Ọyọhọ ufọn iba ke ndibuana ye esop ekedi nsịnudọn̄ emi mme Christian ẹkekemede ndinọ kiet eken. Ke ndibuana ye esop oro, mme Christian ẹma ẹkop mme utịn̄ikọ nsịnudọn̄, ẹkpep Edisana N̄wed Abasi ọtọkiet, ẹbuana mme ifiọkutom oro ẹsọn̄ọde mbuọtidem, ẹnyụn̄ ẹdiana ye mme ekemmọ andinịm ke akpanikọ ke akam. (1 Corinth, ibuot 14) Ndien iren ẹmi ẹkọride  ẹsịm ọyọhọ idaha ẹma ẹkeme ‘ndikpeme udịm-erọn̄ Abasi.’—1 Peter 5:2.

Nte mme andibuana ke esop, mme Christian ẹma ẹdiọn̄ọ kiet eken etịm ọfọn n̄ko ẹnyụn̄ ẹma kiet eken. Utu ke mmọ ndikop mfịghe ke ndibuana ye esop, ẹma ẹda mme esop ẹbọp ẹnyụn̄ ẹsọn̄ọ mme akpa Christian idem.—Utom 2:42; 14:27; 1 Corinth 14:26; Colossae 4:15, 16.

Ntak efen oro ẹkeyomde esop ofụri ererimbot oro akadianade kiet do ekedi man ẹsịn udọn̄ ẹnọ edidianakiet. Mme Christian ẹma ẹkpep ‘ndinyene ikọ-inua kiet.’ (1 Corinth 1:10) Emi ekedi akpan n̄kpọ. Mme andibuana ke esop oro ẹkenyene nsio nsio ifiọkn̄wed ye idaha ke n̄kaowo. Mmọ ẹkesem nsio nsio usem, ndien mmọ ẹma ẹsinyene mme in̄wan̄în̄wan̄ ukpụhọde ke edu uwem. (Utom 2:1-11) Ke ndusụk idaha, n̄kpri ndutan̄uyo ẹma ẹsidu. Nte ededi, ẹma ẹsin̄wam mme Christian ndibiere mme utọ ndutan̄uyo oro ke esịt esop.—Utom 15:1, 2; Philippi 4:2, 3.

Ẹma ẹsida n̄kpọsọn̄ mbụme oro mbiowo n̄kann̄kụk mîkekemeke ndibọrọ ẹbịne mme esenyịn oro ẹsan̄ade-san̄a ẹmi ẹkọride ẹsịm ọyọhọ idaha, utọ nte Paul. Ẹkesida mme mfịna ẹbuanade mme akpan ukpepn̄kpọ ẹbịne otu ukara emi okodude ke Jerusalem. Ke ntọn̄ọ ntọn̄ọ mme apostle Jesus Christ ẹkenam otu ukara emi, edi ke ukperedem enye ama esịne nyobiowo esop ke Jerusalem. Esop kiet kiet ama enyịme odudu oro Abasi ọkọnọde otu ukara ye mme andida ke ibuot esie nditịm utom ukwọrọikọ, ndimek irenowo nnọ mme ifetutom, ye ndinam mme ubiere ke mme n̄kpọ ẹbuanade ukpepn̄kpọ. Ke ini otu ukara ekebierede eneni kiet, mme esop ẹma ẹnyịme ubiere oro ẹnyụn̄ “ẹdara koro mmọ ẹkopde ndọn̄esịt.”—Utom 15:1, 2, 28, 30, 31.

Ih, Jehovah ama ada esop anam n̄kpọ ke akpa isua ikie. Edi nso kaban̄a mfịn?

Nnyịn Imoyom Esop Mfịn

Ukem nte nditọete mmọ eke akpa isua ikie, Mme Ntiense Jehovah mfịn ẹda utom edikwọrọ eti mbụk Obio Ubọn̄ ke akpan n̄kpọ. Usụn̄ kiet oro mmọ ẹnamde utom emi edi ke ndisuan Bible ye mme n̄wed un̄wam ukpep Bible, emi oyomde ndutịm.

Ana ẹtịm mme n̄wed Christian ye ntịn̄enyịn, ẹdụn̄ọde man ẹkụt ẹte ke enen, ẹmịn̄, ndien ekem ẹnọ ẹsọk mme esop. Ekem, Christian kiet kiet enyene ndinọ idem unyịme unyịme ndida mme n̄wed ẹmi nsọk mbon oro ẹyomde ndikot mmọ. Etop Obio Ubọn̄ esịm ediwak miliọn owo ke usụn̄ emi. Mme asuanetop eti mbụk ẹdomo ndinam utom ukwọrọikọ mmọ ke ndutịm, ke ndikụt nte ke owo inamke utom ikaha ke ndusụk efakutom ke adan̄aemi ẹfụmide mbon eken. Kpukpru ẹmi oyom ndutịm.

Sia “Abasi mînamke asari,” ana ẹkabade Bible ye mme n̄wed Bible. (Utom 10:34, NW) Idahaemi, magazine emi odu ke usem 132, ndien ẹmịn̄ nsan̄a esie, Awake!, ke usem 83. Oro oyom otu mme akabade n̄wed ẹmi ẹtịmde mfọn mfọn ke ofụri ererimbot.

Mme andibuana ke esop ẹbọ nsịnudọn̄ ke ini mmọ ẹdụkde mme mbono esop Christian ye mme mbono. Do mmọ ẹkop mme utịn̄ikọ Bible ẹmi ẹnọde nsịnudọn̄, ẹkpep N̄wed Abasi ọtọkiet, ẹbuana mme ifiọkutom oro ẹbọpde-bọp, ẹnyụn̄ ẹdiana ye mme ekemmọ andituak ibuot ke akam. Ndien ukem nte nditọete mmọ ke akpa isua ikie, mmọ ẹsisọn̄ọ mbuọtidem mmọ ebe ke mme ima ima esenyịn oro ẹsan̄ade-san̄a ndika n̄kese. Ntem, mme Christian mfịn ẹdi “otu-erọn̄ kiet, Ekpeme-erọn̄ kiet” onyụn̄ odu.—John 10:16.

Edi akpanikọ, Mme Ntiense Jehovah idịghe mfọnmma, kpa nte akpa mbiet mmọ mîkedịghe. Kpa ye oro, mmọ ẹnam utom ọtọkiet ke edidianakiet. Nte utịp, ẹnam utom ukwọrọikọ Obio Ubọn̄ emi ke ofụri isọn̄.—Utom 15:36-40; Ephesus 4:13.

[Mme ndise ke page 31]

Mme Christian mfịn ẹdi “otu-erọn̄ kiet, Ekpeme-erọn̄ kiet” onyụn̄ odu