Bọ Ndọn̄esịt to Odudu Jehovah

“Ke uwak ekikere emi odude mi ke esịt ndọn̄esịt fo enem mi esịt.”—PSALM 94:19.

  BIBLE enyene mme ikọ ndọn̄esịt ọnọ kpukpru mbon oro ẹyomde nsụkesịt. Eyịghe idụhe, ndien, The World Book Encyclopedia ọdọhọde ete ke “ata ediwak owo ẹmewọn̄ọde ẹbịne Bible ndibọ ndọn̄esịt, idotenyịn, ye ndausụn̄ ke mme ini mfịna ye eyịghe.” Ntak-a?

Koro ima ima Andibot nnyịn, “Abasi kpukpru ndọn̄esịt,” enye emi “ọdọn̄de nnyịn esịt ke kpukpru ukụt nnyịn,” ọkọnọ odudu spirit ẹda ẹwet Bible. (2 Corinth 1:3, 4) Enye edi “Abasi . . . ndọn̄esịt.” (Rome 15:5) Jehovah emenịm uwụtn̄kpọ ke ndisio usụn̄ un̄wam nnọ kpukpru nnyịn. Enye ama ọdọn̄ ikpọn̄îkpọn̄ edibon Eyen esie, Christ Jesus, edi isọn̄ man edinọ nnyịn idotenyịn ye ndọn̄esịt. Jesus ekekpep ete: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Bible etịn̄ aban̄a Jehovah nte enye emi “obiomde mbiomo nnyịn ke usen ke usen, ata Abasi edinyan̄a nnyịn.” (Psalm 68:19, NW) Mbon oro ẹbakde Abasi ẹkeme nditịn̄ ye uko ẹte: “Mmenịm Jehovah ke iso mi kpukpru ini: koro enye odude mi ke ubọk nnasia, ndisehekede.”—Psalm 16:8.

Mme utọ udịmikọ Bible oro ẹwụt ntotụn̄ọ ima emi Jehovah Abasi enyenede ọnọ nnyịn mme owo. Ana in̄wan̄în̄wan̄ nte ke enye enyene udọn̄ ofụri esịt—ọkọrọ ye ukeme—ndinọ akpakịp ndọn̄esịt ndinyụn̄ nsụhọde ubiak nnyịn ke mme ini mfụhọ. “Enye ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem.” (Isaiah 40:29) Didie, ndien, ke nnyịn ikeme ndibọ ndọn̄esịt nto odudu Jehovah?

Ndọn̄esịt Otode Jehovah Ndiwụt Edikere Mban̄a

Andiwet psalm ekewet ete: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.” (Psalm 55:22) Ih, Jehovah Abasi enyene udọn̄ ke ekpụk ubonowo. Apostle Peter ama afiak ọsọn̄ọ ọnọ mme Christian akpa isua ikie ete: “Enye [Abasi] ke ekere mbufo.” (1 Peter 5:7) Jesus Christ ama ọsọn̄ọ etịn̄ nte Abasi adade mme owo ke akpan n̄kpọ, ọdọhọde ete: “Nte inyamke n̄kpri inuen ition ke obubịt okụk iba? Ndien Abasi ifreke ndomo mmọ kiet. Edi ẹmebat kpa idet kpukpru ke ibuot mbufo. Ẹkûfehe ndien: mbufo ẹmesọn̄ urua ẹkan ediwak n̄kpri inuen.” (Luke 12:6, 7) Nnyịn imenen̄ede isọn̄ urua ntre ke enyịn Abasi tutu enye etịm ọfiọk ọkpọkọm ata ekpri ntọt aban̄ade nnyịn ọyọhọ ọyọhọ. Enye ọfiọk mme n̄kpọ oro nnyịn ke idem nnyịn mîfiọkke koro enye enen̄erede enyene udọn̄ ke idem nnyịn kiet kiet.

Ndifiọk ọkpọkpọ udọn̄ emi Jehovah enyenede mi ama enen̄ede ọdọn̄ Svetlana esịt, ekpri akpara oro ẹkesiakde ke ibuotikọ oro ekebemde iso. Akayak esisịt enye ndiwot idem mbemiso okosobode ye Mme Ntiense Jehovah. Do enye ama enyịme ukpepn̄kpọ Bible, emi akan̄wamde enye ndimehe ye Jehovah nte ata owo emi enyenede udọn̄ ke mfọnọn̄kpọ esie. Emi ama otụk esịt esie, onụkde enye ndikpụhọde usụn̄ uwem esie ndinyụn̄ nyak idem esie nnọ Abasi. Emi n̄ko ama ọnọ Svetlana udomo uku oro enye okoyomde man ọyọ kpa ye mme mfịna esie onyụn̄ enyene ata idotenyịn ke uwem. Enye ọdọhọ idahaemi ete: “Mmetịm nnịm ke akpanikọ nte ke Jehovah idikpọn̄ke mi tutu amama. Mmokụt nte ke se ẹwetde ke 1 Peter 5:7 edi akpanikọ. Enye ọdọhọ ete: ‘Ẹtop kpukpru ọkpọsọn̄ ekikere eke ẹtịmerede mbufo esịt ẹduọk ẹdori [Jehovah], koro enye ke ekere mbufo.’”

Idotenyịn Ọkọn̄ọde ke Bible Ọnọ Ndọn̄esịt

Akpan usụn̄ emi Abasi adade ọnọ ndọn̄esịt edi Ikọ esie oro ẹwetde-wet, emi esịnede utịbe utịbe idotenyịn ọnọ ini iso. Apostle Paul ekewet ete: “Koro se ededi eke ẹkewetde ke ini oko, ke ẹkewet ndida n̄kpep nnyịn n̄kpọ, man nnyịn inyene idot-enyịn oto ke ime ye ndọn̄-esịt eke n̄wed Abasi ọnọde.” (Rome 15:4) Paul ama anam ebuana oro idotenyịn ye ndọn̄esịt ẹnyenede an̄wan̄a ke ini enye ekewetde ete: “Abasi Ete nnyịn, emi akamade nnyịn, onyụn̄ ọnọde nnyịn nsinsi ndọn̄esịt ye eti idotenyịn ke mfọn, akpakam ọdọn̄ mbufo esịt, onyụn̄ anam mbufo ẹsọn̄ọ ẹda ke kpukpru nti utom ye ikọ.” (2 Thessalonica 2:16, 17) “Eti idotenyịn” emi esịne idotenyịn mfọnmma, inem inem,  ye anana-utịt uwem ke paradise isọn̄.—2 Peter 3:13.

Utọ nyayama idotenyịn akpanikọ oro ama esịn udọn̄ ọnọ Laimonis, akpauben̄ owo mmịn emi ẹkesiakde ke ibuotikọ oro ekebemde iso. Ke okotde n̄wed Mme Ntiense Jehovah oro ọkọn̄ọde ke Bible, enye ama okop inemesịt ndikpep mban̄a obufa ererimbot ke Obio Ubọn̄ Abasi, oro ẹdinamde idem afiak ọsọn̄ enye. Enye ama okot nyayama un̄wọn̄ọ etienede mi ke Bible aban̄ade utịbe utịbe ukọkudọn̄ọ ete: “Ndien enyịn ẹyen̄wan̄a mme nnan, utọn̄ ẹyenyụn̄ ẹsịrede mbon inan. Ndien mbụn̄ọ eyenek nte edop, edeme imụm oyonyụn̄ ọkwọ.” (Isaiah 35:5, 6) Man odot ndidu uwem ke Paradise oro, Laimonis ama anam ikpọ ukpụhọde. Enye ama etre ndin̄wọn̄ ọkpọsọn̄ mmịn, ndien mme mbọhọidụn̄ ye mme ọdiọn̄ọ esie ẹmekụt ukpụhọde oro enye anamde. Idahaemi enye ke enịm ediwak ukpepn̄kpọ Bible, abuanade ndọn̄esịt otode idotenyịn ọkọn̄ọde ke Bible ye mbon efen.

Udeme Oro Akam Enyenede

Ke ini ifụhọde ke ndusụk ntak, nnyịn imekeme ndikop ndọn̄esịt ebe ke ndibọn̄ akam nnọ Jehovah. Oro ekeme ndinam efịghede nnyịn ke idem. Ke ini nnyịn inamde n̄kpeubọk, nnyịn imekeme ndibọ ndọn̄esịt ebe ke nditi mme n̄kpọ oro ẹtịn̄de ke Ikọ Abasi. Psalm oro ọniọn̄de akan ke Bible etie nte inem inem akam. Anditịm enye ọkọkwọ ete: “Mmeti mme ikpe fo eke eset, O Jehovah; nnyụn̄ n̄kop ndọn̄esịt.” (Psalm 119:52) Ke ata n̄kpọsọn̄ idaha, akpan akpan mbon oro ẹbuanade udọn̄ọ, owo isiwakke ndinyene san̄asan̄a ibọrọ oro ekemde ye kpukpru idaha. Ekeme ndidi nnyịn idifiọkke nnennen itie ndiwọn̄ọde n̄ka ke odudu nnyịn. Ediwak owo ẹmekụt ẹte ke ẹma ẹkenam kpukpru se owo ekemede ndinam, ndiwọn̄ọde mbịne Abasi ke akam ẹsisụn̄ọ ke akwa ndọn̄esịt ndien, ndusụk ini, esisụn̄ọ ke usọbọ oro owo mîkọfiọkke ke mbemiso.—1 Corinth 10:13.

Pat, oro ẹkemende ẹfehe ẹka ubet mbabuat n̄kpọntịbe ufọkibọk, ama okop ọnọ-ndọn̄esịt odudu otode akam mi. Ke enye ama ekeset, enye ama ọdọhọ ete: “Mma mbọn̄ akam nnọ Jehovah nnyụn̄ nnen̄ede n̄kụt nte ke n̄kenyene ndiyak uwem mi nsịn enye ke ubọk, mberide edem enye ndinam se ededi oro ekedide uduak esie. Ke ofụri ini emi, mma nnyene ifụre; mma nnyene emem Abasi, oro ẹtịn̄de ẹban̄a ke Philippi 4:6, 7.” Nso ndọn̄esịt ke mme ufan̄ikọ ẹmi ẹkeme ndinọ kpukpru nnyịn ntem! Do Paul eteme nnyịn ete: “Ẹkûtịmede esịt ke baba n̄kpọ kiet, edi ke kpukpru n̄kpọ, ẹsan̄a ye akam ye n̄kpeubọk ye ekọm, ẹsian Abasi se mbufo ẹyomde. Ndien emem Abasi, emi ayan̄ade ifiọk owo, eyekpeme mbufo esịt ye ekikere ke Christ Jesus.”

Edisana Spirit nte Ọnọ-Ndọn̄esịt

Ke okoneyo oro mbemiso n̄kpa esie, Jesus ama anam an̄wan̄a mme apostle esie ete ke idibịghike imọ iyọkpọn̄ mmọ. Emi ama afịna onyụn̄ anam mmọ ẹfụhọ. (John 13:33, 36; 14:27-31) Ke ọfiọkde udọn̄ mmọ ndika iso n̄kop ndọn̄esịt, Jesus ama ọn̄wọn̄ọ ete: “Nyonyụn̄ mben̄e Ete, ndien Enye ọyọnọ mbufo Ibetedem [m̀mê, ọnọ-ndọn̄esịt] efen, man Enye edidu ye mbufo ke nsinsi.” (John 14:16; ikọ idakisọn̄, NW) Mi Jesus eketịn̄ aban̄a edisana spirit Abasi. Ke adianade ye mme n̄kpọ eken, edisana spirit Abasi ama ọdọn̄ mme apostle esịt ke ini idomo onyụn̄ ọsọn̄ọ mmọ idem ndika iso nnam uduak Abasi.—Utom 4:31.

Angie, emi ebe esie ekekperede ndikpa ke ama ekenyene idiọk mbabuat n̄kpọntịbe, ama okụt unen ndiyọ akpaimọ mfụhọ ye ubiak oro enye okosobode. Nso ikan̄wam enye? Enye ọdọhọ ete: “Ke ẹsiode un̄wam edisana spirit Jehovah ẹfep, nnyịn ikpekekemeke ndiyọ se nnyịn ikọyọde nnyụn̄ n̄ka iso nsọn̄ idem. Ke akpanikọ, nnyịn imokụt odudu Jehovah ke mmeme nnyịn, ndien enye edi ebiet ubọhọ ke ini mfụhọ nnyịn.”

Itie Nditọete Oro Ọnọde Ndọn̄esịt

Se ededi idaha oro owo odude ke uwem, inamke n̄kpọ m̀mê nso mfụhọ mfụhọ idaha ẹkeme ndidemede, akpana enye ekeme ndibọ ndọn̄esịt nto itie nditọete oro odude ke esop Jehovah. Itie nditọete emi ọnọ mbon oro ẹbuanade ke esịt ibetedem ye un̄wam eke spirit. Do, owo ekeme ndikụt ima ima otu mme  ufan oro ẹwụtde edikere mban̄a, ẹnyụn̄ ẹnọde ndọn̄esịt, oro ẹben̄ede idem ẹnyụn̄ ẹnyenede udọn̄ ndin̄wam nnyụn̄ ndọn̄ mbon efen esịt ke mme ini mfụhọ.—2 Corinth 7:5-7.

Ẹkpep mme andibuana ke esop Christian ‘ndifọn ido ye kpukpru owo, akpan akpan ye mmọ ẹmi ẹtode ke ufọk mme andinịm ke akpanikọ.’ (Galatia 6:10) Ukpep oro ọkọn̄ọde ke Bible oro mmọ ẹbọde onụk mmọ ndiwụt ima nditọete ye mbọm. (Rome 12:10; 1 Peter 3:8) Onụk nditọete iren ye iban ke esop ndifọn ido, ndinọ ndọn̄esịt, ndinyụn̄ nnyene esịt mbọm.—Ephesus 4:3.

Joe ye Rebecca, oro ke ndiọkiso ẹketabade eyeneren mmọ ke n̄kpa, ẹma ẹbọ utọ ọnọ-ndọn̄esịt un̄wam oro ẹto mme andibuana ke esop Christian. Mmọ ẹdọhọ ẹte: “Jehovah ye ima ima esop esie ẹmen̄wam nnyịn ke mme ini afanikọn̄ nnyịn. Ima ibọ ediwak kad, leta, ye ikot urụk ukopikọ. Emi ama anam nnyịn ifiọk nte itie nditọete nnyịn ọsọn̄de urua. Ke adan̄aemi ikodude ke mbrenyịn nnama oro, ediwak esop n̄kann̄kụk ẹma ẹdin̄wam nnyịn, ẹnọde udia ẹnyụn̄ ẹnamde ufọk asana.”

Bọ Ndọn̄esịt!

Ke ini idiọk ofụm afanikọn̄ ọtọn̄ọde ndifịme, ndien ọkpọsọn̄ edịm ye edịm itiat nnanenyịn ẹkade iso ndidep, Abasi eben̄e idem ndinọ ukpeme oro ọnọde ndọn̄esịt. Emi edi nte kiet ke otu n̄wed psalm etịn̄de aban̄a enye nte itie udakibuot oro ọnọde ndọn̄esịt: “Enye ayada ntan̄ esie ofụk fi, afo oyonyụn̄ efehe odụk ke idak mba esie.” (Psalm 91:4) Uwụtn̄kpọ emi ekeme ndidi eke ntrukpom. Enye edi uwụtn̄kpọ inuen oro okụtde n̄kpọndịk ndien ekem atat mba esie ofụk nditọ esie man ekpeme mmọ. Ke usụn̄ ifiọk oro akam okponde akan, Jehovah amakabade edi ata Andikpeme kpukpru mbon oro ẹdade enye nte ebiet ubọhọ.—Psalm 7:1.

Edieke edimade ndikpep n̄kpọ efen efen mban̄a Abasi, edu esie, mme uduak esie, ye ukeme esie ndinọ ndọn̄esịt, ẹsịn udọn̄ ẹnọ fi ndikpep Ikọ esie. Mme Ntiense Jehovah ẹyedara ndin̄wam fi ke afan̄ emi. Ih, afo n̄ko emekeme ndibọ ndọn̄esịt nto odudu Jehovah!

[Mme ndise ke page 7]

Idotenyịn ọkọn̄ọde ke Bible aban̄ade ini iso ekeme ndinọ ndọn̄esịt