Mme Mbụme Ẹtode Mme Andikot

Gospel ita ẹbụk nte ẹkekụnide ẹban̄a nditọhọ Jesus ata ọsọn̄urua aran. Ndi ediwak apostle ẹkekụni, m̀mê Judas ekedi akpan owo?

Nnyịn imokot iban̄a n̄kpọntịbe emi ke Gospel emi Matthew, Mark, ye John ẹwetde. Etie nte Judas akada iso ke ndikụni, ndien ekem ke nsụhọde n̄kaha ndusụk apostle eken ẹnyịmede ye enye. N̄kpọntịbe emi anam an̄wan̄a ntak emi nnyịn ikemede ndikop inemesịt ke ndinyene mbụk Gospel inan̄. Se andiwet kiet kiet ekewetde ekedi nnennen, edi idịghe kpukpru ẹnọ ukem ọyọhọ ntọt. Ebede ke ndimen mbiet mbụk ndomo, nnyịn imenyene ọyọhọ ntọt efen efen kaban̄a ediwak n̄kpọntịbe.

Mbụk oro ke Matthew 26:6-13 asiak ebiet n̄kpọntịbe oro—ufọk Simon ọdọn̄ọ-akpamfia, ke Bethany—edi isiakke enyịn̄ n̄wan oro ọkọtọn̄ọde nditọhọ Jesus edifuọn̄ aran ke ibuot. Matthew ọdọhọ ete: ‘Ke ini mme mbet ẹkụtde, mmọ ẹyat esịt’ ẹnyụn̄ ẹkụni ẹte ke ẹkpekeme ndinyam aran emi mbọ okụk nda nnọ mme ubuene.

Mbụk Mark ọdọn̄ọ ata ediwak ọyọhọ ntọt. Edi enye adian do ete ke n̄wan oro okobobom otu oro. Enye ekesịne edifuọn̄ aran oro ekedide “spikenard,” utọ oro ẹkemede nditobo nto India. Kaban̄a n̄kụni oro, Mark ọtọt ete ke ‘ndusụk owo ẹdu do ẹmi ẹyatde esịt, mmọ ẹnyụn̄ ẹsụk n̄wan oro uyo.’ (Mark 14:3-9) Ntre mbụk iba oro ẹwụt ẹte ke se iwakde ibe apostle kiet ẹma ẹbuana ke n̄kụni oro. Nte ededi didie ke enye ọkọtọn̄ọ?

John, emi okokụtde ke enyịn, ama adian mme akpan ọyọhọ ntọt. Enye asiak enyịn̄ n̄wan oro—Mary, eyeneka Martha ye Lazarus. John ama ọnọ n̄ko ọyọhọ ntọt, emi nnyịn ikemede ndida nte edisịn nyọhọ utu ke ndida nte ntuaha: “Mary . . . eyet Jesus ukot, onyụn̄ ada idet esie ọkwọhọde Enye ukot.” (Sịghisịghi ubọkn̄wed edi eke nnyịn.) Ke nditan̄ mme mbụk ẹmi ndian kiet, nnyịn imekeme ndikụt nte ke anaedi Mary ọkọtọhọ Jesus aran oro ke ibuot ye ukot, emi John ọkọsọn̄ọde nte ekedide “spikenard.” John ama enen̄ede ekpere Jesus ndien ama enyene ntụhọ ndiyat esịt edieke ẹsuenede Jesus. Nnyịn ikot ite: “Judas Iscariot, owo mbet Esie, emi edidade Enye ọnọ, ọdọhọ ete, Nsinam mîkanyamke edifuọn̄ aran emi ibọ okụk ikie ita, ida inọ mme ubuene?”—John 12:2-8.

Edi akpanikọ, Judas ekedi “owo mbet Esie,” edi afo emekeme ndikụt iyatesịt John nte ke owo emi okodude ke idaha esie ke akaduak nditap Jesus nnọ. Akabade n̄wed oro Dr. C. Howard Matheny etịn̄ aban̄a John 12:4 ete: “Ikọ oro owụtde edinam idahaemi ‘oyomde’ ye ikọ oro owụtde edinam owo kiet eke idahaemi ‘edidade ọnọ’ ẹwụt n̄kọri m̀mê edinam oro akade-ka iso. Emi owụt nte ke Judas nditap Jesus nnọ ikedịghe edinam eke ibio ini oro ẹkenamde ke mbuari koro ẹketiede ẹkere ẹnyụn̄ ẹdiomide ke ediwak usen.” John ama adian n̄kpọ ndinam an̄wan̄a nte ke Judas ikokụnike “koro enye ekerede mme ubuene; edi ọdọhọ koro enye edide inọ, onyụn̄ akamade ekpat okụk, onyụn̄ ososio se isịnede ke esịt.”

Ke ntem etie nte owụt ifiọk ndikere nte ke Judas inọ ọkọtọn̄ọ n̄kụni koro enye ekpenyenede ekese ndiyịp edieke ẹkpenyamde ọsọn̄urua aran oro ẹnyụn̄ ẹsịnde okụk oro ke ekebe okụk oro enye akakamade. Ke ndondo oro Judas ọkọtọn̄ọde n̄kụni emi, eyedi mme apostle eken ẹma ẹkụni ndiwụt edinyịme ke se iketiede nte akpanikọ. Nte ededi, Judas ekedi akpan esịn-nsọk ke n̄kụni oro.