Mme Mbụme Ẹtode Mme Andikot

Isaiah ibuot 53 esịne ọwọrọetop ntịn̄nnịm ikọ kiet aban̄ade Messiah. Isa 53 Ufan̄ikọ 10 ọdọhọ ete: “Jehovah ama enye ndinuak; esịn enye ọdọn̄ọ.” Nso ke emi ọwọrọ?

Edi mmemmem n̄kpọ ndikụt ntak emi mbụme ekemede ndidemede mban̄a Isaiah 53:10. Mme ata Christian ikereke ke okop-mbọm ye ima ima Abasi nnyịn okpokop inemesịt ndinuak m̀mê ndinam owo ekededi ọdọn̄ọ. Bible ọnọ nnyịn ntak ndinyene mbuọtidem nte ke Abasi isikopke inemesịt ke nditụhọde mbon oro mîduehe. (Deuteronomy 32:4; Jeremiah 7:30, 31) Ke ofụri isua ikie emi, ekeme ndidi Jehovah ke ndusụk idaha ayak ndutụhọ odu ke mme ntak oro ẹkemde ye ọniọn̄ ye ima esie. Edi ke akpanikọ idịghe enye ekedi ntak ndutụhọ edima Eyen esie, Jesus. Ntre, nso ke ubak udịmikọ emi enen̄ede ọwọrọ?

Ọfọn, ẹkeme ndin̄wam nnyịn ifiọk se enye ọwọrọde edieke nnyịn ikerede iban̄a ofụri ufan̄ikọ oro, itịmde ifiọk itie iba oro ikọ oro ‘ama’ odude. Isaiah 53:10 ọkọt ete: “Jehovah ama enye ndinuak; esịn enye ọdọn̄ọ: ukpọn̄ esie ama osio isop idiọk-n̄kpọ, enye oyokụt ubọn̄ esiemmọ, mme usen esie ẹyebịghi, ndien se Jehovah amade ayasiaha enye ke ubọk.”

Ofụri etop Bible owụt nte ke “se Jehovah amade,” oro ẹsiakde ke utịt utịt ufan̄ikọ oro, aban̄a enye ndinam uduak esie ebe ke Obio Ubọn̄. Jehovah ndinam emi oyowụt unen itie edikara esie onyụn̄ anam ẹkeme ndisio okop-item ubonowo ke ndammana idiọkn̄kpọ—kpa mme idiọkn̄kpọ nnyịn. (1 Chronicles 29:11; Psalm 83:18; Utom 4:24; Mme Hebrew 2:14, 15; 1 John 3:8) Se inamde kpukpru emi ẹdi mmemmem edi nte ke Eyen Abasi ekenyene ndikabade ndi owo nnyụn̄ nnọ uwa ufak. Nte nnyịn ifiọkde, Jesus ama okụt ndutụhọ ke ini akanamde oro. Bible asian nnyịn ete ke enye ama “ekpep nsụkibuot ọfiọk oto ke ndutụhọ eke Enye okụtde.” Ntre Jesus ama ọbọ ufọn oto ndutụhọ oro.—Mme Hebrew 5:7-9.

Jesus ama ebem iso ọfiọk nte ke imọ iyokụt ndusụk ndutụhọ ke akpan edinam emi imọ idinamde mi. Ẹkụt emi in̄wan̄în̄wan̄ ke mme ikọ esie oro ẹwetde ke John 12:23, 24, emi nnyịn ikotde ite: “Ekem ini emi Eyen Owo edinyenede ubọn̄. Ke akpanikọ ke ndọhọ mbufo, Adan̄a nte n̄kpasịp ibokpot mîduọhọ isịne ke esịt isọn̄ ikpa, enye osụk odu ke idem esie ikpọn̄; edi enye ama akpa, on̄wụm ekese mfri.” Ih, Jesus ama ọfiọk ete ke imọ inyene ndimụm nsọn̄ọnda n̄kama idem tutu esịm n̄kpa. Mbụk oro aka iso ete: “Ukpọn̄ etịmede Mi ke idem ke emi, ndien ndidọhọ nso? Ete, nyan̄a Mi sio ke ubọk ini emi? Edi mma nsịm ini emi ke ntak emi, man n̄kpọdọhọ nte, Ete, nọ enyịn̄ Fo ubọn̄. Ntre ke uyo oto ke enyọn̄ ete, Mma n̄kọnọ enyịn̄ Mi ubọn̄, nyonyụn̄ ntọn̄ọ ntak nnọ enye ubọn̄.”—John 12:27, 28; Matthew 26:38, 39.

Edi ke usụn̄ emi ke nnyịn ikeme ndifiọk se Isaiah 53:10 ọwọrọde. Jehovah ama enen̄ede ọfiọk ete ke ẹyenuak Eyen imọ ke ndusụk usụn̄. Edi ke enyenede ubọn̄ ye nsinsi ufọn oro edisụn̄ọde ke ekikere, Jehovah ama ama se Jesus ekenyenede ndisobo. Ke usụn̄ oro Jehovah ama “ama enye ndinuak,” m̀mê ama nte ẹkenuakde, Messiah. Ndien Jesus n̄ko ama ama se enye ekekemede ndinam okonyụn̄ anamde. Ke akpanikọ, nte Isaiah 53:10 eberide, ‘se Jehovah amade ama asiaha enye ke ubọk.’