Nte Otu Ukara Okpụhọrede ye N̄ka Oro Ibet Enyịmede

ẸNỊM mbono ofụri isua eke Watch Tower Bible and Tract Society of Pennsylvania toto ke January 1885. Ke ini editan̄ mme Christian oro ẹyetde aran mbok okosụk akade iso ke utịt utịt ọyọhọ isua ikie 19, mme eseutom ye mme akamautom n̄ka emi ẹkenyene idotenyịn eke heaven. Ke akpanikọ, ekpere ndidi ekesidi ntem kpukpru ini.

Edi ukpụhọde kiet ama odu. Ke 1940, ẹma ẹmek Hayden C. Covington—oro ekedide ekpeibet N̄ka ini oro ye kiet ke otu “mme erọn̄ en̄wen,” oro enyenede idotenyịn uwem eke isọn̄—nte eseutom N̄ka. (John 10:16) Enye ama anam utom nte udiana etieibuot N̄ka ọtọn̄ọde ke 1942 tutu esịm 1945. Ke ini oro, Brọda Covington ama ọkpọn̄ utom oro enye akanamde nte eseutom man anam n̄kpọ ekekem ye se iketiede nte edi uduak Jehovah ini oro—nte kpukpru mme eseutom ye mme akamautom n̄ka Pennsylvania ẹdi mme Christian oro ẹyetde aran. Lyman A. Swingle ama ada itie Hayden C. Covington ke otu mme eseutom, ndien ẹma ẹmek Frederick W. Franz nte udiana etieibuot.

Ntak emi mme asan̄autom Jehovah ẹkenịmde nte ke kpukpru mme eseutom ye mme akamautom Watch Tower Bible and Tract Society of Pennsylvania ẹkpenyene ndidi mme Christian oro ẹyetde aran? Koro ke ini oro, ẹkeda nte ke otu mme eseutom ye mme akamautom n̄ka Pennsylvania ẹdi ukem ye Otu Ukara eke Mme Ntiense Jehovah, emi sụk irenowo oro ẹyetde aran ke spirit ẹnamde kpukpru ini.

Enịm-Mbụk Mbono Ofụri Isua

Ke mbono ofụri isua oro ẹkenịmde ke October 2, 1944, ke Pittsburgh, mme andibuana ke n̄ka Pennsylvania ẹma ẹnyịme ubiere itiokiet ndinam edinen̄ede ke n̄wed ediomi esie. N̄wed ediomi oro ama enyịme ẹmek mbon oro ẹtịpde okụk ẹnọ utom N̄ka nte ekemde ye ibatokụk oro mmọ ẹtịpde, edi ọyọhọ edinen̄ede ita oro ẹkenamde ama abiat ndutịm oro efep. Ntọt aban̄ade mbono ofụri isua oro ọkọdọhọ ete: “Mme andibuana ke N̄ka oro idiwakke ibe owo 500 . . . Ana owo kiet kiet emi ẹmekde edi asan̄autom uyọhọ ini N̄ka m̀mê asan̄autom ibio ini ke esop Mme Ntiense Jehovah onyụn̄ enyene ndiwụt edu Ọbọn̄.”

Ke oro ebede, mbon oro ẹkeyakde idem ofụri ofụri ẹnọ Jehovah ẹkenyene ndimek mme eseutom N̄ka nsịn ke itieutom, inamke n̄kpọ m̀mê okụk ifan̄ ke mmọ ẹketịp ndida nnam utom Obio Ubọn̄ aka iso. Emi ama odu ke n̄kemuyo ye n̄kaiso edinen̄ede oro ẹkebemde iso ẹtịn̄ ke Isaiah 60:17, emi nnyịn ikotde ite: “Nyada gold ndinịm ke itie okpoho, nyada silver ndinịm ke itie ukwak, ye okpoho ke itie eto, ye ukwak ke itie itiat: ndien nyanam mbọn̄ fo ẹdi emem, nyonyụn̄ nnam mme andikara fi ẹdi edinen ido.” Ke nditịn̄ mban̄a “mbọn̄” ye “andikara,” ntịn̄nnịm ikọ emi akanyan ubọk owụt mme edinen̄ede ke usụn̄ unam n̄kpọ ke esop ke otu ikọt Jehovah.

Ẹkenam akpan usio-ukot edinam esop asan̄a ke ndutịm ukara Abasi emi ke utịt “tọsịn mbubịteyo ye usenubọk iba ye ikie ita,” oro ẹtịn̄de ẹban̄a ke Daniel 8:14. Ke ini oro, ẹma ‘ẹnam edisana ebiet asana.’

Nte ededi, ke enịm-mbụk mbono ofụri ererimbot ke 1944 ama ekebe, akpan mbụme kiet ama osụhọ. Sia ẹkedade ini oro nte ke Otu Ukara edi ukem ye n̄ka Pennsylvania emi owo itiaba ẹnamde otu mme eseutom, nte emi ọkọwọrọ nte ke tutu amama Otu Ukara ikemeke ndiwak mbe Christian itiaba oro ẹyetde aran? Akan oro, sia edide mme andibuana ke n̄ka oro ẹsimek mme eseutom, nte mme andibuana ke n̄ka oro ẹkesimek mbon Otu Ukara ke mbono ofụri isua kpukpru isua? Nte mme eseutom  ye mme akamautom Watch Tower Bible and Tract Society of Pennsylvania ye mbon Otu Ukara ẹdi ukem, mîdịghe nte mmọ ẹnyene ukpụhọde?

Mbono Ofụri Isua Efen Oro Owo Mîkemeke Ndifre

Ẹma ẹbọrọ mme mbụme emi ke mbono ofụri isua oro ẹkenịmde ke October 1, 1971. Ke mbono oro, kiet ke otu mme etịn̄ikọ ama osio owụt nte ke otu ukara eke “asan̄autom emi anamde akpanikọ, onyụn̄ enyenede ọniọn̄” ama ododu ediwak isua ikie mbemiso Watch Tower Bible and Tract Society of Pennsylvania. (Matthew 24:45-47) Ẹketọn̄ọ otu ukara ke Pentecost 33 E.N., se iwakde ibe isua ikie 18 mbemiso n̄ka Pennsylvania ekedide edidu. Ke akpa, otu ukara ikesịneke owo 7, edi ekesịne apostle 12. Nte an̄wan̄ade, ẹma ẹtat ibat oro ke ukperedem, koro edi ‘mme apostle ye mbiowo ke Jerusalem’ ẹkedi mme adausụn̄.—Utom 15:2.

Ke 1971 kpasụk etịn̄ikọ oro ama anam an̄wan̄a nte mme andibuana ke Watch Tower Society ikemeke ndimek mbon Otu Ukara oro ẹyetde aran. Ntak-a? Enye ọkọdọhọ ete: “Koro idịghe owo ndomokiet emek otu ukara eke otu ‘asan̄autom.’ Jesus Christ, kpa Ibuot esop Christian akpanikọ ye Ọbọn̄ ye Eteufọk otu ‘asan̄autom emi anamde akpanikọ, onyụn̄ enyenede ọniọn̄,’ emek.” Do, nte an̄wan̄ade, mme andibuana ke n̄ka ekededi oro ibet enyịmede ikemeke ndimek mbon Otu Ukara nsịn ke itieutom.

Ke akade iso, etịn̄ikọ oro ama anam ọkpọikọ emi ọwọrọ ada: “Otu ukara inyeneke mme akamautom nte Otu Mme Eseutom N̄ka enyenede, oro edi, etieibuot, udiana etieibuot, ewetn̄wed ye akama-okụk ye udiana ewetn̄wed ye akama-okụk. Enye n̄kukụre enyene etieibuot okpokoro.” Ke ediwak isua, etieibuot n̄ka Pennsylvania ekedi n̄ko etieibuot Otu Ukara. Emi ididịghe aba ntem. Ke adan̄aemi mînyeneke ukem ifiọk m̀mê ukeme, mbon Otu Ukara ẹdinyene ukem ukem utom. Etịn̄ikọ oro ama adian do ete: “Andibuana ekededi ke otu ukara ekeme ndidi etieibuot okpokoro do ye unana edidi etieibuot . . . N̄ka ke ukem ini oro . . . Kpukpru emi ọkọn̄ọ ke nte itie etieibuot okpokoro asan̄ade akanade ke otu ukara.”

Ke mbono ofụri isua eke 1971 oro owo mîkemeke ndifre do, ẹma ẹwụt in̄wan̄ in̄wan̄ ukpụhọde oro odude ke ufọt mbon Otu Ukara oro ẹyetde aran ke spirit ye mme eseutom n̄ka Pennsylvania. Kpa ye oro, mbon Otu Ukara ẹma ẹka iso ndinam utom nte mme eseutom ye mme akamautom N̄ka. Nte ededi, mfịn mbụme emi edemede: Ndi ntak N̄wed Abasi ekededi odu nte ke ana mme eseutom Watch Tower Bible and Tract Society of Pennsylvania ẹdi mbon Otu Ukara?

Ibọrọ edi baba. N̄ka Pennsylvania idịghe n̄kukụre n̄ka oro ibet enyịmede oro Mme Ntiense Jehovah ẹdade ẹnam n̄kpọ. Mme n̄ka efen ẹdu. Kiet edi Watchtower Bible and Tract Society of New York, Incorporated. Enye anam utom nnyịn edi mmemmem ke United States. Nte an̄wan̄ade, edidiọn̄ Jehovah omodu ye n̄ka oro, okposụkedi edide “mme erọn̄ en̄wen” ẹwak ẹkan ke otu mme eseutom ye mme akamautom esie. Ẹda International Bible Students Association ẹnam n̄kpọ ke Britain. Ẹda mme n̄ka efen oro ibet enyịmede ẹnam n̄kpọ man ẹnam mme ufọn n̄kpọ Obio Ubọn̄ ẹkọri ke mme idụt eken. Kpukpru mmọ ẹdiana kiet ẹnọ un̄wam ẹnyụn̄ ẹnyene udeme ke ndinam ẹkwọrọ eti mbụk ke ofụri isọn̄. Inamke n̄kpọ m̀mê mmọ ẹdu ke m̀mọ̀n̄ ndien m̀mê mmanie ẹnam n̄kpọ nte mme eseutom m̀mê mme akama-utom, Otu Ukara ọnọ mme n̄ka emi ndausụn̄ onyụn̄ ada mmọ anam n̄kpọ ke ido ukara Abasi. Ntem, mme utọ n̄ka oro ẹnyene udeme ke ndinam mme ufọn n̄kpọ Obio Ubọn̄ ẹka iso.

Ọfọn nnyịn inyene mme n̄ka oro ibet enyịmede. Ke ndinam emi, nnyịn inịm mme ibet n̄kann̄kụk ye eke idụt, nte Ikọ Abasi oyomde. (Jeremiah 32:11; Rome 13:1) Mme n̄ka oro ibet enyịmede ẹnam utom edisuan etop Obio Ubọn̄ nnyịn edi mmemmem ebe ke ndimịn̄ mme Bible, mme n̄wed, mme magazine, ndiye uduot n̄kpri n̄wed, ye mme n̄wed eken. Mme utọ n̄ka oro n̄ko ẹnam n̄kpọ nte n̄kpọutom oro  ekemde ye ibet ke ndise mban̄a mme n̄kpọ oro ẹnyenede ẹbuana ye inyene, mme n̄kpọ un̄wam, ediomi ẹnamde ndida mme ufọk mbono nnam n̄kpọ, ye ntre ntre eken. Nnyịn imowụt esịtekọm iban̄a mme utom oro mme utọ n̄ka oro ibet enyịmede mi ẹnamde.

Ẹnam Ẹdiọn̄ọ Enyịn̄ Jehovah

Ke 1944, ẹma ẹnam edinen̄ede ke Ikpehe II eke n̄wed ediomi Watch Tower Bible and Tract Society of Pennsylvania man ẹsọn̄ọ mme uduak n̄ka emi. Nte n̄wed ediomi oro owụtde, mme uduak N̄ka esịne akpan uduak emi: “Ndikwọrọ gospel obio ubọn̄ Abasi ke ubọk Christ Jesus nnọ kpukpru mme idụt nte ntiense nnọ enyịn̄, ikọ, ye akakan idaha Ata Ọkpọsọn̄ Abasi JEHOVAH.”

Toto ke 1926 “asan̄autom emi anamde akpanikọ” amanam ẹdiọn̄ọ enyịn̄ Jehovah. N̄wọrọnda ekenen̄ede edi ke 1931 ke ini Nditọ Ukpepn̄kpọ Bible ẹkenyịmede enyịn̄ oro Mme Ntiense Jehovah. (Isaiah 43:10-12) Mme n̄wed N̄ka oro ẹnamde ẹdiọn̄ọ enyịn̄ Abasi esịne n̄wed oro Jehovah (1934), “Let Your Name Be Sanctified” (1961), ye “The Nations Shall Know That I Am Jehovah”—How? (1971).

Ẹnyene nditịn̄ san̄asan̄a mban̄a New World Translation of the Holy Scriptures, emi ẹkemịn̄de ofụri ofụri ke Ikọmbakara ke 1960. Enyịn̄ Jehovah esịne ke kpukpru itie oro Tetragrammaton odude ke N̄wed Abasi Usem Hebrew. Edikabade emi n̄ko esịn enyịn̄ Abasi ke itie 237 ke N̄wed Abasi Christian Usem Greek ke mme ebiet emi ndụn̄ọde ntịn̄enyịn owụtde nte ke emi odot. Nnyịn iwụt esịtekọm didie ntem nte, ke nsio nsio usụn̄, ke Jehovah enyịme “asan̄autom” oro ye Otu Ukara esie ẹda n̄kpọutom umịn̄n̄wed ye mme n̄ka oro ibet enyịmede ẹnam n̄kpọ ke ndinam ẹdiọn̄ọ enyịn̄ esie ke ofụri isọn̄!

Ẹsịn Udọn̄ Ẹnọ Edisuan Ikọ Abasi

Ikọt Jehovah ẹtie ntiense kpukpru ini ẹnọ enyịn̄ esie ẹnyụn̄ ẹsọn̄ọ ẹmụm Ikọ esie ẹkama ebe ke ndimịn̄ nnyụn̄ nsuan ediwak miliọn n̄wed oro ẹkọn̄ọde ke Bible ọkọrọ ye Bible ke idemesie. Ke ntọn̄ọ ntọn̄ọ iduọk isua 1900, Watch Tower Society ama akabade edi andinyene unen ndisio The Emphatic Diaglott, nsiondi N̄wed Abasi Christian Usem Greek eke Benjamin Wilson emi ẹwetde ke ikọ Greek ye Ikọmbakara. N̄ka ama osio nsiondi King James Version eke Nditọ Ukpepn̄kpọ Bible, emi ekesịnede se ẹwetde ẹdian edide page 500. Ke 1942 enye ama osio King James Version emi enyenede mme ikọ mben n̄wed. Ekem ke 1944 N̄ka ama ọtọn̄ọ ndimịn̄ American Standard Version eke 1901, emi adade enyịn̄ Abasi. Enyịn̄ Jehovah ama odu n̄ko ke The Bible in Living English, eke Stephen T. Byington, emi N̄ka okosiode ke 1972.

Mme n̄ka oro ibet enyịmede emi Mme Ntiense Jehovah ẹdade ẹnam n̄kpọ ẹn̄wam ke ndimịn̄ nnyụn̄ nsuan kpukpru mme edikabade Bible emi. Nte ededi, se idide n̄wọrọnda ikan edi edidianakiet oro odude ke ufọt Watch Tower Society ye otu Mme Ntiense Jehovah oro ẹyetde aran emi ẹnamde Kọmiti Ukabade Bible New World. Nnyịn imadat esịt nte ke idahaemi, ẹmịn̄ se iwakde ibe idem edikabade emi 106,400,000, ke ofụri ofụri m̀mê ubak ubak, ke usem 38. Watch Tower Bible and Tract Society of Pennsylvania enen̄ede edi n̄ka Bible!

Ẹmek “asan̄autom emi anamde akpanikọ” ẹte ‘akara kpukpru inyene ete esie.’ Emi esịne mme ufọkutom ke ibuot itieutom ke New York Stet, U.S.A., ye n̄kọk itieutom 110 oro ẹnamde utom idahaemi ke ofụri ererimbot. Mme andibuana ke otu asan̄autom oro ẹfiọk ẹte ke ẹyekot mmimọ idinam ibat ke usụn̄ nte mmimọ idade  se ẹkeyakde ẹsịn mmimọ ke ubọk inam n̄kpọ. (Matthew 25:14-30) Edi, emi ikpanke “asan̄autom” emi ndiyak mme esenyịn oro ẹdotde ke otu “mme erọn̄ en̄wen” ẹse ẹban̄a mme utom ibet ye ndutịm utịm utom. Ke akpanikọ, emi ayak mbon Otu Ukara ẹyak ekese ini ẹsịn “ke akam ye ke utom ikọ Abasi.”—Utom 6:4.

Adan̄a nte mme idaha ererimbot emi ẹyakde, Otu Ukara, emi adade ke ibuot “asan̄autom emi anamde akpanikọ, onyụn̄ enyenede ọniọn̄,” ayada mme n̄ka emi anam n̄kpọ. Mmọ ẹnam utom efere, edi ẹkeme nditre ndida mmọ nnam n̄kpọ. Edieke ẹdade mbet ukara ẹsuan n̄ka oro ibet enyịmede, utom ukwọrọikọ oyosụk aka iso. Idem idahaemi, ke mme idụt oro ukpan odude ndien owo mîdaha mme n̄ka oro ibet enyịmede inam n̄kpọ, ke ẹtan̄a etop Obio Ubọn̄, ke ẹnam mme mbet, ndien n̄kọri ukara Abasi ke aka iso. Emi edi ntre koro Mme Ntiense Jehovah ẹtọ ẹnyụn̄ ẹduọk mmọn̄, ndien “n̄kọri oto Abasi.”—1 Corinth 3:6, 7.

Nte nnyịn isakde iso ise ini iso, nnyịn imenyene mbuọtidem nte ke Jehovah eyese aban̄a mme udọn̄ eke spirit ye eke obụk ikọt esie. Enye ye Eyen esie, Jesus Christ, ẹyeka iso ndinọ ndausụn̄ ye un̄wam ẹtode heaven oro ẹyomde man ẹnam utom ukwọrọikọ Obio Ubọn̄ ẹkụre. Edi akpanikọ, se ededi oro nnyịn inamde nte mme asan̄autom Abasi ‘itoho ke odudu, inyụn̄ itoho ke nsọn̄idem, edi oto spirit Jehovah.’ (Zechariah 4:6) Ke ntre, nnyịn ibọn̄ akam iben̄e un̄wam Abasi, sia ifiọkde ite ke ebede ke odudu oro Abasi ọnọde, nnyịn iyekeme ndikụre utom oro enye ọnọde nnyịn inam ke utịt ini emi!