Ẹyom Jehovah Mbemiso Usen Iyatesịt Esie
Ẹyom Jehovah Mbemiso Usen Iyatesịt Esie
“Ẹyom Jehovah; mbufo ẹyom edinen ido, ẹyom sụn̄-sụn̄ ido: m̀mê mbufo ẹyedịbe ke usen iyatesịt Jehovah.”—ZEPHANIAH 2:3.
1. Nso ikedi idaha eke spirit Judah ke ini Zephaniah ọkọtọn̄ọde utom ntịn̄nnịm ikọ esie?
ZEPHANIAH ọkọtọn̄ọ utom ntịn̄nnịm ikọ esie ke ata idiọk ini ke mbụk Judah. Idaha eke spirit idụt oro ama enen̄ede ọdiọk. Utu ke ndibuọt idem ke Jehovah, mme owo ẹkebuọt idem ke mme oku ndem ye mme asiak ntantaọfiọn̄ kaban̄a ndausụn̄. Utuakibuot Baal ye mme usọrọ mbun̄wụm esie ama ọyọhọ ke idụt oro. Mme adausụn̄ ke obio—ndidem, mbọn̄, ye mme ebiereikpe—ẹkefefịk mbon oro akanade mmọ ẹkpeme. (Zephaniah 1:9; 3:3) Eyịghe idụhe Jehovah ekebierede ‘ndinyan ubọk ndori’ Judah ye Jerusalem ke idem ndisobo mmọ!—Zephaniah 1:4.
2. Nso idotenyịn okodu ọnọ mme anam-akpanikọ asan̄autom Abasi ke Judah?
2 Nte ededi, okposụkedi idaha oro ọkọdiọkde ntre, ekpri idotenyịn ama odu. Idahaemi, Josiah, eyen Amon, ama odoro ke ebekpo. Okposụkedi enye ekedide ekpri eyenọwọn̄, Josiah ama enen̄ede ama Jehovah. Edieke obufa edidem emi afiakde owụk edisana utuakibuot ke Judah, nso ọnọ-nsịnudọn̄ n̄kpọ ke oro edidi ntem ọnọ ibat ibat owo oro ẹkenamde n̄kpọ ke edinam akpanikọ ẹnọ Abasi! Ekeme ndidi oyonụk mbon efen ndidiana ye mmọ nnyụn̄ ndi n̄ko se ẹnyan̄ade ke usen iyatesịt Jehovah.
Se Ẹyomde Man Ẹnyan̄a
3, 4. Ewe n̄kpọ ita oro ẹyomde ke ana owo esịm man edi se ẹnyan̄ade ke “usen iyatesịt Jehovah”?
3 Nte ẹkeme ndinen̄ede nnyan̄a ndusụk owo ke usen iyatesịt Jehovah? Ih, ama akam edi mmọ ẹnam n̄kpọ ita oro ẹsiode ẹwụt ke Zephaniah 2:2, 3. Nte nnyịn ikotde mme ufan̄ikọ emi, ẹyak nnyịn itịm ifiọk se ẹyomde emi. Zephaniah ekewet ete: “Ke ewụhọ mîka-imanke kan̄a; usen ẹyebe nte mbio ibokpot; ke ikan̄ iyatesịt Jehovah mîka-isịmke kan̄a mbufo. Mbufo kpukpru sụn̄-sụn̄ mbio isọn̄ emi ẹnamde ikpe esie, ẹyom Jehovah; mbufo ẹyom edinen ido, ẹyom sụn̄-sụn̄ ido: m̀mê mbufo ẹyedịbe ke usen iyatesịt Jehovah.”
4 Do, man ẹnyan̄a, akana owo (1) oyom Jehovah, (2) oyom edinen ido, onyụn̄ (3) oyom sụn̄sụn̄ ido. Mme n̄kpọ ẹyomde mi ẹkpenyene ndidi akwa n̄kpọ udọn̄ nnọ nnyịn mfịn. Ntak-a? Koro kpa nte Judah ye Jerusalem ẹkesakde iso ẹse usen ubiereikpe ke ọyọhọ isua ikie itiaba M.E.N., mme idụt Christendom—ke nditịm ntịn̄, kpukpru ndiọi owo—ẹsan̄a ẹbịne ubiereikpe Jehovah Abasi ke “akwa ukụt” emi edide. (Matthew 24:21) Owo ekededi oro oyomde ndidịbe ke ini oro enyene ndinam ubiere idahaemi. Didie? Ebe ke ndiyom Jehovah, nyom edinen ido, nnyụn̄ nyom sụn̄-sụn̄ ido mbemiso ini ebede!
5. Nso ke ‘ndiyom Jehovah’ mfịn abuana?
5 Afo emekeme ndidọhọ ete: ‘Ami ndi asan̄autom Abasi oro ama akayak idem ọnọ onyụn̄ ana baptism, kiet ke otu Mme Ntiense Jehovah. Nte ami n̄kesịmke-sịm se ẹyomde oro?’ Ke akpanikọ, mme n̄kpọ efen efen ẹdu ẹkan ediyak idem nnyịn nnọ Jehovah. Israel ekedi idụt oro ẹkeyakde ẹnọ, edi ke eyo Zephaniah mbon Judah ikodụhe uwem ikekem ye uyakidem nnọ oro. Nte utịp, ẹma ẹsịbe idụt oro ke akpatre ẹfep. ‘Ndiyom Jehovah’ mfịn abuana ndikọri nnyụn̄ mmụm ufiop ufiop, ọkpọkpọ itie ebuana ye enye n̄kama ke ebuana ye esop esie eke isọn̄. Enye ọwọrọ ndidomo mfiọk nte Abasi esede mme n̄kpọ nnyụn̄ nnọ ntịn̄enyịn ke mme ekikere esie. Nnyịn iyom Jehovah ke ini itịn̄de enyịn ikpep Ikọ esie, itie ikere enye, inyụn̄ idade item esie isịn ke edinam ke uwem nnyịn. Nte nnyịn n̄ko iyomde ndausụn̄ Jehovah ke akam ofụri esịt inyụn̄ itienede ndausụn̄ edisana spirit esie, itie ebuana nnyịn ye Jehovah oyotụn̄ọ, ndien oyonụk nnyịn ndinam n̄kpọ esie ‘ke ofụri esịt, ukpọn̄, ye odudu nnyịn.’—Deuteronomy 6:5; Galatia 5:22-25; Philippi 4:6, 7; Ediyarade 4:10b.
6. Didie ke nnyịn ‘iyom edinen ido,’ ndien ntak ẹkemede ndinam emi idem ke ererimbot emi?
6 Udiana n̄kpọ oro ẹyomde oro ẹsiakde ke Zephaniah 2:3 edi ‘ndiyom edinen ido.’ Ata ediwak nnyịn ima inam mme akpan ukpụhọde man ikeme ndidot ndina baptism Christian, edi ana nnyịn ika iso imụm ndinen idaha Abasi ikama ke ofụri eyouwem nnyịn. Ndusụk mbon oro ẹketọn̄ọde nte ọfọnde ke afan̄ emi ẹma ẹyak ererimbot abiat mmọ. Idịghe mmemmem n̄kpọ ndiyom edinen ido, koro mme owo oro ẹsede oburobụt ido idan̄, usu nsu, ye mme idiọkn̄kpọ eken nte se ẹnyịmede ẹdu ẹkanade nnyịn ẹkụk. Kpa ye oro, ọkpọsọn̄ udọn̄ ndinem Jehovah esịt ekeme ndikan ntụhọ ekededi ndiyom unyịme ererimbot ebe ke ndidomo ndibuaha ye enye. Judah akataba mfọn Jehovah koro enye ekekpebede mme idụt ukpono ndem oro ẹkedude ẹkpere. Do, utu ke ndikpebe ererimbot, ẹyak nnyịn idi “mme andikpebe Abasi,” isịnede “obufa owo, emi ẹbotde ebiet Abasi ke edinen ido ye edisana ido akpanikọ.”—Ephesus 4:24; 5:1.
7. Didie ke nnyịn ‘iyom sụn̄sụn̄ ido’?
7 Ọyọhọ n̄kpọ ita oro ẹsiode ẹwụt ke Zephaniah 2:3 edi nte ke edieke nnyịn iyomde ndidịbe ke usen iyatesịt Jehovah, ana nnyịn ‘iyom sụn̄-sụn̄ ido.’ Kpukpru usen, nnyịn inam n̄kpọ ye iren, iban, ye n̄kparawa owo oro mînyeneke sụn̄sụn̄ ido. Ye mmọ, ndinyene sụn̄sụn̄ ido edi mmeme. Ẹda nsụkibuot nte ata idiọk mmeme. Mmọ ẹtie uyịre uyịre, ibụk ibụk, ẹnyụn̄ ẹsọn̄ọ ẹyịre ke ekikere idemmọ, ẹnịmde ke akpanikọ nte ke ana ẹnyịme mme ọkpọkpọ “unen” mmimọ ye se mmimọ imade ọkpọkọm ọsọn̄ didie. Ọkpọdiọk didie ntem edieke nnyịn ikpekpebede ndusụk ke otu mme edu oro! Ini edi emi ‘ndiyom edinen ido.’ Didie? Ebe ke ndisụk ibuot nnọ Abasi, ndisụhọde idem mbọ ntụnọ esie nnyụn̄ ndu uwem ekekem ye uduak esie.
Ntak Ẹdọhọde “M̀mê” Iyedịbe?
8. Edida ikọ oro “m̀mê” ke Zephaniah 2:3 owụt nso?
8 Tịm fiọk ete ke Zephaniah 2:3 ọdọhọ ete: “M̀mê mbufo ẹyedịbe ke usen iyatesịt Jehovah.” Ntak ẹdade ikọ oro “m̀mê,” ke ini ẹtịn̄de ẹban̄a “sụn̄-sụn̄ mbio isọn̄”? Ọfọn, sụn̄sụn̄ mbio isọn̄ oro ẹma ẹnam nnennen usio-ukot, edi ikoyomke mmọ ẹbuọt idem ke idemmọ. Mmọ ikesịmke kan̄a utịt usụn̄ uwem mmọ ke edinam akpanikọ. Ẹma ẹkere ke ndusụk mmọ ẹkeme ndiduọ ndụk idiọkn̄kpọ. Ntre ke edi ye nnyịn. Jesus ọkọdọhọ ete: “Ẹyenyan̄a owo eke edimede ime tutu esịm akpatre.” (Matthew 24:13) Ih, edinyan̄a ke usen iyatesịt Jehovah ọkọn̄ọ ke nnyịn ndika iso nnam se inende ke enyịn esie. Nte oro edi se afo ọsọn̄ọde ebiere?
9. Ndinen usio-ukot ewe ke ekpri Edidem Josiah akanam?
9 Nte an̄wan̄ade ke ndinam n̄kpọ mban̄a mme ikọ Zephaniah, ama onụk Edidem Josiah ‘ndiyom Jehovah.’ N̄wed Abasi ọdọhọ ete: “Ke ọyọhọ isua ubọn̄ esie itiaita, ke [Josiah] edide kan̄a eyenọwọn̄ [n̄kpọ nte isua 16 ke emana], enye ọtọn̄ọ nditiene [m̀mê, “ndiyom,” New International Version] Abasi David ete esie.” (2 Chronicles 34:3) Josiah ama aka iso n̄ko ‘ndiyom edinen ido,’ koro nnyịn ikot ite: “Ndien esịm ke ọyọhọ isua duopeba [ke ini Josiah ekedide n̄kpọ nte isua 20], enye ọtọn̄ọ ndision̄o mme edikon̄ ebiet, ye mme eto-n̄kpe, ye mme edisọi mbiet, ye mme editara mbiet mfep, onyụn̄ anam Judah ye Jerusalem ẹsana. Ndien mmọ ẹwụri itie uwa Baalim ke iso esie.” (2 Chronicles 34:3, 4) Josiah ‘ama oyom sụn̄-sụn̄ ido’ n̄ko, anamde n̄kpọ ke nsụhọdeidem ndinem Jehovah esịt ebe ke ndinam idụt oro asana ọbọhọ ukpono ndem ye mme edinam nsunsu ido ukpono eken. Enyene ndidi mbon eken oro ẹnyenede sụn̄sụn̄ ido ẹkenem esịt didie ntem ke mme idaha oro!
10. Nso iketịbe ke Judah ke 607 M.E.N., edi mmanie ke ẹkenyan̄a?
10 Ediwak mme Jew ẹma ẹfiak ẹtiene Jehovah ke ini ukara Josiah. Nte ededi, ke edidem oro ama akakpa, ediwak owo ẹma ẹfiak ẹbịne n̄kani usụn̄ uwem mmọ—ẹbịnede mme edinam emi Abasi mînyịmeke. Nte Jehovah ọkọdọhọde, mbon Babylon ẹma ẹkan Judah ẹnyụn̄ ẹsobo ibuot obio esie, Jerusalem, ke 607 M.E.N. Kpa ye oro, idịghe kpukpru owo ẹketak. Ẹma ẹdịp prọfet Jeremiah, Ebed-melech owo Ethiopia, ikọt ufọk Jonadab, ye mme anam-akpanikọ eken ke usen iyatesịt Jehovah oro.—Jeremiah 35:18, 19; 39:11, 12, 15-18.
Mme Asua Abasi—Ẹkpep N̄kpọ!
11. Ntak edide n̄kpọ-ata ndika iso nnam akpanikọ nnọ Abasi mfịn, edi nso ke mme asua Jehovah ẹkpenam ọfọn ndikere mban̄a?
11 ‘Nsio nsio idomo ẹsịm’ nnyịn ke adan̄aemi nnyịn itiede ibet usen iyatesịt Jehovah oro edisịmde idiọk editịm n̄kpọ emi. (James 1:2) Ke ediwak idụt oro ẹdọhọde nte idade ifụre utuakibuot ke akpan n̄kpọ, mme n̄kari n̄kari ọkwọrọ ederi ẹmeda odudu mmọ ye ukara n̄kann̄kụk man ẹda ibak ibak ukọbọ ẹtiene ikọt Abasi. Mme oburobụt owo ẹdọk Mme Ntiense Jehovah edidọk, ẹkotde mmọ “idiọk n̄ka.” Abasi ọfiọk mme edinam mmọ—ndien iditreke ndinọ mmọ ufen. Mme asua Abasi ẹyenam ọfọn ndikere mban̄a se iketịbede inọ mme utọ asua ikọt esie nte mme Philistine. Ntịn̄nnịm ikọ oro ọdọhọ ete: “Koro ẹyedan̄a ẹkpọn̄ Gaza, Ashkelon oyonyụn̄ edi ndon-ndon; ama edi Ashdod, ẹyebịn enye ẹfep ke ufọt uwemeyo; ẹyenyụn̄ ẹdibede Ekron ẹfep.” Ẹyesobo Gaza, Ashkelon, Ashdod, ye Ekron mme obio Philistine ẹfep.—Zephaniah 2:4-7.
12. Nso iketịbe inọ Philistia, Moab, ye Ammon?
12 Ntịn̄nnịm ikọ oro aka iso ete: “N̄kokop esuene Moab, ye isụn̄i nditọ Ammon, emi mmọ ẹsuenede ikọt mi, ẹnyụn̄ ẹseride iseri ẹban̄a adan̄a mmọ.” (Zephaniah 2:8) Ke akpanikọ, Egypt ye Ethiopia ẹma ẹbọ ufen ke ubọk mbonekọn̄ Babylon. Edi nso ikedi ubiereikpe Jehovah inọ Moab ye Ammon, kpa mme idụt oro ẹketode ubon Lot eyen eyeneka Abraham? Jehovah ama ebem iso etịn̄ ete: “Mmọdo Moab mîditreke ndibiet Sodom: nditọ Ammon idinyụn̄ itreke ndibiet Gomorrah.” Ke mîbietke mme ekaete mmọ—nditọiban Lot iba, oro ẹkebọhọde nsobo Sodom ye Gomorrah—owo ididịpke atan̄idem Moab ye Ammon ibiọn̄ọ ubiereikpe Abasi. (Zephaniah 2:9-12; Genesis 19:16, 23-26, 36-38) Mfịn, Philistia ye mme obio esie ẹdu m̀mọ̀n̄? Nso kaban̄a Moab ye Ammon oro ẹketan̄de idem ini kiet ko? Yom nte afo ediyoyom, udukwe mmọ.
13. Nso ke ọdọkisọn̄ nyom n̄kpọeset ọkọfiọhọ ke Nineveh?
13 Ke eyo Zephaniah, Obio Ukara Assyria ama esịm n̄kon̄n̄kan idaha odudu esie. Ke etịn̄de aban̄a ikpehe kiet ke akwa ufọk ubọn̄ Nineveh ibuot obio Assyria oro enye ọkọfiọhọde, Austen Layard, ọdọkisọn̄ nyom n̄kpọeset ekewet ete: “Ẹma ẹbahade dek . . . ẹdọn̄ ke mme osobo-inan̄ ikpehe, ẹdade flawa m̀mê mbiet unam ẹnam mbuwed. Ẹkeyet uduot eketiede utouto ke ndusụk mmọ, ẹbotde ikpọ mbot ye mme mbiet ẹkanade ikpehe kiet kiet. Ekeme ndidi ẹma ẹtara gold ye silver ẹfụk mme ọkọm ufọk ye mme ibibene ufọk; ẹnyụn̄ ẹda mme eto oro mîkesiwakke ndidu, emi cedar ekedide se ẹsọpde ẹkụt, ẹnam mme utom usọeto.” Kpa ye oro, nte ẹkebemde iso ẹtịn̄ ke ntịn̄nnịm ikọ Zephaniah, ẹkenyene ndisobo Assyria ndien ibuot obio esie, Nineveh, ekenyene ndikabade “ikpîkpu ndon.”—Zephaniah 2:13.
14. Didie ke ntịn̄nnịm ikọ Zephaniah okosu Nineveh ke idem?
14 Isua 15 kpọt ke Zephaniah ama eketịn̄ ntịn̄nnịm ikọ oro, ẹma ẹsobo akwa Nineveh, akwa ufọk ubọn̄ esie ama akabade n̄wụre. Ih, ẹma ẹsobo atan̄-idem obio oro. Ẹma ẹbem iso ẹtịn̄ ẹban̄a idaha nsobo oro in̄wan̄-in̄wan̄ ke mme ikọ emi: “Ikpan̄ n̄ko ye ẹbiọn̄ ẹyedụn̄ ke otu mbuot adaha esie; uyo mmọ ẹyekwọ ke window; n̄wụre oyodu ke asan̄udọk.” (Zephaniah 2:14, 15) Ikpọ ufọk Nineveh ẹdidi n̄kukụre se mme ikpan̄ ye ẹbiọn̄ ẹdụn̄de. Owo idikopke aba uyom mme anyamurua, uyom mme an̄wanaekọn̄, m̀mê ikwọ mme oku ke mme efak obio oro. Ke ọkpọusụn̄ oro mme owo ẹkesiyọhọde, ẹdikop sụk esen esen uyo ikwọ ke window, eyedi mfụhọ mfụhọ ikwọ inuen m̀mê uyom ofụm. Akpakam kpukpru mme asua Abasi ẹsịm utịt ke ukem usụn̄ oro!
15. Nso ke ẹkeme ndikpep nto se iketịbede inọ Philistia, Moab, Ammon, ye Assyria?
15 Nso ke nnyịn ikeme ndikpep nto se iketịbede inọ Philistia, Moab, Ammon, ye Assyria? Se ikpepde edi emi: Nte mme asan̄autom Jehovah, nnyịn ikpenyeneke ndikop ndịk ndomokiet mban̄a mme asua nnyịn. Abasi okụt se mbon oro ẹbiọn̄ọde ikọt esie ẹnamde. Jehovah ama anam n̄kpọ aban̄a mme asua esie ke ini edem, ndien enye ayada ubiereikpe esie etiene kpukpru mme andidụn̄ isọn̄ mfịn. Kpa ye oro, mme andibọhọ ẹyedu—‘akwa otu owo eke ẹtode ke kpukpru obio.’ (Ediyarade 7:9) Afo emekeme ndisịne ke otu mmọ—n̄kukụre edieke afo akade iso ndiyom Jehovah, ndiyom edinen ido, nnyụn̄ nyom sụn̄sụn̄ ido.
Ọyọdọdiọk Ọnọ Mbon Nsọn̄ibuot!
16. Nso ke ntịn̄nnịm ikọ Zephaniah eketịn̄ aban̄a mbọn̄ ye mme adaiso ido ukpono Judah, ndien ntak emi mme ikọ emi ẹkemde ye Christendom?
16 Ntịn̄nnịm ikọ Zephaniah afiak owụk ntịn̄enyịn ke idem Judah ye Jerusalem. Zephaniah 3:1, 2 ọdọhọ ete: “Ọdiọk ọnọ owo eke ọsọn̄de ibuot onyụn̄ edehede, obio utụk! Enye ikopke uyo: ibọhọ item: ibuọtke idem esie ye Jehovah; isan̄ake ikpere Abasi esie.” Nso n̄kpọ mmọn̄eyet ke ekedi ntem nte ke ẹma ẹfụmi ukeme Jehovah nditụnọ ikọt esie! Ke akpanikọ, isọn̄esịt ndidem, mbọn̄, ye mme ebiereikpe oro ama enen̄ede odot se ẹtuade n̄kpọfiọk ẹban̄a. Zephaniah ama etịn̄ aban̄a esuene esuene idaha eke mme adaiso ido ukpono oro, ọdọhọde ete: “Mme prophet esie ẹdi mbon [usọn̄enyịn, NW] ye mbon mbubịk; mme oku esie ẹsabade edisana n̄kpọ: mmọ ẹbiat ibet.” (Zephaniah 3:3, 4) Mme ikọ emi ẹtịm ẹkem didie ntem ye idaha mme prọfet ye mme oku Christendom mfịn! Ke usọn̄enyịn, mmọ ẹsio enyịn̄ Abasi ẹfep ke mme edikabade Bible mmọ ẹnyụn̄ ẹkpep mme ukpepn̄kpọ oro ẹwụtde Enye emi mmọ ẹdọhọde nte ituakde ibuot inọ ke usụn̄ oro mîfọnke.
17. Edide mme owo ẹkpan̄ utọn̄ m̀mê ikpan̄ke, ntak emi nnyịn ikpakade iso nditan̄a eti mbụk?
17 Jehovah ama enen̄ede ọtọt ikọt esie eke eset aban̄a edinam oro enye okoyomde ndinam. Enye ama ọdọn̄ mme asan̄autom esie mme prọfet—Zephaniah ye Jeremiah, ke adianade ye mbon eken—utom ndikpak mme owo ẹkabade esịt. Ih, “Jehovah . . . idinamke se ikwan̄ade: ayada ikpe esie kpukpru usenubọk enịm ke un̄wana: enye ikpụhu.” Nso ikedi utịp? Zephaniah ọkọdọhọ ete: “Edi owo n̄kwan̄a ifiọkke bụt.” (Zephaniah 3:5) Ẹnọ ukem ntọt oro idahaemi. Edieke afo edide asuanetop eti mbụk, afo emenyene ebuana ke utom unọ ntọt emi. Ka iso nditan̄a eti mbụk ye unana edikpa mba! Edide mme owo ẹkpan̄ utọn̄ m̀mê ikpan̄ke, utom fo okụt unen ke ekikere Abasi adan̄a nte afo akade iso ndinam enye ke edinam akpanikọ; afo unyeneke ntak ndikop bụt nte afo anamde utom Abasi ifịk ifịk.
18. Didie ke Zephaniah 3:6 edisu?
18 Ubiereikpe Abasi iditreke ke ndisobo Christendom kpọt. Jehovah anam ubiomikpe esie atara esịm kpukpru mme idụt: “Mmesịbe mme idụt mfep: mme tower mmọ ẹmewụre: mmabiat mme efak mmọ, ndien owo eke asan̄ade ebe idụhe: ẹmesobo mme obio emi.” (Zephaniah 3:6) Mme ikọ emi ẹnen̄ede ẹdi se ẹkemede ndiberi edem tutu Jehovah etịn̄ aban̄a nsobo emi nte n̄kpọ eke ama akadada itie. Nso iketịbe inọ obio Philistia, Moab, ye Ammon? Ndien nso kaban̄a Nineveh, ibuot obio Assyria? Nsobo mmọ etie nte ntọt uwụtn̄kpọ ọnọ mme idụt mfịn. Owo ikpadaha Abasi inam mbubru.
Ka Iso Ndiyom Jehovah
19. Mme mbụme ewe oro ẹnamde owo ekere n̄kpọ ke nnyịn ikpobụp?
19 Ke eyo Zephaniah, iyatesịt Abasi ama atara esịm mbon oro ‘ẹkenamde kpukpru ido mmọ ẹdiọk’ ke ibak. (Zephaniah 3:7) Ukem oro editịbe ke eyo nnyịn. Nte afo omokụt uyarade nte ke usen iyatesịt Jehovah emekpere? Nte afo ke aka iso ‘ndiyom Jehovah’ ebe ke ndikot Ikọ esie kpukpru ini—ke usen ke usen? Nte afo ke ‘oyom edinen ido’ ebe ke ndinyene edisana ido uwem ke n̄kemuyo ye mme idaha Abasi? Ndien nte afo ke ‘oyom sụn̄sụn̄ ido’ ebe ke ndinyene ifụre ifụre ido, edu nsụkibuot nnọ Abasi ye ndutịm esie kaban̄a edinyan̄a?
20. Mme mbụme ewe ke nnyịn idikere iban̄a ke akpatre ibuotikọ ke udịm udịm ibuotikọ ẹban̄ade ntịn̄nnịm ikọ Zephaniah mi?
20 Edieke nnyịn inen̄erede ika iso ndiyom Jehovah, edinen ido, ye sụn̄sụn̄ ido, nnyịn imekeme ndidori enyịn ndidara akpakịp edidiọn̄ idahaemi—ih, idem ke “ukperedem ini” emi odomode mbuọtidem owo mi. (2 Timothy 3:1-5; Mme N̄ke 10:22) Edi nnyịn imekeme ndibụp, ‘Mme usụn̄ ewe ke ẹdiọn̄ nnyịn nte mme asan̄autom Jehovah mfịn, ndien mme edidiọn̄ ini iso ewe ke ntịn̄nnịm ikọ Zephaniah enịm ọnọ mbon oro ẹdidịbede ke usen iyatesịt Jehovah oro enen̄ede asan̄a ekpere?’
Didie ke Afo Ọkpọbọrọ?
• Didie ke mme owo “ẹyom Jehovah”?
• ‘Ndiyom edinen ido’ abuana nso?
• Didie ke nnyịn ikeme ‘ndiyom sụn̄sụn̄ ido’?
• Ntak emi nnyịn ikpakade iso ndiyom Jehovah, edinen ido, ye sụn̄sụn̄ ido?
[Mme Mbụme Ukpepn̄kpọ]
[Ndise ke page 18]
Nte afo ke oyom Jehovah ebe ke ukpepn̄kpọ Bible ye akam ofụri esịt?
[Mme ndise ke page 21]
Koro mmọ ẹkade iso ndiyom Jehovah, akwa otuowo ẹyebọhọ usen iyatesịt esie