Mbụk Eyouwem

Jehovah Omụm Mi Akama ke Kpukpru Usen Uwem Mi

NTE FORREST LEE OBỤKDE

Mme bodisi ndisụk mbọ mme ukwakikwọ ye mme n̄wed Bible nnyịn ke odudu edi oro. Ekọn̄ Ererimbot II ama ọnọ mme andibiọn̄ọ ntak ndikpek obufa adaibuot ukara Canada ndidọhọ ke utom Mme Ntiense Jehovah ikemke ye ibet. Emi eketịbe ke July 4, 1940.

 YE UNANA edikop ndịk mban̄a se iketịbede, nnyịn ima ision̄o mme n̄wed efen efen ke ebiet ẹkebonde inyụn̄ ika iso ke ukwọrọikọ nnyịn. Ndifreke mme ikọ Papa ke ini n̄kpọntịbe oro: “Nnyịn idisọpke itre. Jehovah ọnọ nnyịn ewụhọ ete ikwọrọ ikọ.” Ke ini oro, n̄kedi okopodudu eyenọwọn̄ isua duop. Edi idem mfịn, ubiere ye ifịk oro Papa ekenyenede ọnọ utom ukwọrọikọ ẹsụk ẹteti mi kpukpru ini nte Abasi nnyịn, Jehovah, omụmde mme anam-akpanikọ ikọt esie akama.

Ini efen oro mme bodisi ẹkemụmde nnyịn, mmọ ikọbọhọ mme n̄wed nnyịn kpọt edi ẹma ẹmụm Papa n̄ko ẹkesịn ke ufọk-n̄kpọkọbi, ẹkpọn̄de Mama ikpọn̄ ye nditọ inan̄. Oro eketịbe ke September 1940 ke Saskatchewan. Ikebịghike ke oro ebede, ẹma ẹbịn mi ke ufọkn̄wed koro n̄ketienede ubieresịt mi oro Bible ọnọde ukpep nsịn ndikọm ọfọn̄ etakubom m̀mê ndikwọ ikwọ ufreidụt. Ndika iso mbọ ukpep nto ufọkn̄wed emi ẹnọde ukpep ebe ke leta ama anam nnyene ndutịm oro adade ukem ukem, ndien mma mbuana ọyọhọ ọyọhọ ke utom ukwọrọikọ.

Ke 1948 ẹma ẹyom mme asiakusụn̄, mme asan̄autom uyọhọ ini eke Mme Ntiense Jehovah, ẹwọrọ ẹka mbenesụk edem usiahautịn Canada. Ntre mma n̄wọrọ n̄ka ndikanam utom usiakusụn̄ ke Halifax, Nova Scotia, ye ke Cape Wolfe, Prince Edward Island. Ke isua oro eketienede, mma nnyịme ikot ndikanam utom urua iba ke ọfis n̄kọk itieutom Mme Ntiense Jehovah ke Toronto.  Utom urua iba oro ama akabade edi se ibede ọnọ-uyụhọ utom isua itiokiet. Nte ini akakade, mma nsobo Myrna, emi enyenede ima ọnọ Jehovah ukem nte ami nnyenede, ndien nnyịn ima idọ ndọ ke December 1955. Nnyịn ima inam idụn̄ ke Milton, Ontario, ndien ikebịghike ẹma ẹtọn̄ọ obufa esop do. Ubet idakisọn̄ nnyịn ama akabade edi Ufọkmbono Obio Ubọn̄.

Udọn̄ Nditat Utom Ukwọrọikọ Nnyịn

Ke mme isua oro ẹketienede, nnyịn ima inyene nditọ itiokiet usọp usọp ke adiana ke adiana. Adiaha nnyịn Miriam ekebem iso amana. Ekem Charmaine, Mark, Annette, Grant, ndien ke akpatre Glen, ẹma ẹtiene. Ediwak ini mma nsinyọn̄ utom ndikụt nte nditọwọn̄ ẹtiede ke isọn̄ ẹkanade otụn̄ikan̄, nte Myrna okotde Bible ọnọ mmọ, anamde mme mbụk Bible ẹn̄wan̄a onyụn̄ ekpepde mmọ ndinyene ata ima nnọ Jehovah. Ke ntak ima ima un̄wam esie, kpukpru nditọ nnyịn ẹma ẹnyene ifiọk Bible oro ekemde ke ini uyen.

Ifịk oro ete mi ekenyenede ọnọ utom ukwọrọikọ ama otụk ekikere ye esịt mi ke usụn̄ oro mmen̄kemeke ndifre. (Mme N̄ke 22:6) Ntem, ke 1968, ke ini ẹkenọde mme ubon Mme Ntiense Jehovah ikot ndiwọrọ n̄ka Ufọt Ufọt ye Edem Usụk America man ẹken̄wam ke utom ukwọrọikọ, ama ọdọn̄ ubon nnyịn ndiyere ikot oro. Ke ini oro nditọ nnyịn ẹkedi ọtọn̄ọde ke isua 5 ẹsịm 13 ke emana, ndien owo nnyịn ndomokiet ikọfiọkke usem Spanish. Ke ntienede ndausụn̄ ẹkenọde, mma nnam isan̄ n̄ka nsio nsio idụt ndikese nte idaha udu uwem etiede. Ke mma n̄kọnyọn̄ ndi, nnyịn ima ikere ke akam iban̄a idụt emi nnyịn ikpemekde inyụn̄ ibiere ndiwọrọ n̄ka Nicaragua.

Ndinam Utom ke Nicaragua

Ke October 1970 nnyịn ikodu ke obufa ebietidụn̄ nnyịn, ndien ke ufan̄ urua ita ẹma ẹnọ mi ekpri n̄kpọ ndinam ke ndutịm mbono esop. Mma n̄n̄wana nda ata esisịt usem Spanish oro n̄kọfiọkde nnọ utịn̄ikọ oro nnyụn̄ mberi ke ndinọ ofụri esop ikot ẹdi cerveza ke ufọk nnyịn ke Saturday ke n̄kanika ebede 9 usenubọk ke minit 30. N̄koyom ndidọhọ servicio, emi ọwọrọde utom an̄wautom, edi, ke akpanikọ n̄kọnọ kpukpru owo ikot nte ẹdin̄wọn̄ beer. Ndikpep usem oro ekenen̄ede edi n̄kpọ-ata!

Ke akpa, n̄kesiwet ukwọrọikọ ke ekaubọk nnyụn̄ ntịn̄ enye mfiak ntịn̄ nte nsan̄ade n̄ka enyịnusụn̄. Nyọdọhọ nte: “N̄wed oro asan̄a ye ukpepn̄kpọ Bible mfọn.” Owo kiet emi ọkọbọde n̄wed oro ama ọdọhọ ke oro ebede ete ke imọ ikenyene ndidi mme mbono esop nnyịn man idifiọk m̀mê nso ke ami n̄kodomo ndisian imọ. Owo emi ama akabade edi kiet ke otu Mme Ntiense Jehovah. Ana in̄wan̄-in̄wan̄ didie ntem nte ke Abasi edi enye emi anamde n̄kpasịp akpanikọ ọkọri ke esịt mbon nsụkidem, kpa nte apostle Paul ọkọdọhọde!—1 Corinth 3:7.

 Ke ima ikodu n̄kpọ nte isua iba ke ibuot obio Managua, ẹma ẹdọhọ nnyịn iwọrọ ika usụk usụk Nicaragua. Do nnyịn ima ikanam utom ye esop oro okodude ke Rivas ye mme otu mbon oro ẹnyenede udọn̄ ke mbọhọ oro emi ẹdude nsannsan. Pedro Peña, anam-akpanikọ akanieren Ntiense, ama asan̄a ye ami ke ini ikakade ikese mme otu emi. Otu kiet okodu ke isuo obot nsụn̄ikan̄ ke Lake Nicaragua, emi ubon Mme Ntiense Jehovah kiet kpọt okodude.

Okposụkedi ubon emi ẹkenyenede ata esisịt n̄kpọ obụkidem, mmọ ẹma ẹsịn akamba ukeme ndiwụt esịtekọm mban̄a edidi nnyịn. Ke mbubịteyo oro nnyịn ikakade ikesịm, ẹma ẹnịm udia ẹnọ nnyịn. Nnyịn ima idu do urua kiet, ndien ediwak ke otu ndima owo do oro ẹkemade Bible ẹma ẹbuana udia mmọ ye nnyịn. Nnyịn ima ikop idatesịt ndinyene owo 101 oro ẹkedụkde an̄wa an̄wa utịn̄ikọ Bible ke Sunday.

Mmekere ke odudu Jehovah oro omụmde owo akama ama owụt idem ke idaha efen, ke ini nnyịn ikoyomde ndika n̄kese otu mbon oro ẹkenyenede udọn̄ emi ẹkedụn̄de ke mme obot ẹdude ẹkpere adan̄a Costa Rica. Ke usen oro nnyịn ikoyomde ndidaha, Pedro ama edi ndimen mi, edi n̄kanana ndọn̄ọ utoenyịn. Mma ndọhọ nte: “Pedro, ndikemeke ndika.” Ke otụkde mi ọkpọiso, enye ama ọbọrọ ete: “Afo emenyene ọkpọsọn̄ ufiopidem, edi ana afo edi! Nditọete ke ẹbet.” Ekem enye ama ọbọn̄ akam ofụri esịt oro akanam mmen̄kopke.

Ke oro ebede, mma ndọhọ nte: “Ka kosio fresco (mmọn̄ mfri) n̄wọn̄. Nyokụre ke n̄kpọ nte minit duop.” Ubon Mme Ntiense iba ẹkedụn̄ ke n̄kann̄kụk oro nnyịn ikakade ikese, ndien mmọ ẹma ẹnen̄ede ẹse ẹban̄a nnyịn. Ke ndan̄nsiere nnyịn ima isan̄a ye mmọ ika ukwọrọikọ, okposụkedi n̄kosụk n̄kopde mmemidem ke ntak ufiopidem. Ọkọsọn̄ọ mi idem didie ntem ndikụt se ibede owo ikie ẹdụkde mbono esop nnyịn ke Sunday!

Ndifiak N̄wọrọ Idụn̄

Ke 1975 ọyọhọ eyen nnyịn itiaba, Vaughn, ama amana. Ke isua oro eketienede, nnyịn ikenyene ndifiak nnyọn̄ Canada ke ntak unana okụk. Ikedịghe mmemmem n̄kpọ ndikpọn̄ Nicaragua koro nnyịn ima inen̄ede ikụt odudu Jehovah oro omụmde owo akama ke ini nnyịn ikodude do. Etisịm ini emi nnyịn ikọkpọn̄de, se ibede owo 500 ke efakutom esop nnyịn ẹkesidụk mme mbono esop.

Mbemiso, ke ini ẹkemekde mi ye Miriam adiaha nnyịn akpan asiakusụn̄ ke Nicaragua, Miriam ama obụp mi ete: “Papa, edieke afo edifiakde ọnyọn̄ Canada, nte afo ayayak mi nsụhọ mi?” N̄kaduakke ndikpọn̄ tutu amama, ntre mma ndọhọ nte: “Ọfọn, nyayak!” Ntre ke ini nnyịn ikọkpọn̄de, Miriam ama osụhọ man aka iso ke utom ukwọrọikọ uyọhọ ini esie. Ke ukperedem, enye ama ọdọ Andrew Reed. Ke 1984 mmọ ẹma ẹdụk ọyọhọ otu 77 eke Gilead, kpa ufọkn̄wed isụn̄utom eke Mme Ntiense Jehovah, emi okodude ini oro ke Brooklyn, New York. Idahaemi Miriam anam utom ye ebe esie ke Dominican Republic, oyụhọde udọn̄ oro nti isụn̄utom ke Nicaragua ẹkesịnde enye ke esịt.

Kan̄a ke emi, mme ikọ Papa oro, “nnyịn idisọpke itre,” ẹkesụk ẹdodu mi ke esịt. Ntre ke 1981 ke ini nnyịn ima ikenyene okụk ekemde ndifiak n̄ka Ufọt Ufọt America, nnyịn ima ifiak ika, isan̄ enye emi nnyịn ikaka Costa Rica. Ke adan̄aemi ikanamde utom do, ẹma ẹnọ nnyịn ikot ndikan̄wam ke ndibọp mbufa ufọkutom n̄kọk itieutom mmọ. Nte ededi, ke 1985, ama oyom ẹnọ eyeneren nnyịn Grant usọbọ, ntre nnyịn ima ifiak inyọn̄ọ Canada. Glen ama osụhọ ke Costa Rica man anam utom ubọpufọk n̄kọk itieutom oro, ke adan̄aemi Annette ye Charmaine ẹkenamde utom nte mme akpan asiakusụn̄. Ndusụk nnyịn oro ikọkpọn̄de Costa Rica ikedehede ikere ke nnyịn idifiakke ika do.

 Ndiyọ Mfịna

September 17, 1993 ama esiere nte ọfọnde, eyo onyụn̄ asiaha. Ami ye akpan nnyịn, Mark, ikọdiọn̄ ọkọmufọk. Nnyịn ima inam utom ọtọkiet inyụn̄ ineme iban̄a mme n̄kpọ eke spirit, nte ido nnyịn esidide. Ekem mma mfiọnọde ke ọkọmufọk oro nduọ ke isọn̄. Ke ini n̄kọfiọkde se iketịbede, n̄kukụre se n̄kekemede ndikụt ekedi nyayama ikan̄ ye mme owo oro ẹkesịnede mfia ọfọn̄. Emi ekedi ubet mbabuat n̄kpọntịbe ufọkibọk.

Ke ntak se Bible ọdọhọde, akpa ikọ oro n̄ketịn̄de ekedi: “Nyomke iyịp, nyomke iyịp!” (Utom 15:28, 29) Ọkọnọ ndọn̄esịt didie ntem ndikop Charmaine ọdọhọde ete: “Oro ekem, Papa. Nnyịn kpukpru mi.” Ke ukperedem mma ndifiọk nte ke mbiaibọk ẹma ẹkụt babru ibọkusọbọ mi, ndien edida iyịp nnam n̄kpọ ikedịghe mfịna. Mma mbụn̄ itọn̄ ndien mma ndọn̄ọ akpauben̄ ofụri idem, n̄kekemeke ndikam n̄kot ibifịk ke idemmi.

Sia mmen̄kekemeke ndimenede idem, mma nnen̄ede nyom Jehovah omụm mi akama n̄kan nte akanam nyomde. Ẹma ẹsiak mi usan̄a ofụm ọkpọrọ ke usiakidem oro ẹkenamde man ẹsịn mi ekwa ofụm. N̄kekemeke nditịn̄ ikọ. Mme owo ẹkenyene ndisese n̄kpọkinua mi man ẹfiọk se ami n̄kodomode nditịn̄.

Ubiatokụk ama ọkọri usọp usọp. Sia n̄wan mi ye ata ediwak ke otu nditọ mi ẹdude ke utom ukwọrọikọ uyọhọ ini, mma n̄kere m̀mê mmọ ẹkpenyene ndikpọn̄ utom emi man ẹse ẹban̄a mme mfịna okụk emi. Nte ededi, Mark ama ekeme ndinyene utom oro akan̄wamde enye ndise mban̄a akamba ubak ubiatokụk emi ke n̄kpasịp ọfiọn̄ ita. Nte utịp, kpukpru owo ẹma ẹkeme ndisọn̄ọ ndu ke utom ukwọrọikọ uyọhọ ini ke mîbọhọke ami ye n̄wan mi.

Ẹma ẹdian ediwak kad ye leta ẹtode nsio nsio idụt itiokiet ke ibibene ubet mi ke ufọkibọk. Ke akpanikọ, Jehovah okomụm mi akama. Esop n̄ko ama an̄wam ubon mi ebe ke ndinọ mmọ udia ke ọfiọn̄ ition ye ubak oro n̄kodude ke itie ubọ san̄asan̄a usọbọ. Ebiowo Christian kiet ama esidi edidu ye ami kpukpru uwemeyo, okotde Bible ye mme n̄wed Bible, onyụn̄ obụkde mme akama-nsịnudọn̄ ifiọkutom ọnọ mi. Owo iba ke ubon mi ẹma ẹsitie ye ami ẹtịm idem ẹnọ mbono esop kiet kiet, ntre akananam n̄katabake akpan udia eke spirit.

Ke adan̄aemi n̄kosụk ndude ke ufọkibọk, ẹma ẹnam ndutịm ẹnọ mi ndidụk edinam usen akpan mbono. Mbonutom ufọkibọk ẹma ẹnọ nurse oro odotde ye abiausọbọ udọn̄ọ ibifịk ẹsan̄a ye ami ofụri usen oro. Nso idatesịt ke ekedi ntem ndifiak ndu ye nditọete Christian mi! Tutu amama ndifreke nte n̄kokụtde ediwak owo ke mme itie ikie ẹdade ke udịm, ẹbetde ini mmọ ndikọm mi.

 Ndimụm Idaha eke Spirit N̄kama

N̄kpọ nte isua kiet ke mbabuat n̄kpọntịbe oro ama akada itie, mma n̄keme ndifiak nnyọn̄ ufọk ye ubon mi, okposụkedi okosụk oyomde mme nurse ẹse ẹban̄a mi kpukpru ini. Nsisan̄a ke san̄asan̄a n̄kpọisan̄ n̄ka mme mbono esop, oro mmensiwakke nditaba. Nte ededi, nnyene ndinyịme nte ke esiyom ubiere man n̄ka. Tọn̄ọ nte n̄kọnyọn̄ ndi ufọk, mmekeme ndidụk kpukpru mbono district.

Ke akpatre, ke February 1997, mma n̄keme ndifiak ntịn̄ ikọ ke udomo oro enyenede-nyene adan̄a. Ndusụk ke otu mme nurse mi ẹsikpan̄ utọn̄ ye esịtekọm nte mbuanade idotenyịn mi oro ọkọn̄ọde ke Bible ye mmọ. Nurse kiet okot ofụri n̄wed Jehovah’s Witnesses—Proclaimers of God’s Kingdom ye mme n̄wed Watch Tower eken ọnọ mi. Mmesinyene nneme ye mme owo ebe ke ndikama eto ntaip n̄kpọ ke kọmputa. Okposụkedi nditaip n̄kpọ ke utọ usụn̄ emi efekde-fek owo, edi se inọde utịp ndikeme ndika iso nnyene ebuana ke utom ukwọrọikọ.

Ubiak esịp enen̄ede otụhọde mi. Edi etie nte ke ini ami mbuanade akpanikọ Bible ye mbon efen m̀mê n̄kopde nte mmọ ẹkotde enye ẹnọ mi, mmesikop utan̄ifia. Ke ini ke ini, mmesinọ ikọ ntiense efak ye n̄wan mi, emi esikabarede ikọ ọnọ mi ke ini nyomde un̄wam. Ke ediwak idaha, mmekeme ndinam utom nte asiakusụn̄ unọ un̄wam. Ndinam utom nte ebiowo Christian ọnọ mi idatesịt, akpan akpan ke ini nditọete ẹdide ẹbịne mi ke mbono esop m̀mê ẹdide ẹdise mi ke ufọk ndien ami n̄keme ndin̄wam mmọ nnyụn̄ nsịn udọn̄ nnọ mmọ.

Nnyene ndinyịme nte ke edi mmemmem n̄kpọ ndikop mmemidem. Ntre ini ekededi oro n̄kopde mmemidem, mmesibọn̄ akam ke ndondo oro nte n̄kpakam nnyene idatesịt. Mmesibọn̄ akam okoneyo ye uwemeyo nte Jehovah aka iso omụm mi akama. Owo ndinọ mi leta m̀mê ndidi ndise mi esinam mi n̄kop idatesịt. Ndikot magazine Enyọn̄-Ukpeme m̀mê Awake! n̄ko esinam esịt mi ọyọhọ ye mme ekikere oro ẹbọpde-bọp. Ndusụk ini nsio nsio nurse ẹsikot mme magazine emi ẹnọ mi. Tọn̄ọ nte n̄kosobo mbabuat n̄kpọntịbe, mmakpan̄ utọn̄ nnọ nte ẹkotde ofụri Bible utịm ikatiaba ke kaset. Mmọ emi ẹdu ke otu nsio nsio usụn̄ oro Jehovah omụmde mi akama.—Psalm 41:3.

Ukpụhọde idaha mi ọnọ mi ekese ini nditie n̄kere nte Akwa Anditeme nnyịn, Jehovah, ọnọde nnyịn ukpep kaban̄a uwem. Enye ọnọ nnyịn nnennen ifiọk uduak esie, utom ukwọrọikọ oro enyenede ufọn, item ke se idide ukpọhọde inemesịt ubon, ye ọniọn̄ ndifiọk se ikpanamde ke ini mfịna. Jehovah ọnọ mi anam-akpanikọ ye utịbe utịbe n̄wan. Nditọ mi n̄ko ẹsọn̄ọ ẹda ye ami ke edinam akpanikọ, ndien edi n̄kpọ idatesịt ọnọ mi nte ke kpukpru mmọ ẹbuana ke utom ukwọrọikọ uyọhọ ini. Ke akpanikọ, ke March 11, 2000, eyen nnyịn Mark ye n̄wan esie, Allyson, ẹma ẹkụre ukpep ke ọyọhọ otu 108 eke Ufọkn̄wed Gilead ndien ẹma ẹnọ mmọ ẹkenam utom ke Nicaragua. Ami ye n̄wan mi ima ikeme ndidụk edinam ukụre ukpep mmọ. Mmekeme ndidọhọ ke esịt akpanikọ nte ke mfịna okpụhọde uwem mi edi ikpụhọkede esịt mi.—Psalm 127:3, 4.

Mmọkọm Jehovah ke ọniọn̄ oro enye ọnọde mi man n̄keme ndiyak n̄kpọ-akpa eke spirit oro n̄kọbọde nnọ ubon mi. Mmokop nsọn̄idem nnyụn̄ mbọ nsịnudọn̄ ndikụt nditọ mi ẹnamde n̄kpọ Andibot mmọ ye edu oro ebietde eke ete mi, oro ọkọdọhọde ete: “Nnyịn idisọpke itre. Jehovah ọnọ nnyịn ewụhọ ete ikwọrọ ikọ.” Ke akpanikọ, Jehovah omụm mi ye ubon mi akama ke ofụri usen uwem nnyịn.

[Ndise ke page 24]

Ye Papa, nditọeka mi iren, ye eyeneka mi an̄wan, idade ikpere ufọk o-moto nnyịn, oro ikesidade inam utom usiakusụn̄. Ami ndu ke nnasia

[Ndise ke page 26]

Ye Myrna n̄wan mi

[Ndise ke page 26]

Ndise ubon nnyịn eke ndondo emi

[Ndise ke page 27]

Ke nsụk nnọnọ ikọ ntiense ebe ke leta