Eneni Aban̄ade Ediset ke N̄kpa Jesus

“Mmekeme nditịn̄ nnọ mbufo in̄wan̄-in̄wan̄ nte ke adan̄aemi nnyịn ikemede nditịm nnịm ke akpanikọ nte ke Jesus ama odu uwem . . . , nnyịn ikemeke nditịn̄ in̄wan̄-in̄wan̄ ntre nte ke nnyịn imọfiọk ke Abasi ama anam Enye eset ke n̄kpa.” Ntre ke adaiso Ufọkabasi England, kpa Akwa Bishop eke Canterbury, ọkọdọhọ.

APOSTLE Paul emi ekedide Christian ikenyeneke utọ eyịghe oro. Ke ibuot 15 ke akpa leta eke odudu spirit oro enye ekewetde ọnọ ẹsọk mme ekemmọ Christian ke Corinth eset, Paul ekewet ete: “Mma mmen se n̄kọbọde nyak nnọ mbufo ke akpa-itie, nte, Christ ama akpa aban̄a mme idiọk-n̄kpọ nnyịn, nte asan̄ade ekekem ye se N̄wed Abasi ọdọhọde; ẹnyụn̄ ẹbụk Enye; ẹnyụn̄ ẹnam Enye eset ke n̄kpa ke ọyọhọ usen ita, nte asan̄ade ekekem ye se N̄wed Abasi ọdọhọde.”—1 Corinth 15:3, 4.

Edi mbuọtidem ke ediset ke n̄kpa Jesus Christ okonụk mme mbet esie ndikwọrọ gospel ke ofụri obio Greece ye Rome—‘ẹkwọrọde ẹnọ kpukpru owo ke idak ikpa-enyọn̄.’ (Colossae 1:23) Ke akpanikọ, ediset ke n̄kpa Jesus edi ata itiat idakisọn̄ mbuọtidem Christian.

Nte ededi, toto ke ata ntọn̄ọ ẹma ẹnyene eyịghe ẹban̄a ediset ke n̄kpa Jesus. Ye mme Jew ke ofụri ofụri, ekedi n̄kpọ isụn̄i mme anditiene Jesus ndidọhọ ke owo emi ẹkekọn̄de ke eto mi ekedi Messiah. Ndien ye ata ediwak mbon Greece oro ẹkedide mme ọfiọkn̄wed oro ẹkenịmde ukpọn̄ ikpaha ke nsinsi ke akpanikọ, ekikere ediset ke n̄kpa ekedi n̄kpọ itekesịt.—Utom 17:32-34.

Mbon Eyịghe Eyomfịn

Ke mme isua ndondo emi, ndusụk nditọ ukpepn̄kpọ oro ẹdọhọde ke idi mme Christian ẹmịn̄ mme n̄wed ye mme ibuotikọ ẹnamde etie nte ke ediset ke n̄kpa Jesus edi n̄ke, ẹnyụn̄ ẹtọn̄ọ ọkpọsọn̄ eneni ke ibuot nneme emi. Ke edidụn̄ọde mmọ nyom “ata Jesus,” nsio nsio nditọ ukpepn̄kpọ ẹneni nte ke mme mbụk Gospel ẹban̄ade ukpọk udi ye Jesus ndiwụt mme owo idem ke enye ama ekeset ke n̄kpa ẹdi ata n̄ke oro mme owo ẹketọn̄ọde ke anyan ini ke n̄kpa esie ebede man ẹsọn̄ọ se ẹtịn̄de ẹban̄a ukara esie eke heaven.

Ke uwụtn̄kpọ, kere ban̄a ekikere eyen ukpepn̄kpọ Germany oro Gerd Lüdemann, prọfesọ Obufa Testament onyụn̄ edide andiwet n̄wed oro What Really Happened to Jesus—A Historical Approach to the Resurrection. Enye afan̄a nte ke ediset ke n̄kpa Jesus edi “ikọ oro mînyeneke isọn̄” oro anade owo ekededi oro enyenede “ekikere ifiọk ntaifiọk ererimbot,” esịn.

 Prọfesọ Lüdemann ọsọn̄ọ ọdọhọ ete ke Christ oro ẹnamde eset emi apostle Peter okokụtde ekedi n̄kukụt oro okotode Peter ndidu ke ọkpọsọn̄ mfụhọ ye ubiomikpe ke ntak edikan̄ Jesus. Ndien nte Lüdemann ọdọhọde, se iban̄ade Jesus ndiyarade idem n̄wụt mme andinịm ke akpanikọ ẹwakde ẹbe owo 500 ke idaha kiet ekedi “n̄kukụt otuowo.” (1 Corinth 15:5, 6) Ke ibio ibio, ediwak nditọ ukpepn̄kpọ ẹnam mme mbụk Bible ẹban̄ade ediset ke n̄kpa Jesus ẹkabade ẹdi udịm udịm ekikere idemowo oro ẹkenamde mme mbet ẹnyene obufa uko eke spirit ye ifịk isụn̄utom.

Nte ededi, ediwak owo ẹnyene esisịt udọn̄ ke eneni akwaifiọk. Edi, ana kpukpru nnyịn inyene udọn̄ ke nneme aban̄ade ediset ke n̄kpa Jesus. Ntak-a? Koro edieke owo mîkanamke enye eset, Ido Ukpono Christ ọkọn̄ọ ke nsunsu itiat idakisọn̄. Ke n̄kan̄ eken, edieke ediset ke n̄kpa Jesus edide mbụk akpanikọ, Ido Ukpono Christ ọkọn̄ọ ke akpanikọ. Ke mme idaha oro, owo iwụtke kpọt nte ke se Christ ọkọdọhọde enen edi ẹwụt nte ke mme un̄wọn̄ọ esie n̄ko ẹnen. Akan oro, edieke ediset ke n̄kpa odude, n̄kpa idịghe akwa andikan edi edi asua oro ẹkemede ndikan.—1 Corinth 15:55.

[Ebiet Ẹdade Ndise Ẹto ke page 3]

Oto Self-Pronouncing Edition of the Holy Bible, esịnede King James ye mme edikabade oro Ẹfiakde Ẹtịm