“Ikọ Abasi Ọdọdiọn̄ Asuana”
“Ikọ Abasi Ọdọdiọn̄ Asuana”
“[Enye] ọdọn̄ ikọ esie utom ke isọn̄: uyo esie ọsọp ukot eti-eti.”—PSALM 147:15.
1, 2. Nso utom ke Jesus ọkọnọ mme mbet esie, ndien nso ke oro akabuana?
ẸKỤT kiet ke otu ntịn̄nnịm ikọ oro ẹkpade owo idem ẹkan ke Bible ke Utom 1:8. Esisịt ini mbemiso ọkọdọkde ke heaven, Jesus ama ọdọhọ mme anam-akpanikọ anditiene enye ete: “Mbufo ẹyebọ odudu, ke Edisana Spirit ama edi edidoro mbufo ke idem: mbufo ẹyenyụn̄ ẹdi mme ntiense Mi . . . tutu esịm utịt ererimbot.” Nso akwa utom ke emi edidi ntem!
2 Anaedi nditan̄a ikọ Abasi ke ofụri isọn̄ eketie nte ọkpọsọn̄ utom ọnọ ekpri otu mbet oro ẹkenọde utom oro. Kere se ikabuanade. Mmọ ẹkenyene ndin̄wam mme owo ẹfiọk eti mbụk Ubọn̄ Abasi. (Matthew 24:14) Nditie ntiense nnọ Jesus ama oyom n̄ko edibuana mme okopodudu ukpepn̄kpọ esie ye mbon efen ndinyụn̄ nnam udeme esie ke uduak Jehovah an̄wan̄a. N̄ko-n̄ko, utom oro ama esịne ndinam mme owo ẹdi mbet ndien ekem ẹnịm mmọ baptism. Ndien ẹkenyene ndinam emi ke ofụri ererimbot!—Matthew 28:19, 20.
3. Nso ke Jesus ọkọn̄wọn̄ọ ndinọ mme anditiene enye, ndien didie ke mmọ ẹkenam n̄kpọ ẹban̄a utom oro ẹkenọde mmọ?
3 Nte ededi, Jesus ama ọn̄wọn̄ọ ọnọ mme anditiene enye ete ke edisana spirit oyodu ye mmọ ke ndinam utom oro imọ ikọnọde mmọ. Ntem, kpa ye ubom utom oro ye ọkpọsọn̄ afai afai ukeme eke mme andibiọn̄ọ ndinam mmọ ẹkịbi inua, mme akpa mbet Jesus ẹma ẹkụt unen ke ndinam se enye eketemede. Enye edi mbụk akpanikọ oro owo mîkemeke ndineni.
4. Didie ke utom edikwọrọ ikọ ye edinọ mbon efen ukpep ẹwụt ima Abasi?
4 Ubịnikọt ukwọrọikọ ye unọ ukpep ofụri ererimbot ekedi ediwụt ima oro Abasi ekenyenede ọnọ mbon oro mîkọfiọkke enye. Ukwọrọikọ ama ọnọ mmọ ifet ndisịk n̄kpere Jehovah nnyụn̄ mbọ edifen mme idiọkn̄kpọ. (Utom 26:18) Utom edikwọrọ ikọ ye edinọ ukpep n̄ko ẹma ẹwụt ima oro Abasi amade mbon oro ẹkwọrọde etop oro, sia emi akayakde mmọ ẹwụt ima emi mmọ ẹmade Jehovah ye mme ekemmọ owo. (Matthew 22:37-39) Apostle Paul ama enen̄ede ama utom ukwọrọikọ Christian tutu enye etịn̄ aban̄a ukwọrọikọ nte “ọsọn̄-urua n̄kpọ.”—2 Corinth 4:7.
5. (a) M̀mọ̀n̄ ke nnyịn ikụt mbụk mme akpa Christian oro ẹkemede ndinen̄ede mberi edem, ndien nso n̄kọri ke ẹtịn̄ ẹban̄a do? (b) Ntak emi n̄wed Utom enyenede se ọwọrọde ọnọ mme asan̄autom Abasi mfịn?
5 Ẹkụt mbụk utom ukwọrọikọ eke mme akpa Christian oro ẹkemede ndinen̄ede mberi edem ke n̄wed Utom eke odudu spirit, emi mbet oro Luke ekewetde. Enye edi mbụk aban̄ade usọp usọp n̄kọri oro akpade owo idem. N̄kọri emi ke ifiọk Ikọ Abasi eti nnyịn aban̄a Psalm 147:15, emi ọdọhọde ete: “[Jehovah] ọdọn̄ ikọ esie utom ke isọn̄: uyo esie ọsọp ukot eti-eti.” Mbụk mme akpa Christian, oro edisana spirit ọkọnọde odudu, esịn idem aduai owo onyụn̄ enen̄ede enyene se ọwọrọde ọnọ nnyịn mfịn. Nnyịn Mme Ntiense Jehovah ibuana ke ukem utom edikwọrọ ikọ ye edinam mbet oro, edi ke udomo oro okponde akan. Nnyịn n̄ko imosobo mme ukem mfịna oro mme Christian ẹkesobode ke akpa isua ikie. Nte nnyịn ikerede iban̄a nte Jehovah ọkọdiọn̄de onyụn̄ ọnọde mme akpa Christian odudu, mbuọtidem nnyịn ke un̄wam esie ọsọn̄.
N̄kọri ke Ibat Mbet
6. Ubak udịmikọ ewe aban̄ade n̄kọri odu utịm ikata ke n̄wed Utom, ndien nso ke enye etịn̄ aban̄a?
6 Usụn̄ kiet ndidụn̄ọde edisu Utom 1:8 edi ndikere mban̄a ikọ oro “ikọ Abasi ọdọdiọn̄ asuana,” kpa ubak udịmikọ oro odude itie ita kpọt ke Bible, ye ata esisịt ukpụhọde, ndien ẹkụt kpukpru ke n̄wed Utom. (Utom 6:7; 12:24; 19:20) “Ikọ Ọbọn̄,” m̀mê “ikọ Abasi” ke mme ubak udịmikọ emi etịn̄ aban̄a eti mbụk—edemede-owo-udọn̄ etop akpanikọ Abasi, odu-uwem, okopodudu etop oro okokpụhọrede uwem mbon oro ẹkenyịmede enye.—Mme Hebrew 4:12.
7. Ẹda n̄kọri ikọ Abasi ẹkebuan ye nso ke Utom 6:7, ndien nso iketịbe ke usen Pentecost 33 E.N.?
7 Akpa editịn̄ mban̄a n̄kọri ikọ Abasi edi ke Utom 6:7. Do nnyịn ikot ite: “Ndien ikọ Abasi ọdọdiọn̄ asuana; ibat mbet onyụn̄ ọtọt ke Jerusalem eti-eti; ediwak mme oku ẹnyụn̄ ẹsụk ibuot ẹnọ akpanikọ.” Mi, ẹda n̄kọri ẹkebuan ye ibat mbet nditọt. Mbemiso, ke usen Pentecost 33 E.N., ẹma ẹn̄wan̄a edisana spirit Abasi ẹduọk n̄kpọ nte mbet 120 oro ẹkesopde idem ke ubet enyọn̄. Ekem apostle Peter ama ọnọ aduai-owo-idem utịn̄ikọ, ndien ke otu mbon oro ẹkekpan̄de utọn̄, n̄kpọ nte owo 3,000 ẹma ẹkabade ẹdi mme andinịm ke akpanikọ ke usen oro. Anaedi ọkpọsọn̄ editịm ama odu nte ediwak tọsịn owo ẹkebụn̄ọde ẹka n̄kpọdiọhọ mmọn̄ m̀mê mme n̄kpọdiọhọ mmọn̄ ke esịt ye ke mbọhọ Jerusalem ndikana baptism ke enyịn̄ Jesus, kpa owo oro ẹkekọn̄de ke eto nte abiatibet ke n̄kpọ nte usen 50 ke mbemiso!—Utom 2:41.
8. Didie ke ibat mbet ọkọtọt ke mme isua ẹtienede Pentecost 33 E.N.?
8 Nte ededi, oro ekedi ntọn̄ọ kpọt. N̄kaiso ukeme eke mme adaiso ido ukpono mme Jew nditre utom ukwọrọikọ ekedi ikpîkpu. Ke mme adaiso ido ukpono oro ẹkpude, ‘Jehovah ama ada mmọ emi ẹnyanyan̄a adian ye mme mbet ke usen ke usen.’ (Utom 2:47) Ikebịghike, “ibat ikọt Abasi [ama] ọkọri ekpere ndisịm thousand owo ition.” Ke oro ebede, “mmọ eke ẹnịmde ke akpanikọ ẹdiana ye Ọbọn̄ ẹdọdiọn̄ ẹwak, mme otu owo, iren ye iban.” (Utom 4:4; 5:14) Kaban̄a ukperedem, nnyịn ikot ite: “Ntre ke ufọk Abasi ke ofụri Judea ye Galilee ye Samaria okụt ifụre, onyụn̄ ọkọri ke uwem Abasi; mbon Ufọk Abasi ẹnyụn̄ ẹsan̄a ke uten̄e Jehovah ye ke ndọn̄esịt Edisana Spirit, ẹnyụn̄ ẹtọt eti-eti.” (Utom 9:31) Ndusụk isua ke ukperedem, eyedi n̄kpọ nte 58 E.N., ẹma ẹtịn̄ ẹban̄a “uwak thousand owo emi ẹnịmde ke akpanikọ.” (Utom 21:20) Ke ini oro, ediwak Gentile oro ẹnịmde ke akpanikọ ẹma ẹdu n̄ko.
9. Afo ọkpọdọhọ ke mme akpa Christian ẹketie didie?
9 Mme andikabade esịt ẹkenen̄ede ẹnam ibat emi ọkọri. Ido ukpono oro ekedi obufa—edi enye ama okop odudu. Utu ke ndidi mme ndebe ndebe mbon ufọkabasi, mme mbet ẹma ẹyak idem ofụri ofụri ẹnọ Jehovah ye Ikọ esie, sia ẹkekpepde akpanikọ ndusụk ini ẹto mbon oro ẹkekọbọde idiọk idiọk. (Utom 16:23, 26-33) Mbon oro ẹkenyịmede Ido Ukpono Christ ẹkenam ntre nte utịp ubiere oro ẹketịmde-tịm ẹkere, oro ọkọkọn̄ọde ke ubieresịt. (Rome 12:1, NW) Ẹma ẹkpep mmọ usụn̄ Abasi; akpanikọ ama odụk ekikere ye esịt mmọ. (Mme Hebrew 8:10, 11) Mmọ ẹma ẹnyịme ndikpa mban̄a se mmọ ẹkenịmde ke akpanikọ.—Utom 7:51-60.
10. Nso mbiomo ke mme akpa Christian ẹkenyịme, ndien nso mbiet ke nnyịn ikụt mfịn?
10 Mbon oro ẹkenyịmede ukpepn̄kpọ Christian ẹma ẹdiọn̄ọ mbiomo mmọ ndibuana akpanikọ ye mbon efen. Emi ama etịp esịn nnennen nnennen ke n̄kaiso n̄kọri ke ibat. Eyen ukpepn̄kpọ Bible kiet ọkọdọhọ ete: “Owo ikadaha edikwọrọ mbuọtidem nte se ẹnịmde ẹnọ mme enyene-ifịk m̀mê mme ọkwọrọikọ oro ẹmekde-mek. Ukwọrọikọ ekedi ifet ye utom kpukpru mme andibuana ke Ufọkabasi. . . . Kpukpru Christian ndinyịme ndinọ idemmọ ama ọnọ n̄ka oro akwa odudu toto ke ata ntọn̄ọ.” Enye ama aka iso ewet ete: “Ukwọrọikọ ekedi uwem mme akpa Christian.” Ntre ke edi ye mme ata Christian mfịn.
N̄kọri ke Ibat Idụt
11. Nso orụk n̄kọri ke ẹtịn̄ ẹban̄a ke Utom 12:24, ndien didie ke emi eketịbe?
11 Ẹkụt udiana editịn̄ mban̄a n̄kọri ikọ Abasi ke Utom 12:24: “Ikọ Abasi ọkọri, onyụn̄ ọdọdiọn̄ asuana.” Mi ẹda ubak udịmikọ emi ẹkebuan ye n̄kọri ke ibat idụt. Kpa ye oro ukara ọkọbiọn̄ọde, utom oro ama aka iso ndikụt unen. Ẹkebem iso ẹn̄wan̄a edisana spirit ẹduọk ke Jerusalem, ndien ọtọn̄ọde do ikọ Abasi ama asuana usọp usọp. Ukọbọ ke Jerusalem ama anam mme mbet ẹsuana ke ofụri n̄kann̄kụk Judea ye Samaria. Nso ikedi utịp? “Mmọ eke ẹsuanade ẹsan̄a ke ebiet ke ebiet ẹkwọrọ gospel.” (Utom 8:1, 4) Ẹma ẹda Philip usụn̄ ndinọ eren kiet ikọ ntiense, kpa eren oro akadade etop oro aka Ethiopia ke ama akana baptism. (Utom 8:26-28, 38, 39) Akpanikọ ama omụm n̄kam usọp usọp ke Lydda, Unaisọn̄ Sharon, ye Joppa. (Utom 9:35, 42) Ke ukperedem, apostle Paul ama asan̄a ediwak tọsịn kilomita ke inyan̄ ye obot, ọtọn̄ọde mme esop ke ediwak idụt Mediterranean. Apostle Peter ama aka Babylon. (1 Peter 5:13) Ke ufan̄ isua 30 ke ẹma ẹken̄wan̄a edisana spirit ẹduọk ke Pentecost, Paul ama ewet ete ke ẹma ‘ẹkwọrọ gospel ẹnọ kpukpru owo ke idak ikpa-enyọn̄,’ eyedi enye eketịn̄ aban̄a ererimbot oro ẹkediọn̄ọde ini oro.—Colossae 1:23.
12. Didie ke mme andibiọn̄ọ Ido Ukpono Christ ẹkenyịme nte ke ikọ Abasi ama asuana ke ediwak idụt?
12 Idem mme andibiọn̄ọ Ido Ukpono Christ ẹma ẹnyịme ẹte ke ikọ Abasi ama asuana ke ofụri Obio Ukara Rome. Ke uwụtn̄kpọ, Utom 17:6 ọdọhọ ete ke Thessalonica, edere edere Greece, mme andibiọn̄ọ ẹma ẹfiori ẹte: “Mme anditịmede ererimbot emi ẹdi mi n̄ko- o.” Ke adianade do, ke ntọn̄ọ ntọn̄ọ ọyọhọ isua ikie iba, Ekpri Pliny ama etie ke Bithynia ewet n̄wed ọnọ ẹsọk Akwa Edidem Rome oro Trajan aban̄a Ido Ukpono Christ. Enye ama ọtọt ete: “[Enye] isuanake ke ikpọ obio kpọt, edi odudu esie asuana ke otu n̄kpet n̄kpet obio-in̄wan̄ ye idụt.”
13. Ke nso usụn̄ ke n̄kọri ke ibat idụt okowụt ima oro Abasi enyenede ọnọ ubonowo?
13 N̄kọri emi ke ibat idụt ekedi ediwụt ntotụn̄ọ ima oro Jehovah enyenede ọnọ ubonowo oro odotde ẹnyan̄a. Ke ini Peter okokụtde nte edisana spirit anamde utom ke idem Cornelius owo Gentile, enye ama ọdọhọ ete: “Ke akpanikọ mmokụt nte Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.” (Utom 10:34, 35) Ih, eti mbụk ekedi onyụn̄ edi etop ofụri owo, ndien ikọ Abasi ndisuana ke ediwak idụt ama ọnọ mme owo ke kpukpru itie ifet ndinam n̄kpọ mban̄a ima Abasi. Ke ọyọhọ isua ikie 21 emi, ikọ Abasi asuana ke ata ata usụn̄ esịm ofụri ikpehe isọn̄.
N̄kọri Oro Akakarade
14. Nso orụk n̄kọri ke ẹtịn̄ ẹban̄a ke Utom 19:20, ndien ikọ Abasi akakan nso?
14 Ọyọhọ ikata oro ẹtịn̄de ẹban̄a n̄kọri ikọ Abasi edi ke Utom 19:20: “Ikọ Ọbọn̄ ọkọri ọkpọsọn̄, onyụn̄ akara.” Akpasarade ikọ Greek oro ẹkabarede “ndikara” ọnọ ekikere aban̄a “ndikan.” Mme ufan̄ikọ oro ẹbemde iso ẹtịn̄ ẹte ke ediwak owo ke Ephesus ẹma ẹkabade ẹdi mme andinịm ke akpanikọ, ndien ediwak mbon oro ẹkekam ẹbrede idiọn̄ ẹma ẹfọp mme n̄wed mmọ ke iso kpukpru owo. Ntem, ikọ Abasi ama akan mme nsunsu edinịm ke akpanikọ eke ido ukpono. Eti mbụk n̄ko ama akan mme n̄kpọ ubiọn̄ọ efen, utọ nte ukọbọ. N̄kpọ ndomokiet ikekemeke nditre enye. Ke emi nnyịn imafiak ikụt n̄wọrọnda mbiet ata Ido Ukpono Christ ke eyo nnyịn.
15. (a) Nso ke ewetmbụk Bible kiet ekewet aban̄a mme akpa Christian? (b) Anie ke mme mbet ẹkenọ itoro ke unen oro mmọ ẹkekụtde?
15 Mme apostle ye mme akpa Christian eken ẹma ẹtan̄a ikọ Abasi ye ifịk. Ewetmbụk Bible kiet eketịn̄ aban̄a mmọ ete: “Ke ini mme owo ẹbierede nditịn̄ mban̄a Ọbọn̄ mmọ, mmọ isinanake usụn̄ ndinam oro. Ke akpanikọ, edi ubiere iren ye iban emi otụk nnyịn akan mme usụn̄ ukwọrọikọ mmọ.” Edi, mme akpa Christian oro ẹma ẹfiọk ẹte ke unen oro mmimọ ikokụtde ke utom ukwọrọikọ mmimọ ikọkọn̄ọke ke ukeme mmimọ ikpọn̄. Abasi ọkọdọn̄ mmọ ete ẹnam utom oro, ndien mmọ ẹma ẹnyene ibetedem Abasi man ẹnam enye. N̄kọri eke spirit oto Abasi. Apostle Paul ama enyịme emi ke leta oro enye ekewetde ọnọ ẹsọk esop Corinth. Enye ekewet ete: “Ami n̄kọtọ, Apollos ọkọbọk ke mmọn̄; edi n̄kọri oto Abasi. Koro nnyịn isan̄a ikpat kiet idi mme anam-utom Abasi.”—1 Corinth 3:6, 9.
Edisana Spirit ke Anam Utom
16. Nso iwụt nte ke edisana spirit ama ọnọ mme mbet odudu nditịn̄ ikọ ye uko?
16 Ti ete ke Jesus ama ọn̄wọn̄ọ ọnọ mme mbet esie ete ke edisana spirit eyenyene udeme ke n̄kọri ikọ Abasi ye nte ke edisana spirit ọyọnọ mme mbet odudu ke utom ukwọrọikọ mmọ. (Utom 1:8) Didie ke emi eketịbe? Ikebịghike ke ẹma ẹken̄wan̄a edisana spirit ẹduọk mme mbet ke Pentecost, ẹma ẹkot Peter ye John ẹditịn̄ ikọ ẹnọ Sanhedrin mme Jew, n̄kponn̄kan esopikpe ke idụt oro, emi mme ebiereikpe esie ẹkenyenede nduduọhọ ediwot Jesus Christ. Nte mme apostle oro ẹyekop ndịk ke iso utọ enyene-uten̄e ye otuowo edide mbon usua do? N̄wan̄ansa-o! Edisana spirit ama ọnọ Peter ye John odudu nditịn̄ ikọ ye uko oro akanamde idem akpa mme andibiọn̄ọ mmọ, “mmọ ẹnyụn̄ ẹkabade ẹfiọk ẹte mmọ oro ẹkedu ye Jesus.” (Utom 4:8, 13) Edisana spirit n̄ko ama anam Stephen ọnọ Sanhedrin ikọ ntiense uko uko. (Utom 6:12; 7:55, 56) Ke mbemiso, edisana spirit ama onụk mme mbet ndikwọrọ ikọ ye uko. Luke ọtọt ete: “Ke mmọ ẹma ẹkebọn̄ akam ẹma, ufọk emi mmọ ẹbonode ke esịt enyek; ndien kpukpru mmọ ẹyọhọ ye Edisana Spirit, ẹnyụn̄ ẹtịn̄ ikọ Abasi uko-uko.”—Utom 4:31.
17. Ke mme usụn̄ efen ewe ke edisana spirit akan̄wam mme mbet ke utom ukwọrọikọ mmọ?
17 Ebede ke okopodudu edisana spirit esie, Jehovah, ke adianade ye Jesus oro ẹnamde eset ke n̄kpa, ama ọnọ utom ukwọrọikọ ndausụn̄. (John 14:28; 15:26) Ke ẹma ẹken̄wan̄a edisana spirit ẹduọk Cornelius, mme iman esie, ye mme n̄kpet n̄kpet ufan esie, apostle Peter ama ọfiọk ete ke mme Gentile oro mînaha mbobi ẹma ẹkeme ndidot ndina baptism ke enyịn̄ Jesus Christ. (Utom 10:24, 44-48) Ke ukperedem, spirit ama enyene akpan udeme ke edimek Barnabas ye Saul (apostle Paul) kaban̄a utom isụn̄utom ye ke nditeme mmọ ebiet emi mmọ ẹkpekade ye ebiet emi mmọ mîkpakaha. (Utom 13:2, 4; 16:6, 7) Enye ama ada mme apostle ye mbiowo ke Jerusalem usụn̄ ke ndutịm edinam ubiere. (Utom 15:23, 28, 29) Edisana spirit n̄ko ama ada usụn̄ ke edimek mme esenyịn ke esop Christian.—Utom 20:28.
18. Didie ke mme akpa Christian ẹkewụt ima?
18 Ke adianade do, uyarade edisana spirit ama odu n̄ko ke idem mme Christian, anamde mmọ ẹnyene mme edu Abasi, utọ nte ima. (Galatia 5:22, 23) Ima okonụk mme mbet ndibuana n̄kpọ ye kiet eken. Ke uwụtn̄kpọ, ke Pentecost eke 33 E.N. ebede, ẹma ẹtọn̄ọ etịbe ndida nse mban̄a se mme mbet ke Jerusalem ẹkeyomde ke n̄kan̄ eke obụk. Mbụk Bible oro ọdọhọ ete: “Owo eke odude ke unana idụhe ke otu mmọ: koro mmọ emi ẹnyenede in̄wan̄ m̀mê ufọk ẹnyam mmọ, ẹnyụn̄ ẹda ekọm-urua ẹdi ẹdinịm mme apostle ke ukot: ndien ẹdeme ẹnọ owo kiet kiet nte unana esie edide.” (Utom 4:34, 35) Idịghe mme ekemmọ andinịm ke akpanikọ kpọt ke ima emi akatara esịm edi ama atara esịm mbon en̄wen n̄ko, ebe ke edibuana eti mbụk ye ke mme edinam mfọnido eken. (Utom 28:8, 9) Jesus ọkọdọhọ ete ke ẹdida ima n̄waidem ẹfiọk mme anditiene imọ. (John 13:34, 35) Ke akpanikọ, akpan edu edide ima ama odụri mme owo ọsọk Abasi onyụn̄ etịp esịn ke n̄kọri ke akpa isua ikie kpa nte anamde mfịn.—Matthew 5:14, 16.
19. (a) Ke ewe usụn̄ ita ke ikọ Jehovah ọkọkọri ke akpa isua ikie? (b) Nso ke nnyịn ididụn̄ọde ke ibuotikọ oro etienede?
19 Ke ofụri ofụri, ikọ Greek emi ọwọrọde “edisana spirit” odu utịm ike 41 ke uwetn̄kpọ akpasarade usem ke n̄wed Utom. Nte an̄wan̄ade, n̄kọri mme ata Christian ke akpa isua ikie ekenyene n̄kpet n̄kpet ebuana ye odudu ye ndausụn̄ edisana spirit. Ibat mbet ama ọkọri, ikọ Abasi ama asuana esịm akamba ikpehe, ndien enye ama akan mme ido ukpono ye ukpepn̄kpọ akwaifiọk eke ini oro. Ẹkụt mbiet n̄kọri akpa isua ikie emi ke utom Mme Ntiense Jehovah mfịn. Ke ibuotikọ oro etienede, nnyịn iyodụn̄ọde ukem n̄wọrọnda n̄kọri ikọ Abasi oro ke eyomfịn.
Nte Afo Emeti?
• Didie ke mme akpa mbet ẹkekọri ke ibat?
• Ke usụn̄ ewe ke ikọ Abasi akasuana ke ediwak idụt?
• Didie ke ikọ Abasi akakara ke akpa isua ikie?
• Nso udeme ke edisana spirit ekenyene ke n̄kọri ikọ Abasi?
[Mme Mbụme Ukpepn̄kpọ]
[Ndise ke page 12]
Philip ama ọkwọrọ ikọ ọnọ owo Ethiopia, asuande eti mbụk ke ediwak idụt
[Ndise ke page 13]
Edisana spirit ama ọnọ mme apostle ye mbiowo ke Jerusalem ndausụn̄
[Ebiet Ẹdade Ndise Ẹto ke page 10]
Enyọn̄ enyọn̄ inụk nnasia: Mbiet Obio Jerusalem ke ini Udiana Temple–emi okodude ke n̄kann̄kụk Ufọkisen Holyland, Jerusalem.