Nsụkibuot—Akpan Ukpepn̄kpọ Ini Uyen?

“MME Ete ye Eka Ẹyom Mbon Oro Ẹdade ke Idem, Idịghe Nditọ Oro Ẹsụkde Ibuot Kpọt.” Ntem ke akpan ibuotikọ n̄wedmbụk n̄kpọntịbe kiet ọkọdọhọ. Ekpri ntọt emi ọkọkọn̄ọ ke mme utịp ndụn̄ọde oro ẹkenamde ke New Zealand, emi akayararede nte ke “mbahade 22 eke ikie kpọt ke otu mbon oro ẹkedade ẹnam ndụn̄ọde ẹkekere ke ẹkpenyene ndikpep nditọ nsụkibuot ke ufọk.” Ndụn̄ọde oro ama ayarade n̄ko nte ke mme ete ye eka mfịn ẹnịm ke akpanikọ ẹte ke ndikpep nditọ mme utọ n̄kpọ nte nti edu, nda-ke-idem, ye edibiom mbiomo enen̄ede edi akpan n̄kpọ akan.

Ke emana nda-ke-idem ye udọn̄ idemowo emi, idịghe n̄kpọ n̄kpaidem nte ke ata ediwak owo inyeneke in̄wan̄-in̄wan̄ ekikere iban̄a nsụkibuot ye edida enye n̄kpep nditọ. Edi nte ẹkpenyene ndise nsụkibuot ini uyen nte ido eset? Mîdịghe nte enye odu ke otu akpan ukpepn̄kpọ oro nditọ ẹkemede ndikpep nnyụn̄ mbọ ufọn nto? Ke edide akpan n̄kpọ akan, didie ke Jehovah Abasi, Anditọn̄ọ ndutịm ubon, ese edisụk ibuot nnọ ete ye eka, ndien nso idi ndusụk ufọn oro ẹsisụn̄ọde ẹto utọ nsụkibuot oro?—Utom 17:28; Ephesus 3:14.

“Koro Emi Enende”

Apostle Paul ekewet ọnọ esop Christian akpa isua ikie ke Ephesus ete: “Nditọ, ẹkop uyo mme ete ye mme eka mbufo ke Ọbọn̄; koro emi enende.” (Ephesus 6:1) Ntem, akpan ntak kaban̄a utọ nsụkibuot oro edi nte ke enye odu ke n̄kemuyo ye idaha Abasi kaban̄a se inende. Nte Paul ekesịnde enye, ‘emi edi se inende.’

Ke n̄kemuyo ye emi, nnyịn imokụt nte ke Ikọ Abasi etịn̄ aban̄a ntụnọ oro ete ye eka ẹnọde ke ima nte ediye n̄kpọmbana, “ediye anyanya ke ibuot fo, ye obukpe ke itọn̄ fo,” ye nte n̄kpọ “emi enemde Ọbọn̄ esịt.” (Mme N̄ke 1:8, 9; Colossae 3:20) Ke edide ata isio ye oro, nsọn̄ibuot ye ete ye eka anam owo etre ndinyene unyịme Abasi.—Rome 1:30, 32.

“Man Ọkpọfọn ye Afo”

Paul ama owụt ufọn nsụkibuot efen ke ini enye ekewetde ete: “Kpono usọ ye uka (emi edi akpa ibet eke asan̄ade ye un̄wọn̄ọ), man ọkpọfọn ye afo, afo okponyụn̄ odu uwem ebịghi ke isọn̄.” (Ephesus 6:2, 3; Exodus 20:12) Ke mme usụn̄ ewe ke edisụk ibuot nnọ ete ye eka ekeme ndisụn̄ọ ke mfọnọn̄kpọ owo?

Akpa kan̄a, nte idịghe akpanikọ nte ke mme ete ye eka ẹdu uwem ẹbịghi ẹnyụn̄ ẹnyene ifiọk ẹkan? Okposụkedi ekemede nditie nte ke mmọ inyeneke ekese ifiọk iban̄a kọmputa m̀mê ndusụk ukpepn̄kpọ en̄wen oro ẹkpepde ke ufọkn̄wed, mmọ ẹnyene ekese ifiọk ẹban̄a uwem ye nte ẹyọde mme mfịna uwem. Ke n̄kan̄ eken, n̄kparawa owo ẹnana ekikere oro adade ukem ukem oro esisan̄ade ye edikọri nsịm ọyọhọ idaha. Ntem, mmọ ẹsiwak ndinam mme ubiere ibụmede ibụmede, ediwak ini ẹyakde idem ẹnọ idiọk mfịghe ubọkn̄ka, oro esinọde mmọ ekese unan. Bible etịn̄ nte enende ete: “Ndisịme ido eyịre ke esịt  eyenọwọn̄.” Nso idi usọbọ? “Eto item eyebịn enye efep ọkpọn̄ enye anyan usụn̄.”—Mme N̄ke 22:15.

Mme ufọn nsụkibuot ẹka anyan ẹkan itie ebuana ete m̀mê eka ye eyen. Man n̄kaowo asan̄a nte ọfọnde onyụn̄ oforo, ana edidianakiet odu, emi ke n̄kan̄ eken oyomde ndusụk udomo nsụkibuot. Ke uwụtn̄kpọ, ke ndọ, edi ndinyịme nnọ, utu ke nditie uyịre uyịre nnyụn̄ n̄wụt unana edikere mban̄a mme unen ye ntụk mbon en̄wen, esisụn̄ọ ke emem, n̄kemuyo, ye inemesịt. Ke itieutom, nsụkibuot edi akpan n̄kpọ ke mbubehe m̀mê utom ekededi ndikụt unen. Ke ebuana ye mme ibet ye ewụhọ ukara, nsụkibuot isinamke owo ọbọhọ ufen kpọt edi n̄ko esida ke nsụhọde n̄kaha ndusụk ifụre ye ukpeme edi.—Rome 13:1-7; Ephesus 5:21-25; 6:5-8.

N̄kparawa owo oro ẹsisọn̄de ibuot ye ukara ẹsiwak ndikabade ndi mbon oro mîdotke ke obio. Ke edide isio, ukpepn̄kpọ nsụkibuot oro ẹkebọde ke ini uyen ekeme ndinọ utịp ke ofụri eyouwem owo. Ọfọn didie ntem ndikpep emi ke ini uyen!

Akwa Utịp Nsụkibuot

Nsụkibuot isidaha inem inem itie ebuana ubon ye mme ufọn ofụri eyouwem eken kpọt idi edi n̄ko esisịn itiat idakisọn̄ oro ẹkemede ndibọp ata akpan itie ebuana oro akande kpukpru ndori—enyeoro odude ke ufọt owo ye Andibot esie. Nte “Andibot” emi “obube mmọn̄ uwem” odude ye enye, Jehovah Abasi odot ndibọ ọyọhọ nsụkibuot nnyịn.—Ecclesiastes 12:1; Psalm 36:9.

Ikọ oro “sụk ibuọt” ke nsio nsio orụk esie odu awak ebe utịm ike 160 ke Bible. Adianade do, ẹtịn̄ ẹtụk mme ibet, mme item, mme ewụhọ, mme ikpe, ye mme edumbet Abasi ke ediwak itie ikie, emi kpukpru ẹyomde nsụkibuot. Nnyịn inyeneke eyịghe ndomokiet nte ke Abasi ese nsụkibuot nte se ẹyomde man ẹnyene unyịme esie. Ih, nsụkibuot edi n̄kpọ oro owo mîkemeke ndifụmi ke ndikọri eti itie ebuana ye Jehovah. (1 Samuel 15:22) Ke mfụhọ, ndammana ntụhọ owo idịghe ndisụk ibuot edi edi ndisọn̄ ibuot. Bible ọdọhọ ete: “Ekikere esịt owo [ọdiọk] toto ke uyen esie.” (Genesis 8:21) Ke ntre, owo inyeneke ndikpep nsụkibuot n̄kukụre ke ini uyen edi ẹnyene ndikpep ke ofụri eyouwem. Ndinam ntre ada akwa utịp edi.

Ti ete, nte apostle Paul eketịn̄de, ewụhọ ndisụk ibuot nnọ ete ye eka asan̄a ye adiana-iba un̄wọn̄ọ, oro edi, “man ọkpọfọn ye afo, afo okponyụn̄ odu uwem ebịghi ke isọn̄.” (Sịghisịghi ubọkn̄wed edi eke nnyịn.) Ẹsọn̄ọ un̄wọn̄ọ emi ke Mme N̄ke 3:1, 2: “Eyen mi, kûfre mbet mi; edi yak esịt fo ekpeme mme ewụhọ mi: Koro ẹyekọrọ anyan usen, ye isua uwem, ye ifụre ẹnọ fi.” Akwa utịp oro ẹnyenede mbon oro ẹsụkde ibuot edi ọkpọkpọ itie ebuana ye Jehovah idahaemi ye nsinsi uwem ke emem emem obufa ererimbot.—Ediyarade 21:3, 4.

[Ndise ke page 30, 31]

Nsụkibuot esinam owo enyene inem inem itie ebuana ke ubon, ke itieutom, onyụn̄ enyene ye Jehovah