Itie Ebuana Ofụri Ererimbot Oro Esede Aban̄a Kiet Eken

ADAN̄A nte enyịn ekemede ndikụt, mme owo ẹdu. Ediwak mmọ ẹdi mbonusọn̄, emi ndusụk ẹbiomode ndo tutu ikemeke ndisan̄a isan̄. Iban idịbi ye mbufa mme ọdọ ndọ oro ẹkamade n̄kpri nditọ ẹdu. Kpukpru mmọ ẹdi mbon itọkekọn̄—iren, iban, ye nditọwọn̄—oro ẹfen̄ede ẹkpọn̄ ufọk mmọ ẹka ndiyom ubọhọ ke n̄kpet n̄kpet idụt ke ntak ekọn̄ mbio obio, mme oto-obot afanikọn̄, m̀mê mme idaha eken. Ẹnyịk ndusụk mmọ ndiwọrọ n̄kpọn̄ mme itieidụn̄ mmọ ediwak ini. Ke akpa ini oro ẹkụtde idiọn̄ọ ndutịme mbio obio m̀mê oto-obot afanikọn̄, mmọ ẹtan̄ n̄kpọ ndụn̄ufọk ifan̄, ẹtan̄ nditọ mmọ, ẹnyụn̄ ẹfen̄e ẹkeyom itie ubọhọ. Ekem, ke ini mme idaha ẹnade sụn̄, ediwak mbon itọkekọn̄ ẹfiak ẹkebọp ufọk mmọ ẹnyụn̄ ẹfiak ẹtọn̄ọ uwem.

Ke ediwak isua oro ẹkebede, mbon itọkekọn̄ ẹtode ediwak idụt ẹmebụn̄ọ ẹdụk Central African Republic. Ke ndondo emi, ẹma ẹnyịk ediwak tọsịn owo, esịnede ediwak ke otu Mme Ntiense Jehovah, ndifen̄e n̄wọn̄ọ ke Democratic Republic of Congo oro ekọn̄ ọnọmọde n̄ka Central African Republic oro esisịt ifụre odude.

Nditọete Ẹnọ Un̄wam

Mme Ntiense ke Central African Republic ẹkeda edinam ndutịm unọ un̄wam nte akwa ifet. Ẹma ẹyom mme itieidụn̄ ẹnọ nditọete Christian oro ẹkedide ẹdibehe. Ke akpa, ẹma ẹkụt mme ubet ke mme ufọk owo, edi nte ibat mbon itọkekọn̄ ọkọkọride, ama ana in̄wan̄-in̄wan̄ nte ke oyom ẹnam akamba ndutịm efen efen. Ẹma ẹnam ndusụk Ufọkmbono Obio Ubọn̄ ẹkabade ẹdi ufọkidụn̄ otuowo. Mme Ntiense n̄kann̄kụk ẹma ẹtọn̄ọ utom edisịn ikan̄ efen efen, ẹsịn mmọn̄ esan̄ukwak, ẹnyụn̄ ẹyọn̄ọ isọn̄ man mbon oro ẹdidụn̄de ẹkpekop inem. Mbon itọkekọn̄ oro ẹma ẹdiana ye nditọete n̄kann̄kụk ẹnam utom ndiwụk mme ufọkidụn̄ otuowo ibio ini emi. Ẹma ẹdiomi ọyọhọ ndutịm mbono esop Christian ke usem Lingala man ẹkeme ndinọ mme andibehe enịm-uwem udia eke spirit. Edidianakiet ke ufọt Mme Ntiense n̄kann̄kụk ye isenowo mmọ ama owụt nte ke itie ebuana nditọete ofụri ererimbot edi ata idem n̄kpọ.

Mme ubon mbon itọkekọn̄ ikesiwakke ndibehe ọtọkiet. Ke ndusụk idaha, mbonubon oro ẹma ẹkesuana ẹkesifiak ẹdiana kiet ke ebiet mmọ ẹkade. Ẹma ẹwet enyịn̄ mbon oro  ẹkedide ẹdibehe ke ifụre ẹnịm ke Ufọkmbono Obio Ubọn̄ kiet kiet. Ẹma ẹnam ndutịm man ẹyom mbon oro owo mîkosụk ikwe. N̄kọk itieutom oro esede aban̄a utom Mme Ntiense Jehovah ke idụt oro ama esinọ ubomisọn̄ ita ke usen man ẹda ẹn̄wam Mme Ntiense oro ẹkesụk ẹdide ke usụn̄ ẹnyụn̄ ẹyom owo ekededi oro okosopde. Ẹma ẹdian akamba idiọn̄ọ, oro ọkọdọhọde “WATCH TOWER—Mme Ntiense Jehovah” ke mme ubomisọn̄ emi.

Kere ban̄a idatesịt oro okodude ke ini nditọ itọkekọn̄ itiaba oro ẹkedian̄arede ẹkpọn̄ ete ye eka mmọ ẹkekụtde ubomisọn̄ ekenyenede Mme Ntiense Jehovah. Mmọ ẹma ẹsọsọp ẹfen̄e ẹbịne ubomisọn̄ oro ẹnyụn̄ ẹkenam ẹdiọn̄ọ mmọ nte Mme Ntiense. Nditọete ẹma ẹn̄wam mmọ ndidụk ubomisọn̄ oro ẹnyụn̄ ẹda mmọ ẹka Ufọkmbono Obio Ubọn̄, ebiet emi mmọ ẹkefiakde ẹdiana ye ubon mmọ ke akpatre.

Nso in̄wam mme ata Christian emi ndiyọ mme utọ idaha oro, idịghe ini kiet kpọt, edi ediwak ini? Mmọ ẹnen̄ede ẹnịm ke akpanikọ ẹte ke nnyịn idu uwem ke ukperedem ini nte ẹkebemde iso ẹtịn̄ ke Edisana N̄wed Abasi.—2 Timothy 3:1-5; Ediyarade 6:3-8.

Ntem, mmọ ẹfiọk ẹte ke ibịghike Jehovah Abasi eyetre ekọn̄, usua, afai, ye en̄wan. Mfịna itọkekọn̄ edidi n̄kpọ eset. Kan̄a ke emi, ke n̄kemuyo ye item apostle Paul ke 1 Corinth 12:14-26, Mme Ntiense Jehovah ẹsidomo ndise mban̄a kiet eken. Okposụkedi inyan̄, adan̄a obio, usem, ye anyan usụn̄ ẹbaharede mmọ, mmọ ẹkere ẹban̄a kiet eken, ntre mmọ ẹsinam n̄kpọ usọp usọp ke ini owo osobode unana.—James 1:22-27.

[Ndise obio ke page 30]

(Ama oyom ndikụt nte enye enen̄erede etie, se n̄wed)

AFRICA

Central African Republic

Democratic Republic of Congo

[Ebiet Ẹdade N̄kpọ Ẹto]

Mountain High Maps® Copyright © 1997 Digital Wisdom, Inc.

[Mme ndise ke page 30]

Ẹma ẹda Ufọkmbono Obio Ubọn̄ ita ẹnam n̄kpọ nte itie udara isenowo

[Ndise ke page 31]

Ẹma ẹwụk mme itie utem udia usọp usọp

[Ndise ke page 31]

Mme owo efen efen ẹma ẹdibehe

[Mme ndise ke page 31]

Ẹmana obufa ẹnyụn̄ ẹkabade ẹdi nditọ itọkekọn̄