Ẹdat Esịt ke Idotenyịn Obio Ubọn̄!

EKEDI edinam idatesịt oro owo 5,784 ẹkesopde idem ke March 10, 2001, ke okụre ita oro enyenede akwa ubon Bethel ke Stet New York. Enye ekedi edinam ukụre ukpep ọyọhọ otu 110 eke ufọkn̄wed isụn̄utom Gilead.

Carey Barber, owo Otu Ukara eke Mme Ntiense Jehovah, ama ọkọm kpukpru owo onyụn̄ eberede edinam oro, ọdọhọde ete: “Nnyịn imadat esịt ndifiọk nte ke ẹnọ ọyọhọ otu nditọ ufọkn̄wed Gilead 110 ukpep idahaemi nte mme isụn̄utom ẹnyụn̄ ẹnọ mmọ ẹka mme efakutom ke ofụri ererimbot.”

Nte Ẹkemede Ndika Iso Ndat Esịt

Ke Brọda Barber okụrede ntọn̄ọikọ esie, Don Adams ama etịn̄ ikọ ọnọ otuowo, esịnede nditọ ufọkn̄wed 48 oro ẹkụrede ukpep, ke ibuotikọ oro “Ufọn Jehovah Ofori Nnyịn.” Ke ọkọn̄de utịn̄ikọ esie ke Mme N̄ke 10:22, enye ama eti otuowo ete ke Jehovah esidiọn̄ onyụn̄ omụm mme asan̄autom esie akama ke ini mmọ ẹnịmde mme ufọn n̄kpọ Obio Ubọn̄ akpa ke uwem mmọ. Enye ama esịn udọn̄ ọnọ nditọ ufọkn̄wed ete ẹnyịme obufa utom mmọ ye ukem edu unyịmesịt oro apostle Paul ekenyenede ke ini ẹkenọde enye ikot ẹte ‘ebe edi ke Macedonia edin̄wam.’ (Utom 16:9) Okposụkedi mme mfịna ẹkedude, Paul ndikenyịme ndikwọrọ ikọ ke ebiet ẹkedọn̄de enye aka ama osụn̄ọ ke akpakịp idara idara edidiọn̄.

Mme andibuana ke otu oro ẹkụrede ukpep ẹma ẹkụre ukpepn̄kpọ Bible ọfiọn̄ ition mmọ ye ubọ ukpep ke nditịm mmọ idem nnọ utom isụn̄utom. Kpa ye oro, Daniel Sydlik, owo Otu Ukara eke Mme Ntiense Jehovah, ama esịn udọn̄ ọnọ mmọ ndika iso n̄kpep n̄kpọ. Ke etịn̄de ikọ ke ibuotikọ oro “Ẹdi Mme Ata Mbet,” enye ọkọdọhọ ete: “Ndidi mbet ọwọrọ ndinam mme ikọ Jesus kpukpru ini. Enye abuana nnyịn ndinyịme ndikpan̄ utọn̄ kpukpru ini ke mme ikọ esie, ke etop esie, ye ke ukpepn̄kpọ esie.” Enye ama osio owụt nte ke mme mbet Christ isinamke ubiere ye unana edikpan̄ utọn̄ nnọ Eteufọk mmọ; ọniọn̄ Abasi edịbe Christ ke idem. (Colossae 2:3) Owo nnyịn ndomokiet ikemeke ndikop mme ikọ Jesus ini kiet ndien ekem esịm ubiere ete ke imọfiọk kpukpru n̄kpọ iban̄a enye, ntre Brọda Sydlik ama esịn udọn̄ ọnọ mme andikụre ukpep ete ẹka iso ndikpep n̄kpọ, ndida nsịn ke edinam, ndinyụn̄ n̄kpep akpanikọ Christian, emi osụn̄ọde ke ubọhọ-ufụn.—John 8:31, 32.

Man owo aka iso adat esịt ke utom Abasi, ana enye enyịme ndibọ item ye edinen̄ede. “Nte Ekpụt Mbufo Ẹyeteme Mbufo?” edi mbụme oro Lawrence Bowen, andikpep ke Gilead, okobụpde. Enye ama owụt nte ke Bible ada ndamban̄a ekpụt akabuan ye mme ntotụn̄ọ ekikere ye ntụk owo. Enye ekeme ndin̄wam ke nditeme owo edieke item eke odudu spirit otode Ikọ Abasi ebede odụk owo ọwọn̄esịt. (Psalm 16:7, NW; Jeremiah 17:10) Usụn̄ uwem edinam akpanikọ owo ekeme ndikam ntụk Jehovah ntotụn̄ọ ntotụn̄ọ. Ke ama okokot Mme N̄ke 23: 15, 16, etịn̄ikọ ama obụp ete: “Nte ekpụt mbufo ẹyeteme mbufo?” Enye ama adian do ete: “Nnyịn ibọn̄ akam ite yak mmọ ẹteme, ndien mbufo ke ntem ẹyenam Jehovah okop ọyọhọ inemesịt. Mbufo ẹyedemede mme ntotụn̄ọ ntụk esie. Ih, mbufo ẹyenam ekpụt Abasi adara nte mbufo ẹsọn̄ọde ẹdu ke efakutom mbufo.”

Mark Noumair, oro akanamde utom nte isụn̄utom ke Kenya mbemiso akabarede edi andikpep ke Gilead, ọkọnọ akpatre utịn̄ikọ ke ikpehe edinam emi. Utịn̄ikọ esie oro “Se Enyịn Okụtde Ọfọn Akan” ama owụt nte edide akpan n̄kpọ ndikọri edu edikop uyụhọ. Ke n̄kemuyo ye Ecclesiastes 6:9, Brọda Noumair ama ọdọhọ ete: “Ẹnyịme ata idem n̄kpọ. ‘Se enyịn okụtde’ edi oro. Utu ke ndinyene ndap ndap ekikere mban̄a se ẹyomde ndinam edi oro mbufo mînamke, ẹwụk ekikere ke ndida mme idaha mbufo eke idahaemi nnam se ẹkemede. Ndinyene ndap ndap ekikere, ndinyene mme idotenyịn oro mîwụtke eti ibuot, m̀mê ndiwụk ekikere ke mme ndiọi idaha ke utom mbufo n̄kukụre edinam mbufo ẹkûkop uyụhọ.” Ih, inamke n̄kpọ m̀mê mmọn̄ ke nnyịn idu mîdịghe m̀mê mme idaha nnyịn ẹtie didie, ndiyom uyụhọ otode Abasi ke mme idaha nnyịn anam inyene idara idara edu ke ndinam n̄kpọ Akwa Andibot nnyịn.

Mme Ifiọkutom Idatesịt ke Utom Obio Ubọn̄ ye ke Gilead

Ke ẹma ẹkebọ utọ nti item oro ẹto mme utịn̄ikọ oro, nditọ ufọkn̄wed ẹma ẹbụk ndusụk  ifiọkutom oro mmọ ẹkenyenede ke adan̄aemi ẹkebuanade ke an̄wan̄wa utom ukwọrọikọ ke ini ukpep ọfiọn̄ ition mmọ. Ke idak ndausụn̄ Wallace Liverance, esịn-owo-enyịn̄ ke Ufọkn̄wed Gilead, nditọ ufọkn̄wed oro ẹkụrede ukpep ẹma ẹbụk nte mmimọ ikotorode idem mmimọ nte mme asan̄autom Abasi. (2 Corinth 4:2, NW) Mmọ ẹma ẹkeme ndidemede ndusụk owo ubieresịt oro Abasi ọnọde mmọ. Mme ifiọkutom nditọ ufọkn̄wed ẹma ẹwụt nte mmọ ẹketọn̄ọde ukpepn̄kpọ Bible ye mbon esịt akpanikọ oro mmọ ẹkesobode ke efak, ke utom ukwọrọikọ eke ufọk ke ufọk, ye ke mme idaha en̄wen. Ke nsio nsio idaha, mme owo oro ẹkenyenede udọn̄ ẹma ẹdọhọ ẹte ke akpanikọ esịne ke mme n̄wed esop Jehovah oro ẹkọn̄ọde ke Bible. Enyeneufọk kiet ama anam n̄kpọ nte ọfọnde aban̄a akpan ufan̄ikọ Bible kiet. Enye ke ekpep Bible ye Mme Ntiense Jehovah idahaemi.

Ekem, Joel Adams ama anam ndụn̄ọde ye mbon oro ẹkekụrede ukpep ke Gilead ke mme isua oro ẹkebede. Ibuotikọ esie ekedi “Ẹkûtre Ndikpep N̄kpọ, Ẹkûtre Ndinam N̄kpọ Jehovah.” Mbon oro ẹkedade ẹnam ndụn̄ọde ẹma ẹnyene ekemini item ẹnọ mbufa isụn̄utom oro. Ke etide ini oro enye akabuanade ke ọyọhọ otu 26 eke Gilead, Harry Johnson ọkọdọhọ ete: “Ẹma ẹkpep nnyịn ẹte ke Jehovah esida oyonyụn̄ ada ikọt esie usụn̄ kpukpru ini. Mbuọtidem oro edi nsịnudọn̄ ọnọ nnyịn ke ofụri isua emi.” William Nonkes, andikabuana ke ọyọhọ otu 53 eke Gilead, ama eteme mme andikụre ukpep ete: “Ke akande kpukpru n̄kpọ, ẹti mme edumbet Bible, ẹnyụn̄ ẹbuan mmọ ke kpukpru ubiere oro mbufo ẹnamde ke uwem idahaemi ye ke nsinsi. Nte utịp, mbufo ẹyekeme ndika iso ndu ke utom mbufo, ndien uwak edidiọn̄ Jehovah ẹyedu ye mbufo.”

“Ẹsọn̄ọ Idem Man Ẹnam Uduak Jehovah” ekedi ibuotikọ oro Richard Rian ekemekde ọnọ ikpehe esie ke ndutịm. Kiet ke otu mbon oro enye akadade anam ndụn̄ọde ekedi John Kurtz, emi okokụrede ukpep ke ọyọhọ otu 30, oro ama akabiat isua 41 ke Spain nte isụn̄utom. Ke ini ẹkebụpde enye ẹban̄a ndutịm ukpepn̄kpọ Gilead, Brọda Kurtz ọkọdọhọ ete: “Bible edi akpan n̄wed ukpepn̄kpọ. Ndien nnyịn imenyene mme n̄wed un̄wam ukpep Bible ndin̄wam nnyịn ifiọk Bible. Mmọ ẹdu ẹnọ kpukpru owo. Owo inọhọ ndedịbe ntọt ndomokiet ke Gilead. Ntreke ndisọn̄ọ ntịn̄ emi koro ntọt oro ẹnọde ke Gilead odu ọnọ kpukpru Mme Ntiense.”

Brọda Gerrit Lösch, owo Otu Ukara eke Mme Ntiense Jehovah, ama ada ndutịm eke spirit oro ekeberi ke nditịn̄ ikọ ke ibuotikọ oro “Ndidu ke Idak Mba Jehovah.” Enye ama anam an̄wan̄a nte ẹdade mba ntrukpom ẹnọ uwụtn̄kpọ ke Bible ẹban̄a ukpeme ye un̄wam oro Abasi ọnọde mme anam-akpanikọ asan̄autom esie. (Deuteronomy 32:11, 12; Psalm 91:4) Ndusụk ini ntrukpom esitat mba esie ke ediwak hour man ekwi nditọ esie. Ke ndusụk idaha, enye esikam ada mba ofụk nditọ esie man mmọ ẹkûkop tuep. Ke ukem usụn̄ oro ye ke n̄kemuyo ye uduak esie, Jehovah ekeme ndin̄wam mme anam-akpanikọ asan̄autom esie, akpan akpan ke ini mmọ ẹsobode mme idomo ke n̄kan̄ eke spirit. Jehovah isiyakke ẹdomo mme asan̄autom esie ẹbe se ukeme mmọ edide edi enye esisiak usụn̄ ubọhọ ọnọ mmọ man mmọ ẹkeme ndiyọ. (1 Corinth 10:13) Brọda Lösch ama eberi ke ndidọhọ ete: “Man ika iso ndinyene ukpeme eke spirit, ana nnyịn isọn̄ọ idu ke idak mba Jehovah. Emi ọwọrọ ete ke inaha nnyịn ikọri edu nda-ke-idem. Ẹyak nnyịn kpukpru ini isịk ikpere Jehovah ye esop esie oro ebietde eka, ikûdian̄ade ikpọn̄ ndausụn̄ ye ima ima item mmọ.”

Etieibuot okpokoro ama okot mme etop ekọm oro mbon oro ẹkerede ẹban̄a ke ofụri ererimbot ẹkenọde ẹbe ke urụk ukopikọ ye mme leta. Ekem ẹma ẹdeme n̄weditoro. Ke ini ẹketọn̄ọde Ufọkn̄wed Gilead, ẹketọn̄ọ ye uduak ndinịm ibat ibat otu ke ufan̄ isua ition. Edi Jehovah Abasi anam ufọkn̄wed emi aka iso odu ke isua 58. Nte Brọda Barber ọkọdọhọde ke ntọn̄ọikọ esie ete: “Nso ata utịbe n̄wetnnịm n̄kpọ ke mme andikụre ukpep ke Gilead ẹnyene ntem toto ke 1943, ke ini ẹketọn̄ọde Gilead! Ntan̄ndian ukeme mmọ osụn̄ọ ke ata ata edida ediwak tọsịn sụn̄sụn̄ mbio isọn̄ ke mme itie ikie ndidọn̄ ke ubọn̄ ubọn̄ esop Jehovah.” Ih, ufọkn̄wed isụn̄utom emi etịp esịn ke ndinam ediwak miliọn owo ẹdat esịt ke idotenyịn Obio Ubọn̄.

[Ekebe ke page 24]

IDAHA OTU

Ibat idụt ẹtode: 8

Ibat idụt ẹnọde ẹka: 18

Ofụri ibat nditọ ufọkn̄wed: 48

Isua emana ke ẹbaharede ukem ukem: 34

Isua ẹdude ke akpanikọ ke ẹbaharede ukem ukem: 18

Isua ẹdude ke utom uyọhọ ini ke ẹbaharede ukem ukem: 13

[Ndise ke page 25]

Ọyọhọ Otu 110 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead

Ke udịm enyịn̄ ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.