Enye Ama ‘Eme Ime Tutu Esịm Akpatre’

KE VIDIO 1993 oro ẹsiwụtde mbufa mme andibuana ke ibuot itie utom Mme Ntiense Jehovah, Lyman Alexander Swingle ama etịn̄ ekikere esie kaban̄a edinam n̄kpọ Jehovah ete: “Kpa n̄kpa ye ikpaukot utom ke ukot!” *

Brọda Swingle emi ekedide isua 90 ke emana ama anam se enye ekesịnde udọn̄ ọnọ mbon efen ete ẹnam. Enye ama ‘eme ime tutu esịm akpatre.’ (Matthew 24:13) Okposụkedi okokụtde ndutụhọ ke ikpọkidem, ke Wednesday, March 7, enye ama odụk mbono Otu Ukara eke Mme Ntiense Jehovah oro enye ekedide andibuana. Ke Tuesday urua en̄wen idem esie ama enen̄ede ọdiọk, ndien ke March 14, ke n̄kanika ebede 4 usenubọk ke minit 26, abiaibọk esie ama ọtọt ete ke enye akpa.

Lyman Swingle ọkọtọn̄ọ utom ke ibuot itieutom ofụri ererimbot eke Mme Ntiense Jehovah ke Brooklyn, New York, ke April 5, 1930. Enye ama anam utom do ke se ikperede ndisịm isua 71. Ẹkebem iso ẹnọ Lyman akanam utom ke itie udian n̄wed, ekem ẹnọ aka itie umịn̄n̄wed, ndien enye n̄ko ama an̄wam ke ndinam mmọn̄n̄wed. Ke akpanikọ, Brọda Swingle akabiat n̄kpọ nte isua 25 ke itie unam mmọn̄n̄wed. Enye n̄ko ama anam utom ke itieutom uwetn̄wed ke ibuot itieutom ke n̄kpọ nte isua 20. Ke akpatre isua 17 oro enye okodude uwem, enye akanam utom ke Ọfis Abatokụk.

Lyman ekedi uko uko anditan̄a Obio Ubọn̄ Abasi. Ke mme ntọn̄ọ ntọn̄ọ isua esie ke Brooklyn, enye ye owo ubet esie, Arthur Worsley, ẹma ẹsiwat kiet ke otu ubom Mme Ntiense ẹdụk Akpa Hudson. Ke ẹkamade ukwak utịn̄ikọ, mmọ ẹma ẹsibiat ediwak utịturua nditan̄a etop Obio Ubọn̄ nnọ mme obio oro ẹkedude ke mbenesụk.

Brọda Swingle akamana ke November 6, 1910, ke Lincoln, Nebraska, edi ikebịghike ke oro ebede ubon mmọ ẹma ẹwọrọ ẹka Salt Lake City, Utah. Do, ke 1913, ete ye eka esie ẹma ẹkabade ẹdi Nditọ Ukpepn̄kpọ Bible, nte ẹkekotde Mme Ntiense Jehovah ini oro. Ke ediwak isua, ediwak mme etịn̄ikọ ẹtode ibuot itieutom Mme Ntiense ke Brooklyn ẹma ẹsidụn̄ ye ubon Swingle, ndien iren emi ẹma ẹnyene eti odudu ke idem Lyman. Ke 1923, ke edide isua 12 ke emana, enye ama ana baptism nte idiọn̄ọ uyakidem esie nnọ Abasi.

Ke ama akanam utom ke se ibede isua 26 ke Brooklyn nte eren oro mîdọhọ ndọ, uwem Lyman ama enyene uforo akamba akamba ke ini enye ọkọdọde Crystal Zircher ke June 8, 1956. Mmọ ẹkedi itai ye aban̄, ẹbuanade ọtọkiet ke utom ukwọrọikọ tutu esịm n̄kpa Crystal ke 1998. Ke n̄kpọ nte isua ita mbemiso enye akakpade, Crystal ama ọdọn̄ọ akpauben̄ ekpo oro okobiomode enye ndo idiọk idiọk. Nte Lyman ekesede aban̄a enye ke usen ke usen ekedi uwụtn̄kpọ edinam akpanikọ oro ekesịnde udọn̄ ọnọ kpukpru owo, akpan akpan mbon oro ẹkesikụtde nte Lyman onụkde n̄kpọitie mbon n̄kpọnnam ima ima ke mbenusụn̄ mbọhọ oro nte Crystal ọkọnọde mme andisan̄a mbe Enyọn̄-Ukpeme ye Awake!

Brọda Swingle ekedi in̄wan̄-in̄wan̄, ọfọn-ido owo oro mbon oro ẹkedide ẹdidiọn̄ọ enye ẹkemade. Ukem nte ete ye eka esie, enye ekenyene idotenyịn oro ọkọn̄ọde ke Bible ndidu ye Jesus Christ ke Obio Ubọn̄ eke heaven, kpa idotenyịn oro nnyịn inyenede mbuọtidem ite ke enye okụt edisu idahaemi.—1 Thessalonica 4:15-18; Ediyarade 14:13.

[Ikọ idakisọn̄]

[Ndise ke page 31]

Brọda Swingle ama anam utom n̄kpọ nte isua 25 ke itie unam mmọn̄n̄wed

[Ndise ke page 31]

Lyman ye Crystal ẹkedi itai ye aban̄