Ntak Ekpepde Bible?

BILL ekedi akparawa, okop odudu, ọfiọk n̄wed, onyụn̄ enyene okụk. Edi, enye ikokopke uyụhọ. Uwem esie ikenyeneke uduak, ndien oro ama enen̄ede afịna enye. Ke odomode ndikụt uduak ke uwem, enye ama odụn̄ọde nsio nsio ido ukpono, edi enye ikekwe se enye okoyomde. Ke 1991 enye ama osobo ye kiet ke otu Mme Ntiense Jehovah oro ọkọnọde enye n̄wed oro ekenemede se Bible etịn̄de aban̄a se uwem ọwọrọde. Ẹma ẹdiomi ukpepn̄kpọ Bible man Bill ọnọ n̄kpan̄utọn̄ ke ibuot nneme emi ye mme ibuot nneme en̄wen.

Bill eti ete: “Nnyịn ima inyene akpa ukpepn̄kpọ nnyịn, ndien sia nnyịn ikakade ibịne Bible ndien ndien, mma mfiọk nte ke emi edi se ami n̄koyomde. Mme ibọrọ Bible ẹkenen̄ede ẹdi n̄kpọ nduaidem. Ke ukpepn̄kpọ oro okụrede, mma n̄wat ndọk obot, n̄wọrọ ke ubomisọn̄ mi, nnyụn̄ nsio n̄kpo idara. Mma n̄kop nduaidem nte ke akpatre ke ami mma n̄kụt mme ibọrọ mbụme mi.”

Nte ededi, idịghe kpukpru owo oro ẹkụtde  akpanikọ Bible ẹsisio n̄kpo idara ntre ke ata ata usụn̄. Edi, ndikụt ibọrọ ke mme akpan mbụme ke uwem esidi n̄kpọ inemesịt ọnọ ediwak owo. Esitie mmọ ke idem nte eketiede owo oro ke n̄ke Jesus emi ọkọfiọhọde inyene eke edịbede ke in̄wan̄. Jesus ọkọdọhọ ete: “Ke idatesịt esie, aka akanyam kpukpru se enye enyenede, edep in̄wan̄ oro.”—Matthew 13:44.

Ukpọhọde Uwem Oro Enyenede Uduak

Bill ama ekere aban̄a akpan mbụme emi, Nso idi uduak uwem? Mbon akwaifiọk, mme ekpep ukpepn̄kpọ ido ukpono, ye ntaifiọk ẹsịn ọkpọsọn̄ ukeme ẹyom ibọrọ mbụme emi ke ediwak tọsịn isua. Mme owo oro ẹdomode ndibọrọ mbụme emi ẹmewet ediwak n̄wed. Ukeme mmọ edi ikpîkpu, ndien ediwak owo ẹbiere ẹte ke owo ikemeke ndibọrọ mbụme emi. Edi, ibọrọ odu. Okposụkedi ibọrọ otụn̄ọde, enye iwakke n̄kukọhọ. Ẹnam enye an̄wan̄a ke Bible. Ukpọhọde inem inem uwem oro enyenede uduak edi emi: Ana nnyịn inyene nnennen itie ebuana ye Jehovah, Andibot nnyịn ye Ete nnyịn eke heaven. Didie ke nnyịn ikeme ndinam oro?

Edisan̄a n̄kpere Abasi enyene ikpehe iba oro ẹtiede nte ẹdu ke ntuaha. Mbon oro ẹsan̄ade ẹkpere Abasi ẹsibak ẹnyụn̄ ẹma enye. Ẹyak nnyịn idụn̄ọde itien̄wed iba oro ẹsọn̄ọde se ẹtịn̄de emi. Ke anyan ini ko ke edem, enyene-ọniọn̄ Edidem Solomon ama etịm odụn̄ọde ubonowo onyụn̄ ewet se enye okokụtde enịm ke n̄wed Ecclesiastes eke Bible. Ke etịn̄de ibio ibio aban̄a se enye okokụtde, enye ekewet ete: “Yak nnyịn ikop utịt ofụri n̄kpọ emi: bak Abasi, nyụn̄ nịm mbet esie: koro emi edi eke kpukpru owo.” (Ecclesiastes 12:13, sịghisịghi ubọkn̄wed edi eke nnyịn.) Ediwak isua ikie ke ukperedem, ke ini ẹkebụpde enye m̀mê ewe edi akamba item ke Ibet oro ẹkenọde Moses, Jesus ọkọbọrọ ete: “Ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo.” (Matthew 22:37, sịghisịghi ubọkn̄wed edi eke nnyịn.) Nte etie fi esen esen nte ke nnyịn ikpenyene ndibak nnyụn̄ mma Abasi? Ẹyak nnyịn idụn̄ọde ufọn mbak ye ima ye nte mmọ ẹdianade kiet ẹnam owo enyene ọnọ-uyụhọ itie ebuana ye Abasi.

Se Mbak Abasi Ọwọrọde

Ukpono ukpono mbak edi akpan n̄kpọ edieke anade nnyịn ituak ibuot inọ Abasi ke usụn̄ oro enye enyịmede. Bible ọdọhọ ete: “Uten̄e Jehovah edi editọn̄ọ ifiọk.” (Psalm 111:10) Apostle Paul ekewet ete: “[Ẹyak] nnyịn inyene esịt ekọm, inyụn̄ ida emi inọ Abasi, utom eke enemde Enye esịt ke ukpono ye uten̄e.” (Mme Hebrew 12:28) Kpasụk ntre, angel oro apostle John okokụtde ke n̄kukụt nte efede ke ufọt enyọn̄ ọkọtọn̄ọ nditan̄a eti mbụk esie ye mme ikọ emi: “Mbufo ẹten̄e Abasi ẹnyụn̄ ẹnọ enye ubọn̄.”—Ediyarade 14:6, 7.

Mbak Abasi emi, oro edide ata akpan n̄kpọ ke ndidu uwem emi enyenede uduak, idịghe ukem nte idiọk ndịk. Nnyịn imekeme ndikop ndịk edieke idiọk ye ibak ibak abiatibet edịghede nnyịn uwem. Edi mbak Abasi edi uten̄e ye ntotụn̄ọ ukpono oro inyenede inọ Andibot. Enye n̄ko abuana eti ndịk ediyat Abasi esịt koro enye edide Akakan Ebiereikpe ye Ata Ọkpọsọn̄, emi enyenede odudu ndinọ mbon oro mîsụkke ibuot ufen.

Mbak ye Ima Ẹsan̄a Ikpat Kiet

Nte ededi, Jehovah iyomke mme owo ẹnam n̄kpọ ẹnọ enye n̄kukụre koro mmọ ẹkopde ndịk ẹban̄a enye. Jehovah enen̄ede edi Abasi ima. Ama onụk apostle John ndiwet nte: “Abasi edi ima.” (1 John 4:8) Jehovah Abasi anam n̄kpọ ke ata ima ima usụn̄ ye ubonowo, ndien enye oyom mme owo ẹnam n̄kpọ ẹban̄a oro ebe ke ndima enye n̄ko. Nte ededi, didie ke utọ ima oro odu ke n̄kemuyo ye mbak Abasi? N̄kpọ mbiba emi ẹnen̄ede ẹnyene ebuana. Andiwet psalm ekewet ete: “Jehovah etie ufan ye mmọ eke ẹbakde enye.”—Psalm 25:14.

 Kam kere ban̄a ukpono ye mbak oro eyen enyenede ọnọ ete emi okopde odudu onyụn̄ enyenede eti ibuot. Ke ukem ini oro, utọ eyen oro ayanam n̄kpọ aban̄a ima oro ete esie owụtde. Eyen oro ọyọbuọt idem ye ete oro onyụn̄ eberi edem ke enye kaban̄a ndausụn̄, enyenede mbuọtidem nte ke ndausụn̄ emi ayada mme ufọn edi. Ukem ntre, edieke nnyịn imade inyụn̄ ibakde Jehovah, nnyịn iyetiene ndausụn̄ esie, ndien emi ọyọfọn ye nnyịn. Tịm fiọk se Jehovah eketịn̄de aban̄a nditọ Israel: “Oh, mmọ ẹkpekam ẹnyene orụk esịt emi ke idem mmọ, eke ẹbakde mi, ẹnyụn̄ ẹnịmde ofụri mbet mi kpukpru ini, kpan̄ [ọkpọfọn] ye mmọ, ye nditọ mmọ ke nsinsi!”—Deuteronomy 5:29.

Ih, mbak Abasi isisụn̄ọke ke ufụn edi esisụn̄ọ ke ubọhọ-ufụn, isisụn̄ọke ke mfụhọ edi esisụn̄ọ ke inemesịt. Isaiah ama etịn̄ ntịn̄nnịm ikọ aban̄a Jesus ete: “Uten̄e Jehovah eyenem enye esịt.” (Isaiah 11:3) Ndien andiwet psalm ama ewet ete: “Inemesịt odu ọnọ owo eke abakde Jehovah, emi adarade mbet esie etieti.”—Psalm 112:1, NW.

Nte an̄wan̄ade, nnyịn ikemeke ndibak m̀mê ndima Abasi edieke nnyịn mîfiọkke enye. Ntak edi oro edikpep Bible edide ata akpan n̄kpọ. Utọ ukpepn̄kpọ oro an̄wam nnyịn ndifiọk edu Abasi ndinyụn̄ mfiọk eti ibuot oro odude ke nditiene ndausụn̄ esie. Nte nnyịn isan̄ade ikpere Abasi, nnyịn iyom ndinam uduak esie ndien onụk nnyịn ndinịm mme ewụhọ esie, ifiọkde ite ke mmọ ẹyefọn ye nnyịn.—1 John 5:3.

Edi n̄kpọ idatesịt owo ndifiọk nte ke imọ ke isan̄a ke nnennen afan̄ ke uwem. Emi edi ntre ye Bill, oro ẹketịn̄de ẹban̄a ke ntọn̄ọ ntọn̄ọ. Enye ọkọdọhọ ke ndondo emi ete: “Ke isua usụkkiet emi ẹbede tọn̄ọ nte n̄kekpep Bible ke akpa ini, itie ebuana mi ye Jehovah ọmọkọri. Akpa idatesịt oro n̄kokopde ọmọkọri akabade edi ata usụn̄ uwem idatesịt. Ami mmenyene idotenyịn oro enyenede iwụk ke uwem. Uwem mi ọyọhọ ye mme edinam oro ẹnyenede uduak, iyọhọke ye anana-uduak ediyom inemesịt. Jehovah amakabade edi ata owo ọnọ mi, ndien mmọfiọk nte ke enye enyene mfọnọn̄kpọ mi ke ekikere.”

Ke ibuotikọ oro etienede, nnyịn iyeneme nte ifiọk Jehovah esidade inemesịt ye ufọn ọsọk mbon oro ẹdade enye ẹsịn ke edinam ke uwem mmọ.

[Se Ẹwetde ke Ikpọ Abisi ke page 5]

Ndisan̄a n̄kpere Abasi ọwọrọ nnyịn ndima nnyụn̄ mbak enye

[Ndise ke page 6]

Uten̄e Jehovah ama adat Jesus esịt