Un̄wam Ndida Mfiọk Bible

BIBLE edi n̄wọrọnda n̄wed. Mme andiwet enye ẹdọhọ ke mmimọ ikada odudu spirit Abasi iwet, ndien se idọn̄ọde ke enye ẹnọ ekese nsọn̄ọ nte ke se mmọ ẹtịn̄de emi edi akpanikọ. (2 Timothy 3:16) Ke adianade ye mme n̄kpọ eken, Bible owụt ebiet oro nnyịn itode, ntak emi nnyịn idude mi, ye ebiet emi nnyịn ikade. Ke akpanikọ enye edi n̄wed oro odotde nnyịn ikere iban̄a!

Eyedi afo omodomo ndikot Bible edi okụt nte enye ọsọn̄de. Ekeme ndidi afo ufiọkke ebiet emi afo akpakade man okokụt ibọrọ ke mme mbụme fo. Ke edide ntre, idịghe afo ikpọn̄ ke edi. Idaha fo etie nte eke eren oro okodude uwem ke akpa isua ikie. Enye akawat ke chariot, otode Jerusalem aka idụt emana esie, Ethiopia. Akwa owo ukara Ethiopia emi ke okokot ntịn̄nnịm ikọ n̄wed Isaiah eke Bible, oro ẹkewetde ke se iwakde ibe isua ikie itiaba ke mbemiso, uyo uwọrọ.

Ke mbuari, eren kiet emi ekefehede etiene chariot oro ama ọkọm enye. Eren oro ekedi Philip, mbet Jesus, ndien enye ama obụp owo Ethiopia oro ete: “Nte ọmọfiọk se ikọ oro okotde ọwọrọde?” Owo Ethiopia oro ama ọbọrọ ete: “N̄keme didie ke owo mîtemeke mi?” Ekem enye ama eben̄e Philip ete ọdọk etie ke chariot. Philip ama anam itien̄wed oro eren emi okokotde an̄wan̄a onyụn̄ ọkwọrọ “Jesus ọnọ enye.”—Utom 8:30-35.

Kpa nte Philip akan̄wamde owo  Ethiopia oro ndifiọk Ikọ Abasi anyan ini ko, Mme Ntiense Jehovah ẹn̄wam mme owo ndifiọk Bible mfịn. Mmọ ẹyedara ndin̄wam fi n̄ko. Nte ido edide, mfọnn̄kan n̄kpọ edi ndikpep Bible ke nde ke nde, itọn̄ọde ye mme akpan ukpepn̄kpọ N̄wed Abasi. (Mme Hebrew 6:1) Nte afo anamde n̄kọri, afo eyekeme ndidia se apostle Paul okokotde “ọkpọsọn̄ udia”—oro edi, mme ntotụn̄ọ akpanikọ. (Mme Hebrew 5:14) Okposụkedi edide Bible ke afo ekpep, mme n̄wed eken—mme n̄wed un̄wam ukpep Bible—ẹkeme ndin̄wam fi okụt onyụn̄ ọfiọk mme udịmikọ Bible ke nsio nsio ibuot nneme.

Ẹkeme ndidiomi ukpepn̄kpọ ke ini ye ke itie oro eferede fi ke idem. Ndusụk owo ẹsikam ẹkpep n̄kpọ ebe ke urụk ukopikọ. Owo inịmke ukpepn̄kpọ oro ke ido nte ẹsikpepde n̄kpọ ke ubet ukpepn̄kpọ; enye edi ọkpọkpọ ndutịm oro ẹnamde ekekem ye mme ọkpọkpọ idaha fo, esịnede idaha fo ke uwem ye ke ifiọkn̄wed. Iyomke afo ekpe okụk ke utọ ukpepn̄kpọ Bible oro. (Matthew 10:8) Owo itiehe udomo, owo idinyụn̄ inamke bụt anam fi. Ẹyebọrọ mme mbụme fo, ndien afo eyekpep nte ekemede ndisan̄a n̄kpere Abasi. Nte ededi, ntak emi afo ekpekpepde Bible? Kere ban̄a ndusụk ntak oro edikpep Bible ekemede ndinam fi okop inemesịt ke uwem.