Wụt Esịtekọm Nyụn̄ Kop Inemesịt

“EDIWỤT esịtekọm edi akpan ifiọk n̄kpọntịbe owo,” ntre ke Calgary Herald, n̄wedmbụk n̄kpọntịbe Canada ọkọdọhọ. Herald oro ama okot oto ndusụk nditọ ufọkn̄wed praimari oro ẹkedide isua usụkkiet ke emana oro andikpep mmọ ọkọdọhọde mmọ ẹwet ẹban̄a kpukpru se mmọ ẹwụtde esịtekọm ẹban̄a. Uyen kiet ama ọdọhọ ete ke imọ imowụt esịtekọm iban̄a ubon imọ ‘koro mmọ ẹsede ẹban̄a imọ.’ N̄kaiferi kiet n̄ko ama owụt esịtekọm aban̄a ubon esie, ọdọhọde ete: “Mmọ ẹkpeme mi, ẹnam mi n̄kop nsọn̄idem, ẹse ẹban̄a mi, ẹma mi, ẹnọ mi udia, ndien ke mîkpedịghe ete ye eka mi, ami n̄kpodụhe ke ererimbot emi.”

Unana esịtekọm esisụn̄ọ ke edu unana edikop uyụhọ. Nte owo akwaifiọk ye ekpep ukpepn̄kpọ ido ukpono oro J. I. Packer ọdọhọde, “ẹkebot nnyịn ndiberi edem ke Abasi ndinyụn̄ mberi edem ke ekemmọ owo.” Emi eti nnyịn aban̄a ọniọn̄ ọniọn̄ item Bible oro ẹkenọde ediwak isua ikie oro ẹkebede, emi ọdọhọde ete: “Mbufo ẹnyụn̄ ẹnyene esịt ẹkọm.” (Colossae 3:16) Mme ikọ ntotụn̄ọ esịtekọm oro ẹtịn̄de ye mbon en̄wen ẹsin̄wam ndinam ima ima itie ebuana ọkọri.

N̄ko-n̄ko, ebede ke ndiwụt esịtekọm nnọ nnyụn̄ mbat kiet eken ke ọsọn̄urua, nnyịn n̄ko iwụt esịtekọm inọ Jehovah, ndien enye okụt emi. Bible ọdọhọ ete: “Koro enyịn Jehovah ẹsan̄ade ke ofụri ererimbot, ẹte isọn̄ọ imụm mmọ eke ofụri esịt mmọ odude ye enye ikama.” (2 Chronicles 16:9) Abasi ọsọn̄ọ ọnọ nnyịn ete ke imọ ifreke ima enyịn̄ imọ oro mme owo ẹwụtde. (Mme Hebrew 6:10) Ih, nnyịn imenyene eti ntak ndiwụt esịtekọm koro edu Abasi emi, ke iwụtde enye ke usen ke usen, enem Jehovah esịt onyụn̄ etịp esịn ke inemesịt nnyịn. Enye edi nte Mme N̄ke 15:13 etịn̄de: “Esịt idara anam iso eye.”