Mme Mbụme Ẹtode Mme Andikot

Nso idi “nduọk-odudu” oro ẹtịn̄de ẹban̄a ke Mme Hebrew 4:9-11, ndien didie ke owo ekeme ‘ndidụk ke nduọk-odudu oro’?

Apostle Paul ekewet n̄wed ọnọ ẹsọk mme Christian ẹdide mme Hebrew ke akpa isua ikie ete: “Nduọk-odudu sabbath osụhọ ọnọ ikọt Abasi. Koro owo ama okodụk ke nduọk-odudu Abasi, enye odop utom esie, kpa nte Abasi okodopde utom Esiemmọ. Mmọdo ẹyak nnyịn isịn ifịk idụk ke nduọk-odudu oro.”—Mme Hebrew 4:9-11.

Ke ini Paul eketịn̄de aban̄a Abasi ndidop utom Esie, eyedi enye eketịn̄ aban̄a se ẹwetde ke Genesis 2:2, emi nnyịn ikotde ite: “Abasi onyụn̄ anam utom esie emi enye akanamde, okụre ke ọyọhọ usen itiaba; ndien ke ọyọhọ usen itiaba enye odop kpukpru utom esie emi enye akanamde.” Ntak emi Jehovah ‘okodopde utom ke ọyọhọ usen itiaba’? Ke akpanikọ emi ikedịghe koro enye okoyomde ndifiak n̄kop odudu ke “kpukpru utom esie emi enye akanamde.” Udiana ufan̄ikọ ọnọ ekikere: “Abasi ọdiọn̄ ọyọhọ usen itiaba, onyụn̄ anam enye edi edisana; koro ke esịt ke enye odop kpukpru utom esie emi Abasi okobotde okonyụn̄ anamde.”—Genesis 2:3; Isaiah 40:26, 28.

“Ọyọhọ usen itiaba” ama okpụhọde ye ofụri usen itiokiet oro ẹkebemde iso sia enye ekedide usen emi Abasi ọkọdiọn̄de onyụn̄ anamde edi edisana, oro edi, usen emi enye okosiode enịm, m̀mê akayakde ọnọ, kaban̄a akpan uduak. Nso ikedi uduak oro? Ke mbemiso, Abasi ama ayarade uduak esie kaban̄a ubonowo ye isọn̄. Abasi ọkọdọhọ akpa eren oro ye n̄wan esie ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye: ẹnyụn̄ ẹkara iyak ke akamba mmọn̄, ye inuen ke enyọn̄, ye kpukpru n̄kpọ uwem eke ẹnyọnide ke isọn̄.” (Genesis 1:28) Okposụkedi Abasi ama akanam ubonowo ye isọn̄ ẹnyene mfọnmma ntọn̄ọ, ekenyene ndida ini mbemiso ẹkande ofụri isọn̄ ẹnyụn̄ ẹnamde enye akabade edi paradise oro ọyọhọde ye mfọnmma ekpụk ubonowo, nte Abasi akaduakde. Ntem, ke “ọyọhọ usen itiaba,” Abasi ama ọduọk odudu, m̀mê odop utom edika iso mbot mme n̄kpọ ke isọn̄ man ayak se enye ama okobobot ẹkọri nte ekemde ye uduak esie. Ke utịt “usen” oro, kpukpru se Abasi akaduakde ẹyekabade ẹdi ata idem n̄kpọ. Nduọkodudu oro edibịghi adan̄a didie?

Ke ifiakde ibịne ikọ Paul ke Mme Hebrew, nnyịn imokụt ite ke enye ọkọdọhọ ke “nduọk-odudu sabbath osụhọ ọnọ ikọt Abasi,” ndien enye ama esịn udọn̄ ọnọ mme ekemmọ Christian ete ẹsịn ifịk ‘ẹdụk ke nduọk-odudu oro.’ Emi owụt ete ke ini Paul ekewetde mme ikọ oro, “ọyọhọ usen itiaba” eke nduọkodudu Abasi, oro ọkọtọn̄ọde ke n̄kpọ nte isua 4,000 ke mbemiso, ke okosụk akaka iso. Enye idisịmke utịt tutu uduak Abasi kaban̄a ubonowo ye isọn̄ osu ọyọhọ ọyọhọ ke utịt Tọsịn Isua Ukara Jesus Christ, emi edide “Ọbọn̄ usen sabbath.”—Matthew 12:8; Ediyarade 20:1-6; 21:1-4.

Ye utịbe utịbe idotenyịn oro ke ekikere, Paul ama anam an̄wan̄a nte owo ekemede ndidụk ke nduọkodudu Abasi. Enye ekewet ete: “Koro owo ama okodụk ke nduọk-odudu Abasi, enye odop utom esie.” Emi anam nnyịn ifiọk ite ke okposụkedi ekenyenede mfọnmma ntọn̄ọ, ubonowo ke ofụri ofụri idụkke ke nduọkodudu Abasi. Emi ekedi koro Adam ye Eve ikakaha iso inịm nduọkodudu Abasi ke “ọyọhọ usen itiaba” ebe ke ndinyịme ndutịm oro enye akanamde ọnọ mmọ. Utu ke oro, mmọ ẹma ẹsọn̄ ibuot ẹnyụn̄ ẹyom ndida ke idem n̄kpọn̄ Abasi. Ke akpanikọ, mmọ ẹma ẹdiana ye ndutịm Satan utu ndinyịme ima ima ndausụn̄ Abasi. (Genesis 2:15-17) Nte utịp, mmọ ẹma ẹduọk idotenyịn edidu uwem ke nsinsi ke paradise isọn̄. Ọtọn̄ọde ke ini oro ka iso, ofụri ubonowo ama odụk ufụn ọnọ idiọkn̄kpọ ye n̄kpa.—Rome 5:12, 14.

Nsọn̄ibuot ubonowo ikabiatke uduak Abasi. Usen nduọkodudu esie ke aka iso. Nte ededi, Jehovah ama anam ima ima ndutịm—ufak—ebe ke Eyen esie, Jesus Christ, man kpukpru mbon oro ẹnyịmede enye ke isọn̄ mbuọtidem mmọ ẹkpedori enyịn ndinyene edifak ye nduọkodudu ke mfịghe idiọkn̄kpọ ye n̄kpa. (Rome 6:23) Ntak edi oro Paul ekesịnde udọn̄ ọnọ mme ekemmọ Christian ete ‘ẹdop utom mmọ.’ Ama oyom mmọ ẹnyịme ndutịm Abasi kaban̄a edinyan̄a ẹkûnyụn̄ ẹdomo ndinam ini iso mmọ ọwọrọ usụn̄ ke usụn̄ idemmọ, nte Adam ye Eve ẹkedomode ndinam. Ama oyom  mmọ n̄ko ẹfep ndibịne usụn̄ edibat idem ke edinen.

Ke akpanikọ, ndisịk mme ibụk ibụk udọn̄ m̀mê mme n̄kpọ ererimbot nnịm man ẹnam uduak Abasi ọnọ nduọkodudu. Jesus ama ọnọ ikot emi ete: “Ẹtiene Mi, kpukpru mbufo emi ẹkpade mba ẹnyụn̄ ẹbiomde edidobi mbiomo, ndien Ami nyọnọ mbufo nduọk-odudu. Ẹmen ọkpọnọ Mi ẹkọn̄ọ ke itọn̄ mbufo, ẹnyụn̄ ẹkpebe Mi; koro mmenyene ifụre-ifụre ido nnyụn̄ nsụhọde idem ke esịt; ndien mbufo ẹyekụt nduọk-odudu ẹnọ ukpọn̄ mbufo. Koro ọkpọnọ Mi ememem, mbiomo Mi onyụn̄ efefere.”—Matthew 11:28-30.

Ke akpanikọ, nneme Paul aban̄ade nduọkodudu Abasi ye nte owo ekemede ndidụk enye ekedi n̄kpọ nsịnudọn̄ ọnọ mme Christian ẹdide mme Hebrew ke Jerusalem, oro ẹkeyọde ekese ukọbọ ye nsahi ke ntak mbuọtidem mmọ. (Utom 8:1; 12:1-5) Ukem ntre, mme ikọ Paul ẹkeme ndidi n̄kpọ nsịnudọn̄ nnọ mme Christian mfịn. Sia ifiọkde ite ke un̄wọn̄ọ Abasi ndida paradise isọn̄ ndi ke idak edinen Obio Ubọn̄ esie ekpere ndisu, nnyịn n̄ko ikpenyene ndidop utom nnyịn inyụn̄ isịn ifịk ndidụk nduọkodudu oro.—Matthew 6:10, 33; 2 Peter 3:13.

[Mme ndise ke page 31]

Un̄wọn̄ọ Abasi aban̄ade paradise isọn̄ oyosu ke utịt usen nduọkodudu esie