Ukpọhọde Ererimbot Inemesịt

“JESUS eyen Nazareth edi n̄kukụre owo oro okopde odudu akan—idịghe sụk ke tọsịn isua iba emi edi ke ofụri mbụk owo,” ntre ke magazine Time ọdọhọ. Ke ini Jesus okodude ke isọn̄, ediwak tọsịn owo oro ẹnyenede esịt akpanikọ ikọfiọkke ubom esie kpọt, edi ẹma ẹfiọk nte enye ekekerede aban̄a mbon en̄wen. Ntem, idịghe n̄kpọ n̄kpaidem nte mmọ ẹkeyomde ndimek enye edidem. (John 6:10, 14, 15) Edi, nte ẹketịn̄de ẹban̄a ke ibuotikọ oro ekebemde iso, Jesus ikenyịmeke ndisịn idem ke mbre ukara.

IBỌRỌ Jesus ọkọkọn̄ọ ke nsụhọde n̄kaha n̄kpọ ita: ekikere Ete esie kaban̄a mme owo ndibiere n̄kpọ nnọ idemmọ, emi esịnede ukara owo; Jesus ndifiọk nte ke mme ndedịbe odudu ẹdu oro ẹkopde odudu oro ẹnamde n̄kpọ ndibiọn̄ọ idem nti ukeme oro mme owo ẹsịnde ndikara ukara; ye uduak Abasi ndiwụk ukara eke heaven ndikara ofụri isọn̄. Nte nnyịn itịmde idụn̄ọde n̄kpọ ita emi, nnyịn iyokụt ntak emi mme ukeme oro ubonowo esịnde ndinam ererimbot ọfọn, ẹkpude. Nnyịn iyokụt n̄ko nte ẹdisan̄ade ẹkụt unen.

Nte Mme Owo Ẹkeme Ndikara Idemmọ?

Ke ini Abasi okobotde mme owo, enye ama ọnọ mmọ odudu ndikara mme unam. (Genesis 1:26) Edi ubonowo okodu ke idak itie edikara Abasi. Akpa eren ye n̄wan ẹkenyene ndiwụt ke mmimọ imosụk ibuot inọ Abasi ebe ke ndibet mfri eto kiet, “eto ifiọk, eti ye idiọk.” (Genesis 2:17) Ke mfụhọ, Adam ye Eve ẹma ẹda ifụre edimek mmọ ẹnam n̄kpọ ke idiọk usụn̄ ẹnyụn̄ ẹsọn̄ ibuot ye Abasi. Ndidia mfri oro ẹkekpande ikedịghe sụk uyịpinọ. Enye ama esịne edisọn̄ ibuot ye itie edikara Abasi. Ikọ idakisọn̄ Genesis  2:17 ke The New Jerusalem Bible ọdọhọ ete ke Adam ye Eve ẹkedọhọ ke imenyene “ọyọhọ edida ke idem ke eti ido uwem emi otode ke oro owo esịn ndidiọn̄ọ idaha esie nte enye emi ẹkebotde-bot . . . Akpa idiọkn̄kpọ oro ekedi edin̄wana ye itie edikara Abasi.”

Ke ntak mme akpan eneni ido uwem oro ẹkebuanade, Abasi ama ayak Adam ye Eve ye nditọ mmọ ẹmek usụn̄ idemmọ, ndien mmọ ẹma ẹnịm mme idaha eke idemmọ kaban̄a se inende ye se ikwan̄ade. (Psalm 147:19, 20; Rome 2:14) Ke nditịm ntịn̄, mme owo ẹma ẹtọn̄ọ ndibiere n̄kpọ nnọ idemmọ. Nte edinam emi omokụt unen? Ke ikerede iban̄a se itịbede ke ediwak tọsịn isua, nnyịn imekeme ndidọhọ baba! Ecclesiastes 8:9 (NW) ọdọhọ ete: ‘Owo akara owo tutu ọnọ enye unan.’ Akama-mfụhọ n̄wetnnịm n̄kpọ edikara idem emi ọsọn̄ọ nte Jeremiah 10:23 edide akpanikọ: “O Jehovah, mmọfiọk nte ke usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” Mbụk owụt nte ke mme owo inyeneke ukeme ndikara uforo uforo ye unana ndausụn̄ Andibot mmọ.

Jesus ama enen̄ede enyịme emi. Enye ikadaha ke idem ikpọn̄ Abasi. Enye ọkọdọhọ ete: “Nnamke n̄kpọ oto Idem Mi. . . . Koro Ami nnamde se inemde [Abasi] esịt kpukpru ini.” (John 4:34; 8:28, 29) Ntem, sia Abasi mîkọnọhọ enye odudu ndida itie edidem mme owo, Jesus ikakam ikereke-kere ndinam oro. Nte ededi, emi iwọrọke ite ke enye ikamaha ndin̄wam mme ekemmọ owo. Ke edide isio, enye ama anam kpukpru se enye ekekemede man an̄wam mme owo ndinyene n̄kponn̄kan inemesịt ini oro ye ke ini iso. Enye ama akam ayak idem esie ọnọ kaban̄a ubonowo. (Matthew 5:3-11; 7:24-27; John 3:16) Edi Jesus ama ọfiọk ete ke “ẹmenịm ini ẹnọ kpukpru n̄kpọ,” esịnede ini Abasi ndiwụt unen esie ndikara ubonowo. (Ecclesiastes 3:1; Matthew 24:14, 21, 22, 36-39) Nte ededi, ti ete ke Eden akpa ete ye eka nnyịn ẹkenam uduak idiọk edibotn̄kpọ eke spirit oro akadade ata ata urụkikọt etịn̄ ikọ. Emi ada nnyịn edisịm ọyọhọ ntak iba oro akanamde Jesus okûsịn idem ke mbre ukara.

Ndedịbe Ọbọn̄ Ererimbot

Bible asian nnyịn ete ke Satan ama ọnọ Jesus “kpukpru mme obio ererimbot ye ubọn̄ mmọ” ke ndituak ibuot ini kiet kpọt. (Matthew 4:8-10) Ke nditịm ntịn̄, ẹma ẹnọ Jesus itie edikara ererimbot—edi ke isọn̄ edinam se Devil ọkọdọhọde enye anam. Jesus ikọduọhọ ke idomo emi. Nte ededi, nte emi ekenen̄ede edi idomo? Nte Satan  ekpekenen̄ede ọnọ utọ akwa enọ oro? Ih, koro Jesus ke idemesie okokot Devil “ọbọn̄ ererimbot emi,” ndien apostle Paul okokot enye “abasi eyo emi.”—John 14:30; 2 Corinth 4:4; Ephesus 6:12.

Edi akpanikọ, Jesus ama ọfiọk ete ke Devil inyeneke mfọnọn̄kpọ ubonowo ke ekikere. Enye ama etịn̄ aban̄a Satan nte “owotowo” ye “ete nsu ye ete kpukpru se idide abian̄a.” (John 8:44, The Amplified Bible) Nte an̄wan̄ade, ererimbot oro ‘esịnede ke ubọk’ utọ idiọk spirit oro ikemeke ndinen̄ede n̄kop inemesịt tutu amama. (1 John 5:19) Edi Devil idinyeneke odudu emi ke nsinsi. Ibịghike Jesus, oro edide okopodudu edibotn̄kpọ eke spirit idahaemi, oyodorode Satan onyụn̄ osio odudu esie efep ofụri ofụri.—Mme Hebrew 2:14; Ediyarade 20:1-3.

Satan ke idemesie ọfiọk ete ini imọ nte ọbọn̄ ererimbot ọyọsọp okụre. Ntem, enye ke mbrenyịn ke esịn ofụri ukeme ndibiat mme owo mbe idaha edinam ukpụhọde, kpa nte enye akanamde mbemiso Ukwọ eyo Noah. (Genesis 6:1-5; Jude 6) Ediyarade 12:12 ọdọhọ ete: “Mbọm isọn̄ ye inyan̄, koro andidori ikọt Abasi ikọ ama osụhọde etiene mbufo; enye asan̄a ye akwa ifụtesịt, sia enye ọdiọn̄ọde ete ini imọ edi ibio.” Ntịn̄nnịm ikọ Bible ye mme n̄kpọntịbe ererimbot ẹwụt ẹte ke nnyịn idu ke utịt ‘ibio ini’ emi. (2 Timothy 3:1-5) Ubọhọ ke ekpere idahaemi.

Ukara Oro Edidade Inemesịt Idi

Ọyọhọ ntak ita oro akanamde Jesus okûsịn idem ke mbre ukara edi nte ke enye ama ọfiọk ete ke Abasi oyowụk ukara eke heaven ndikara isọn̄ ke ini oro ẹnịmde ke ini iso. Bible okot ukara emi Obio Ubọn̄ Abasi, ndien oro ekedi akpan ibuotikọ ukpepn̄kpọ Jesus. (Luke 4:43; Ediyarade 11:15) Jesus ama ekpep mme mbet esie ndibọn̄ akam mben̄e Obio Ubọn̄ oro edi, koro edidi ke idak ukara oro kpọt ke ‘ẹdinam uduak Abasi ke isọn̄, kpa nte ẹnamde ke heaven.’ (Matthew 6:9, 10) Afo emekeme ndikere ete, ‘Edieke edide Obio Ubọn̄ emi ọmọn̄ akara ofụri isọn̄, nso iditịbe inọ ukara owo?’

Ẹkụt ibọrọ ke Daniel 2:44: “Ke eyo ndidem oro [ẹkarade ke utịt editịm n̄kpọ emi], Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt [ukara owo] emi, ndien enye ayada ke nsinsi.” (Sịghisịghi ubọkn̄wed edi eke nnyịn.) Ntak emi Obio Ubọn̄ Abasi ‘edinuakde’ mme ukara eke isọn̄? Koro mmọ emi ẹsọn̄ọde ẹyịre ke edu edibiere n̄kpọ nnọ idem oro omiomde Abasi, emi Satan ọkọtọn̄ọde ke edem ko ke in̄wan̄ Eden. Ke adianade ye edibiọn̄ọ akakan ufọn ubonowo, mbon oro ẹdomode ndisịn udọn̄ nnọ edu oro ẹyetuaha iso ye iso ye Andibot. (Psalm 2:6-12; Ediyarade 16:14, 16) Ntem, ana nnyịn ibụp idem nnyịn, ‘Nte nnyịn idada inọ m̀mê ibọbiọn̄ọ ukara Abasi?’

Ukara Anie ke Afo Edimek?

Man an̄wam mme owo ndinam nnennen ubiere kaban̄a ukara, Jesus ama ọdọn̄ mme mbet esie ndikwọrọ “gospel Ubọn̄ Abasi emi ke ofụri ekondo nte ntiense [nnọ] kpukpru mme idụt” mbemiso utịt editịm n̄kpọ emi edide. (Matthew 24:14) Mmanie ke ẹdiọn̄ọ mfịn ke ofụri ererimbot nte ẹkwọrọde Obio Ubọn̄ Abasi? Mme Ntiense Jehovah. Ke akpanikọ, ke anyan ini magazine emi emenyene mme ikọ emi “Ọnọ Ntọt Obio Ubọn̄ Jehovah” ke ikpaedem esie. Mfịn, n̄kpọ nte Mme Ntiense miliọn itiokiet ke se iwakde ibe idụt 230 ke ẹn̄wam mme owo ndinyene nnennen ifiọk mban̄a Obio Ubọn̄ oro. *

Mme Edidiọn̄ Ẹnyenede Mme Andidu ke Idak Obio Ubọn̄

Jesus ekesinam n̄kpọ ke usụn̄ Abasi kpukpru ini. Ntem, utu ke ndimek usụn̄ uwem nda-ke-idem  ndinyụn̄ ndomo ndida ukara nnam editịm n̄kpọ oro odude ke emi ọfọn, enye ama anam utom ọkpọsọn̄ ndinam mme udọn̄ n̄kpọ Obio Ubọn̄ Abasi, kpa n̄kukụre usọbọ kaban̄a mme mfịna ererimbot, ẹka iso. Ke ntak edinam akpanikọ esie ẹma ẹnọ enye ebekpo ubọn̄ ke heaven nte Edidem Obio Ubọn̄ oro. Nso utịbe utịbe utịp ke ẹkenọ enye ntem ke ndisụk ibuot nnọ Abasi!—Daniel 7:13, 14.

Mfịn ediwak miliọn mbon oro ẹkpebede Jesus ke ndinịm Obio Ubọn̄ Abasi akpa ye ke ndinam uduak Abasi n̄ko ẹyenyene utịbe utịbe enọ—ifet edidi mme andidu ke isọn̄ ke idak Obio Ubọn̄ Abasi. (Matthew 6:33) Ke idak ima ima ukara esie, ẹyenam mmọ ẹsịm mfọnmma eke owo, ye idotenyịn edidu uwem ke nsinsi. (Ediyarade 21:3, 4) Akpa John 2:17 ọdọhọ ete: “Ererimbot ke ebebe efep, ye mbumek esie; edi owo eke anamde se Abasi amade ododu ke nsinsi.” Ke ẹkpọride Satan ye mme anditiene enye ẹfep ẹnyụn̄ ẹnamde ofụri isọn̄ akabade edi paradise oro ufreidụt emi esitọde ubahade, mbiara ndutịm unyamurua, ye nsunsu ido ukpono mîdụhe, edidi n̄kpọ akwa idatesịt didie ntem ndidu mi ke nsinsi!—Psalm 37:29; 72:16.

Ih, Obio Ubọn̄ Abasi edi ata ukpọhọde ererimbot ata inemesịt, ndien nte enende ẹkot etop oro ẹdade ẹtọt enye eti mbụk. Ke ini kiet ke otu Mme Ntiense Jehovah awahade ufọk fo, ntak mûkpan̄ke utọn̄ unọ eti mbụk emi enye adade ọsọk fi edieke akanam mûkpan̄ke utọn̄?

[Ikọ idakisọn̄]

[Ndise ke page 5]

Mbụk owụt nte ke mme owo ikemeke ndikara uforo uforo ye unana ndausụn̄ Abasi

[Ndise ke page 5]

Sia enye akarade “eyo emi,” Satan ama ekeme ndinọ Jesus “kpukpru mme obio ererimbot”

[Ndise ke page 7]

Jesus ama ekpep ete ke idak ukara Obio Ubọn̄ Abasi, ererimbot edidi utịbe utịbe itie