“Usen Ifụre Ido Ukpono”

KE NNEME oro enye ekenyenede ye Mme Ntiense Jehovah edemerede enye udọn̄, akamba andikpep ke ufọkn̄wed kiet ke Poland ama osio usen kiet enịm nte “Usen Ifụre Ido Ukpono” ke ufọkn̄wed esie. Enye ama ọnọ ekikere ete nditọ ufọkn̄wed—mbon Catholic, mbon Buddha, ye Mme Ntiense Jehovah—ẹnọ idem unyịme unyịme nditịm mbio mbio utịn̄ikọ ndinam nditọ ufọkn̄wed eken ẹfiọk mme edinịm ke akpanikọ ye mme edinam mmọ. Mme uyen Ntiense Jehovah ita ẹma ẹsọsọp ẹnọ idemmọ unyịme unyịme.

Ke usen oro ama ekedisịm, akpa owo nditịn̄ ikọ ekedi Malwina oro ekedide isua 15. Ke ubak ubak, enye ọkọdọhọ ete: “Ediwak mbufo ẹma ẹfiọk nnyịn mbemiso itọn̄ọde ndidi ufọkn̄wed emi koro nnyịn imesiwaha idise mbufo ke ufọk mbufo. Eyedi mbufo ẹmesikere ntak emi nnyịn isiyịrede ndinam oro. Nnyịn isinam oro koro nnyịn itienede uwụtn̄kpọ Jesus Christ, Anditọn̄ọ Ido Ukpono Christ. Enye ama esikwọrọ eti mbụk Obio Ubọn̄ Abasi ke ebiet ekededi oro enye ekekemede ndikụt mme owo. Mme apostle ye mme akpa Christian eken ẹma ẹsinam ukem oro. Ke ediwak itie, Mme Ntiense Jehovah ẹyọ n̄kpọsọn̄ idomo mbuọtidem, edi nnyịn imokop inemesịt ite ke nnyịn imenyene emem ke ufọkn̄wed nnyịn, emi kpukpru mbufo ẹtịpde ẹsịn. Nnyịn imọkọm mbufo iban̄a oro!”

Ke utịt utịn̄ikọ esie, Malwina ama ọdọhọ ete: “Ntak efen odu oro esinamde nnyịn idi ufọk mbufo. Nnyịn imekere iban̄a mbufo. Bible ọdọhọ ete ke ibịghike mme n̄kpọntịbe oro ẹdinyen̄ede ererimbot ẹyesịm ubonowo. Ntre ke ini nnyịn ikọn̄de usụn̄ufọk mbufo, mbọk ẹda ini ẹnọ n̄kpan̄utọn̄. Nnyịn ikpama nditịn̄ nnọ mbufo nte nnyịn ikemede ndidụn̄ ọtọkiet ke nsinsi ke paradise ke isọn̄.”

Udiana etịn̄ikọ ekedi Mateusz, ekedide isua 15 n̄ko. Mateusz ama asian otuowo esie ete ke ediwak isua emi ẹbede, Mme Ntiense Jehovah ẹda nsio nsio usụn̄ ndisuan eti mbụk. Ke uwụtn̄kpọ, ke 1914—ke eyo senima oro owo mîkesitịn̄ke ikọ—Mme Ntiense ẹma ẹsiwụt “Photo-Drama of Creation,” kpa ndise oro ẹnamde-nam n̄kpọ ẹwụt ye ndise slide oro ẹkesịnede mme utịn̄ikọ oro ẹkenamde ẹsan̄a ukem ye se ẹnamde ẹwụt.

 Mateusz ama etịn̄ aban̄a udeme oro ekebe utịn̄ikọ ekenyenede ke ndisuan etop Obio Ubọn̄ ndien ekem etịn̄ aban̄a n̄wọrọnda ndutịm usion̄o ikọ ke uwak usem ke ukwakutom ndise ilektrik (MEPS) oro Mme Ntiense Jehovah ẹkenamde. Enye n̄ko ama obụk nte Mme Ntiense Jehovah ẹn̄wamde ndisian mme dọkta mme usụn̄ usọbọidem oro owo mîdaha iyịp. Enye ama ọdọhọ ete: “Idahaemi, mme ọwọrọetop mbiausọbọ Poland ẹtịn̄ nti ikọ ẹban̄a idaha nnyịn ẹnyụn̄ ẹsọn̄ọ ẹdọhọ ẹte ke imesisiak ediwak mbon udọn̄ọ oro mîdịghe Mme Ntiense idem ke isua kiet kiet ye unana edinọ mmọ iyịp.”

Mateusz ama eberi ke nditịn̄ mban̄a edibọp mme Ufọkmbono Obio Ubọn̄ onyụn̄ ọdọhọ ete: “Nte mbufo ẹkpema ndidi Ufọkmbono Obio Ubọn̄ nnyịn? Ẹdụk ke mfọn, owo itan̄ke etịbe.” Ke etịn̄de aban̄a an̄wa mbono Sosnowiec, Mateusz ọkọdọhọ ete: “Afo ekpenyene ndika n̄kese akamba ufọk oro ẹdade ẹnam n̄kpọ mi. Ntak mûsan̄ake ye nnyịn uka? Nnyịn imenyene ekikere kiet ndinọ, ndien nsan̄a nnyịn Katarzyna ọmọn̄ etịn̄ emi ọnọ mbufo.”

Ekem, Katarzyna oro ekedide isua 15 n̄ko ama etịn̄ ye ifiopesịt ete: “Nnyịn iyadat esịt ndikụt mbufo ke Sosnowiec ke mbono district eke Mme Ntiense Jehovah. Ẹyeneme mme n̄kpọ oro ẹbehede mme uyen.” Katarzyna ama etịn̄ n̄ko aban̄a akpan edinam mme Christian—Editi n̄kpa Jesus Christ. Enye ama esịn udọn̄ ọnọ mme andikpan̄ utọn̄ nnọ enye ete: “Isua oko se iwakde ibe miliọn owo 14 ẹkedụk edinam emi ke ofụri ererimbot. Ntak mûtieneke nnyịn udụk ini efen?”

Ke mmọ ẹma ẹkekụre utịn̄ikọ mmọ, Malwina, Mateusz, ye Katarzyna ẹma ẹnọ mme andikpep n̄wed oro Jehovah’s Witnesses—Proclaimers of God’s Kingdom ọkọrọ ye kaset vidio iba oro ẹnemede mme edinịm ke akpanikọ ye mme edinam Mme Ntiense Jehovah. * Mme andikpep ẹma ẹbọ mmọ ye esịtekọm ẹnyụn̄ ẹn̄wọn̄ọ ndida mmọ n̄kpep ukpepn̄kpọ mbụkeset.

Ke nneme oro okụrede, Martyna emi ekedide isua 12 ama ebre ikwọ oro “We Thank You, Jehovah” (Nnyịn Imọkọm Fi, Jehovah) ọnọ kpukpru mbon oro ẹkesopde idem. Mme uyen Ntiense emi ẹma ‘ẹda uko ke Abasi mmọ’ ẹnọ eti ikọ ntiense. (1 Thessalonica 2:2) Nso ata eti uwụtn̄kpọ ke emi edi ntem ọnọ mme uyen Ntiense ke kpukpru ebiet!

[Ikọ idakisọn̄]

[Ndise ke page 26]

Nte Malwina etịmde utịn̄ikọ esie usen ifan̄ mbemiso ọnọde enye ke ufọkn̄wed

[Ndise ke page 26]

Nte Katarzyna emekde mme itie N̄wed Abasi kaban̄a utịn̄ikọ esie