Jesus Anyan̄a—Didie?

“Jesus anyan̄a!” “Jesus edi Andinyan̄a nnyịn!” Ke ediwak idụt ke ererimbot, ẹsiwet mme utọ ufiet emi ke mme ibibene ufọk ye ke mme an̄wan̄wa itie. Ediwak miliọn owo ẹnen̄ede ẹnịm ke akpanikọ ẹte ke Jesus edi Andinyan̄a mmimọ. Edieke afo obụpde mmọ, “Didie ke Jesus anyan̄a nnyịn?” eyedi mmọ ẹdibọrọ ẹte, “Jesus ama akpa ọnọ nnyịn” m̀mê, “Jesus akakpa kaban̄a mme idiọkn̄kpọ nnyịn.” Ih, n̄kpa Jesus anam ẹkeme ndinyan̄a nnyịn. Edi didie ke n̄kpa owo kiet ekeme ndifụk idiọkn̄kpọ ediwak owo? Edieke ẹkpebụpde fi ẹte, “Didie ke n̄kpa Jesus ekeme ndinyan̄a nnyịn?” afo ọkpọbọrọ didie?

IBỌRỌ oro Bible ọnọde ke mbụme emi edi ata mmemmem onyụn̄ an̄wan̄a owo onyụn̄ enen̄ede enyene se ọwọrọde. Nte ededi, man ifiọk nte emi edide akpan n̄kpọ, oyom nnyịn ibem iso ida uwem ye n̄kpa Jesus nte usọbọ ke ata ọkpọsọn̄ mfịna kiet. Adan̄aoro kpọt ke nnyịn idikeme ndifiọk nnennen nnennen nte n̄kpa Jesus enyenede akwa ufọn.

Ke ndikayak Jesus ọnọ uwem esie, Abasi akanam n̄kpọ aban̄a idaha oro ekedemerede ke ini Adam akanamde idiọkn̄kpọ. Nso n̄kpọ mmọn̄eyet ke idiọkn̄kpọ oro ekedi ntem! Ata akpa owo ye n̄wan esie, Eve, ẹkedi mme mfọnmma owo. Ediye in̄wan̄ Eden  ekedi ebietidụn̄ mmọ. Abasi ama ọnọ mmọ utom oro ekenyenede uduak ndise mban̄a in̄wan̄ ebietidụn̄ mmọ. Mme odu-uwem n̄kpọ eken ke isọn̄ ẹkenyene ndidu ke idak ima ima edise enyịn mmọ. Nte ubonowo ọkọtọtde ọyọhọ isọn̄ ye ediwak miliọn owo ke orụk mmọ, mmọ ẹkenyene nditat paradise nsịm utịt isọn̄. (Genesis 1:28) Nso inem inem utom ke ẹkenọ mmọ ntem! Akan oro, mmọ ẹma ẹnyene ufiop ufiop itie ebuana ye kiet eken. (Genesis 2:18) Mmọ ikananake baba n̄kpọ kiet. Mmọ ẹma ẹnyene idotenyịn nsinsi uwem inemesịt.

Ọsọsọn̄ ndikere nte Adam m̀mê Eve ekpekemede ndinam idiọkn̄kpọ. Edi akpa owo iba oro ẹma ẹsọn̄ ibuot ye enye emi okobotde mmọ—Jehovah Abasi. Ke adade urụkikọt, edibotn̄kpọ eke spirit oro Satan kpa Devil ama abian̄a Eve anam enye ọsọn̄ ibuot ye Jehovah, ndien Adam ama adiana ye enye.—Genesis 3:1-6.

Eyịghe ndomokiet ikodụhe iban̄a se Andibot ekenyenede ndinam Adam ye Eve. Enye ama ananam an̄wan̄a se ididide utịp ntụtutọn̄, ọdọhọde ete: “Dia kpukpru eto in̄wan̄; edi ama edi eto ifiọk, eti ye idiọk, kûdia ke esịt: koro ke usen eke afo adiade ke esịt afo ayakpa n̄kpa.” (Genesis 2:16, 17) Idahaemi ama oyom ẹbọrọ akpan mbụme kiet.

Ubonowo Osobo Ọkpọsọn̄ Mfịna

Akpa idiọkn̄kpọ oro ama ada ata ọkpọsọn̄ mfịna ọsọk ubonowo. Adam ọkọtọn̄ọ uwem nte mfọnmma owo. Ke ntre, nditọ esie ẹkpekekeme ndidu mfọnmma uwem ke nsinsi. Nte ededi, Adam ama anam idiọkn̄kpọ mbemiso ekenyenede eyen ndomokiet. Ofụri ekpụk ubonowo okosụk odu enye ke idem ke ini ẹkenọde enye ubiereikpe emi: “Ke ibibiak iso fo ke afo edidia udia, tutu edifiak ke isọn̄ emi ẹsiode fi ke esịt: koro afo edide ntan, oyonyụn̄ afiak ke ntan.” (Genesis 3:19) Ntre ke ini Adam akanamde idiọkn̄kpọ onyụn̄ ọtọn̄ọde ndikpa nte Abasi ọkọdọhọde, ẹma ẹbiere ikpe n̄kpa ẹnọ ofụri ubonowo ndikpa ye enye.

Nte odotde, apostle Paul ama ewet ke ukperedem ete: ‘Idiọk-n̄kpọ okoto owo kiet odụk ke ererimbot, n̄kpa onyụn̄ oto ke idiọk-n̄kpọ oro odụk; n̄kpa onyụn̄ ebe esịm kpukpru owo, koro kpukpru owo ẹma ẹnam idiọk-n̄kpọ.’ (Rome 5:12) Ih, ke ntak akpa idiọkn̄kpọ oro, nditọ oro ẹkpekemanade nte mme mfọnmma owo ye idotenyịn anana-utịt uwem ẹkemana ye udọn̄ọ, usọn̄, ye n̄kpa nte idotenyịn mmọ.

Owo ekeme ndidọhọ ete, “Oro inenke. Idịghe nnyịn ikemek ndisọn̄ ibuot ye Abasi—Adam ekemek. Ntak emi nnyịn ikpatabade idotenyịn nsinsi uwem ye inemesịt nnyịn?” Nnyịn imọfiọk ite ke edieke esopikpe ekpesịnde eyen ke ufọk-n̄kpọkọbi koro ete esie ekeyịpde ubomisọn̄, eyen oro ekpenyene unen ndiseme ete: “Oro inenke! N̄kanamke idiọkn̄kpọ ndomokiet.”—Deuteronomy 24:16.

Ke ndikpek akpa eren ye n̄wan oro ẹnam idiọkn̄kpọ, ekeme ndidi Satan ekekere ke iyesịn Abasi ke idiọk idaha. Devil ọkọtọn̄ọ en̄wan ke ata ntọn̄ọ mbụk owo—mbemiso nditọ ekededi ẹkemanade. Ke ndondo oro Adam ama akanam idiọkn̄kpọ, akpan mbụme ekedi, Nso ke Jehovah edinam aban̄a nditọ oro Adam ye Eve ẹdinyenede?

Jehovah Abasi akanam se ikedide nnennen ye unenikpe. Edinen owo oro Elihu ọkọdọhọ ete: “Nsa Abasi, enye idiọkke. Nsa Abasi Ibom, enye inamke ukwan̄-n̄kpọ.” (Job 34:10) Ndien prọfet Moses ekewet aban̄a Jehovah ete: “Akwa itiat, utom esie ọfọn ama: koro kpukpru usụn̄ esie ẹnende: Abasi akpanikọ emi mînamke ukwan̄n̄kpọ, enye edi eti ye edinen.” (Deuteronomy 32:4) Usọbọ oro Abasi ọkọnọde kaban̄a mfịna oro idiọkn̄kpọ Adam akadade  edi ibọhọ nnyịn ifet edidu uwem ke nsinsi ke paradise isọn̄.

Abasi Ọnọ Mfọnmma Usọbọ

Kere ban̄a usọbọ oro Jehovah ọkọnọde ke ikpe oro enye ekebierede ọnọ Satan kpa Devil. Jehovah ọkọdọhọ Satan ete: “Nyonyụn̄ nsịn usua ke ufọt fo ye n̄wan [esop Abasi eke heaven], ye ke ufọt mfri fo [ererimbot oro Satan akarade] ye mfri esie [Jesus Christ]: enye ayanuak fi [Satan] ibuot, afo oyonyụn̄ anuak enye nditịn̄-ikpat [n̄kpa Jesus].” (Genesis 3:15, NW) Ke akpa ntịn̄nnịm ikọ Bible emi, Jehovah ama etịn̄ aban̄a uduak esie ndinam Eyen esie eke spirit ke heaven edi isọn̄ edidu uwem nte mfọnmma owo oro Jesus ndien ekem akpa—ẹnuak enye nditịn̄ ikpat—ke idaha unana idiọkn̄kpọ.

Ntak emi Abasi okoyomde mfọnmma owo akpa? Ọfọn, nso ikedi ubiereikpe oro Jehovah Abasi ọkọnọde Adam edieke enye anamde idiọkn̄kpọ? Nte ikedịghe n̄kpa? (Genesis 2:16, 17) Apostle Paul ekewet ete: “N̄kpọ-eyen-utom idiọk-n̄kpọ edi n̄kpa.” (Rome 6:23) Adam ama akpa ke ntak idiọkn̄kpọ esie. Ẹkenọ enye uwem, enye emek ndinam idiọkn̄kpọ, ndien enye ama akpa nte n̄kpọ eyenutom idiọkn̄kpọ esie. (Genesis 3:19) Nso kaban̄a ubiomikpe oro ofụri ubonowo enyenede ke ntak idiọkn̄kpọ oro? Ama oyom n̄kpa man ẹsio isop idiọkn̄kpọ mmọ. Edi n̄kpa anie ekeme ndifụk ndudue ofụri ubonowo nte enende?

Ibet oro Abasi ọkọnọde idụt Israel eset okoyom “uwem ke uwem.” (Exodus 21:23) Nte ekemde ye edumbet ibet emi, n̄kpa oro edifụkde mme ndudue ubonowo enyene ndidi ukem ekọmurua ye se Adam ọkọduọkde. N̄kpa mfọnmma owo en̄wen kpọt ekeme ndikpe utịp idiọkn̄kpọ. Jesus ekedi utọ owo oro. Ke akpanikọ, Jesus ekedi “n̄kem n̄kem ufak” ndida nnyan̄a ofụri ubonowo oro odotde ẹnyan̄a oro ọkọwọrọde oto Adam.—1 Timothy 2:6, NW; Rome 5:16, 17.

N̄kpa Jesus Enyene Akamba Ufọn

N̄kpa Adam ikenyeneke ufọn; enye ama odot ndikpa ke ntak idiọkn̄kpọ esie. Nte ededi, n̄kpa Jesus ama enyene akamba ufọn koro enye akakpade ke idaha unana idiọkn̄kpọ. Jehovah Abasi ama ekeme ndinyịme ekọmurua mfọnmma uwem Jesus nte ufak kaban̄a okopitem nditọ anamidiọk Adam. Ndien ekọmurua uwa Jesus isioho isop idiọkn̄kpọ oro ikanamde ke ini edem kpọt. Edieke okposiode isop idiọkn̄kpọ ini edem kpọt, nnyịn ikpenyeneke idotenyịn iban̄a ini iso. Sia ẹkeyomode nnyịn ke idiọkn̄kpọ, nnyịn ikpafiak inam idiọkn̄kpọ. (Psalm 51:5) Nnyịn ikeme ndiwụt esịtekọm didie ntem nte ke n̄kpa Jesus eberede ifet ọnọ nnyịn ndisịm mfọnmma oro Jehovah ke akpa akaduakde ọnọ nditọ Adam ye Eve!

Ẹkeme ndimen Adam ndomo ye ete oro akakpade ọkpọn̄ nnyịn ke akamba isọn (idiọkn̄kpọ) oro usụn̄ ndomokiet mîdụhe inọ nnyịn ndikpe. Ke n̄kan̄ eken, Jesus ebiet eti ete oro akakpade ayak ediwak inyene oro mîn̄wamke nnyịn ndikpe akamba isọn oro Adam ekesịnde nnyịn kpọt, edi n̄ko ọnọde nnyịn ediwak n̄kpọ ndida ndu uwem ke nsinsi. N̄kpa Jesus idịghe sụk edibiat mme idiọkn̄kpọ ini edem mfep; enye n̄ko edi utịbe utịbe ndutịm kaban̄a ini iso nnyịn.

Jesus anyan̄a koro enye akakpade ọnọ nnyịn. Ndien nso ọsọn̄urua ndutịm ke n̄kpa esie edi ntem! Ke ini nnyịn idade enye nte ubak usọbọ oro Abasi ọnọde kaban̄a awak-n̄kukọhọ mfịna idiọkn̄kpọ Adam, mbuọtidem oro nnyịn inyenede ke Jehovah ye ke usụn̄ unam n̄kpọ esie ọyọsọn̄. Ih, n̄kpa Jesus edi usụn̄ ndinyan̄a “owo ekededi eke ọbuọtde idem” ke enye nsio ke idiọkn̄kpọ, udọn̄ọ, usọn̄, ye n̄kpa. (John 3:16) Nte afo omowụt esịtekọm ọnọ Abasi ke enye ndinam ima ima ndutịm emi kaban̄a edinyan̄a nnyịn?

[Ndise ke page 5]

Adam ama ada idiọkn̄kpọ ye n̄kpa ọsọk ubonowo

[Ndise ke page 6]

Jehovah ama ọnọ mfọnmma usọbọ