Mme Edidiọn̄ Ẹtode Eti Mbụk
Mme Edidiọn̄ Ẹtode Eti Mbụk
“Jehovah emeyet mi aran enịm, man mbụk eti mbụk nnọ mbon nsụk-esịt; ọmọdọn̄ mi, ete mbọp mmọ eke esịt mmọ obụn̄ọde, . . . ndọn̄ kpukpru mme atua-eyet esịt.”—ISAIAH 61:1, 2.
1, 2. (a) Jesus ọkọdọhọ ke imọ idi nso, ndien didie? (b) Mme edidiọn̄ ewe ẹketo eti mbụk emi Jesus ọkọkwọrọde?
USEN Sabbath kiet ke ntọn̄ọ ntọn̄ọ utom ukwọrọikọ esie, Jesus okodu ke synagogue ke Nazareth. Nte n̄wetnnịm n̄kpọ oro ọdọhọde, ẹma “ẹnọ Enye n̄wed prophet Isaiah. Ndien ke Enye okụbọrede n̄wed, okụt itie emi ẹwetde ẹte, Spirit Jehovah odoro Mi ke idem, koro Enye emeyet Mi aran enịm, ete, n̄kwọrọ eti mbụk.” Jesus ama aka iso ndikot udọn̄ikọ ntịn̄nnịm ikọ oro. Ekem enye ama osụhọde etetie onyụn̄ ọdọhọ ete: “Ikọ n̄wed Abasi emi omosu ke utọn̄ mbufo mfịn emi.”—Luke 4:16-21.
2 Ke usụn̄ emi, Jesus ama anam ẹdiọn̄ọ enye nte ọkwọrọ eti mbụk, andibụk eti mbụk, ye andinọ ndọn̄esịt oro ẹkebemde iso ẹtịn̄ ẹban̄a. (Matthew 4:23) Ndien nso eti mbụk ke Jesus ekenyene ntem ndibụk! Enye ama ọdọhọ mme andikpan̄ utọn̄ nnọ enye ete: “Ami ndi un̄wana ererimbot; owo eke etienede Mi idisan̄ake ke ekịm, edi eyenyene un̄wana uwem.” (John 8:12) Enye ama ọdọhọ n̄ko ete: “Edieke mbufo ẹsọn̄ọde ẹda ke ikọ Mi, mbufo ẹdi mbet Mi ke akpanikọ: ndien mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.” (John 8:31, 32) Ih, Jesus ama “enyene ikọ uwem nsinsi.” (John 6:68, 69) Un̄wana, uwem, uwọrọ-ufụn—ke akpanikọ mmọ emi ẹdi mme edidiọn̄ oro ẹkpedade ke ọsọn̄urua!
3. Nso eti mbụk ke mme mbet Jesus ẹkekwọrọ?
3 Ke Pentecost 33 E.N. ama ekebe, mme mbet ẹma ẹka iso ndinam utom Jesus edide edikwọrọ eti mbụk. Mmọ ẹma ẹkwọrọ “eti mbụk obio ubọn̄” ẹnọ nditọ Israel ye mme Gentile. (Matthew 24:14, NW; Utom 15:7; Rome 1:16) Mbon oro ẹkenamde n̄kpọ ẹban̄a ẹma ẹdi ẹdifiọk Jehovah Abasi. Ẹma ẹsion̄o mmọ ke ufụn ido ukpono, mmọ ẹma ẹnyụn̄ ẹkabade ẹdi ubak obufa idụt eke spirit, kpa “Israel Abasi,” emi mme andibuana ke enye ẹnyenede idotenyịn ndikara ke heaven ke nsinsi ye Ọbọn̄ mmọ, Jesus Christ. (Galatia 5:1; 6:16; Ephesus 3:5-7; Colossae 1:4, 5; Ediyarade 22:5) Ke akpanikọ, mmọ ẹkedi mme ọsọn̄urua edidiọn̄!
Edikwọrọ Eti Mbụk Mfịn
4. Ke usụn̄ ewe ke ẹnam utom edikwọrọ eti mbụk mfịn?
4 Mfịn, mme Christian oro ẹyetde aran, oro “akwa otuowo” eke “mme erọn̄ en̄wen” emi ibat mmọ ọkọride-kọri ẹnọde ibetedem, ẹka iso ndinam ntịn̄nnịm utom oro ẹkenọde Jesus. (Ediyarade 7:9; John 10:16) Nte utịp, ẹkwọrọ eti mbụk ke udomo oro akanam owo mîkwọrọke. Ke idụt ye efakutom 235, Mme Ntiense Jehovah ‘ẹbụk eti mbụk ẹnọ mbon nsụk-esịt; ẹbọp mmọ eke esịt mmọ obụn̄ọde, ẹkwọrọ uwọrọ-ufụn ẹnọ mbuot ekọn̄, ẹkwọrọ nsana-nyak ẹnọ mmọ eke ẹkọbide; ẹkwọrọ isua mfọnido Jehovah, ye usen usiene Abasi; ẹdọn̄ kpukpru mme atua-eyet esịt.’ (Isaiah 61:1, 2) Ntem, utom ukwọrọikọ Christian aka iso ndida edidiọn̄ nsọk ediwak owo onyụn̄ ada ata ndọn̄esịt ọsọk “mmọ emi ẹdude ke ukụt ekededi.”—2 Corinth 1:3, 4.
5. Kaban̄a edikwọrọ eti mbụk, didie ke Mme Ntiense Jehovah ẹkpụhọde ye mme ufọkabasi Christendom?
5 Edi akpanikọ nte ke mme ufọkabasi Christendom ẹnam nsio nsio orụk ukwọrọikọ. Ediwak mmọ ẹsidọn̄ mme isụn̄utom ndikenyịk mme owo ke mme idụt en̄wen ẹkabade esịt. Ke uwụtn̄kpọ, The Orthodox Christian Mission Center Magazine etịn̄ aban̄a edinam mme isụn̄utom Orthodox ke Madagascar, usụk usụk Africa, Tanzania, ye Zimbabwe. Nte ededi, ke Ufọkabasi Orthodox, kpa nte edide ke mme ufọkabasi Christendom eken, n̄wakn̄kan ke otu mme andibuana isitieneke inam utọ utom oro. Ke okpụhọrede ye oro, kpukpru Mme Ntiense Jehovah oro ẹma ẹkeyak idem ẹnọ ẹsidomo ndibuana ke ndikwọrọ eti mbụk. Mmọ ẹfiọk ẹte ke editan̄a eti mbụk edi uyarade nte ke mmimọ imenyene ata mbuọtidem. Paul ọkọdọhọ ete: “Owo ada esịt enịm ke akpanikọ enyene edinen ido; onyụn̄ ada inua enyịme enyene edinyan̄a.” Ke nditịm ntịn̄, mbuọtidem oro mînụkke owo anam n̄kpọ, akpa.—Rome 10:10; James 2:17.
Eti Mbụk Oro Adade Nsinsi Edidiọn̄ Edi
6. Nso eti mbụk ke ẹkwọrọ mfịn?
6 Mme Ntiense Jehovah ẹkwọrọ mfọnn̄kan mbụk. Mmọ ẹda Bible mmọ ẹwụt mbon oro ẹmade ndikpan̄ utọn̄ nte ke Jesus akawa uwem esie man eberede usụn̄ ọnọ ubonowo ndisan̄a n̄kpere Abasi, man ẹfen mme idiọkn̄kpọ, ẹnyụn̄ ẹnyene idotenyịn nsinsi uwem. (John 3:16; 2 Corinth 5:18, 19) Mmọ ẹtọt ẹte ke ẹma ẹwụk Obio Ubọn̄ Abasi ke heaven ke ubọk Edidem emi ẹyetde aran, Jesus Christ, ye nte ke ibịghike enye oyosio kpukpru idiọkido efep ke isọn̄ onyụn̄ anam ẹfiak ẹwụk Paradise. (Ediyarade 11:15; 21:3, 4) Ke edisu ntịn̄nnịm ikọ Isaiah, mmọ ẹtọt mbọhọidụn̄ mmọ ẹte ke idahaemi edi “isua mfọnido Jehovah,” emi ubonowo osụk ekemede ndinam n̄kpọ mban̄a eti mbụk. Mmọ ẹtọt n̄ko ẹte ke ibịghike “usen usiene Abasi nnyịn” eyedi emi Jehovah edisobode mme anamidiọk oro mîkabakede esịt.—Psalm 37:9-11.
7. Ifiọk n̄kpọntịbe ewe iwụt edidianakiet eke Mme Ntiense Jehovah, ndien ntak emi mmọ ẹnyenede utọ edidianakiet oro?
7 Ke ererimbot oro ọyọhọde ye n̄kpọ mmọn̄eyet ye afanikọn̄, emi edi n̄kukụre eti mbụk emi akamade nsinsi edidiọn̄. Mbon oro ẹnyịmede enye ẹkabade ẹdi ubak otu nditọete Christian ofụri ererimbot oro ẹdianade kiet, oro mîyakke asari idụt, ekpụk, m̀mê idaha ke ndutịm uforo abahade mmọ. Mmọ “ẹsịne ima, emi edide se ibọpde uwem adiana inam ọfọn ama.” (Colossae 3:14; John 15:12) Ẹma ẹkụt emi isua oko ke idụt Africa kiet. Ikan̄ ẹketopde usenubọk usen kiet ama edemede mme owo ẹdụn̄de ke ibuot obio oro. Ediomi edibọ ukara ke odudu ke osụk akaka iso. Ke ini en̄wan oro akakabarede edi en̄wan ekpụk, ẹma ẹkụt ndudue ẹnọ ubon Ntiense kiet ke mmọ ndida mme ekemmọ Ntiense oro ẹtode ekpụk efen nsịn ke ufọk. Mbon ubon oro ẹma ẹbọrọ ẹte: “Mme Ntiense Jehovah kpọt ẹdụn̄ ke ufọk nnyịn.” Ye mmọ, asari ekpụk ikedịghe akpan n̄kpọ; ima Christian—edinọ mbon oro ẹdude ke unana ndọn̄esịt—ekedi akpan n̄kpọ. Owo ubon oro kiet emi mîkedịghe Ntiense ama ọdọhọ ete: “Mme andibuana ke kpukpru ido ukpono ẹma ẹda mme ekemmọ andituak ibuot ẹnọ. Mme Ntiense Jehovah kpọt mîkadaha inọ.” Ediwak ntọt ẹban̄ade ukem n̄kpọntịbe emi ke mme idụt oro en̄wan mbio obio ọnọmọde ẹwụt nte ke Mme Ntiense Jehovah ẹnen̄ede “ẹma nditọ-ete.”—1 Peter 2:17.
Eti Mbụk Okpụhọde Mme Owo
8, 9. (a) Mme ukpụhọde ewe ke mbon oro ẹnyịmede eti mbụk ẹnam? (b) Mme ifiọkutom ewe iwụt odudu emi eti mbụk enyenede?
8 Eti mbụk enyene n̄kpọ ndinam ye se Paul okokotde ‘uwem emi odude ke emi ye uwem emi edidide.’ (1 Timothy 4:8) Enye inọhọ utịbe utịbe idotenyịn ini iso oro enyenede nsọn̄ọ kpọt edi n̄ko anam “uwem emi odude ke emi” ọfọn akan. Nte owo kiet kiet, Ikọ Abasi, kpa Bible, ada Mme Ntiense Jehovah usụn̄ ndinam uwem mmọ odu ke n̄kemuyo ye uduak Abasi. (Psalm 119:101) Nte mmọ ẹkọride mme utọ edu nte edinen ido ye edinam akpanikọ, ẹsinam edu mmọ edi obufa.—Ephesus 4:24.
9 Kere ban̄a uwụtn̄kpọ Franco. Enye ekedi owo iyatesịt. Ini ekededi emi mfịna okodude, enye ama esinen̄ede ayat esịt onyụn̄ abiat n̄kpọ. N̄wan esie ama ekpep Bible ye Mme Ntiense Jehovah, ndien uwụtn̄kpọ Christian mmọ ama an̄wam Franco sụn̄sụn̄ ndikụt nte ke imọ inyene ndikpụhọde. Enye ama ekpep Bible ye mmọ ndien ke akpatre ama ekeme ndision̄o mbun̄wụm spirit ẹdide emem ye mfara ke idem. (Galatia 5:22, 23) Enye ekedi kiet ke otu owo 492 oro ẹkenade baptism ke Belgium ke isua utom 2001. Kere, n̄ko, ban̄a Alejandro. Akparawa oro ama enyene mbumehe uda n̄kpọsọn̄ ibọk esịm udomo edisan̄a ke mme ifụm mbio nsat mme n̄kpọ ndinyam man aka iso ke mbumehe n̄kpọsọn̄ ibọk esie. Ke ini enye ekesịmde isua 22, Mme Ntiense Jehovah ẹma ẹdọhọ Alejandro ẹte ekpep Bible, ndien enye ama enyịme. Enye ama okot Bible kpukpru usen onyụn̄ odụk mme mbono esop Christian. Enye ama ọsọsọp okpụhọde uwem esie tutu ke se ikosụhọrede ikan ọfiọn̄ itiokiet, enye ama ekeme ndibuana ke utom ukwọrọikọ—kiet ke otu owo 10,115 emi ẹkenamde oro isua oko ke Panama.
Eti Mbụk—Edidiọn̄ Ọnọ Mbon Nsụkesịt
10. Mmanie ẹnyịme eti mbụk, ndien didie ke idaha ekikere mmọ okpụhọde?
10 Isaiah ama ebem iso etịn̄ ete ke ẹyekwọrọ eti mbụk ẹnọ mbon nsụkesịt. Mmanie ẹdi mbon nsụkesịt emi? Mmọ ke ẹtịn̄ ẹban̄a ke n̄wed Utom nte “mmọ emi ẹkenịmde ẹnọ nsinsi uwem.” (Utom 13:48) Mmọ ẹdi mbon nsụhọdeidem ẹtode kpukpru idaha ke n̄kaowo emi ẹnyịmede etop akpanikọ. Mme utọ owo oro ẹfiọk ẹte ke ndinam uduak Abasi esida mme edidiọn̄ oro ẹkponide ẹkan n̄kpọ ekededi emi ererimbot ekemede ndinọ, edi. (1 John 2:15-17) Nte ededi, Mme Ntiense Jehovah ẹsisan̄a didie ẹsịm esịt mme owo ke utom ukwọrọikọ mmọ?
11. Nte Paul ọdọhọde, didie ke ẹkpekwọrọ eti mbụk?
11 Ọfọn, kere ban̄a uwụtn̄kpọ apostle Paul, emi ekewetde ọnọ mbon Corinth ete: “Ke adan̄aemi n̄kedide ke ọtọ mbufo, nditọ-ete, nsan̄ake ye akan ikọ m̀mê ifiọk n̄kwọrọ ndịbe-n̄kpọ Abasi nnọ mbufo. Koro n̄kadaduak nte ndifiọkke baba n̄kpọ kiet ke otu mbufo, ke mîbọhọke Jesus Christ, ye nte ẹkewotde Enye.” (1 Corinth 2:1, 2) Paul ikodomoke ndinam mme andikpan̄ utọn̄ nnọ enye ẹkụt ifiọk esie. Enye ekekpep sụk akpanikọ Abasi, akpanikọ oro ẹwetde mfịn ke Bible. N̄ko, tịm fiọk nsịnudọn̄ oro Paul ọkọnọde ekemmọ ọkwọrọ ikọ oro Timothy: “Kwọrọ ikọ, nam enye usọp usọp.” (2 Timothy 4:2, NW) Timothy ekenyene ndikwọrọ “ikọ,” kpa etop Abasi. Paul ama ewet ọnọ ẹsọk Timothy n̄ko ete: “Sịn ifịk wụt Abasi idem fo, ete idi owo eke ẹdomode ẹfiọk, anam-utom eke mînyeneke ntak ndikop bụt, edi itịmde isiak ikọ akpanikọ.”—2 Timothy 2:15.
12. Didie ke Mme Ntiense Jehovah mfịn ẹtiene mme ikọ ye uwụtn̄kpọ Paul?
12 Mme Ntiense Jehovah ẹtiene uwụtn̄kpọ Paul, ẹnyụn̄ ẹnam mme ikọ oro enye ekewetde ọnọ ẹsọk Timothy. Mmọ ẹfiọk odudu emi Ikọ Abasi enyenede ẹnyụn̄ ẹda enye ẹnam n̄kpọ nte ọfọnde nte mmọ ẹyomde ndiwụt mme mbọhọidụn̄ mmọ nti ikọ oro ẹnọde idotenyịn ye ndọn̄esịt. (Psalm 119:52; 2 Timothy 3:16, 17; Mme Hebrew 4:12) Edi akpanikọ, mmọ ẹsida mme n̄wed Bible ẹnam n̄kpọ nte ọfọnde man mbon oro ẹnyenede udọn̄ ẹkeme ndinyene ifiọk Bible efen efen ke ini idemmọ. Edi mmọ ẹsiwụt mme owo mme ikọ N̄wed Abasi kpukpru ini. Mmọ ẹfiọk ẹte ke Ikọ Abasi eke odudu spirit oyotụk esịt mbon nsụhọdeidem. Ndien ndida enye nnam n̄kpọ ke usụn̄ emi esisọn̄ọ mbuọtidem mmọ n̄ko.
‘Dọn̄ Kpukpru Mme Atua-Eyet Esịt’
13. Ke isua 2001, mme n̄kpọntịbe ewe ikanam ntatara udọn̄ ndidọn̄ mme atua-eyet esịt odu?
13 Isua 2001 akasan̄a ye mme afanikọn̄ esie, ndien nte utịp, ediwak owo ẹma ẹyom ndọn̄esịt. N̄wọrọnda uwụtn̄kpọ kiet edi se iketịbede ke September isua oko ke United States, ke ini mbon edinam oyomonsia ẹkebiatde World Trade Center ke New York ye Pentagon ekperede Washington, D.C. Mbọribọ okomụm ofụri idụt oro didie ntem aban̄a mme edinam oyomonsia oro! Kpa ye mme utọ n̄kpọntịbe oro, Mme Ntiense Jehovah ẹsidomo ndinam utom mmọ edide ‘edidọn̄ kpukpru mme atua-eyet esịt.’ Ifiọkutom ifan̄ ẹyewụt nte mmọ ẹsinamde emi.
14, 15. Didie ke Mme Ntiense ẹkekeme ndida N̄wed Abasi ndọn̄ mme atuaeyet esịt uforo uforo ke idaha iba?
14 Ntiense kiet emi edide ọkwọrọikọ uyọhọ ini ama asan̄a ebịne eyenan̄wan kiet ke mbenusụn̄ okobụp m̀mê nso ke enye ekere aban̄a edinam oyomonsia eke ndondo oro. Eyenan̄wan oro ama ọtọn̄ọ eyet. Enye ama ọdọhọ ete ke mbọm anam imọ, ke onyụn̄ ọdọn̄ imọ nte ikpekemede ndin̄wam ke usụn̄ ekededi. Ntiense oro ama asian enye ete ke Abasi enen̄ede enyene udọn̄ ke idem kpukpru nnyịn, ndien enye ama okot Isaiah 61:1, 2. Mme ikọ odudu spirit Abasi emi ẹma ẹsịne ifiọk ẹnọ eyenan̄wan oro, emi ọkọdọhọde ete ke kpukpru owo ẹdu ke mfụhọ. Enye ama ọbọ tract kiet onyụn̄ ọdọhọ Ntiense oro ete edi ufọk imọ edise imọ.
15 Ntiense iba emi ẹkenamde utom ukwọrọikọ ẹma ẹsobo ye eren oro akanamde utom ke efeurua esie. Mmọ ẹma ẹdọhọ ke iyom ndiwụt enye mme ikọ ndọn̄esịt ke N̄wed Abasi ke ntak n̄kpọ mmọn̄eyet oro ẹketịbede ndondo oro ke World Trade Center. Ke unyịme esie mmọ ẹma ẹkot 2 Corinth 1:3-7, emi esịnede mme ikọ emi: “Ndọn̄esịt . . . awak oto ke Christ.” Eren oro ama okop inemesịt nte ke mme mbọhọidụn̄ imọ ẹdide Mme Ntiense ẹkeda n̄kpọ oro ọnọde ndọn̄esịt ẹsọk mbon en̄wen onyụn̄ ọdọhọ ete: “Abasi akpakam ọdiọn̄ utịbe utịbe utom emi mbufo ẹnamde.”
16, 17. Ewe ifiọkutom iba ẹwụt odudu oro Bible enyenede ke ndin̄wam mme owo oro ẹfụhọde m̀mê ẹtịmerede esịt ẹban̄a mme n̄kpọ mmọn̄eyet?
16 Ntiense emi akafiakde aka ndise mbon oro ẹkenyenede udọn̄ ama osobo ye eyeneren mma kiet emi ekenyenede udọn̄ ke mbemiso onyụn̄ anam an̄wan̄a enye ete ke imọ imekere iban̄a nte n̄kpọ etiede ye mme mbọhọidụn̄ imọ ke etienede n̄kpọ mmọn̄eyet oro eketịbede ndondo oro. Idem ama akpa eren oro ndikụt nte Ntiense oro akadade ini esie ndisan̄a nse mme owo nnyụn̄ mbụp nte n̄kpọ etiede ye mmọ. Enye ama ọdọhọ ete ke imọ ikanam utom ikpere World Trade Center ke ini edinam oyomonsia oro akadade itie ndien ke ima ida enyịn ikụt ofụri n̄kpọntịbe oro. Ke ini enye okobụpde ntak emi Abasi ayakde ndutụhọ odu, Ntiense oro ama okot ndusụk ufan̄ikọ ke Bible, esịnede Psalm 37:39, emi ọdọhọde ete: “Edi Jehovah anyan̄a nti owo: enye edi odudu mmọ ke ini ukụt.” Eren oro ke mfọnido ama obụp nte n̄kpọ etiede ye Ntiense oro ye ubon esie, ọnọ enye ikot ete afiak awaha, onyụn̄ owụt ntotụn̄ọ esịtekọm aban̄a ediwaha oro.
17 Owo efen ke otu ediwak tọsịn mbon oro ẹtuan̄ade oro Mme Ntiense Jehovah ẹkedọn̄de esịt ke etienede edinam oyomonsia oro ekedi eyenan̄wan emi Mme Ntiense ẹkesobode ke adan̄aemi mmọ ẹkesan̄ade ẹse mme mbọhọidụn̄ mmọ. Enye ama enen̄ede ofụhọ aban̄a se iketịbede onyụn̄ akpan̄ utọn̄ nte mmọ ẹkotde Psalm 72:12-14: “Enye ayanyan̄a ubuene ke in enye esemede; ye owo ukụt, ye owo eke mînyeneke andinyan̄a. Enye ayatua eyen unana ye ubuene mbọm, onyụn̄ anyan̄a ukpọn̄ mme ubuene. Enye ayafak ukpọn̄ mi osio ke ukụt ye nnama: onyụn̄ ese iyịp mmọ ke n̄kpọ-uto.” Mme ikọ oro ẹkenyene se ẹwọrọde didie ntem! Eyenan̄wan oro ama eben̄e Mme Ntiense oro ete ẹfiak ẹkot ufan̄ikọ oro onyụn̄ ọdọhọ mmọ ẹdụk ẹdi ufọk imọ ẹdika iso ke nneme oro. Ke utịt nneme oro, ẹma ẹtọn̄ọ ukpepn̄kpọ Bible.
18. Didie ke Ntiense kiet akan̄wam mme mbọhọidụn̄ esie ke ini ẹkedọhọde enye ada mmọ usụn̄ ke akam?
18 Ntiense kiet anam utom ke itie unyamudia ke akwa obio kiet emi mme owo mîkenyeneke udọn̄ ke mbemiso ke eti mbụk Obio Ubọn̄. Ke edinam oyomonsia oro ama akada itie, ndịk ama odu ke obio oro. Ke mbubịteyo Friday oro eketienede edinam oyomonsia oro, etubom itie unyamudia oro ama ọdọhọ ete kpukpru owo ẹdomo tiande ẹkeda ke an̄wa, ẹdop uyo ke esisịt ini ke nditi mbon unọmọ oro. Ke owụtde ukpono ọnọ ekikere mmọ, Ntiense oro ama ọwọrọ an̄wa okodop uyo ada ke mbenusụn̄. Etubom oro ama ọfiọk ete ke enye ekedi asan̄autom Mme Ntiense Jehovah, ntre ke ndopuyo editi oro okụrede, enye ama ọdọhọ ete Ntiense oro ada kpukpru owo usụn̄ ke akam. Ntiense oro ama enyịme. Ke akam esie, enye ama etịn̄ aban̄a ntatara mfụhọ oro edi ama ọdọhọ ete ke iyomke mbon mfụhọ oro ẹfụhọ ye unana idotenyịn. Enye ama etịn̄ aban̄a ini emi utọ enyene-ndịk n̄kpọntịbe oro mîditịbeke aba onyụn̄ ọdọhọ ete ke kpukpru owo ẹkeme ndisan̄a n̄kpere Abasi ndọn̄esịt ebe ke ndinyene nnennen ifiọk Bible. Ke ama ọkọdọhọ “Amen,” etubom oro—ọkọrọ ye se iwakde ibe owo 60 oro ẹkedude ke an̄wa itie unyamudia oro—ama asan̄a ebịne Ntiense oro, ọkọm enye, afat enye, ọdọhọde ete ke akam oro ekedi mfọnn̄kan akam oro akanam imọ ikopde.
Edidiọn̄ Adade Ọsọk Obio
19. Ifiọkutom ewe iwụt ke ndusụk owo ẹfiọk n̄kokon̄ idaha Mme Ntiense Jehovah?
19 Idahaemi akpan akpan, mme obio oro Mme Ntiense Jehovah ẹnamde utom ifịk ifịk ẹbọ ufọn ẹto edidu mmọ—nte ediwak owo ẹdọhọde. Didie ke mme owo oro ẹsịnde udọn̄ ẹnọ emem, edinam akpanikọ, ye edisana ido uwem mîkpedịghe eti odudu? Ke idụt kiet ke Ufọt Ufọt Asia, Mme Ntiense ẹma ẹsobo ye akwa owo n̄ka ukpeme ukara oro ama ọkọkpọn̄ utom. Enye ama ọdọhọ ete ke ẹma ẹnọ imọ utom ini kiet ko ndidụn̄ọde nsio nsio esop ido ukpono. Ke ini imọ ikodụn̄ọrede Mme Ntiense Jehovah, edinam akpanikọ ye eti edu uwem mmọ ẹma ẹtụk imọ. Enye ama ama ọkpọsọn̄ mbuọtidem mmọ ye nte mmọ ẹkekọn̄de mme ukpepn̄kpọ mmọ ke N̄wed Abasi. Eren emi ama enyịme ukpepn̄kpọ Bible.
20. (a) Nso ke ibatutom oro Mme Ntiense Jehovah ẹketọtde isua oko owụt? (b) Nso iwụt nte ke ekese utom efen efen ke osụk ododu ndinam, ndien didie ke nnyịn ise utom ukwọrọikọ nnyịn?
20 Otode ifiọkutom ifan̄ oro ẹbụkde ke ibuotikọ emi, ke otu ediwak tọsịn oro ẹkemede ndibụk, ana in̄wan̄-in̄wan̄ nte ke Mme Ntiense Jehovah ẹma ẹnen̄ede ẹyọhọ ye utom ke isua utom 2001. * Mmọ ẹma ẹnyene nneme ye ediwak miliọn owo, ẹma ẹdọn̄ ediwak mbon oro ẹtuan̄ade esịt, ndien ẹma ẹdiọn̄ utom ukwọrọikọ mmọ. Owo 263,431 ẹma ẹyarade uyakidem mmọ nnọ Abasi ebe ke ndina baptism. Ke ofụri ererimbot, ibat mme ọkwọrọ eti mbụk ama ọkọri ke mbahade 1.7 eke ikie. Ndien owo 15,374,986 ndikodụk Editi n̄kpa Jesus eke isua ke isua owụt nte ke ekese utom efen efen ke osụk ododu ndinam. (1 Corinth 11:23-26) Nnyịn ikpakam ika iso ndiyom mbon nsụkesịt oro ẹnyịmede eti mbụk. Ndien adan̄a nte isua mfọnido Jehovah osụk akade iso, nnyịn ikpakam ika iso ndidọn̄ “mmọ eke esịt mmọ obụn̄ọde” esịt. Nso utom oro asan̄ade ye edidiọn̄ ke nnyịn inyene ntem! Ke akpanikọ kpukpru nnyịn imetịn̄ mme ikọ Isaiah emi: “Nyadat esịt eti-eti ke Jehovah, ukpọn̄ mi eyebre aban̄a Abasi mi.” (Isaiah 61:10) Abasi akpakam aka iso ndida nnyịn nnam n̄kpọ nte enye osude mme ntịn̄nnịm ikọ emi: “Ọbọn̄ Jehovah [ayanam] edinen ido ye itoro ẹtịbe ke iso kpukpru mme idụt.”—Isaiah 61:11.
[Ikọ idakisọn̄]
^ ikp. 20 Chart oro odude ke page 19 esịm 22 ọtọt utom Mme Ntiense Jehovah ke isua utom 2001.
Nte Afo Emeti?
• Didie ke mbon nsụkesịt ẹkebọ edidiọn̄ ẹto eti mbụk oro Jesus ọkọkwọrọde?
• Mme edidiọn̄ ewe ke mbon oro ẹkenamde n̄kpọ ẹban̄a utom ukwọrọikọ mme mbet Jesus eke akpa isua ikie ẹkebọ?
• Didie ke mbon oro ẹnyịmede mfịn ẹbọ edidiọn̄ ẹto eti mbụk?
• Didie ke nnyịn ise ifet nnyịn ndidi mme ọkwọrọ eti mbụk?
[Mme Mbụme Ukpepn̄kpọ]
[Chart ke page 19-22]
IBATUTOM ISUA UTOM 2001 EKE MME NTIENSE JEHOVAH KE OFỤRI ERERIMBOT
(Se magazine)
[Mme ndise ke page 15]
Mme Ntiense Jehovah ẹsiti kpukpru ini ẹban̄a mbiomo oro mmọ ẹnyenede ndikwọrọ ikọ
[Mme ndise ke page 17]
Mbon oro ẹnyịmede eti mbụk ẹsikabade ẹdi ubak otu nditọete ofụri ererimbot oro adianade kiet