Ọtọ Udịbe Ofụm

AFO emekeme ndikụt mfụhọ mfụhọ eto ẹkotde alpine rose ke etịn̄e ikpọ obot Europe. Itịpitịp rose emi esiwak ndibiọk isọn̄ isọn̄ man ọbọhọ ọkpọsọn̄ ofụm etịn̄e obot emi. Ọkpọsọn̄ ofụm emi esifịna eto alpine emi ke ndinam idaha eyo ebịt, ndinam isọn̄ ye ofụm ẹsat, ndinyụn̄ n̄wụbede mmọ.

Alpine rose esiwak ndibọhọ ofụm emi ebe ke ndidọn̄ n̄kam ke mme abaitiat. Okposụkedi ntan mîsiwakke ke mme itie emi, mme abaitiat emi ẹsin̄wam eto emi ọbọhọ ofụm ẹsinyụn̄ ẹn̄wam enye aka iso enyene mmọn̄. Ekpere ndidi owo isikwe mmọ ke n̄wakn̄kan ini ke isua, edi ke ndaeyo mme eto emi ẹsision̄o ndatndat flawa ẹbana ikpọ obot emi ẹdide ebiet ubọhọ mmọ.

Prọfet Isaiah ama anam an̄wan̄a nte ke Abasi eyemek “mbọn̄,” ndien ke mmọ kiet kiet ẹyebiet “ọtọ udịbe ofụm.” (Isaiah 32:1, 2) Ke idak ndausụn̄ Edidem, Christ Jesus, mbọn̄ eke spirit, m̀mê mme esenyịn emi, ẹyebiet ikpọ itiat, ẹsọn̄ọde ẹda ke mme ini mfịghe ye ukụt. Mmọ ẹyenọ ubọhọ oro ẹkemede ndiberi edem ke ini afanikọn̄, ẹnyụn̄ ẹn̄wam mbon unana ndika iso nnyene mmọn̄ eke spirit otode Ikọ Abasi.

Ukem nte ofụm, ukọbọ, unana udọn̄, m̀mê udọn̄ọ ẹkeme ndinam mbuọtidem Christian emem edieke enye mînyeneke ukpeme. Mbiowo Christian ẹkeme ndinọ ukpeme ebe ke ndinen̄ede nnọ n̄kpan̄utọn̄ ke se idide mfịna Christian oro, ẹnọde item oro ọkọn̄ọde ke Bible, ẹnyụn̄ ẹnọde nsịnudọn̄ m̀mê ata ata un̄wam. Ukem nte Edidem mmọ oro ẹmekde, Christ Jesus, mmọ ẹyom ndin̄wam mbon oro “ẹsuanade.” (Matthew 9:36) Ndien esidọn̄ mmọ ndin̄wam mbon oro ofụm nsunsu ukpepn̄kpọ eberide. (Ephesus 4:14) Utọ un̄wam oro ẹnọde mi ke ini ifet ebererede ekeme ndinen̄ede nnyene ufọn.

Miriam anam an̄wan̄a ete: “Mma nnen̄ede mfụhọ ke ini ndusụk n̄kpet n̄kpet ufan mi ẹkekpọn̄de esop, ete mi okonyụn̄ ọdọn̄ọde uwọrọiyịp ke mfre ke ukem ini oro. Ke ukeme ndikan mfụhọ emi, mma ntọn̄ọ ndiwọrọ an̄wa ye ufan eren edide owo ererimbot. Esisịt ini ke oro ebede, ke n̄kerede ke ndotke, mma nsian mbiowo nte ke mmọn̄ n̄kpọn̄ esop, sia n̄kenen̄ede nnịm nte ke Jehovah ikemeke ndima mi.

“Ke ọkpọsọn̄ ini emi, ima ima ebiowo kiet ama eti mi aban̄a mme isua oro n̄kanamde utom nte asiakusụn̄ ofụri ini. Enye ama asian mi ete ke kpukpru ini imọ ima isima edinam akpanikọ mi, ndien enye ama ọdọhọ ke mfọnido ete nyak mbiowo ẹn̄wam mi, ẹsọn̄ọ ẹnọ mi nte ke Jehovah ama mi. Ima ima udọn̄ mmọ ke akpan ini emi eketie nte ‘ọtọ udịbe’ ọnọ mi ke ini oyobio eke spirit oro akabarade mi. Ke ufan̄ ọfiọn̄ kiet, mma nsịbe ebuana ye ufan eren mi oro, ndien ami ke n̄ka iso ndisan̄a ke usụn̄ akpanikọ toto ke ini oro.”

Mbiowo ẹsikop inemesịt ke ini mmọ ẹkụtde nte mme ekemmọ Christian ẹforode ke n̄kan̄ eke spirit, ke ntak ukpeme oro ẹkenọde mmọ ke nnennen ini. Ndien mme “ọtọ udịbe” emi ẹnam nnyịn itabi akpakịp un̄wam eke spirit oro nnyịn idibọde ke ini Ukara Christ eke Tọsịn Isua ise.