Edinyene Eti Ubieresịt Akpa Nso?

“ẸWỤK Ukara Ẹte Ọbọ R$20,000.” Esen esen akpan ibuotikọ emi ama odu ke n̄wedmbụk n̄kpọntịbe Brazil oro Correio do Povo. Ibuotikọ oro ama ọtọt aban̄a Luiz Alvo de Araújo, owo emi esidade leta edinọ ke n̄kann̄kụk, oro akanyamde isọn̄ ọnọ ukara. Ke ama ekesịn ubọk ke n̄wed ndiwụt ke idịghe imọ inyene isọn̄ oro aba, Luiz ama okop n̄kpaidem ndikụt nte ke okụk ẹkekpede imọ ama ada R$20,000 (n̄kpọ nte $8,000, U.S.) awak akan ekọmurua oro mmimọ ikebierede!

Ndikpọn̄ nyọhọ-nsụhọ okụk oro nnọ ikedịghe mmemmem n̄kpọ. Ke ama akasan̄a ke mme itieutom ukara ediwak ini mînyụn̄ ikwe unen, ẹma ẹteme Luiz ẹte ekpe ekpeibet esịn onyụn̄ ebiere mfịna emi ke esopikpe. Ebiereikpe oro okowụkde ukara ete ọbọ okụk oro onyụn̄ ekpe ekọmurua oro ekemde ye ibet ama ọdọhọ ete: “Nte an̄wan̄ade owo ama anam ndudue, ndien sia n̄kpọ emi esiwakde n̄kukọhọ, owo ndomokiet ikọfiọkke se ẹkpenamde. Akpa ndikụt orụk ikpe emi edi emi.”

Luiz, kiet ke otu Mme Ntiense Jehovah, anam an̄wan̄a ete: “Ubieresịt mi oro Bible ọnọde ukpep idiyakke mi nda se mîdịghe okịm. N̄kenyene ndin̄wana nda okụk oro n̄kọnọ.”

Utọ edinam emi editie ediwak owo esen esen mîdịghe idikam in̄wan̄ake mmọ. Edi Ikọ Abasi owụt ete ke mme ata Christian ẹbat edinyene eti ubieresịt ke nte mmọ ẹnamde n̄kpọ ye ukara ererimbot ke ata ọsọn̄urua n̄kpọ. (Rome 13:5) Mme Ntiense Jehovah ẹbiere ndinyene ‘esịt emi mîbiomke mmọ, ndinyụn̄ nnam akpanikọ ke kpukpru n̄kpọ.’—Mme Hebrew 13:18, NW.