Mme Mbụme Ẹtode Mme Andikot

Nte unana mfọnmma Mary emi mîkọfiọkke erenowo ama enyene idiọk utịp ke ediyomo Jesus?

Kaban̄a “emana Jesus,” n̄wetnnịm n̄kpọ eke odudu spirit ọdọhọ ete: “Ẹkeda Mary eka Esie ẹnọ Joseph ke ndọ; edi ke ini mmọ mîdụhe kan̄a ke ufọk kiet, ẹyarade ẹfiọk ẹte enye omoyomo idịbi oto ke Edisana Spirit.” (Matthew 1:18) Ke akpanikọ, edisana spirit Abasi ama enyene akamba udeme ke uyomo idịbi Mary.

Nte ededi, nso kaban̄a Mary? Nte nsen eyen esie ama enyene n̄kpọ ndinam ke usụn̄ ekededi ye uyomo idịbi esie? Ke ẹkerede ẹban̄a un̄wọn̄ọ oro Abasi akanamde ọnọ Abraham, Isaac, Jacob, Judah, ye Edidem David—mme ete ete Mary—eyen oro amanade ekenyene ndidi ata andito ubon mmọ. (Genesis 22:18; 26:24; 28:10-14; 49:10; 2 Samuel 7:16) Ke ewe usụn̄ efen ke eyen oro amanade ọnọ Mary ekpekeme ndidi nnennen adiakpa un̄wọn̄ọ Abasi oro? Enye ekpenyene ndidi ata ata eyen esie.—Luke 3:23-34.

Angel Jehovah ama ekese Mary emi mîkọfiọkke erenowo, ọdọhọde ete: “Kûfehe ndịk, Mary: koro afo ama okụt mfọniso ke iso Abasi. Ndien sese, afo oyoyomo, onyụn̄ aman eyeneren, onyụn̄ osio Enye enyịn̄ Jesus.” (Luke 1:30, 31) Uyomo idịbi oyom nsen eyen n̄wan ye nsene eren ẹdiana kiet. Nte an̄wan̄ade, Jehovah Abasi ama anam nsen eyen ke idịbi Mary etie nte n̄kpọ eke akadianade ye nsene eren, anamde emi ebe ke ndisio uwem ikpọn̄-ikpọn̄ edibon Eyen esie ke obio mme spirit ndi isọn̄.—Galatia 4:4.

Nte eyen oro anana-mfọnmma n̄wan oyomode ke usụn̄ emi ekeme ndidi mfọnmma nnyụn̄ nnana idiọkn̄kpọ ke obụkidem esie? Didie ke ibet ubon ekeme ndinam utom ke ini mfọnmma ye unana-mfọnmma ẹdianade kiet? Ti ete ke ẹkeda edisana spirit ndisio mfọnmma odudu uwem Eyen Abasi ndi isọn̄ enye okonyụn̄ edi ntak uyomo idịbi oro. Emi ama abiat unana mfọnmma ekededi oro okodude ke nsen eyen Mary, ke ntre obotde nsenubon oro ekedide mfọnmma toto ke ntọn̄ọ esie.

Ke usụn̄ ekededi, nnyịn imekeme ndinịm ke akpanikọ nte ke edinam edisana spirit Abasi ke ini oro ama anam uduak Abasi okụt unen. Angel Gabriel ama anam an̄wan̄a Mary ete: “Edisana Spirit oyodoro fi ke idem, odudu Andikon̄-n̄kan oyonyụn̄ ofụk fi: mmọdo se idimanade eyekere Edisana, Eyen Abasi.” (Luke 1:35) Ih, edisana spirit Abasi ama ọtọ ọkọ akanade enye, yak idọhọ ntre, man unana mfọnmma m̀mê idiọk odudu ekededi edibiat ọbọn̄eyen oro ọkọtọn̄ọde ndiboro ke ini uyomo idịbi oro.

Nte an̄wan̄ade, Jesus ekenyene mfọnmma uwem esie eke owo oto Ete esie eke heaven, itoho owo ndomokiet ekededi. Jehovah ‘ama eben̄e ikpọkidem’ ọnọ enye, ndien Jesus—ọtọn̄ọde ke ini oro ẹkeyomode enye ka iso—ekenen̄ede edi enye “emi asanade . . . emi mîsan̄ake ye mme anamidiọk.”—Mme Hebrew 7:26; 10:5.

[Ndise ke page 19]

“Afo oyoyomo, onyụn̄ aman eyeneren”