Ntak Anade Baptism?
Ntak Anade Baptism?
“Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism.”—Matthew 28:19.
1, 2. (a) Ke mme idaha ewe ke ndusụk owo ẹkena baptism? (b) Mme mbụme ewe ẹdemede kaban̄a baptism?
EDIDEM Charlemagne eke Frank ama enyịk mbon Saxon oro enye akakande ndina baptism ọkwọkudịm ke 775-777 E.N. Ewetmbụk oro John Lord ekewet ete: “Enye ama enyịk mmọ ndikabade esịt ndụk inua-okot Ido Ukpono Christ.” Ukem ntre, ke ama ọkọdọ adiaha edidem Greek Orthodox ke 987 E.N., Vladimir I andikara Russia ama ebiere ete ke kpukpru mme andidu ke idak ukara imọ ẹnyene ndikabade ndi “mme Christian.” Enye ama owụk kpukpru ikọt esie ete ẹna baptism—ẹkamade ofụt ẹnyịk mbon oro mîkenyịmeke ndinam ntre!
2 Ndi mme utọ baptism oro ẹma ẹdot? Ndi mmọ ẹnyene se ẹnen̄erede ẹwọrọ? Ndi ẹkpenyene ndinịm owo ekededi baptism?
Baptism—Didie?
3, 4. Ntak emi edisịme m̀mê ediduọk mmọn̄ ke ibuot mîdịghe nnennen baptism Christian?
3 Ke ini Charlemagne ye Vladimir I ẹkenyịkde mme owo ẹte ẹna baptism, mme andikara oro ikanamke n̄kpọ ke n̄kemuyo ye Ikọ Abasi. Ke akpanikọ, ufọn ndomokiet idụhe ke ini baptism abuanade edisịme mmọn̄, ediduọk mmọn̄ ke ibuot, m̀mê edikam mbụk mme owo oro owo mîkpepke akpanikọ N̄wed Abasi ke mmọn̄.
4 Kere ban̄a se iketịbede ke ini Jesus eyen Nazareth akakade ebịne John Andinịm Owo Baptism ke 29 E.N. John ke ekenịm mme owo baptism ke Akpa Jordan. Mmọ ke unyịmesịt ẹma ẹdi ẹbịne enye ndina baptism. Ndi enye n̄kukụre ọkọdọhọ mmọ ẹda ke Jordan ke adan̄aemi enye adade ekpri mmọn̄ ke akpa oro ọduọk mmọ ke ibuot m̀mê ndida enye nsịme mmọ? Nso iketịbe ke ini John ekenịmde Jesus baptism? Matthew obụk ete ke enye ama akana baptism “kpa idaha oro Enye ọwọrọ ke mmọn̄ ọdọk.” (Matthew 3:16) Enye ama osụhọde odụk mmọn̄ oro, ẹbụkde enye ke Akpa Jordan. Kpasụk ntre, ke ini ẹkenịmde enyene-ifịk eunuch owo Ethiopia oro baptism, mbụk Bible oro ọdọhọ ete: “Mmọ mbiba, Philip ye eunuch oro, ẹnyụn̄ ẹsụhọde ẹdụk ke mmọn̄.” Ekem akaiso ete: “Edi ke adan̄aemi mmọ ẹtode ke mmọn̄ ẹwọrọ ẹdọk . . . ” Ntem, baptism Jesus ye eke mme mbet esie ama abuana edibụhọ ke mmọn̄ ofụri ofụri.—Utom 8:38, 39.
5. Didie ke mme akpa Christian ẹkesinịm mme owo baptism?
5 Mme ikọ Greek oro ẹkabarede “nịm baptism,” “baptism,” ye ntre ntre eken, ẹda ẹban̄a edibụk m̀mê edinyịni ke mmọn̄. Smith’s Bible Dictionary ọdọhọ ete: “Baptism nte enende ye ke ata ata usụn̄ ọwọrọ edibụhọ ke mmọn̄.” Ntem ndusụk edikabade Bible ẹtịn̄ ẹban̄a “John Andibụk Owo ke Mmọn̄” ye “John andinyịni owo ke mmọn̄.” (Matthew 3:1, Rotherham; Diaglott interlinear) History of the Christian Religion and Church, During the Three First Centuries eke Augustus Neander ọdọhọ ete: “Ke akpa ẹkesinịm owo baptism ebe ke ndibụk ke mmọn̄.” N̄wed French oro ẹtịmde ẹdiọn̄ọ Larousse du XXe Siècle (Paris, 1928) ọdọhọ ete: “Mme akpa Christian ẹkena baptism ebe ke ndibụhọ ke mmọn̄ ke kpukpru ebiet oro mmọn̄ okodude.” Ndien New Catholic Encyclopedia ọdọhọ ete: “Ana in̄wan̄-in̄wan̄ nte ke Baptism ke akpa Ufọkabasi ekedi ke edibụhọ ke mmọn̄.” (1967, Volume II, page 56) Ntre mfịn, ndina baptism nte kiet ke otu Mme Ntiense Jehovah edi usio-ukot oro ẹnamde ke unyịmesịt, oro abuanade edibụhọ ke mmọn̄ ofụri ofụri.
Obufa Ntak Ndinịm Baptism
6, 7. (a) Kaban̄a nso uduak ke John ekenịm owo baptism? (b) Nso ikedi obufa ke baptism oro mme anditiene Jesus ẹkenịmde?
6 Uduak baptism oro John ekenịmde ama okpụhọde ye baptism oro mme anditiene Jesus ẹkenịmde. (John 4:1, 2) John ekenịm mme owo baptism nte an̄wan̄wa idiọn̄ọ edikabade esịt n̄kpọn̄ mme idiọkn̄kpọ oro mmọ ẹkenamde ẹdian Ibet. * (Luke 3:3) Edi obufa n̄kpọ ama abuana ke baptism oro mme anditiene Jesus ẹkenịmde. Ke Pentecost 33 E.N., apostle Peter ama akpak mme andikpan̄ utọn̄ nnọ enye ete: “Mbufo ẹkabade esịt, ẹnyụn̄ ẹna baptism, kpukpru mbufo, ke enyịn̄ Jesus Christ, man ẹfen mme idiọk-n̄kpọ mbufo.” (Utom 2:37-41) Okposụkedi enye eketịn̄de ikọ ọnọ mme Jew ye mme okpono Abasi ke ido mme Jew, Peter iketịn̄ke iban̄a edina baptism nte idiọn̄ọ edikabade esịt n̄kpọn̄ mme idiọkn̄kpọ oro ẹkenamde ẹdian Ibet; ikọ esie ikonyụn̄ iwọrọke ke ndina baptism ke enyịn̄ Jesus ada aban̄a ediyet mme idiọkn̄kpọ mfep.—Utom 2:10.
7 Ke idaha oro, Peter ama ada akpa ke otu “ukpọhọde Obio Ubọn̄” anam n̄kpọ. Kaban̄a nso uduak? Man ayarade ifiọk aban̄ade ifet oro mme andikpan̄ utọn̄ nnọ enye ẹkenyenede ndidụk Obio Ubọn̄ heaven. (Matthew 16:19) Sia mme Jew ẹma ẹkesịn Jesus nte Messiah, edikabade esịt nnyụn̄ n̄wụt mbuọtidem ke enye ekedi obufa ye akpan n̄kpọ ke ndiyom nnyụn̄ nnyene edifen nnọ nto Abasi. Mmọ ẹma ẹkeme ndinọ an̄wan̄wa uyarade utọ mbuọtidem oro ebe ke ndibụhọ ke mmọn̄ ke enyịn̄ Jesus Christ. Ke usụn̄ oro mmọ ẹyeyarade ọkpọkpọ uyakidem mmọ nnọ Abasi ebe ke Christ. Kpukpru owo oro ẹyomde ndinyene unyịme Abasi mfịn ẹnyene ndiwụt ukem mbuọtidem oro, ẹyak idemmọ ẹnọ Jehovah Abasi, ẹnyụn̄ ẹna baptism Christian ke idiọn̄ọ uyakidem oro owo mîfamke n̄kpọ ida ẹnọ Ata Edikon̄ Abasi.
Nnennen Ifiọk Edi Akpan N̄kpọ
8. Ntak emi mîdịghe kpukpru owo ẹdot ndina baptism Christian?
8 Idịghe kpukpru owo ẹdot ndina baptism Christian. Jesus ọkọnọ mme anditiene enye ewụhọ ete: “Mbufo ẹka ẹkenam kpukpru mme idụt ẹdi mbet Mi, ẹnịm mmọ baptism ẹsịn ke enyịn̄ Ete ye Eyen ye Edisana Spirit: ẹnyụn̄ ẹkpep mmọ ẹnam kpukpru n̄kpọ eke n̄ketemede mbufo.” (Matthew 28:19, 20) Mbemiso ẹnịmde mme owo baptism, ẹnyene ‘ndikpep mmọ ẹnam kpukpru n̄kpọ eke Jesus eketemede mme mbet esie.’ Ntem, ndinyịk mbon oro mînyeneke mbuọtidem oro ọkọn̄ọde ke nnennen ifiọk Ikọ Abasi ndina baptism inyeneke ufọn onyụn̄ atuaha ye utom oro Jesus ọkọdọn̄de mme ata anditiene enye.—Mme Hebrew 11:6.
9. Nso ke ndina baptism “ke enyịn̄ Ete” ọwọrọ?
9 Nso ke ndina baptism “ke enyịn̄ Ete” ọwọrọ? Enye ọwọrọ nte ke owo oro oyomde ndina baptism ọdiọn̄ọ itieutom ye odudu ukara Ete nnyịn eke heaven. Ntem enye enyịme Jehovah Abasi nte Andibot nnyịn, “Ata Edikon̄ ke ofụri ererimbot,” ye Andikara Ekondo.—Psalm 83:18; Isaiah 40:28; Utom 4:24.
10. Nso ke ndina baptism ‘ke enyịn̄ Eyen’ ọwọrọ?
10 Ndina baptism ‘ke enyịn̄ Eyen’ ọwọrọ ndidiọn̄ọ itieutom ye odudu Jesus nte ikpọn̄-ikpọn̄ edibon Eyen Abasi. (1 John 4:9) Mbon oro ẹdotde ndina baptism ẹnyịme Jesus nte enye emi Abasi adade ọnọ ‘ufak ndifak ediwak owo.’ (Matthew 20:28; 1 Timothy 2:5, 6) Mbon oro ẹyomde ndina baptism ẹnyene n̄ko ndidiọn̄ọ ‘n̄kon̄n̄kan itie’ oro Abasi ọnọde Eyen esie.—Philippi 2:8-11; Ediyarade 19:16.
11. Nso ke ndina baptism ‘ke enyịn̄ edisana spirit’ ọwọrọ?
11 Nso ke ndina baptism ‘ke enyịn̄ edisana spirit’ ọwọrọ? Emi owụt nte ke mbon oro ẹyomde ndina baptism ẹdiọn̄ọ ẹte ke edisana spirit edi anamutom odudu Jehovah, emi enye adade anam n̄kpọ ke nsio nsio usụn̄ ke n̄kemuyo ye uduak esie. (Genesis 1:2; 2 Samuel 23:1, 2; 2 Peter 1:21) Mbon oro ẹdotde ndina baptism ẹnyịme nte ke edisana spirit an̄wam mmimọ ndifiọk “nditụn̄ọ n̄kpọ Abasi,” ndika iso ke utom ukwọrọikọ Obio Ubọn̄, ndinyụn̄ n̄wụt mbun̄wụm spirit ẹdide “ima, ye idatesịt, ye emem, ye ime, ye mfọn-ido, ye eti ido, ye edinam akpanikọ, ye ifụre ifụre ido ye mfara ke idem.”—1 Corinth 2:10; Galatia 5:22, 23; Joel 2:28, 29.
Nte Edikabade Esịt ye Edinam Ukpụhọde Ẹdide Akpan N̄kpọ
12. Didie ke baptism Christian enyene ebuana ye edikabade esịt?
12 Ke ẹsiode Jesus oro mîkenyeneke idiọkn̄kpọ ẹfep, baptism edi idiọn̄ọ oro Abasi enyịmede emi enyenede ebuana ye edikabade esịt. Ke ini nnyịn ikabarede esịt, nnyịn inen̄ede itua n̄kpọfiọk, m̀mê ifụhọ iban̄a n̄kpọ oro nnyịn ikanamde m̀mê ikokpude ndinam. Mme Jew akpa isua ikie oro ẹkeyomde ndinem Abasi esịt ẹkenyene ndikabade esịt n̄kpọn̄ mme idiọkn̄kpọ oro mmọ ẹkenamde ẹdian Christ. (Utom 3:11-19) Ndusụk Gentile oro ẹkenịmde ke akpanikọ ke Corinth ẹma ẹkabade esịt ẹkpọn̄ use, ukpono ndem, uyịpinọ, ye ikpọ idiọkn̄kpọ eken. Ke ntak edikabade esịt mmọ, ẹma “ẹyet” mmọ ke iyịp Jesus; ẹma ‘ẹnam mmọ ẹsana,’ m̀mê ẹsio ẹnịm san̄asan̄a, ndinam utom Abasi; ndien ẹma ‘ẹtebe mmọ ikpe’ ke enyịn̄ Christ ye ke Spirit Abasi. (1 Corinth 6:9-11) Edikabade esịt edi akpan usio-ukot ke ndinyene eti ubieresịt ye ubọhọ emi Abasi ọnọde kaban̄a ubiomikpe idiọkn̄kpọ.—1 Peter 3:21.
13. Ke se iban̄ade baptism, nso ke edinam ukpụhọde abuana?
13 Ana inam ukpụhọde mbemiso nnyịn inade baptism nte kiet ke otu Mme Ntiense Jehovah. Edinam ukpụhọde edi edinam oro owo emi anamde ubiere ofụri esịt nditiene Christ Jesus anamde ke unyịmesịt. Mme utọ owo oro ẹsịn akani idiọk usụn̄ uwem mmọ ẹnyụn̄ ẹbiere ndinam se inende ke enyịn Abasi. Ke N̄wed Abasi, mme ikọedinam usem Hebrew ye Greek oro ẹnyenede ebuana ye edinam ukpụhọde ẹnọ ekikere ẹban̄a edifiak edem, ediwọn̄ọde n̄kpọn̄. Edinam emi owụt ediwọn̄ọde n̄kpọn̄ idiọk usụn̄ mbịne Abasi. (1 Ndidem 8:33, 34) Edinam ukpụhọde esiyom ẹnam “utom eke odotde edikabade esịt.” (Utom 26:20) Enye oyom ete nnyịn ikpọn̄ nsunsu utuakibuot, inam n̄kpọ ke n̄kemuyo ye mme ewụhọ Abasi, inyụn̄ inọ Jehovah san̄asan̄a utuakibuot. (Deuteronomy 30:2, 8-10; 1 Samuel 7:3) Edinam ukpụhọde osụn̄ọ ke edikpụhọde ekikere, uduak, ye edu nnyịn. (Ezekiel 18:31) Nnyịn ‘ifiak edem’ ke ini imende obufa owo ikpụhọ ye edu unana uten̄e Abasi.—Utom 3:19; Ephesus 4:20-24; Colossae 3:5-14.
Uyakidem nnọ ke Ofụri Esịt Edi Akpan N̄kpọ
14. Nso ke mme anditiene Jesus ndiyak idem nnọ ọwọrọ?
14 Ana uyakidem ke ofụri esịt nnọ Abasi ebem baptism mme anditiene Jesus iso. Ediyak idem nnọ ọwọrọ edisio nnịm san̄asan̄a nnọ edisana uduak. Usio-ukot emi enen̄ede edi akpan n̄kpọ tutu nnyịn ikpenyene nditịn̄ ubiere nnyịn ke akam nnọ Jehovah nte ke nnyịn iyom ndinọ enye san̄asan̄a utuakibuot ke nsinsi. (Deuteronomy 5:9) Nte ededi, nnyịn iyakke idem inọ utom, m̀mê owo edi iyak inọ Abasi ke idemesie.
15. Ntak emi mbon oro ẹyomde ndina baptism ẹsibụhọde ke mmọn̄?
15 Ke ini iyakde idem nnyịn inọ Abasi ebe ke Christ, nnyịn iwụt ubiere nnyịn ndida uwem nnyịn nnam uduak Abasi nte ẹwụtde ke N̄wed Abasi. Ke idiọn̄ọ uyakidem oro, mbon oro ẹyomde ndina baptism ẹsibụhọ ke mmọn̄, idem kpa nte ẹkenịmde Jesus baptism ke Akpa Jordan nte idiọn̄ọ ediyak idemesie nnọ Abasi. (Matthew 3:13) Odot ẹtịm ẹfiọk nte ke Jesus ama ọbọn̄ akam ke ata akpan edinam oro.—Luke 3:21, 22.
16. Didie ke nnyịn ikeme ndiwụt idatesịt nnyịn nte odotde ke ini ikụtde nte mme owo ẹnade baptism?
16 Baptism Jesus ekedi ata akpan ye idara idara edinam. Ntre ke edi ye baptism Christian eke eyomfịn. Ke ini nnyịn ikụtde nte mme owo ẹyararede uyakidem mmọ nnọ Abasi, nnyịn imekeme ndiwụt idatesịt nnyịn ebe ke ndikwak ubọk ukpono ukpono ye ke nditoro mmọ ufiop ufiop. Edi imesifep edisio n̄kpo, edifri inụk, ye mme edinam eke ẹtiede ntre ke ntak ukpono oro inyenede iban̄a edisana edinam uwụt mbuọtidem emi. Nnyịn isiwụt idatesịt nnyịn ke usụn̄ oro owụtde uku.
17, 18. Nso isin̄wam ndibiere m̀mê mme owo ẹdot ndina baptism?
17 Ke mîbietke mbon oro ẹsisịmede nseknditọ mmọn̄ m̀mê oro ẹsinyịkde mme owo oro mînyeneke ifiọk N̄wed Abasi ẹna baptism, akananam Mme Ntiense Jehovah inyịkke owo ekededi ndina baptism. Ke akpanikọ, mmọ isinịmke mbon oro mîdotke ke n̄kan̄ eke spirit baptism. Idem mbemiso owo ekededi ekemede ndidi ọkwọrọ eti mbụk oro mînaha baptism, mbiowo Christian ẹsikụt ẹte ke enye ọdiọn̄ọ mme akpan ukpepn̄kpọ Bible, odu uwem ekekem ye mmọ, onyụn̄ ọbọrọ ih ke utọ mbụme nte, “Ndi afo emenen̄ede oyom ndidi kiet ke otu Mme Ntiense Jehovah?”
18 Ke ediwak idaha, ke ini mme owo ẹnyenede akamba udeme ke utom ukwọrọikọ Obio Ubọn̄ ẹnyụn̄ ẹwụtde udọn̄ ndina baptism, mbiowo Christian ẹsinyene nneme ye mmọ man ẹkụt ẹte ke mmọ ẹdi mme andinịm ke akpanikọ oro ẹyakde idem ẹnọ Jehovah ẹnyụn̄ ẹsịmde mme n̄kpọ oro Abasi oyomde mbemiso ẹnade baptism. (Utom 4:4; 18:8) Ọkpọkpọ ibọrọ ẹnọde ke se iwakde ibe mbụme 100 ke ukpepn̄kpọ Bible esin̄wam mbiowo ndibiere m̀mê mbon oro ẹbọrọde mme mbụme oro ẹsịm mme n̄kpọ N̄wed Abasi oro ẹyomde kaban̄a edibụhọ ke mmọn̄. Ndusụk owo isidotke ndien ke ntre owo isinyịmeke mmọ ẹna baptism Christian.
Nte Enyene Se Ibiọn̄ọde Fi?
19. Ke ikerede iban̄a John 6:44, mmanie ẹdidi nsan̄a mme ada udeme nnyene ye Jesus?
19 Ekeme ndidi ẹkedọhọ ediwak mbon oro ẹkenyịkde-nyịk ẹna baptism ọkwọkudịm ẹte ke mmọ ẹyeka heaven ke ini ẹkpan̄ade. Edi ke etịn̄de aban̄a mme anditiene nde ikpat esie, Jesus ọkọdọhọ ete: “Baba owo kiet ikemeke nditiene Mi, ibọhọke Ete emi ọkọdọn̄de Mi odudi enye edi.” (John 6:44) Jehovah odụri owo 144,000 emi ẹdidide nsan̄a mme ada udeme nnyene ye Jesus ke Obio Ubọn̄ eke heaven ọnọ Christ. Baptism oro ẹnyịkde-nyịk mme owo ndina akananam inamke owo ekededi asana kaban̄a ubọn̄ ubọn̄ itie oro ke ndutịm Abasi.—Rome 8:14-17; 2 Thessalonica 2:13; Ediyarade 14:1.
20. Nso ikeme ndin̄wam ndusụk owo oro mînaha baptism kan̄a?
20 Ọtọn̄ọde ke iduọk isua 1930 akpan akpan, akwa udịm owo oro ẹdoride enyịn ndibọhọ “akwa ukụt” nnyụn̄ ndu uwem ke isọn̄ ke nsinsi ẹdiana ye “mme erọn̄ en̄wen” Jesus. (Ediyarade 7:9, 14; John 10:16) Mmọ ẹdot ndina baptism koro mmọ ẹdu uwem ekekem ye Ikọ Abasi ẹnyụn̄ ẹma Enye ‘ke ofụri esịt, ukpọn̄, odudu, ye ekikere mmọ.’ (Luke 10:25-28) Okposụkedi ndusụk owo ẹfiọkde ẹte ke Mme Ntiense Jehovah ‘ẹtuak ibuot ẹnọ Abasi ke spirit ye ke akpanikọ,’ mmọ itieneke uwụtn̄kpọ Jesus kan̄a inyụn̄ inọhọ Jehovah an̄wan̄wa uyarade ata ima ye san̄asan̄a utuakibuot ebe ke ndina baptism. (John 4:23, 24; Deuteronomy 4:24; Mark 1:9-11) Ifịk ifịk akam oro ẹbọn̄de nnennen nnennen ẹban̄a akpan usio-ukot emi ekeme ndinen̄ede ndi n̄kpọ nsịnudọn̄ onyụn̄ ọnọ mmọ uko ndinam n̄kpọ ke ọyọhọ n̄kemuyo ye Ikọ Abasi, ndinam uyakidem nnọ Jehovah Abasi oro owo mîfamke n̄kpọ ida, ndinyụn̄ nna baptism.
21, 22. Kaban̄a mme ntak ewe ke ndusụk owo ẹtre ndiyak idem nnọ nnyụn̄ nna baptism?
21 Ndusụk owo ẹtre ndiyak idem nnọ nnyụn̄ nna baptism koro mmọ ẹnen̄ede ẹsịn idem ke mme mbubehe ererimbot m̀mê ẹbịne inyene tutu mmọ ẹdinyene esisịt ini ẹnọ mme n̄kpọ eke spirit. (Matthew 13:22; 1 John 2:15-17) Mmọ ẹkpekop inemesịt didie ntem edieke mmọ ẹkpekpụhọrede ekikere ye utịtmbuba mmọ! Ndisan̄a n̄kpere Jehovah okpofori mmọ ke n̄kan̄ eke spirit, akpan̄wam ndisụhọde editịmede esịt mmọ, okponyụn̄ ada emem ye uyụhọ oro ẹtode edinam uduak Abasi ọsọk mmọ.—Psalm 16:11; 40:8; Mme N̄ke 10:22; Philippi 4:6, 7.
22 Mbon en̄wen ẹdọhọ ẹte ke mmimọ imama Jehovah edi mmọ iyakke idem inọ inyụn̄ inaha baptism koro mmọ ẹkerede ẹte ke ntem ke mmimọ idifep ndinam ibat. Edi nnyịn owo kiet kiet iyanam ibat inọ Abasi. Nnyịn imenyene mbiomo ke ini ikopde ikọ Jehovah. (Ezekiel 33:7-9; Rome 14:12) Nte ‘mme owo oro ẹkemekde,’ nditọ Israel eke eset ẹkemana ẹdụk idụt oro akayakde idem ọnọ Jehovah ndien ke ntre mmọ ẹma ẹnyene mbiomo ndinam n̄kpọ esie ke edinam akpanikọ ke n̄kemuyo ye mme ewụhọ esie. (Deuteronomy 7:6, 11) Owo ndomokiet imanake idụk orụk idụt oro mfịn, edi edieke edide nnyịn imọbọ nnennen item N̄wed Abasi, oyom nnyịn ida enye inam n̄kpọ ye mbuọtidem.
23, 24. Mme ndịk ewe mîkpakpanke nnyịn ndina baptism?
23 Ndịk nte ke mmimọ inyeneke ifiọk ikem ekeme ndikpan ndusụk owo ndina baptism. Kpa ye oro, kpukpru nnyịn imenyene ekese ndikpep koro “tutu amama ubonowo idikemeke ndidụn̄ọde mfiọk kpukpru utom emi ata Abasi anamde ọtọn̄ọde ke ntọn̄ọ tutu esịm utịt.” (Ecclesiastes 3:11, NW) Kere ban̄a eunuch owo Ethiopia. Nte okpono Abasi ke ido mme Jew, enye ama enyene ndusụk ifiọk N̄wed Abasi, edi enye ikekemeke ndibọrọ kpukpru mbụme ẹban̄ade uduak Abasi. Nte ededi, ke ama ekekpep aban̄a ndutịm Jehovah kaban̄a edinyan̄a ebe ke uwa ufak Jesus, eunuch oro ye unana ubiatini ama ana baptism mmọn̄.—Utom 8:26-38.
24 Ndusụk owo ẹsimen̄e ndinam uyakidem nnọ Abasi koro ẹkopde ndịk ke mmimọ ididụhe uwem ekekem ye uyakidem mmimọ. Monique oro edide isua 17 ke emana ọdọhọ ete: “Mmen̄e ndina baptism koro n̄kopde ndịk nte ke ndikemeke ndidu uwem ekekem ye uyakidem mi.” Nte ededi, edieke nnyịn ibuọtde idem ye Jehovah ke ofụri esịt nnyịn, ‘enye eyenen̄ede usụn̄ nnyịn enịm.’ Enye ayan̄wam nnyịn ‘ndika iso nsan̄a ke akpanikọ’ nte mme anam-akpanikọ asan̄autom esie oro ẹyakde idem ẹnọ.—Mme N̄ke 3:5, 6; 3 John 4.
25. Mbụme ewe idot ẹkere ẹban̄a idahaemi?
25 Ke ntak ọyọhọ mbuọtidem ke Jehovah ye ntotụn̄ọ ima oro ẹnyenede ẹnọ enye, onụk ediwak tọsịn owo ndiyak idem nnọ nnyụn̄ nna baptism ke isua kiet kiet. Ndien ke akpanikọ kpukpru asan̄autom Abasi oro ẹyakde idem ẹnọ ẹyom ndinam akpanikọ nnọ enye. Edi, nnyịn idu uwem ke ndiọkeyo, ndien nnyịn imesisobo nsio nsio idomo mbuọtidem. (2 Timothy 3:1-5) Nso ke nnyịn ikeme ndinam man idu uwem ekekem ye uyakidem nnyịn nnọ Jehovah? Nnyịn iyeneme emi ke ibuotikọ oro etienede.
[Ikọ idakisọn̄]
^ ikp. 6 Sia Jesus mîkenyeneke idiọkn̄kpọ, owo ikenịmke enye baptism nte idiọn̄ọ edikabade esịt. Baptism esie akada aban̄a ediyak idemesie nnọ Abasi ndinam uduak Ete esie.—Mme Hebrew 7:26; 10:5-10.
Nte Afo Emeti?
• Didie ke ẹsinịm baptism Christian?
• Nso ifiọk ke ẹyom man owo ana baptism?
• Mme usio-ukot ewe ẹsida ẹsịm baptism Christian?
• Ntak emi ndusụk owo ẹmen̄ede ndina baptism, edi didie ke ẹkeme ndin̄wam mmọ?
[Mme Mbụme Ukpepn̄kpọ]
[Mme ndise ke page 14]
Ndi afo ọmọfiọk se ndina baptism ‘ke enyịn̄ Ete, ye Eyen, ye edisana spirit’ ọwọrọde?