Ke Mîbịghike Mme Mfịna Ubonowo Ẹyetre!

“EDINAM unọ un̄wam enyene esisịt ufọn edieke enye mîdịghe ubak akamba ndutịm oro enyenede ata akpan uduak onyụn̄ enyenede ibetedem ukaraidem emi uduak edide ndise mban̄a se idide mme akpan ntak en̄wan. Ifiọk n̄kpọntịbe ọsọn̄ọ ndien ndien nte ke edinam unọ un̄wam ikpọn̄ ikemeke ndikọk mme ata mfịna ukaraidem.”—The State of the World’s Refugees 2000.

Kpa ye ikpọ edinam unọ un̄wam, mme mfịna ubonowo ke ẹkọri ke usụn̄ oro owo mîkemeke ndikpan. Ndi idotenyịn edinyene usọbọ ukaraidem oro ebịghide odu? Ke akpanikọ, ata esisịt idotenyịn odu. Edi m̀mọ̀n̄ efen ke nnyịn ikeme ndidori enyịn? Ke n̄wọrọnda ikpehe kiet ke ntọn̄ọ ntọn̄ọ leta oro enye ekewetde ọnọ ẹsọk mme Christian ke Ephesus, apostle Paul anam an̄wan̄a nte Abasi edidade utịt ọsọk kpukpru mfịna ubonowo. Enye akam owụt n̄kpọutom oro Abasi edidade anam emi—n̄kpọutom oro edisede aban̄a akpan ntak kpukpru mfịna oro ẹnọmọde nnyịn mfịn. Ntak mûkereke uban̄a se Paul enyenede nditịn̄? Ẹkụt ikpehe oro ke Ephesus 1:3-10.

‘Ndifiak Ntan̄ Kpukpru N̄kpọ Ndọn̄ Ọtọkiet ke Christ’

Nte apostle oro ọdọhọde, uduak Abasi edi kaban̄a se enye okotde ‘ndutịm [m̀mê edise mban̄a mme mbubehe] ke edikem ini eke ẹkemekde.’ Nso ke emi ọwọrọ? Enye ọwọrọ ke Abasi emenịm ini oro enye edinamde n̄kpọ ke usụn̄ oro ediwọrọde “ndifiak ntan̄ kpukpru n̄kpọ ndọn̄ ọtọkiet ke Christ, mme n̄kpọ eke ẹdude ke enyọn̄ ye mme n̄kpọ eke ẹdude ke isọn̄.” (Ephesus 1:10, NW) Ih, Abasi amanam ndutịm ndinam kpukpru n̄kpọ eke ẹdude ke enyọn̄ ye ke isọn̄ ẹfiak ẹdidu ke n̄kemuyo ke idak ukara esie. Nte enemde, kaban̄a ikọ oro ẹkabarede mi nte ‘ndifiak ntan̄ ndọn̄ ọtọkiet,’ eyen ukpepn̄kpọ Bible oro J. H. Thayer ọdọhọ ete: “Ndifiak ntan̄ kpukpru n̄kpọ ye kpukpru owo (emi ke mbemiso mîkadianake kiet ke ntak idiọkn̄kpọ)  ndian ọtọkiet nnọ idemesie . . . kaban̄a itie ebuana oro adianade kiet ke Christ.”

Oro anyan ubọk owụt ntak oyomde Abasi anam emi ke ikerede iban̄a nte ubahade ekedemerede ke akpa itie. Ke ntọn̄ọ ntọn̄ọ mbụk owo, akpa ete ye eka nnyịn, Adam ye Eve, ẹma ẹdiana ye Satan kpa Devil ke ndisọn̄ ibuot ye Abasi. Mmọ ẹkeyom orụk nda-ke-idem oro edinamde mmọ ẹnyene unen ndibiere se ifọnde ye se idiọkde nnọ idemmọ. (Genesis 3:1-5) Ke n̄kemuyo ye unenikpe Abasi, ẹma ẹsion̄o mmọ ẹfep ke ubon Abasi, mmọ ẹma ẹnyụn̄ ẹtaba itie ebuana mmọ ye enye. Mmọ ẹma ẹyak ubonowo ẹsịn ke idaha unana mfọnmma oro akamade kpukpru enyene-ndịk utịp oro nnyịn isobode mfịn.—Rome 5:12.

Ndiyak Idiọkn̄kpọ Odu ke Ekpri Ini

Ndusụk owo ẹkeme ndibụp: ‘Ntak emi Abasi akayakde mmọ ẹnam oro?’ ‘Ntak emi enye mîkakam idaha akakan odudu esie inam ẹnam uduak esie, ntem akpande kpukpru ubiak ye ndutụhọ oro nnyịn isobode idahaemi?’ Ekeme ndidọn̄ owo ndikere n̄kpọ ke usụn̄ oro. Edi ndikpada akakan odudu nnam n̄kpọ ke utọ usụn̄ oro ekpenen̄ede owụt nso? Nte afo akpama owo ekededi emi ke ndondo oro enye ọfiọkde ete ke mme owo idinyịmeke ye se imọ itịn̄de ọsọpde-sọp osobo kpukpru mmọ efep koro enye enyenede odudu ndinam ntre? Ke akpanikọ, ukpamaha.

Mbon nsọn̄ibuot oro ikenenike iban̄a akakan odudu Abasi. Mmọ akpan akpan ẹkenen̄ede ẹneni ẹban̄a unen oro enye enyenede ndikara ye kaban̄a nte usụn̄ edikara esie enende. Man ẹbiere mme akpan eneni oro ẹkedemerede ke nsinsi, Jehovah ayak mme edibotn̄kpọ esie ẹkara idemmọ ye unana enye ndikara mmọ nnennen nnennen ke ndusụk ikpehe ini. (Ecclesiastes 3:1; Luke 21:24) Ini oro ama okụre, enye eyesịbe odụk man afiak akara ofụri isọn̄. Ke ini oro, eyenen̄ede ana in̄wan̄-in̄wan̄ nte ke usụn̄ edikara esie edi n̄kukụre usụn̄ oro adade emem, inemesịt, ye mfọnọn̄kpọ oro ebịghide ọsọk mme andidụn̄ isọn̄. Ekem ẹyesion̄o kpukpru mbon ufịk ke ererimbot ẹfep ke nsinsi.—Psalm 72:12-14; Daniel 2:44.

“Mbemiso Editọn̄ọ Ererimbot”

Jehovah ama aduak ndinam kpukpru emi ke anyan ini ko. Paul etịn̄ aban̄a “mbemiso editọn̄ọ ererimbot.” (Ephesus 1:4, NW) Oro ikedịghe mbemiso ẹkebotde isọn̄ m̀mê Adam ye Eve. Ererimbot oro ama ‘ọfọn eti eti,’ ndien nsọn̄ibuot ikodụhe. (Genesis 1:31) Do, ewe “ererimbot” ke apostle Paul eketịn̄ aban̄a? Ererimbot nditọ Adam ye Eve—anamidiọk, anana-mfọnmma ererimbot ubonowo emi enyenede idotenyịn edinyan̄a. Mbemiso nditọ ekededi ẹkemanade, Jehovah ama ọfọfiọk nte enye edinamde n̄kpọ man mme andito ubon Adam oro ẹdotde ẹnyan̄a ẹbọhọ.—Rome 8:20.

Nte ededi, emi idịghe ndinọ ekikere nte ke Andikara ekondo enyene ndinam n̄kpọ nte mme owo ẹnamde. Ke ẹfiọkde ẹte ke mbabuat idaha ekeme ndidaha nda, mmọ ẹsitịm nsio nsio usụn̄ unam n̄kpọ man ẹse ẹban̄a mme idaha oro. Baba, Ata Ọkpọsọn̄ Abasi esiwụk uduak esie onyụn̄ ọyọhọ enye. Nte ededi, Paul anam an̄wan̄a usụn̄ nte Jehovah ekebierede ndinam n̄kpọ man otodo ada nsinsi ubọhọ ọsọk ubonowo. Nso ikedi mme usụn̄ oro?

Anie Edida Ubọhọ Edi?

Paul anam an̄wan̄a ete ke mme mbet Christ oro ẹyetde aran ẹnyene akpan udeme ke ndikọk unan oro idiọkn̄kpọ Adam akadade edi. Paul ọdọhọ ke Jehovah ‘ekemek mmimọ ke ebuana ye Christ’ ndikara ye Jesus ke Obio Ubọn̄ esie eke heaven. Ke akade iso ndinam emi an̄wan̄a, Paul ọdọhọ ete ke Jehovah ‘ekebem iso emek mmimọ ọnọ idemesie, ndida mmimọ nnyene nte nditọ, ebe ke Jesus Christ.’ (Ephesus 1:4, 5, NW) Edi akpanikọ, Jehovah ikemekke, m̀mê ndikebem iso mmek mmọ nnịm, nte owo kiet kiet. Nte ededi, enye ekebem iso emek otu mme owo oro ẹnamde akpanikọ ẹnyụn̄ ẹyakde idem ẹnọ, emi ẹdibuanade ye Christ ke ndikọk unan oro Satan kpa Devil, ke adianade ye Adam ye Eve, ẹkenọde ekpụk ubonowo.—Luke 12:32; Mme Hebrew 2:14-18.

Nso utịbe n̄kpọ ke emi edi ntem! Ke akpa ata oro enye akamiade aban̄a itie edikara Abasi, Satan okowụt ke edibotn̄kpọ Abasi ẹdide owo ẹma ẹnyene ndo—nte ke edieke ẹdude ke  ọkpọsọn̄ mfịghe m̀mê ke ẹnọde ubọkedem, kpukpru mmọ ẹyesọn̄ ibuot ye ukara Abasi. (Job 1:7-12; 2:2-5) Ke in̄wan̄-in̄wan̄ ediwụt “ubọn̄ ubọn̄ mfọnido esie oro owo mîdotke,” (NW) nte ini akakade Jehovah Abasi ama owụt mbuọtidem oro enye enyenede ke idem mme edibotn̄kpọ esie eke isọn̄ ebe ke ndida ndusụk mbon oro ẹtode anamidiọk ubon Adam nnyene nte nditọ esie eke spirit. Ẹyeda mbon oro ẹsịnede ke ekpri otu emi ẹka man ẹkenam utom ke heaven. Kaban̄a nso uduak?—Ephesus 1:3-6; John 14:2, 3; 1 Thessalonica 4:15-17; 1 Peter 1:3, 4.

Apostle Paul ọdọhọ ke nditọ emi Abasi adade enyene mi ẹkabade ẹdi ‘nsan̄a mme ada udeme nnyene ye Christ’ ke Obio Ubọn̄ esie eke heaven. (Rome 8:14-17) Nte ndidem ye mme oku, mmọ ẹyenyene udeme ke ndinam ekpụk ubonowo ọbọhọ ubiak ye ndutụhọ oro enye osobode idahaemi. (Ediyarade 5:10) Ke akpanikọ, “ofụri ekondo ke omụm mmụm, onyụn̄ odu ke ubiak uman tutu esịm emi.” Nte ededi, ke mîbịghike, san̄asan̄a nditọ Abasi emi ẹmekde mi ẹyetiene Jesus Christ ẹnam n̄kpọ, ndien ẹyetọn̄ọ ntak ‘ẹsio kpukpru okopitem owo ke itie ufụn mbiara, ẹsịn ke itie eyen-isọn̄ emi enyenede ubọn̄ eke nditọ Abasi.’—Rome 8:18-22.

“Ubọhọ Ufụn ebe ke Ufak”

Kpukpru emi ẹkekeme ndida itie ebe ke Abasi ndiwụt ata n̄wọrọnda ye akakan mfọnido oro owo mîdotke nnọ ererimbot ubonowo emi odotde ẹnyan̄a—kpa uwa ufak Jesus Christ. Paul ewet ete: “Nnyịn inyene ubọhọ ufụn ebe ke ufak oto ke iyịp [Jesus Christ], kpa edifen mme idiọkn̄kpọ nnyịn, nte asan̄ade ekekem ye akpakịp mfọnido esie oro owo mîdotke.”—Ephesus 1:7, NW.

Jesus Christ edi akpan owo ke edisu uduak Abasi. (Mme Hebrew 2:10) Uwa ufak esie ọnọ Jehovah isọn̄ oro ekemde ye ibet ndida ndusụk mme andito ubon Adam ndisịn ke ubon esie eke heaven nnyụn̄ nnam ubonowo ọbọhọ mme utịp idiọkn̄kpọ Adam, ye unana edibiat mbuọtidem mmọ ke mme ibet ye edumbet Esie. (Matthew 20:28; 1 Timothy 2:6) Jehovah amanam n̄kpọ ke usụn̄ oro ọsọn̄ọde edinen ido esie onyụn̄ ekemde ye mme n̄kpọ oro mfọnmma unenikpe oyomde.—Rome 3:22-26.

“Edisana Ndịben̄kpọ” Abasi

Ke ediwak tọsịn isua emi ẹkebede, Abasi ikayarakede nnennen nnennen nte enye edisan̄ade osu uduak esie kaban̄a isọn̄. Ke akpa isua ikie E.N., ‘enye ama anam [mme Christian] ẹfiọk edisana ndịben̄kpọ uduak esie.’ (Ephesus 1:9, NW) Paul ye ekemmọ mme Christian oro ẹyetde aran ẹma ẹtịm ẹfiọk akamba udeme oro Jesus Christ enyenede ke edisu uduak Abasi. Mmọ n̄ko ẹma ẹtọn̄ọ ndifiọk akpan udeme oro mmimọ inyenede nte nsan̄a mme ada udeme nnyene ye Christ ke Obio Ubọn̄ esie eke heaven. (Ephesus 3:5, 6, 8-11) Ke akpanikọ, ukara Obio Ubọn̄ ke ubọk Jesus Christ ye nsan̄a mme andikara esie edi n̄kpọutom oro Abasi edidade ida nsinsi emem idi, ke heaven ye ke isọn̄ n̄ko. (Matthew 6:9, 10) Ebede ke enye, Jehovah ayanam isọn̄ emi afiak okodu ke idaha oro enye akaduakde ọnọ enye ke akpa.—Isaiah 45:18; 65:21-23; Utom 3:21.

Edimek ini oro enye enịmde ndinam n̄kpọ man osio kpukpru ufịk ye ukwan̄ikpe efep ke isọn̄ enen̄ede ekpere. Edi Jehovah ama enen̄ede ọtọn̄ọ ndutịm edifiak n̄wụk ke Pentecost 33 E.N. Didie? Ke ndikọtọn̄ọ nditan̄ mme “n̄kpọ eke ẹdude ke enyọn̄,” kpa mbon oro ẹdikarade ye Christ ke heaven, ndọn̄ ini oro. Mmọ emi ẹma ẹsịne mme Christian eke Ephesus.  (Ephesus 2:4-7) Ke ata ndondo emi, ke eyo nnyịn, Jehovah ke atan̄ mme “n̄kpọ eke ẹdude ke isọn̄” ọdọn̄. (Ephesus 1:10) Ebede ke ubịnikọt ukwọrọikọ eke ofụri ererimbot, enye ke anam kpukpru mme idụt ẹkop eti mbụk aban̄ade ukara Obio Ubọn̄ esie ke ubọk Jesus Christ. Ke ẹtan̄ mbon oro ẹnamde n̄kpọ ẹban̄a eti mbụk emi ẹbon idem idahaemi ke itie ukpeme ye ukọkudọn̄ọ eke spirit. (John 10:16) Ibịghike, ke paradise isọn̄ oro ẹnamde asana, mmọ ẹyebọhọ ukwan̄ikpe ye ndutụhọ ofụri ofụri.—2 Peter 3:13; Ediyarade 11:18.

Ẹmenam “n̄kọri oro ẹkpade owo idem” ke ndutịm unọ un̄wam man ẹn̄wam ubonowo oro ẹfịkde. (The State of the World’s Children 2000) Edi, edinam oro edikpade owo idem ikan edidi Christ Jesus ye nsan̄a mme andikara esie ndisịbe ndụk ebe ke ukara Obio Ubọn̄ eke heaven ke mîbịghike. Mmọ ẹyetịm ẹse ẹban̄a kpukpru se idide ntak en̄wan ye mme idiọkn̄kpọ eken oro ẹnọmọde nnyịn. Mmọ ẹyeda utịt ẹsọk kpukpru mfịna ubonowo.—Ediyarade 21:1-4.

[Mme ndise ke page 4]

Mme edinam unọ un̄wam ikọkke mme mfịna ubonowo

[Ndise ke page 6]

Uwa ufak Christ anam ubonowo ọbọhọ idiọkn̄kpọ Adam

[Ndise ke page 7]

Ẹkeme ndinyene ifụre ye ukọkudọn̄ọ eke spirit mfịn

[Ndise ke page 7]

Ke mîbịghike, ebede ke Obio Ubọn̄ Messiah, ẹyebọhọ mme mfịna ofụri ofụri