Ikpọ Mbono Ofụri Ererimbot ke 2003

ẸMA ẹnịm mbono ofụri isua eke mme andibuana ke Watch Tower Bible and Tract Society of Pennsylvania ke Saturday, October 6, 2001, ke Jersey City, New Jersey, U.S.A. Ke mbono oro ama akasuana, mme andibuana ye isenowo mmọ ẹma ẹtiene ẹbuana ke akpan edinam. Ke ndan̄nsiere, ke mme mbono efen oro ẹkenịmde ke ikpọ obio inan̄ ke Canada ye United States, mbon Otu Ukara eke Mme Ntiense Jehovah ẹma ẹnọ ntọt oro etienede mi ke ẹma ẹkekụre utịn̄ikọ ediberi mmọ:

“Nte nnyịn isakde iso ise ini iso, enen̄ede edi akpan n̄kpọ nte kpukpru ikọt Abasi ẹkûsịn ndisop idem ọtọkiet. Apostle Paul ama eteme ete idọdiọn̄ inam emi, ọkọrọ ye ndisịn udọn̄ nnọ kiet eken, adan̄a nte nnyịn ikụtde nte akwa ye enyene-ndịk usen Jehovah asan̄ade ekpere. (Mme Hebrew 10:24, 25) Ke n̄kemuyo ye item N̄wed Abasi emi, nnyịn imodori enyịn ndinịm mme mbono district ke kpukpru ikpehe ererimbot ke isua efen [2002]. Ndien ke isua 2003, edieke edide uduak Jehovah, ẹyenịm san̄asan̄a mbono ofụri ererimbot ke ndusụk ikpehe ererimbot. Ini edi emi ndidu ke edidemede nnyụn̄ ndu ke ukpeme, iwụkde ntịn̄enyịn ke nte mme n̄kpọntịbe ẹkade iso ke ererimbot.”

Ana utom ikọt Abasi aka iso kpa ye n̄kaiso eyịghe ye mfịghe oro ẹdude nte editịm n̄kpọ emi asan̄ade ekpere utịt esie. Ana ẹtan̄a eti mbụk Obio Ubọn̄, esịnede etop Bible oro odụride owo utọn̄, ẹnọ kpukpru idụt, esien, usem, ye obio, ẹnọde mmọ ikot ‘nditen̄e Abasi nnyụn̄ nnọ enye ubọn̄ koro ini ikpe esie etịmde asan̄a ekpere.’ (Ediyarade 14:6, 7) Ke ntre, ke edide uduak ye inemesịt Ete nnyịn eke heaven, ẹdiomi ikpọ mbono ofụri ererimbot ke nsio nsio ikpehe ererimbot ke isua 2003.

Akpa kan̄a, ẹnam ndutịm ndibem iso ndomo mme utọ mboho oro nse ke ibat ibat ikpọ obio ke Edem Edere America ndien esisịt ini ke oro ebede ke Europe. Ke ekperede ufọt ufọt 2003, ẹyenam ndutịm man otu mme andidụk ẹka ẹkedụk mbono oro ke ibat ibat ikpọ obio ke Asia; ndien ke ekperede utịt isua, mme otu efen efen ẹyeka ẹkedụk ke Africa, Edem Usụk America, ye mme ikpehe Pacific. Ẹyeyom ndusụk n̄kọk itieutom ẹnọ ibat ibat mme andidụk ẹka mme san̄asan̄a obio mbono, ntre owo idikemeke ndinọ kpukpru owo ikot ndidụk. Nte ededi, edidi n̄kpọ nsịnudọn̄ ndinyene ibat ibat mme andidụk oro ẹdade ke ibuot nsio nsio idụt ke mme itie kiet kiet.

Ke mîbịghike, mme esop Mme Ntiense Jehovah ẹyebọ ntọt aban̄ade mme mboho emi. N̄kọk itieutom kiet kiet ọyọtọt mme andidụk oro ẹnọde ikot ẹban̄a nnennen usenọfiọn̄ ye san̄asan̄a ikpọ obio oro mmọ ẹdikemede ndidụk mbono. Ntem, ẹben̄e ẹte mbufo ẹkûwet m̀mê ẹkûbụp ẹban̄a n̄kpọ emi kan̄a.

Mbon oro ẹdimekde ke akpatre ẹdidi sụk Mme Ntiense oro ẹma ẹkeyak idem ẹnọ ẹnyụn̄ ẹna baptism emi ẹdidide nti uwụtn̄kpọ ẹdinyụn̄ ẹwụtde nditọete n̄kann̄kụk ima nditọete. Nditọete n̄kann̄kụk emi, n̄ko, ẹyenyene nti ifet ndidara isenowo emi ufiop ufiop nnyụn̄ n̄kama mmọ isen. (Mme Hebrew 13:1, 2) Emi oyosụn̄ọ ke “nsịnudọn̄ edem mbiba.” (Rome 1:11, 12, NW) Mme n̄kọk itieutom oro ẹdọhọde ẹnọ mme andidụk ẹkedụk mbono ke akpan idụt m̀mê mme idụt ẹyenọ n̄kaiso ọyọhọ ntọt aban̄ade mme ndutịm emi.

Nte ẹsinamde, ẹyediomi mbono district usen ita ẹnọ isua 2003 ke ata ediwak idụt. Ebede ke ndisop idem ọtọkiet, kpukpru owo ẹyenyene ifet ‘ndikop, ndibọ ukpep, ndinyụn̄ n̄kop ndọn̄esịt.’ (Deuteronomy 31:12; 1 Corinth 14:31) Emi ọyọnọ kpukpru ikọt Abasi ifet ‘nditabi, nnyụn̄ nse nte Jehovah ọfọnde.’ (Psalm 34:8) Mme isụn̄utom ẹyedụk kpukpru ikpọ mbono ofụri ererimbot emi, ọkọrọ ye ediwak mbono district, ndusụk mmọ ẹyenyene n̄kpọ ndinam ke ndutịm oro.

Ke isua emi, nnyịn iyodụk Mme Mbono District “Ifịk Ifịk Mme Anditan̄a Obio Ubọn̄,” emi ẹdidemerede nnyịn udọn̄ ndinọ ikọ ntiense oro okponde akan. N̄ko, udọn̄ nnyịn kaban̄a se Jehovah enịmde ọnọ nnyịn ke isua oro edide eyenen̄ede ọkọri. Emi ayan̄wam nnyịn ‘ndidu ke ukpeme, ndidu ke edidemede, ndinyụn̄ ndu ke mben̄eidem’ ke ntak ndiọkeyo ye akpan ini emi.—Matthew 24:42-44.