Kûyak Ẹbian̄a Fi

ABIAN̄A ekpere ndibịghi nte ubonowo. Kiet ke otu akpa n̄kpọntịbe oro ẹwetde ke mbụk ekedi edinam abian̄a. Oro ekedi ke ini Satan akabian̄ade Eve ke in̄wan̄ Eden.—Genesis 3:13; 1 Timothy 2:14.

Okposụkedi akananam mîdụhe ini oro abian̄a mîyọhọke isọn̄ tọn̄ọ ke ini oro, enye enen̄ede atara asuana mfịn. Ke etịn̄de aban̄a eyomfịn, Bible ama ọtọt ete: “Ndiọi owo ye mbon abian̄a ẹyedọdiọn̄ ẹdiọk ẹka iso, ẹbian̄a owo, owo ẹyenyụn̄ ẹbian̄a mmọ.”—2 Timothy 3:13.

Ẹbian̄a mme owo ke kpukpru orụk ntak. Mbon abian̄a ẹsibian̄a mme owo ẹbọ okụk. Ndusụk mbon mbre ukara ẹsibian̄a mbon oro ẹkemekde mmọ, ẹbierede ndisọn̄ọ ndu ke ukara inamke n̄kpọ m̀mê nso itak. Mme owo ẹsikam ẹbian̄a idemmọ. Utu ke ndinyịme akpanikọ sia abiakde-biak, mmọ ẹsisọn̄ọ idemmọ esịt nte ke idiọkke ndibịne ndiọi edinam, utọ nte edin̄wọn̄ sika, edida n̄kpọsọn̄ ibọk ke idiọk usụn̄, m̀mê oburobụt ido idan̄.

Ndien abian̄a odu ke mme n̄kpọ ẹban̄ade ido ukpono. Mme adaiso ido ukpono eyo Jesus ẹma ẹsibian̄a mme owo. Jesus ama etịn̄ aban̄a mbon abian̄a oro ete: “Mmọ ẹdi nnan mme adausụn̄. Ndien nnan ama ada nnan usụn̄, mmọ mbiba ẹyeduọn̄ọ ke ukpe.” (Matthew 15:13b, 14) Akan oro, mme owo ẹbian̄a idemmọ ke mme n̄kpọ ẹban̄ade ido ukpono. Mme N̄ke 14:12 ọdọhọ ete: “Enyene usụn̄ eke enende ke iso owo: ndien utịt esie edi usụn̄ n̄kpa.”

Nte ekedide ke eyo Jesus, ẹbian̄a ediwak owo mfịn ke mme n̄kpọ ẹban̄ade ido ukpono ndien emi ikpaha nnyịn idem! Apostle Paul ọkọdọhọ ke Satan ‘anam ikike mmọ eke mînịmke ke akpanikọ ekịm, mbak un̄wana gospel ubọn̄ Christ, emi edide mbiet Abasi, edisem ọnọ mmọ.’—2 Corinth 4:4.

Edieke owo abian̄ade nnyịn ọbọ okụk, okụk nnyịn ayatak. Edieke ebre mbre ukara abian̄ade nnyịn, nnyịn imekeme nditaba ndusụk ifụre nnyịn nte utịp. Edi edieke Satan abian̄ade nnyịn tutu nnyịn isịn akpanikọ aban̄ade Jesus Christ, nnyịn iyataba nsinsi uwem! Ntre kûyak ẹbian̄a fi. Yak ekikere ye esịt fo nọ Bible, kpa ebiet emi akpanikọ aban̄ade ido ukpono otode, emi owo mînyụn̄ ikemeke ndifan̄a. Edieke itrede ndinam emi nnyịn iyataba ekese n̄kpọ.—John 17:3