“Ẹtiene Mi, . . . Ndien Ami Nyọnọ Mbufo Nduọk-Odudu”

“Ẹkpeme Udịm-Erọn̄ Abasi”

“Mbufo ẹmesinọ n̄kpan̄utọn̄ kpukpru ini ẹnyụn̄ ẹtịn̄ mme ikọ ẹtode Bible oro ẹnamde esịt ẹnem nnyịn.”—Pamela.

“Ẹsọsọn̄ọ ke kpukpru se mbufo ẹnamde ke ufọn kpukpru nnyịn. Emi enen̄ede otụk nnyịn.”—Robert.

AMA onụk Pamela ye Robert ndiwet mme ikọ ekọm emi nnọ mbiowo Christian ke esop mmọ kiet kiet. Mbon en̄wen ke otu mme asan̄autom Abasi ke ofụri ererimbot ẹwụt esịtekọm n̄ko ẹban̄a n̄kaiso un̄wam ye ukpeme oro mbon oro ‘ẹkpemede udịm-erọn̄ Abasi’ emi ẹnọde mmọ. (1 Peter 5:2) Ke akpanikọ, ikọt Jehovah ẹwụt esịtekọm ẹban̄a ediwak n̄kpọ oro mbiowo ẹnamde ke ufọn mmọ, ye edu oro mmọ ẹdade ẹnam mme n̄kpọ emi.

‘Ẹyọhọ ye Utom’

Ẹnọ mbiowo Christian ediwak utom ndinam. (Luke 12:48) Mmọ ẹsitịm mme utịn̄ikọ oro ẹdinọde ke mme mbono esop ẹsinyụn̄ ẹbuana ke edikwọrọ eti mbụk Obio Ubọn̄ Abasi an̄wan̄wa. Utom mmọ esịne edika utom ubọkerọn̄ nnọ ekemmọ mme andinịm ke akpanikọ. Mbiowo ẹsinyene ini ẹnọ mbon oro ẹyomde san̄asan̄a ntịn̄enyịn—mbonusọn̄ ye mbon eken—ẹnamde kpukpru emi ye unana edifụmi mfọnọn̄kpọ eke spirit ye eke obụkidem ubon mmọ. (Job 29:12-15; 1 Timothy 3:4, 5; 5:8) Ndusụk mbiowo ẹsin̄wam ndibọp mme Ufọkmbono Obio Ubọn̄. Mbon eken ẹsinam utom ke Mme Kọmiti Unyene Nneme ye Mbon Ufọkibọk mîdịghe ẹdi mme andibuana ke Otu Oro Ẹsisan̄ade Ẹse Mbon Udọn̄ọ. Ndien ediwak mmọ ẹsinam utom unyịmesịt ke n̄kpri ye ikpọ mbono. Ih, mbiowo ‘ẹyọhọ ye utom Ọbọn̄.’ (1 Corinth 15:58) Eyịghe idụhe mbon oro ẹyakde ẹsịn ke idak ukpeme mmọ ẹnen̄erede ẹma utọ mbiowo oro ẹnamde utom ọkpọsọn̄ mi!—1 Thessalonica 5:12, 13.

Mbiowo oro ẹsikade ẹkese ekemmọ mme Christian ke ufọk mmọ m̀mê ke mme itie en̄wen kpukpru ini, man ẹsọn̄ọ mmọ idem ke n̄kan̄ eke spirit, ẹsinọ nsịnudọn̄. Thomas, emi ọkọkọride okpon ye unana ete ọkọdọhọ ete: “Ke mîkpedịghe ima ima un̄wam ye nsịnudọn̄ mbiowo, n̄kereke ke n̄kpanam n̄kpọ Jehovah nte asan̄autom uyọhọ ini mfịn.” Ediwak uyen oro ẹkebọkde ke mme ubon emi ete m̀mê eka ikpọn̄ esede enyịn ẹnyịme ke edi ntịn̄enyịn oro mbiowo ẹkenọde mmimọ akan̄wam mmimọ ndikọri ọkpọkpọ itie ebuana ye Abasi.

Mbonusọn̄ ke esop ẹsinen̄ede ẹma ẹdi utom ubọkerọn̄ ẹnọ mmimọ n̄ko. Ke mbiowo iba ẹma ẹkeka ẹkese ebe ye n̄wan ẹdide isụn̄utom, emi ẹdude ke ufọt ufọt isua 80, ebe ye n̄wan emi ẹma ẹwet ẹte: “Nnyịn  iyom ndikọm mbufo ke mbufo ndikedi ndise nnyịn, nnyịn ima idara edidi oro eti eti. Ke mbufo ẹma ẹkenyọn̄ọ, nnyịn ima ifiak ikot mme itie N̄wed Abasi oro mbufo ẹkenemede ye nnyịn. Nnyịn idifreke mme ikọ nsịnudọn̄ mbufo tutu amama.” Ebeakpa oro ekedide isua 70 ke emana ekewet ọnọ mbiowo ete: “Ami ke n̄kọbọn̄ akam nnọ Jehovah mben̄e un̄wam, ndien enye osio mbufo mbiba ọdọn̄ ẹdi ufọk mi. Edidi mbufo ekedi edidiọn̄ Jehovah!” Ndi afo ọmọbọ ufọn ke ndondo emi oto mbiowo esop mbufo ndikedi ndise fi? Ke akpanikọ kpukpru nnyịn imowụt esịtekọm iban̄a ukeme oro mmọ ẹsịnde ke ndibọk udịmerọn̄ oro ẹkeyakde ẹsịn ke idak ukpeme mmọ!

Mme Ekpemerọn̄ Emi Ẹkpebede Abasi ye Christ

Jehovah edi ima ima Ekpemerọn̄. (Psalm 23:1-4; Jeremiah 31:10; 1 Peter 2:25) Jesus Christ n̄ko edi n̄wọrọnda Ekpemerọn̄ eke spirit. Ke akpanikọ, ẹkot enye “eti ekpeme-erọn̄,” ye “Akwa Andikpemerọn̄.” (John 10:11; Mme Hebrew 13:20; 1 Peter 5:4) Didie ke Jesus akanam n̄kpọ ye mbon oro ẹkeyomde ndikabade ndi mbet esie? Enye ama ọnọ mmọ ufiop ufiop ikot emi: “Ẹtiene Mi, kpukpru mbufo emi ẹkpade mba ẹnyụn̄ ẹbiomde edidobi mbiomo, ndien Ami nyọnọ mbufo nduọk-odudu.”—Matthew 11:28.

Kpasụk ntre mfịn, mbiowo ẹsidomo ndinọ otuerọn̄ nduọkodudu ye ukpeme. Utọ iren oro ‘ẹbiet ọtọ udịbe ofụm, ye etehe ubọhọ edịm; ẹbiet akpa mmọn̄ ke edisat isọn̄, ẹbiet mfụt akwa itiat ke isọn̄ n̄kpa-mba.’ (Isaiah 32:2) Utọ mme ọfọn-ido ekpemerọn̄ emi ẹsinọ nduọkodudu, ẹbọ ukpono ẹto mme erọn̄, ẹnyụn̄ ẹnyene unyịme Abasi.—Philippi 2:29; 1 Timothy 5:17.

Iban Mmọ Ẹnọ Nti Ibetedem

Ikọt Abasi ẹwụt esịtekọm ẹban̄a mbiowo Christian ye ima ima ibetedem oro iban mmọ ẹsinọde mmọ. Man ẹnọ ibetedem, esiwak ndiyom iban emi ẹnam n̄waidem. Ke ndusụk idaha, mmọ ẹsidu ke ufọk ke adan̄aemi mme ebe mmọ ẹsede ẹban̄a mme mbubehe esop m̀mê ẹnamde utom ubọkerọn̄. Ndusụk ini, ẹsikpọnọde ọkpọkpọ ndutịm oro ẹma ẹkenam ye ntịn̄enyịn ẹnịm n̄kan̄ kiet, koro mfịna oro oyomde ẹse ẹban̄a usọp usọp edemerede ke esop. Michelle ọkọdọhọ ete: “Ke ini n̄kụtde nte ebe mi anamde utom ọkpọsọn̄ nditịm idem nnọ mme mbono esop m̀mê anamde utom ubọkerọn̄, mmesiti nte ke enye anam utom Jehovah, ndien mmesidomo ndinọ enye ibetedem nte n̄kekeme.”

Cheryl, emi n̄ko ọdọde ebiowo, ọkọdọhọ ete: “Mmọfiọk ke nditọete ke esop ẹsiyom mbiowo nditịn̄ ikọ nnọ, ndien mmesiyom mmọ ẹfiọk ke mmọ ẹkeme ndidi mbịne ebe mi ini ekededi oro mmọ ẹyomde enye.” Iban emi ẹnọde ibetedem, utọ nte Michelle ye Cheryl, ẹsinyịme ndinam n̄waidem man mme ebe mmọ ẹkeme ndikpeme mme erọn̄ Abasi. Ẹdara iban mbiowo ke ndinyene edu edinọ ibetedem.

Edi, inaha ebiowo oro ọyọhọde ye utom ofụmi ndise mban̄a mme udọn̄ n̄kpọ eke spirit ye mme n̄kpọ en̄wen oro n̄wan ye nditọ esie ẹyomde. Ana ebiowo oro ọdọde ndọ “edi owo eke owo mîbiomke enye ikọ, eke edide ebe n̄wan kiet, onyụn̄ enyenede nditọ eke ẹnịmde ke akpanikọ, nditọ eke mme owo mîdorike mmọ ikọ ite ẹdi mbon etịme-etịme ido ye nsọn̄-ibuot.” (Titus 1:6) Ana enye ese aban̄a ubon esie ke ido nte N̄wed Abasi oyomde mme esenyịn ẹdide mme Christian ẹnam.—1 Timothy 3:1-7.

Ye ebiowo oro ọyọhọde ye utom, n̄wan emi ọnọde ibetedem enen̄ede ọsọn̄ urua! Oro edi nte esitiede mbiowo oro ẹdọde ndọ, emi ẹwụtde ẹdikere mban̄a, ke idem. Edi kpa nte Bible ọdọhọde ete: “Okụt [“eti,” NW] an̄wan okụt eti n̄kpọ.” (Mme N̄ke 18:22) Ke ikọ ye ke edinam, utọ mbiowo oro ẹsiwụt ntotụn̄ọ esịtekọm ẹnọ iban mmọ. Ke adianade ye akam ofụri esịt ye inem inem ukpepn̄kpọ oro mmọ ẹsinịmde ọtọkiet, mme ọdọ ndọ ẹdide mme Christian mi ẹsisio ini ẹnịm ndidara mme utọ n̄kpọ nte edinam isan̄ ke mbenesụk, ke akai, m̀mê edinam isan̄ ubọ ofụm ke itie unọ idem inemesịt. Ih, mbiowo ẹsikop idatesịt ke ndinọ iban mmọ ima ima ukpeme.—1 Peter 3:7.

Mbiowo emi ke unana ibụk ẹbọkde udịmerọn̄ Abasi ẹnọ ikọt Jehovah nduọkodudu. Mmọ ẹnen̄ede ẹdi mme “enọ ke owo” (NW) ẹnyụn̄ ẹdi edidiọn̄ ẹnọ esop!—Ephesus 4:8, 11-13.