Mme Itie Utuakibuot—Ndi Nnyịn Imoyom Mmọ?

‘Ediwak tọsịn mbonisan̄ ido ukpono oro ẹsịnede ndiye ọfọn̄ ẹnyụn̄ ẹtode nsio nsio ikpehe idụt oro, otu mbon India oro ẹnekde unek oro ẹdọhọde nte edide unek mbon Spain eset ẹtiene ibịt oro ẹmiade, ye mme enyene-ifịk mbon ufọkabasi oro ẹsịnde ọkpọsọn̄ ukeme ndinyọni ke edọn̄ mbe otuowo man ẹkesịm itieuwa, ẹma ẹyọhọ etehe ufọkabasi ye mme efak oro ẹdude ẹkpere akwa ufọkabasi oro.’

NTRE ke n̄wedmbụk n̄kpọntịbe oro Economista eketịn̄ aban̄a akwa udịmowo ke December 2001. Ke ini oro, n̄kpọ nte miliọn owo ita ẹkeka akwa ufọkabasi ke Mexico City man ẹkewụt mbuọtidem mmọ ke Edisana Mary eke Guadalupe. Ata ediwak owo ẹsika ikpọ ufọk ido ukpono eken n̄ko, utọ nte Akwa Ufọkabasi St. Peter ke Rome.

Ediwak mbon oro ẹyomde ndituak ibuot nnọ Abasi ẹsinen̄ede ẹma mme ufọk ido ukpono. Maria emi otode Brazil ọdọhọ ete: “N̄kada ufọkabasi nte ebiet emi n̄kemede ndisan̄a n̄kpere Abasi. Enye ekedi edisana ebiet. N̄kenịm ke akpanikọ nte ke ndika ufọkabasi anam ukpọn̄ owo asana ye nte ke ekedi idiọkn̄kpọ nditre ndika Mass ndinyụn̄ ntre ndiyarade idiọkn̄kpọ kpukpru Sunday.” Consuelo otode Mexico obụk ete: “Ufọkabasi ama esinen̄ede aduai mi idem; n̄kada enye ke ọsọn̄urua. Ke adan̄aemi ndude do, ekesitie nte ndu ke heaven.”

Okposụkedi ndusụk owo ẹdade mme ufọk ido ukpono ke ata akpan n̄kpọ, mbon en̄wen ẹyịk m̀mê enen̄ede oyom ẹda mmọ ẹnam n̄kpọ nte mme itie utuakibuot. Ke etịn̄de aban̄a ibat mme aka ufọkabasi ndisụhọde, Peter Sibert, oku Catholic ke England, ọdọhọ ete: “[Mme owo] ẹsimek orụk ido ukpono oro mmọ ẹmade. Ediwak mbonusọn̄ ẹdi mbon Catholic ndien mmọ ẹdu uwem ẹkekem ye mme edinịm ke akpanikọ mmọ—edi mme uyen inyeneke utọ edu oro iban̄a mme edinịm ke akpanikọ mmọ.” Daily Telegraph London eke November 20, 1998, ọkọdọhọ ete: “Tọn̄ọ  ke 1979, ẹmeberi n̄kpọ nte ufọkabasi 1,500 ke England ke ẹmende ẹdomo ye ufọkabasi 495 oro ẹsiakde ye ufọkabasi 150 oro ẹkefiakde ẹbọp.”

Ke 1997 n̄wedmbụk n̄kpọntịbe Munich, Germany oro Süddeutsche Zeitung ama ọtọt ete: “Ẹwọn̄ọde mme ufọkabasi ẹsịn ke mme ufọk usio senima ye mme ufọkidụn̄: Mbon ufọkabasi ikaha ufọkabasi aba, ẹdida mme itie utuakibuot ẹnam mme mbubehe en̄wen. . . . Ẹtọn̄ọ ndinam se ẹsinamde ke Netherlands m̀mê England, ke Germany.” Enye ama adian do ete: “Owo ekeme ndikụt n̄kpọ nte n̄wọrọnda edinyam ufọk ido ukpono 30 m̀mê 40 ke Germany ke ufan̄ isua ifan̄ emi ẹkebede.”

Ndi ẹnen̄ede ẹyom mme ufọk ido ukpono ndida ntuak ibuot nnọ Abasi? Ndi uwụtn̄kpọ ikpọ ufọk ido ukpono odu ke N̄wed Abasi? Mme orụk ufọk ewe ke ẹkesida ẹtuak ibuot ẹnọ odu-uwem Abasi akpanikọ? Nso ke nnyịn ikeme ndikpep nto mmọ kaban̄a ufọn edinyene mme itie utuakibuot ye se ẹkpenamde do?