Mme Ukpepn̄kpọ Ẹtode N̄wetnnịm N̄kpọ Aban̄ade Emana Jesus

MME n̄kpọ oro ẹketịbede ke ini emana Jesus ẹduai ediwak miliọn owo idem. Ẹsikụt emi ke udịm udịm ndise emana Jesus oro ẹsiwụtde ye mme mbre emana Jesus oro ẹsibrede ke ofụri ererimbot ke ini Christmas. Okposụkedi ẹkamade nduaidem, owo ikewetke mme n̄kpọ oro ẹketịbede ke ini emana Jesus ke Bible nte mbụk unọ idem inemesịt. Utu ke oro, mmọ ẹdi ubak kpukpru n̄wed oro Abasi ọkọnọde odudu spirit esie ẹda ẹwet man ẹda ẹkpep owo n̄kpọ ẹnyụn̄ ẹnam owo ẹsan̄a nte enende.—2 Timothy 3:16.

Edieke Abasi okpokoyomde mme Christian ẹnịm usọrọ emana Jesus, do Bible ọkpọnọ nnennen usenọfiọn̄. Ndi enye ọnọ? Ke ama eketịn̄ ete ke Jesus akamana ke ini mme ekpemerọn̄ ẹkedude ke an̄wa ẹkpeme erọn̄ mmọ ke okoneyo, Albert Barnes, eyen ukpepn̄kpọ Bible eke ọyọhọ isua ikie 19 ama ebiere ete: “Emi anam an̄wan̄a nte ke Andinyan̄a nnyịn ama amana mbemiso December 25 . . . Ini oro tuep esidu, akpan akpan ke mme edikon̄ ye obot obot ikpehe oro ẹdude ẹkpere Bethlehem. Abasi emedịp ini emana [Jesus]. . . . Ikonyụn̄ idịghe akpan n̄kpọ ndidiọn̄ọ ini oro; edieke ekpekedide akpan n̄kpọ, Abasi akpakanam ẹwet ẹnịm.”

Ke okpụhọrede ye oro, mme andiwet Gospel inan̄ ẹtịn̄ in̄wan̄-in̄wan̄ ẹnọ nnyịn usen oro Jesus akakpade. Enye akakpa ke usen Passover, oro ẹkesinịmde ke Nisan 14 ke ọfiọn̄ mme Jew, ke ini utọ. Akan oro, Jesus ama enen̄ede owụk mme anditiene enye ete ẹnịm usen oro nditi imọ. (Luke 22:19) Bible inọhọ utọ ewụhọ oro ite ẹnịm usọrọ usen emana  Jesus, m̀mê usọrọ usen emana owo en̄wen ekededi. Ke mfụhọ, eneni aban̄ade usen emana Jesus ekeme ndikpan owo ndikụt mme n̄wọrọnda n̄kpọntịbe efen efen oro akadade itie ke n̄kpọ nte ini oro.

Ete ye Eka Oro Abasi Emekde

Ke otu ediwak tọsịn ubon oro ẹkedude ke Israel, nso orụk ete ye eka ke Abasi ekemek ete ẹbọk Eyen esie? Nte Enye ekekere akpan akpan aban̄a utọ n̄kpọ nte uwọrọiso ye imọ? Baba-o. Utu ke oro, Jehovah okowụk ntịn̄enyịn ke mme edu eke spirit ete ye eka oro. Dụn̄ọde ikwọ itoro Mary nte ẹwetde ke Luke 1:46-55, emi enye ọkọkwọde ke ini ẹkesiande enye akwa ifet ndikabade ndi eka Messiah. Ke adianade ye mme n̄kpọ eken, enye ọkọdọhọ ete: “Ukpọn̄ mi ke okpono Jehovah . . . koro Enye ekesede usụhọde-itie ofụn-an̄wan Esie.” Enye ama osụhọde idem ada idemesie nte owo eke odude ke “usụhọde-itie,” kpa ofụn an̄wan Jehovah. Ke edide akpan n̄kpọ akan, ndinem ikọ itoro ke ikwọ Mary owụt nte ke enye ekedi owo emi ekerede n̄kpọ eke spirit okonyụn̄ enen̄erede enyene ifiọk N̄wed Abasi. Okposụkedi ekedide anamidiọk andito ubon Adam, enye ekedi mfọnn̄kan edimek nte eka Eyen Abasi ke isọn̄.

Nso kaban̄a ebe Mary, oro akakabarede edi ete emi ekemende Jesus akama? Joseph ekedi owo oro ekenen̄erede enyene ifiọk usọeto. Ke ntak oro enye ekenyịmede ndida ubọk esie nnam ọkpọsọn̄ utom, enye ama ekeme ndise mban̄a ubon esie oro nte ini akakade ekedide edisịne nditọiren ition ye ke nsụhọde n̄kaha nditọiban iba. (Matthew 13:55, 56) Joseph ikedịghe imọ owo. Ke ini ekedide edikem Mary ndimen akpan esie n̄ka temple Abasi, ekeme ndidi Joseph ikokopke inemesịt sia enye mîkekemeke ndinọ erọn̄ ke uwa. Utu ke oro, mmọ ẹkewa se ẹkedọhọde mme ubuene ẹwa. Ibet Abasi eketịn̄ aban̄a eka oro amande nsek eyeneren ete: “Edieke ubọk mîkemke enye ke eyen erọn̄, yak enye ada mbomo n̄kuku iba, m̀mê nditọ ibiom iba, edi; kiet ke eke edifọp uwa, kiet eken ke eke uwa idiọk ido: ndien yak oku osio isop ọnọ enye, ndien enye edidi edisana.”—Leviticus 12:8; Luke 2:22-24.

Bible ọdọhọ ete ke Joseph ‘ekedi edinen owo.’ (Matthew 1:19) Ke uwụtn̄kpọ, enye ikenyeneke ebuana idan̄ ye n̄wan esie emi mîkọfiọkke erenowo ibọhọke ke Jesus ama akamana. Emi ikayakke ẹnyene ukwan̄ ekikere ekededi ẹban̄a enye emi Ete Jesus ekenen̄erede edi. Ikememke utom mbufa mme ọdọ ndọ emi nditre ndinyene ebuana idan̄ ke adan̄aemi ẹdụn̄de ufọk kiet, edi oro ama owụt ke mmọ mbiba ẹma ẹda ifet edidi se ẹmekde ndibọk Eyen Abasi, ke ọsọn̄urua.—Matthew 1:24, 25.

Ukem nte Mary, Joseph ekedi owo oro ekerede n̄kpọ eke spirit. Enye ama esitre utom kpukpru isua onyụn̄ ada ubon esie anam isan̄ usen ita ọtọn̄ọde ke Nazareth tutu esịm Jerusalem man ẹkedụk usọrọ Passover eke isua ke isua. (Luke 2:41) Ekeme ndidi Joseph n̄ko ama ekpep ekpri Jesus ndisitiene mbuana ke utuakibuot eke urua ke urua ke synagogue n̄kann̄kụk, ebiet oro ẹkesikotde ẹnyụn̄ ẹnamde Ikọ Abasi an̄wan̄a. (Luke 2:51; 4:16) Ke ntre, eyịghe idụhe nte ke Abasi ekemek eti ete ye eka eke isọn̄ ndikama Eyen esie.

Akwa Edidiọn̄ Enyenede Usụhọde Mme Ekpemerọn̄

Kpa ye oro ekedide ọkpọsọn̄ n̄kpọ ọnọ n̄wan esie, emi akasan̄ade ye idịbi ọfiọn̄ usụkkiet idahaemi, Joseph ama anam isan̄ aka akwa obio mme ete ete esie man ekesịn enyịn̄ ke n̄wed, ke ndinam ewụhọ Caesar. Ke ini ebe ye n̄wan emi ẹkedide ẹdisịm Bethlehem, mmọ ikekwe itienna  ke akwa obio oro ọkọyọhọde ye owo mi. Ntem, mme idaha ẹma ẹnyịk mmọ ndidu ke ufọk ufene, emi ẹkemande ẹnyụn̄ ẹsịnde Jesus ke usịnudia ufene. Man ọsọn̄ọ mbuọtidem mmọ, Jehovah ama ọnọ usụhọde ete ye eka emi nsọn̄ọ ndiwụt nte ke emana eyen emi ekenen̄ede edi uduak Abasi. Nte enye ọkọdọn̄ mme ọwọrọiso nyobiowo oro ẹtode Bethlehem ndikọnọ ebe ye n̄wan emi nsọn̄ọ? Baba. Utu ke oro Jehovah Abasi akayarade n̄kpọ emi ọnọ mme ekpemerọn̄ oro ẹkenamde utom ọkpọsọn̄ ẹkenyụn̄ ẹdude ke an̄wa ẹkpeme otuerọn̄ mmọ okoneyo oro.

Angel Abasi ama ọbiọn̄ọde onyụn̄ ọdọhọ mmọ ẹka Bethlehem, emi mmọ ẹdikụtde nsekeyen oro, Messiah, “anade ke ebiet usịn-udia ufene.” Nte mme usụhọde owo emi ẹma ẹkop n̄kpaidem m̀mê bụt ndikop nte ke nsek Messiah okodu ke ufọk ufene? N̄wan̄ansa-o! Ye unana ubiat ini, mmọ ẹma ẹkpọn̄ otuerọn̄ mmọ ẹka Bethlehem. Ke ini mmọ ẹkekade ẹkekụt Jesus, mmọ ẹma ẹbụk ẹnọ Joseph ye Mary se Angel Abasi ọkọdọhọde. Nte eyịghe mîdụhe, emi ama ọsọn̄ọ mbuọtidem ebe ye n̄wan oro nte ke kpukpru n̄kpọ ẹtịbe nnennen nte Abasi akaduakde. Amaedi “mme ekpemerọn̄” oro, mmọ ẹma “ẹfiak ẹnyọn̄ọ, ẹkpono ẹnyụn̄ ẹtoro Abasi kaban̄a kpukpru n̄kpọ oro mmọ ẹkekopde ẹnyụn̄ ẹkụtde.” (Luke 2:8-20) Ih, Jehovah ikanamke ndudue ke ndikemek ndiyarade n̄kpọ nnọ mme ekpemerọn̄ oro ẹbakde Abasi.

Otode se ẹnemede ke enyọn̄ emi, nnyịn imokụt mme orụk owo oro oyomde nnyịn idi man inyene mfọn Jehovah. Iyomke nnyịn iyom uwọrọiso m̀mê imọ. Utu ke oro, ukem nte Joseph, Mary, ye mme ekpemerọn̄ oro, oyom nnyịn ikop uyo Abasi inyụn̄ iwụt ima oro nnyịn imade enye ebe ke ndinam mme udọn̄ n̄kpọ eke spirit ẹdi ebeiso ẹnọ mme udọn̄ n̄kpọ obụkidem. Ke akpanikọ, nti n̄kpọ ẹdu ndikpep nto editie n̄kere mme n̄wetnnịm n̄kpọ ẹban̄ade mme n̄kpọ oro ẹketịbede ke n̄kpọ nte ini emana Jesus.

[Ndise ke page 7]

Mary ndinọ ibiom iba okowụt nso?

[Ndise ke page 7]

Abasi ekemek ndiyarade emana Jesus nnọ ibat ibat usụhọde mme ekpemerọn̄