Nte Afo Emeti?

Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:

• Didie ke “ukeme ukere n̄kpọ” ekeme ndidi n̄kpọ ukpeme? (Mme N̄ke 1:4, NW)

Enye ekeme ndinam nnyịn idu ke edidemede iban̄a mme n̄kpọndịk eke spirit onyụn̄ onụk nnyịn ndidiomi usụn̄ edinam oro owụtde eti ibuot, utọ nte ndifep mme idomo ndinam idan̄ ke itieutom. Enye an̄wam nnyịn ndifiọk nte ke ekemmọ mme Christian ẹdi mme anana-mfọnmma owo, ndien emi ekeme ndin̄wam nnyịn ndifep ndinam n̄kpọ ke ibụmede ke ini ẹyatde nnyịn esịt. Enye n̄ko ekeme ndinam nnyịn ifep mfịghe uma inyene emi ekemede ndinụk nnyịn nsio ke usụn̄ eke spirit.—8/15, page 21-24.

• Owo ekeme ndisan̄a didie ndi eti mbọhọidụn̄?

Usụn̄ iba ndidi eti mbọhọidụn̄ edi ndidi eti andinọ enọ ye ndidi andibọ oro owụtde esịtekọm. Enen̄ede ọfọn ndidi eti mbọhọidụn̄ ke ini afanikọn̄ etịbede. Mme Ntiense Jehovah ẹdomo ukeme ndidi nti mbọhọidụn̄ ebe ke ndidụri mbon efen utọn̄ mban̄a n̄kpọntịbe emi editịbede ke mîbịghike, kpa edinam Abasi nditre idiọkido.—9/1, page 4-7.

• Nte Bible ọdọhọde, mmanie ẹdi ata ndisana owo, ndien didie ke mmọ ẹdin̄wam ubonowo?

Kpukpru akpa mme Christian ẹkedi ata ndisana owo ndien edi Abasi akanam mmọ ẹdi ndisana, idịghe owo m̀mê mme esop. (Rome 1:7) Ke ndondo oro ẹnamde ẹset ẹkedụk uwem eke heaven, ndisana owo ẹyediana ye Christ ke ndidiọn̄ mme anam-akpanikọ ke isọn̄. (Ephesus 1:18-21)—9/15, page 5-7.

• Ndidiọn̄ọ n̄kpọ mban̄a mbre mbuba Greece eset ekeme ndida nso ufọn nsọk mme Christian?

Uwetn̄kpọ apostle Peter ye Paul ẹnyene mme uwụtn̄kpọ ẹkọn̄ọde m̀mê ẹtịn̄de n̄kpọ ẹban̄a mme mbre mbuba eset oro. (1 Corinth 9:26; 1 Timothy 4:7; 2 Timothy 2:5; 1 Peter 5:10) Ekedi akpan n̄kpọ owo mbuba eset ndinyene eti andikpep, ndinyene mfara ke idem, ndinyụn̄ nda ukeme esie nnam n̄kpọ nte odotde. Ntre ke edi ye ukeme eke spirit oro mme Christian ẹsịnde mfịn.—10/1, page 28-31.

• Nso idi mme n̄kpọ-ata ye mme utịp edibọk nditọ ke esenidụt?

Ediwak nditọwọn̄ ẹsisọp ndikpep obufa usem ẹkan mme ete ye eka mmọ, emi ekemede ndidi esisọn̄ mmọ ndifiọk se ekikere ye edinam nditọ mmọ ẹwọrọde. Ndien ekeme ndidi mme ukpepn̄kpọ Bible idisọpke in̄wan̄a nditọ emi ke usem emana mme ete ye eka mmọ. Kpa ye oro, ẹkeme ndisọn̄ọ mbọbọ ubon nte mme ete ye eka ẹkpepde nditọ mmọ usem emana mmọ, emi ke ntem ẹdide ẹdifiọk usem iba ẹnyụn̄ ẹmehede ye ido obio mbiba.—10/15, page 22-26.

• Ntak edide akpan n̄kpọ ndikpep ndikpe ubọk?

N̄kpeubọk ofụri esịt esiwak ndidi usụn̄ ndifiak ndiọn̄ itie ebuana oro akabiarade. Bible ọnọ mme uwụtn̄kpọ aban̄a odudu oro n̄kpeubọk enyenede. (1 Samuel 25:2-35; Utom 23:1-5) Ediwak ini emi owo iba ẹtọhọde, mmọ mbiba ẹsinyene nduduọhọ. Ke ntre, oyom mmọ mbiba ẹnyịme ke mmimọ imanam ndudue ẹnyụn̄ ẹkpe kiet eken ubọk.—11/1, page 4-7.

• Ntak emi mbre mfọniso ọdiọkde, idem ọkpọkom ẹda ekpri okụk ẹbre?

Mbre mfọniso ekeme ndidemede ntan̄idem, edu ndomoidem, ye idiọkitọn̄, emi Bible obiomde ikpe. (1 Corinth 6:9, 10) Ediwak owo oro ẹnyenede mbumehe ubre mbre mfọniso ẹketọn̄ọ emi ke ini uyen ebe ke ndida n̄kpri okụk n̄kọbi n̄kpa.—11/1, page 31.

• Sia ẹkewetde ediwak n̄wed Bible ke usem Greek, ntak okoyomde ẹkabade Bible ẹsịn ke usem Greek, ndien ye nso utịp?

Usem Greek eyomfịn enen̄ede okpụhọde ye usem Greek oro ẹkedade ẹkabade N̄wed Abasi Usem Hebrew eke Septuagint ye enye oro ẹkedade ẹkabade N̄wed Abasi Christian Usem Greek. Ke se ibede isua ikie eke ndondo emi ẹdomo ke ata ediwak usụn̄ ndikabade ubak m̀mê ofụri Bible nsịn ke usem Greek oro ẹsemde kpukpru usen. Mfịn, n̄kpọ nte edikabade Bible 30, ke ofụri ofụri m̀mê ke ubak ubak, ẹdu oro mme ọsọ owo ke Greece ẹkemede ndikot, ndien n̄wọrọnda ke otu mmọ emi edi edikabade New World Translation of the Holy Scriptures eke usem Greek, oro ẹkesiode ke 1997.—11/15, page 26-29.

• Ntak mîyomke mme Christian ẹnọ ọyọhọ mbak duop?

Ke idak Ibet oro ẹkenọde Israel eset, edinọ ọyọhọ mbak duop ekedi usun̄ ndida nnọ esien Levi ibetedem nnyụn̄ nse mban̄a mbon unana. (Leviticus 27:30; Deuteronomy 14:28, 29) N̄kpa uwa Jesus ama abiat Ibet ye edinọ ọyọhọ mbak duop esie oro ẹkeyomde, efep. (Ephesus 2:13-15) Idaha okodude ke akpa esop ekedi Christian kiet kiet ndinọ nte ekemde ye se enye enyenede ye nte enye akaduakde ke esịt esie. (2 Corinth 9:5, 7)—12/1, page 4-6.

• Ndi Ediyarade 20:8 ọwọrọ nte ke Satan ayabian̄a ata ediwak owo ke akpatre udomo?

Uwetn̄kpọ oro ọdọhọ ke mbon oro ẹdibian̄ade ẹditie “nte ntan mben-inyan̄.” Ke Bible, ikọ oro esiwak ndiwọrọ ibat oro owo mîfiọkke, ye unana edinọ ekikere mban̄a akwa ibat. Mfri Abraham, emi akanade awak “nte ntan emi odude ke mben inyan̄,” ke ẹsiode Jesus Christ ẹfep ekedidi 144,000, nte ini akakade. (Genesis 22:17, NW; Ediyarade 14:1-4)—12/1, page 29.