‘Abasi, Ntak Emi Afo Akayakde Emi Etịbe?’

RICARDO osụk eteti ini oro enye eketiede ye Maria, n̄wan esie, ke ubet emi ẹsitiede ẹbet abiaibọk. * Mmọ mbiba ikenyeneke uko ndikot obufa ibọrọ useidem Maria. Ekem, Ricardo ama atat efọkn̄wed oro, ndien mmọ ẹma ẹsọsọp ẹtop enyịn ẹse se ẹkewetde ke ibọrọ useidem oro. Mmọ ẹma ẹkụt ikọ oro “kansa,” ndien mmọ mbiba ẹma ẹtọn̄ọ nditua eyet koro mmọ ẹma ẹfiọk se ikọ oro ọwọrọde ọyọhọ ọyọhọ.

Ricardo eti ete: “Abiaibọk oro ama enen̄ede ọfọn ido, edi nte an̄wan̄ade, enye ama ọfiọk nte idaha oro ọdiọkde eketre, koro enye ama aka iso ndisian nnyịn ete ke inyene ndibuọt idem ye Abasi.”

Mbemiso ẹketọn̄ọde usọbọ emi ẹdade un̄wana ikan̄ ẹnọ, abiaibọk Maria ama okụt nte ukot nnasia esie enyekde. N̄kaiso useidem ama ayarade ke kansa oro ama asuana esịm mfre esie. Ke ẹma ẹkenọ usọbọ ke urua kiet kpọt, ẹma ẹtre usọbọ oro ẹdade un̄wana ikan̄ ẹnọ. Maria ama osụhọ onyụn̄ akpa ke ọfiọn̄ iba ẹbede. Ricardo anam an̄wan̄a ete: “Mma ndat esịt ke ndutụhọ esie ama etre, edi mma nnen̄ede ntaba enye tutu ami nyom ndikpa n̄ko. Ediwak ini, mma nsiseme nnọ Abasi nte: ‘Ntak emi afo akayakde emi etịbe?’”

Mme Mbụme Ẹsidemede ke Ini N̄kpọ Mmọn̄eyet Etịbede

Ukem nte Ricardo, anana-ibat owo ke ofụri ererimbot ẹsobo ndutụhọ. Ediwak ini, edi mbon emi mîduehe ẹsibọ ufen. Kere ban̄a akama-iduọesịt mfụhọ emi anana-utịt ekọn̄ oro ọnọmọde ubonowo adade edi. Mîdịghe kere ban̄a ubiak emi akpakịp mbon unọmọ ẹkopde ẹto idan̄ n̄kanubọk, edisabade nditọwọn̄, afai esịtufọk, ye mme idiọkn̄kpọ eken emi owo anamde. Ke ofụri mbụk, etie nte ukwan̄ikpe ye ubiak emi iren ye iban ẹdade ẹtiene kiet eken ẹyọyọhọ. (Ecclesiastes 4:1-3) Ndien mbon unọmọ ẹdu emi ẹbọde ndutụhọ ẹto mme oto-obot afanikọn̄, m̀mê udọn̄ọ eke ntụk, ekikere ye ikpọkidem. Eyịghe idụhe ediwak owo ẹbụpde ẹte, “Ntak emi Abasi ayakde utọ ndutụhọ emi odu?”

Idem ye mbon oro ẹnyenede mme edinịm ke akpanikọ ido ukpono, isimemke ndiyọ ndutụhọ. Afo n̄ko emekeme ndikere m̀mê nso ntak ke ima ima Abasi emi enyenede ofụri odudu ekeme ndinyene ke ndiyak ndutụhọ owo odu. Ndinyene ibọrọ akpanikọ oro ọnọde uyụhọ ke mbụme oro etịmerede owo ekikere mi edi akpan n̄kpọ ke nnyịn ndinyene ifụre ekikere ye itie ebuana ye Abasi. Bible ọnọ utọ ibọrọ oro. Mbọk kere ban̄a se enye enyenede nditịn̄ nte ẹwụtde ke ibuotikọ oro etienede mi.

[Ikọ idakisọn̄]

[Mme ndise ke page 3]

Abiaibọk oro ama aka iso ndisian nnyịn ete ke inyene ndibuọt idem ye Abasi