“N̄kọfiọkke Ekese N̄kpọ Mban̄a Abasi”

“ỌTỌN̄ỌDE ke isua emi ekebede, Mme Ntiense Jehovah ẹsiwaha edem mi ẹdibuana utịbe utịbe mbụk aban̄ade Obio Ubọn̄ Abasi ye ami. Mma ndu ke Catholic isua itiata, edi n̄kọfiọkke ekese n̄kpọ mban̄a Abasi. Ke isua kiet emi kpọt, mmekpep ekese n̄kpọ,” ntem ke eren kiet emi odụn̄de ke Kerala, India, ekewet. Enye ama aka iso ọdọhọ ete, “Mmenen̄ede n̄kop inemesịt ndifiọk nte ke ẹmịn̄ Enyọn̄-Ukpeme ke usem 139 [idahaemi 146]. Edi n̄kpọ n̄kpaidem ndifiọk nte ke mme owo eke kpukpru usem ke ẹkop etop aban̄ade Abasi.”

Okposụkedi ediwak mbon akwaifiọk ẹkerede ke owo ikemeke ndifiọk Abasi, apostle Paul ama anam an̄wan̄a ete ke ẹkeme. Ke etịn̄de ikọ ọnọ otu mbon Athens, emi ndusụk mmọ ẹkesituakde ibuot ke itieuwa emi ekenyenede “Abasi Emi Owo Mîfiọkke,” Paul ama ọdọhọ ete: “Se mbufo ẹtuakde ibuot ẹnọ ke unana-ifiọk, kpa oro ke ami n̄kwọrọ nnọ mbufo. Abasi emi okobotde ererimbot ye kpukpru se idude ke esịt . . . ọnọ kpukpru owo uwem, ye ibifịk, ye kpukpru n̄kpọ: Enye anam kpukpru mme idụt ẹto ke ekpụk kiet ẹwọrọ ẹdidụn̄ ke ofụri iso isọn̄.”—Utom 17:23-26.

Paul ama esịn udọn̄ ọnọ otuowo esie ete ẹyom usụn̄ ẹfiọk Andibot, koro “Enye mîyomke usụn̄ ye baba nnyịn owo kiet.” (Utom 17:27) Mme Ntiense Jehovah ẹyedara ndin̄wam fi ọfiọk ata Abasi ye nti edu esie.