Da Mme Ukpụhọde Idaha Nam N̄kpọ nte Ọfọnde

Pum, Jan, Dries, ye Otto, mbiowo Christian inan̄ oro ẹdụn̄de ke Netherlands, ẹnyene ediwak n̄kpọ oro mmọ ẹdade ẹbiet kiet eken. Mmọ mbinan̄ ẹdọ ndọ ẹnyụn̄ ẹnyene nditọ. Ke adianade do, ke ndusụk isua emi ẹkebede, kpukpru mmọ ẹma ẹnyene utom idịbi udia ofụri ini ẹnyụn̄ ẹdụn̄ ke nti ufọk. Nte ededi, kpukpru mmọ ẹma ẹtre utom idịbi udia oro mmọ ẹkesinamde ẹnyụn̄ ẹtọn̄ọ ndisịn ofụri ini ye ukeme mmọ ke ndinam mme ufọn n̄kpọ Obio Ubọn̄ ẹka iso. Nso ikan̄wam mmọ ndinam ukpụhọde emi? Mmọ mbinan̄ ẹma ẹda mme ukpụhọde idaha ẹnam n̄kpọ nte ọfọnde.

NTE ini akade, mme idaha ata ediwak nnyịn ẹyekpụhọde. Ediwak ukpụhọde, utọ nte edidọ ndọ, edinyene nditọ, m̀mê edise mban̄a ete ye eka oro ẹma ẹkesọn̄, ẹsinam inyene mme mbiomo efen efen. Nte ededi, ndusụk ukpụhọde idaha ẹsinọ nnyịn ifụre nditat utom ukwọrọikọ Christian nnyịn. (Matthew 9:37, 38) Ke uwụtn̄kpọ, ekeme ndidi nditọ nnyịn ẹkponi ẹnyụn̄ ẹkpọn̄ ufọk, mîdịghe ekeme ndidi nnyịn imọkpọn̄ utom.

Ke adianade do, ke adan̄aemi edide akpanikọ nte ke mme idaha nnyịn ẹkeme ndikpụhọde edide imoyom mmọ ẹkpụhọde m̀mê iyomke, ndusụk mme Christian ẹkụt unen ke ndikpụhọde mme idaha mmọ man ẹnyene ifet nditat utom ukwọrọikọ mmọ. Oro edi ata ukem se Pum, Jan, Dries, ye Otto ẹkenamde. Didie ke mmọ ẹkenam emi?

Ke Ini Nditọ Ẹkpọn̄de Ufọk

Pum ekedi andikama n̄wed okụk ke usiakifia unam ibọk. Enye ye n̄wan esie, Anny, ẹma ẹsiwak ndinam utom ọtọkiet ye nditọiban mmọ iba nte mme asiakusụn̄ unọ un̄wam. Pum ye Anny ẹma ẹsinam ndutịm n̄ko ẹnọ nditọiban emi ndibuana ke unọ idem inemesịt ye mbon en̄wen oro ẹdude ke utom usiakusụn̄. Mmọ ẹbụk ẹte: “Emi ama ekpeme mmọ ọbiọn̄ọ mme mfịna oro mme orụk ebuana efen ẹkpekedade ẹdi.” Ke ntak uwụtn̄kpọ ete ye eka mmọ, nditọiban iba emi ẹma ẹkabade ẹdi mme asiakusụn̄ ofụri ini ke ẹkụrede ufọkn̄wed sekọndri.

Ke ini nditọ mmọ ẹma ẹkekpọn̄ ufọk, Pum ye Anny ẹma ẹdikụt ke mme ukpụhọde idaha emi ẹnọ mmimọ ekese ifụre ye okụk ndida nnam isan̄ n̄ka mme itie inemesịt m̀mê ndibuana ke ndusụk orụk unọ idem nduọkodudu efen efen. Nte ededi, utu ke emi, ebe ye n̄wan emi ẹma ẹbiere ndida mme ukpụhọde idaha emi ntat utom ukwọrọikọ Christian mmọ. Ntre Pum ama eben̄e eteutom esie ete ayak imọ isitre utom usen kiet ke urua. Nte ini akade, Pum ama anam ndutịm oro akayakde enye esitọn̄ọ utom ke n̄kanika 7 usenubọk onyụn̄ etre ke n̄kanika 2 uwemeyo. Nte ededi, nditre ndinam utom usen kiet ke urua ọkọwọrọ ndinyịme ndida usụhọde okụkutom ndu uwem. Kpa ye oro, mmọ ẹma ẹkụt unen, ndien ke 1991, Pum ama etiene n̄wan esie anam utom nte asiakusụn̄ ofụri ini.

Ekem, ẹma ẹnọ Pum ikot ndikabade ndi udiana andise mban̄a Ufọk Mbono Mme Ntiense Jehovah. Emi ọkọwọrọ ebe ye n̄wan emi  ndiwọrọ n̄kpọn̄ ufọk mmọ oro mmọ ẹkedụn̄de ke isua 30 n̄kodụn̄ ke okụre Ufọk Mbono oro. Mmọ ẹma ẹnam ntre. Nte emi ekedi ọkpọsọn̄ n̄kpọ ndinam? Anny ọbọrọ ete ke ini ekededi oro ikenyenede udọn̄ unyọn̄ ufọk, imọ ima isibụp idem imọ: ‘Nte ami ndi n̄wan Lot?’ Enye ama esịn ‘ndise edem.’—Genesis 19:26; Luke 17:32.

Pum ye Anny ẹkụt ke ubiere oro mmimọ ikanamde amada ediwak edidiọn̄ edi. Ke adianade ye ediwak n̄kpọ en̄wen, mmọ ẹsikop inem utom oro mmọ ẹnamde ke Ufọk Mbono oro, editịm itie oro nnọ mme mbono district, ye edisobo ye mme esenyịn circuit (mme asan̄autom oro ẹsan̄ade-san̄a) oro ẹsinọde utịn̄ikọ ke ufọk mbono oro. Ke ini ke ini, mmọ ẹsisan̄a ẹse nsio nsio esop, ke ini Pum anamde utom nte udiana esenyịn circuit.

Nso ikan̄wam Pum ye Anny ndikụt unen ke nditat utom mmọ? Pum ọdọhọ ete: “Ke ini mme idaha fo ẹnen̄erede ẹkpụhọde, afo enyene ndibiere ndida mbufa idaha oro nnam n̄kpọ ke mfọnn̄kan usụn̄.”

Ndidu Mmemmem Uwem

Jan ye n̄wan esie, Woth, ẹnyene nditọ ita. Ukem nte Pum ye ubon esie, Jan ama ada ukpụhọde idaha anam n̄kpọ nte ọfọnde. Ke ediwak isua, Jan ama anam utom ke itie unịm okụk oro ẹkesikpede enye ediwak okụk, enye ama esinyụn̄ anam ubon esie ẹdu inem uwem. Nte ededi, ama enen̄ede ọdọn̄ enye nditat utom ukwọrọikọ esie. Enye anam an̄wan̄a ete: “Nte ini akakade, esịtekọm oro nnyenede mban̄a akpanikọ ama enen̄ede otụn̄ọ, ndien ima oro mmade Jehovah ama etetịm ọkọri.” Ntre ke 1986, Jan ama okpụhọde mme idaha esie. Enye ọdọhọ ete: “Mma nda edinam edifiak nnen̄ede mme idaha ke ọfis nnam n̄kpọ nte ọfọnde nnyụn̄ ntọn̄ọ ndisụhọde ini utom mi. Mme nsan̄autom mi oro ẹkekopde n̄kpaidem ẹban̄a emi ẹma ẹnọ mi nditịk enyịn̄ oro Diwodo koro n̄kesinamde utom n̄kukụre ke dinsdag [Tuesday], woensdag [Wednesday], ye donderdag [Thursday]. Okụkọfiọn̄ mi ama osụhọde ke mbahade 40 eke ikie. Mma nnyam ufọk nnyịn ndep ubom oro ẹdụn̄de-dụn̄ man ikeme ndinam utom ke ebiet emi ẹkenen̄erede ẹyom mme asuanetop Obio Ubọn̄. Nte ini akakade, mma mbak n̄kpọn̄ utom; okụkutom mi ama afiak osụhọde ke mbahade 20 eke ikie, edi ke 1993, mma n̄keme nditọn̄ọ utom nte asiakusụn̄ ofụri ini.”

Mfịn, Jan edi andibuana ke Kọmiti Unyene Nneme ye Mbon Ufọkibọk esinyụn̄ anam utom kpukpru ini nte esenyịn mbono. Kpa ye unana nsọn̄idem, Woth esinam utom ke ini ke ini nte  asiakusụn̄ unọ un̄wam. Nditọ mmọ mbita ẹdọ ndọ idahaemi, ndien mmọ ye mme nsan̄a ndọ mmọ, ẹdi ifịk ifịk mme asan̄autom Obio Ubọn̄.

Didie ke Jan ye Woth ẹdomo ndikpụhọde nda ekekem ye usụhọde idaha udu uwem? Jan ọbọrọ ete: “Ke ini ikenyenede n̄kpọ, nnyịn ima ikụt ite nnyịn ikọmọke idem ikaha ke mme n̄kpọ obụkidem. Idahaemi isitịmke isọn̄ nnyịn idem ndibet esisịt mbemiso ikemede ndinyene se iyomde, edi edidiọn̄ eke spirit ye mme ifetutom oro inyenede ẹtịm ẹkpon ẹkan.”

Ukem nte Jan ye Woth, Dries ye n̄wan esie, Jenny, n̄ko ẹma ẹnam ubiere ndidu mmemmem uwem man ẹnyene ini efen efen ẹnọ mme n̄kpọ Obio Ubọn̄. Dries ye Jenny ẹma ẹnam utom nte mme asiakusụn̄ tutu mmọ ẹkabade ẹdi ete ye eka. Ekem, man ese aban̄a ubon esie, Dries ama anam utom nte anam ndutịm ke akamba usiakifia kiet. Mme eteutom esie ẹma ẹma utom esie ẹnyụn̄ ẹyom ndimenede enye itie. Edi Dries ikenyịmeke ẹmenede imọ itie koro oro ọkpọwọrọ ndisịn esisịt ini ke mme edinam Christian.

Ndibọk ubon—ọkọrọ ye ndise mban̄a eka Jenny emi ọdọn̄ọde—ama oyom ini ye ukeme ebe ye n̄wan emi. Kpa ye oro, mmọ ẹma ẹka iso ndinyene edu usiakusụn̄. Nso ikan̄wam mmọ ndinam emi? Jenny anam an̄wan̄a ete: “Mme asiakusụn̄ ẹma ẹsidụn̄ ye nnyịn, ima isinyụn̄ ikot mme asiakusụn̄ udia ke ufọk nnyịn, inyụn̄ inyịme mme esenyịn circuit ẹdụn̄ ye nnyịn.” Dries adian do ete: “Nnyịn ikodu mmemmem uwem ikonyụn̄ ikamake isọn. Nnyịn ima ibiere nte ke tutu amama nnyịn idinamke akwa mbubehe m̀mê ndidep ufọk, man ke ini iso mme utọ n̄kpọ ntre ẹdibiọn̄ọ nnyịn.”

Ubiere oro Dries ye Jenny ẹkenamde ndikpụhọde idaha mmọ man mmọ ẹnyene ini efen efen ẹnọ mme n̄kpọ Obio Ubọn̄ ama ada ekese utịp edi. Nditọiren mmọ mbiba ẹnam utom idahaemi nte mbiowo, ndien kiet ke otu nditọiren emi ye n̄wan esie edi mme asiakusụn̄. Dries ye Jenny ẹma ẹnam utom nte mme akpan asiakusụn̄, ndien nte ini akakade Jenny ama asan̄a ye Dries ke utom circuit. Idahaemi, mmọ ẹdi mme anamutom unyịmesịt ke Bethel, ebiet emi Dries anamde utom nte andibuana ke Kọmiti N̄kọk Itieutom.

Edibak N̄kpọn̄ Utom

Ukem nte Dries ye Jenny, Otto ye n̄wan esie, Judy, ẹma ẹnam utom usiakusụn̄ mbemiso mmọ ẹkenyenede nditọiban mmọ iba. Ke ini Judy akasan̄ade ye idịbi adiaha mmọ, Otto ama enyene utom nte andikpep ke ufọkn̄wed.

Nte nditọ oro ẹkekọride, Otto ye Judy ẹma ẹsiwak ndikot mme asiakusụn̄ esen ke ufọk mmọ man nditọiban mmọ ẹkpekeme ndikụt idatesịt oro mme Christian emi ẹnamde utom uyọhọ ini ẹnyenede. Nte ini akakade, adiaha mmọ ama odụk utom usiakusụn̄. Ke  ukperedem, enye ama aka Ufọkn̄wed Gilead ndien enye, ye ebe esie ẹnam utom idahaemi nte isụn̄utom ke idụt kiet ke Africa. Udun̄wan mmọ ama ọtọn̄ọ utom usiakusụn̄ ke 1987, ndien Judy ama etiene odụk utom usiakusụn̄.

Ke ini mme ukpụhọde idaha ke ufọkn̄wed ẹsiyakde enye anam utom ke ibat ibat hour, enye esida nyọhọ-nsụhọ ini oro anam utom usiakusụn̄. Nte ini akakade, enye ama esịn n̄wed ọkpọn̄ utom. Mfịn, nte enye anamde utom oro ẹsan̄ade-san̄a, Otto ada ifiọk oro enye enyenede nte andikpep ọsọn̄ọ mme esop idem ke n̄kan̄ eke spirit.

Nso item ke Otto ọnọ mbon oro ẹbakde ẹkpọn̄ utom idịbi udia mmọ? “Ke ini ọkpọn̄de utom, kûdomo ndiduọk odudu ke isua kiet m̀mê akande oro. Ndiyom ‘ndiduọk odudu’ ekeme ndimehe owo. Ibịghike afo emekeme ndifre mban̄a utom usiakusụn̄. Utu ke oro, tọn̄ọ nditat utom fo nte asan̄autom iwiwa.”

Da Ifiọk Eyouwem Fo Nam N̄kpọ

Edi akpanikọ, nditọete nte Pum, Jan, Dries, ye Otto idahaemi inyeneke ukeme ye odudu aba nte mmọ ẹkenyenede ke ini mmọ ẹkedide n̄kparawa. Edi mmọ ẹnen̄ede ẹkọri ẹsịm ọyọhọ idaha, ẹnyene mbufiọk, ye ọniọn̄. (Mme N̄ke 20:29) Mmọ ẹfiọk se ọwọrọde ndidi ete, ndien otode ke mmọ ndinam utom ọtọkiet ye iban mmọ, mmọ ẹnyene ndusụk ifiọk ẹban̄a se ndidi eka enen̄erede ọwọrọ. Ke ẹdianade kiet ye iban mmọ, mmọ ẹmese ẹban̄a mme mfịna ubon ẹnyụn̄ ẹnịm mme utịtmbuba ukara Abasi ẹnọ nditọ mmọ. Otto ọdọhọ ete: “Nte esenyịn circuit, ke ini nnọde item mban̄a ubon, ifiọk oro nnyenede nto edibọk ubon mi esinam item oro enyene ufọn.” Kpasụk ntre, ifiọk oro Dries enyenede nte ete anam enye enyene ufọn ke ubon Bethel, emi ediwak uyen ẹnamde utom.

Ih, ndinyene ọkpọkpọ ifiọk esin̄wam utọ nditọete oro ndise mban̄a nsio nsio n̄kpọ oro oyomde ẹse ẹban̄a ke esop. Ifiọk mmọ esiban mme n̄kpọutom mmọ ẹsọp, yak idọhọ ntre, man mmọ ẹda odudu mmọ ẹnam n̄kpọ ke mfọnn̄kan usụn̄. (Ecclesiastes 10:10) Ke akpanikọ, ke ndusụk udomo ini, mmọ ẹsikeme ndinam ekese n̄kan mbon oro ẹkopde odudu ẹkan mmọ edi oro mînen̄ekede inyene mbufiọk.

Utọ nditọete oro, ye iban mmọ, ẹdi nti uwụtn̄kpọ ẹnọ n̄kparawa owo ke otu ikọt Jehovah. N̄kparawa owo ẹsikụt ke mme utọ ọdọ ndọ emi ẹmesobo ediwak n̄kpọ-ata ẹnyụn̄ ẹnyene edidiọn̄ oro ẹsitịn̄de ẹban̄a ke mme n̄wed Christian nnyịn. Edi n̄kpọ nsịnudọn̄ ndikụt iren ye iban oro ẹnyenede edu ebietde eke Caleb oro, okposụkedi ama ọkọsọn̄, ekeben̄ede utom emi akamade n̄kpọ-ata.—Joshua 14:10-12.

Kpebe Mbuọtidem Mmọ

Nte afo emekeme ndikpebe mbuọtidem ye edinam mme ọdọ ndọ oro ẹtịn̄de ẹban̄a ke ibuotikọ emi? Ti ete ke mmọ ẹma ẹnam akpanikọ edi usụn̄ uwem mmọ. Mmọ ẹma ẹn̄wam nditọ mmọ ẹnyene udọn̄ ndinam utom usiakusụn̄. Mmọ ẹkenam oro, nte Jan esịnde enye, “ebe ke ndidi uwụtn̄kpọ ke ndima Jehovah ye esop esie, ke ndinam ndutịm mban̄a eti ebuana ọtọkiet, ye ke ndikpep nditọ nte mmọ ẹkpesede ẹban̄a idemmọ.” Mmọ n̄ko ẹma ẹsinam utom ẹnyụn̄ ẹbre mbre ọtọkiet nte ubon. Pum eti ete: “Ke ini nduọkodudu, ekesidi ido ofụri ubon ndika ukwọrọikọ ke usenubọk nnyụn̄ nduọk odudu ọtọkiet ke uwemeyo.”

Ke adianade do, mme Christian emi ẹma ẹnam mbemiso ntịmidem, ndien ke ini mme idaha mmọ ẹkekpụhọrede, mmọ ẹma ẹben̄e idem ndida mbufa idaha oro nnam n̄kpọ nte ọfọnde. Mmọ ẹma ẹnịm mme utịtmbuba ẹnyụn̄ ẹnam mme ubiere oro akanamde mmọ ẹsọp ẹsịm mme utịtmbuba oro. Mmọ ẹma ẹyom usụn̄ ndinam utom idịbi udia oro mîdiaha ekese ini ẹma ẹnyụn̄ ẹnyịme ndida usụhọde okụkutom ndu uwem. (Philippi 1:10) Iban mmọ ẹma ẹnọ mme ebe mmọ ọyọhọ ibetedem. Ke ẹdianade kiet, mmọ ẹma ẹnyene ọkpọsọn̄ udọn̄ ndidụk ‘akamba usụn̄ oro ẹbererede ndinam akwa utom’ ndien, nte utịp, mmọ ẹdara akpakịp edidiọn̄ ẹtode Jehovah.—1 Corinth 16:9; Mme N̄ke 10:22.

Nte afo n̄ko emenyene udọn̄ nditat utom ukwọrọikọ fo? Ke edide ntre, ndida mme ukpụhọde idaha nnam n̄kpọ nte ọfọnde ekeme ndidi usụn̄ ndinam ntre.

[Ndise ke page 20]

Nte Pum ye Anny ẹsede ẹban̄a Ufọk Mbono

[Ndise ke page 20]

Nte Jan ye Woth ẹbuanade ke utom ukwọrọikọ

[Ndise ke page 21]

Nte Dries ye Jenny ẹnamde utom ke Bethel

[Ndise ke page 21]

Nte Otto ye Judy ẹtịmde idem ndika n̄kese esop efen