Akpatre Udia Mbubịteyo—Nso ke Enye Edi?

NSO idi Akpatre Udia Mbubịteyo, ndien nso ke enye ọwọrọ ọnọ mme owo oro ẹdude uwem mfịn? Mme n̄wed ofụri orụk ifiọk ye mme n̄wed ukabadeikọ ẹdidọhọ fi ke Akpatre Udia Mbubịteyo, oro ẹnyụn̄ ẹkotde Udia Mbubịteyo Ọbọn̄, edi udia oro Jesus Christ akadiade ye mme apostle esie ke mbubịteyo oro mbemiso n̄kpa uwa esie. Sia enye ekedide akpatre udia mbubịteyo oro Jesus akadiade ye mme anam-akpanikọ anditiene enye, oro anam ẹsikot enye Akpatre Udia Mbubịteyo. Ndien sia edide Ọbọn̄ Jesus Christ ke idemesie ọkọtọn̄ọ enye, enyịn̄ oro Udia Mbubịteyo Ọbọn̄ etịm odot.

Ke ediwak isua ikie emi ẹbede, ediwak owo ẹnyịme ndikpa nnọ se mmọ ẹdade nte akpan n̄kpọ. Ndusụk owo ẹma ẹbọ ufọn ẹto mme utọ n̄kpa oro ke ndusụk ini. Nte ededi, mme n̄kpa uwaidem oro ndomokiet, inamke n̄kpọ m̀mê mmọ ẹkewọrọ etop adan̄a didie, imende udomo ye n̄kpa Jesus Christ. Akan oro, idụhe n̄kpa ndomokiet ke mbụk ubonowo oro ọyọhọde ye afanikọn̄ mi, oro ekemede ndinyene akamba ufọn ntre. Ntak-a?

Man ẹbọrọ mbụme oro ẹnyụn̄ ẹn̄wam fi ndifiọk se Udia Mbubịteyo Ọbọn̄ ọwọrọde ọnọ fi, nnyịn imesịn udọn̄ inọ fi ndikot ibuotikọ oro etienede.