Mme Uyen Oro Ẹnamde Esịt Jehovah Adat

“Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.”—Mme N̄ke 27:11.

1, 2. (a) Nam an̄wan̄a m̀mê mme n̄kpọ ererimbot ndidọn̄ fi itọn̄ ọwọrọ ke afo udotke ndidi Christian. (Rome 7:21) (b) Nso ke afo ekpep oto uwụtn̄kpọ Asaph? (Se ekebe, page 13.)

 Ẹketịm mme ibuotikọ ukpepn̄kpọ emi akpan akpan ẹnọ mme uyen ke otu Mme Ntiense Jehovah. Ke ntre, nnyịn imesịn udọn̄ inọ mme uyen ndikpep ibuotikọ emi ye ntịn̄enyịn nnyụn̄ mbọrọ mbụme ifụre ifụre ke ini ẹnemede enye ke Ukpepn̄kpọ Enyọn̄-Ukpeme ke esop.

YAK idọhọ ke afo aka ndidep ọfọn̄. Nte osụk oyomde, afo ọsọsọp okụt ọfọn̄ oro eyede fi. Uduot ye nte ẹkịmde etie nte ẹkekam ẹkịm enye ẹnọ fi, ndien ekọmurua oro ẹdiande owụt ke enye emem urua. Edi ekem afo etịm ese enye. Ke ata n̄kpaidem, afo okụt ke mben ọfọn̄ emi ọtọn̄ọ nditaha, ye nte ke ituak esie idọnọke. Okposụkedi nte ẹkịmde ọfọn̄ emi eyede, enye idịghe eti ọfọn̄. Nte afo akpabiat okụk fo edep utọ idiọk ọfọn̄ emi?

² Men emi domo ye idaha oro afo ekemede ndisobo mfịn nte uyen Christian. Ke akpa editop enyịn nse, mme n̄kpọ ererimbot emi—ukem nte ọfọn̄ oro—ẹkeme nditie nte ẹnen̄ede ẹye. Ke uwụtn̄kpọ, mme nsan̄a ufọkn̄wed fo ẹkeme ndika mme usọrọ oro ẹduaide owo idem, ẹda n̄kpọsọn̄ ibọk, ẹn̄wọn̄ mmịn, ẹnam uwọrọ an̄wa nte ẹmade-ma, ẹnyụn̄ ẹnyene ebuana idan̄ mbemiso ndọ. Nte utọ usụn̄ uwem oro esidọn̄ fi itọn̄ ke ndusụk idaha? Nte afo emesiyom ndikam ntabi inua-okot ifụre mmọ nse? Ke edide ntre, kûsọsọp ubiere ke imọ idi idiọk owo ndien ke imọ ikam idotke ndidi Christian. Kamse, Bible enyịme ete ke ererimbot ekeme ndinen̄ede ndọn̄ owo itọn̄—idem akam ekeme ndidọn̄ owo oro oyomde ndidat Abasi esịt.—2 Timothy 4:10.

3. (a) Ntak emi edibịne mme n̄kpọ ererimbot mînyeneke ufọn? (b) Didie ke Christian kiet etịn̄ nte edibịne mme n̄kpọ ererimbot ananade ufọn?

³ Idahaemi mbọk tịm se, ukem nte ekpetịmde ese ọfọn̄ oro oyomde ndidep. Bụp idemfo, ‘Uduot ye ituak editịm n̄kpọ emi etie didie?’ Bible ọdọhọ ete ke “ererimbot ke ebebe efep.” (1 John 2:17) Inemesịt ekededi oro ẹnyenede ẹto enye ke mfọn n̄kaha edidi ke ekpri ini. N̄ko-n̄ko, edu uwem unana uten̄e Abasi enen̄ede enyene idiọk utịp. Ke akpanikọ, enye idịghe se owo ekpedepde. Christian kiet, oro ekenyenede ndiyọ se enye okotde “mme ubiak ẹsụn̄ọde ẹto edida ini uyen nnam n̄kpọ ke idiọk usụn̄,” ọdọhọ ete: “Ererimbot ekeme nditie nte enem onyụn̄ ekeme ndidọn̄ owo itọn̄. Ndien enye oyom fi enịm ke afo emekeme ndidara mme orụk usụn̄ unọ  idem inemesịt esie ye unana edida unan. Edi, emi ikam ikemeke nditịbe. Ererimbot ayada fi anam n̄kpọ nte enye amade, edi enye ama okụre ye afo, enye oyotop fi ọduọk.” * Ntak akpabiatde ini uyen fo ke utọ idiọk usụn̄ uwem oro?

Ndikpeme ke Ntak “Andidiọk”

4, 5. (a) Nso ke Jesus ekeben̄e ke akam oro enye ọkọbọn̄de ọnọ Jehovah esisịt ini mbemiso n̄kpa esie? (b) Ntak oro eben̄e emi okodotde?

⁴ Sia ẹfiọkde ẹte ke editịm n̄kpọ emi inyeneke eti n̄kpọ ndomokiet ndinọ, mme uyen ke otu Mme Ntiense Jehovah ẹsidomo ofụri ukeme ndifep ndinam ufan ye ererimbot emi. (James 4:4) Nte afo edi kiet ke otu mme anam-akpanikọ uyen emi? Ke edide ntre, afo omodot itoro. Edi akpanikọ, idịghe mmemmem n̄kpọ ndibiọn̄ọ mfịghe ubọkn̄ka nnyụn̄ n̄wọrọ nda san̄asan̄a, edi un̄wam odu.

⁵ Esisịt ini mbemiso n̄kpa esie, Jesus ama ọbọn̄ akam ete Jehovah ‘ekpeme’ mme mbet imọ “ke ntak andidiọk.” (John 17:15, NW) Jesus ama enyene eti ntak ndinam eben̄e emi. Enye ama ọdiọn̄ọ nte ke usụn̄ uwem nsọn̄ọnda ididịghe mmemmem inọ mme anditiene imọ, inamke n̄kpọ m̀mê mmọ ẹdi isua ifan̄ ke emana. Ntak-a? Nte Jesus okowụtde, ntak kiet edi nte ke mme mbet esie ẹkenyene ndisak iso nse okopodudu asua oro enyịn mîkwe—“andidiọk,” Satan kpa Devil. Bible ọdọhọ ete ke idiọk edibotn̄kpọ eke spirit emi “ke oyoyo nte lion eke okụnide, oyom se editade.”—1 Peter 5:8.

6. Nnyịn isan̄a didie ifiọk nte ke Satan isituaha n̄kparawa owo mbọm?

⁶ Ke ofụri mbụk, Satan okop idatesịt ndida ibak ibak afanikọn̄ ntiene mme owo. Kere ban̄a mme enyene-ndịk afanikọn̄ oro Satan akadade etiene Job ye ubon esie. (Job 1:13-19; 2:7) Eyedi afo emekeme nditi mbụk n̄kpọntịbe ke eyouwem fo emi ẹban̄ade afai afai edu Satan. Devil ke oyo, ndien nte enye oyomde se editade, enye ituaha mme uyen mbọm. Ke uwụtn̄kpọ, ke ntọn̄ọ ntọn̄ọ akpa isua ikie E.N., Herod ama odiomi ndiwot kpukpru nditọiren ke Bethlehem oro ẹkedide isua iba m̀mê ẹkpride ẹkan oro. (Matthew 2:16) Eyedi Satan okonụk Herod—kpukpru emi man ẹwot eyen emi ekenyenede ndikabade ndi Messiah emi Abasi ọkọn̄wọn̄ọde, edinyụn̄ adade ubiereikpe Abasi etiene Satan! (Genesis 3:15) Nte an̄wan̄ade, Satan imaha n̄kparawa owo. Akpan uduak esie edi ndisobo adan̄a ediwak owo nte enye ekekeme. Emi  enen̄ede edi ntre idahaemi, koro ẹma ẹsio Satan ke heaven ẹduọk ke isọn̄, ndien “enye asan̄a ye akwa ifụtesịt, sia enye ọdiọn̄ọde ete ini imọ edi ibio.”—Ediyarade 12:9, 12.

7. (a) Didie ke Jehovah edi ata isio isio ye Satan? (b) Didie ke Jehovah ese afo ndikop inem uwem?

⁷ Ke edide ata isio ye Satan, emi asan̄ade ye “akwa ifụtesịt,” Jehovah enyene “esịt mbọm.” (Luke 1:78) Enye edi ata uwụtn̄kpọ ima. Ke akpanikọ, Andibot nnyịn owụt utọ utịbe edu emi tutu Bible ekeme ndidọhọ ete: “Abasi edi ima.” (1 John 4:8) Nso ukpụhọde idu ntem ke ufọt abasi editịm n̄kpọ emi ye Abasi emi afo enyenede akwa ifet ndituak ibuot nnọ! Ke adan̄aemi Satan oyomde owo ndisobo, Jehovah “iyomke baba owo kiet atak.” (2 Peter 3:9) Enye ese uwem kpukpru owo ke ọsọn̄urua—esịnede okuo. Ke ini Jehovah adade Ikọ esie eteme fi ete okûdi ubak ererimbot, enye idomoke ndinam fi okûkop inem uwem m̀mê okûnyene ifụre. (John 15:19) Ke edide isio, enye ekpekpeme fi ke ntak andidiọk. Ete fo eke heaven oyom fi enyene n̄kpọ eke ọfọnde akan inemesịt ibio ini eke ererimbot emi. Enye oyom fi enyene “ata uwem”—kpa nsinsi uwem ke paradise isọn̄. (1 Timothy 6:17-19) Jehovah oyom fi okụt unen, ndien enye esịn udọn̄ ọnọ fi ndibịne utịtmbuba oro. (1 Timothy 2:4) N̄ko-n̄ko, Jehovah ọnọ fi san̄asan̄a ikot. Nso ikot edi emi?

“Dat Mi Esịt”

8, 9. (a) Nso enọ ke afo ekeme ndinọ Jehovah? (b) Didie ke Satan osụn̄i Jehovah, nte ẹwụtde ke idem Job?

⁸ Nte akanam afo emedep n̄kpọ ọnọ n̄kpet n̄kpet ufan fo ndien ekem ese nte ufan fo atuakde inua imam ke n̄kpaidem ye esịtekọm ke ọbọde enọ oro? Eyedi ama ada fi anyan ini ndikere utọ enọ emi edidotde ye owo oro. Idahaemi kere ban̄a mbụme emi: Nso utọ enọ ke afo ekeme ndinọ Andibot fo, kpa Jehovah Abasi? Ke akpa, ndikekere mban̄a emi ekeme nditie nte se mîwụtke ifiọk. Nso ke Ata Ọkpọsọn̄ oyom oto ikpîkpu owo? Nso ke afo ọkpọnọ enye oro enye mîkenyeneke-nyene? Bible ọnọ ibọrọ ke Mme N̄ke 27:11 ete: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.”

⁹ Otode ke ukpepn̄kpọ Bible fo, eyedi afo ọmọdiọn̄ọ ke edi Satan kpa Devil osụn̄i Jehovah. Enye ọdọhọ ete ke owo ekededi oro anamde n̄kpọ Abasi, anam ke ntak ibụk, idịghe ke ntak ima. Satan ọdọhọ ete ke edieke mmọ ẹsobode n̄kpọsọn̄ idaha, ke mmọ ẹyesọsọp ẹfehe ẹkpọn̄ utuakibuot akpanikọ. Ke uwụtn̄kpọ, kere ban̄a se Satan ọkọdọhọde Jehovah aban̄a edinen owo oro Job: “Nte afo usịnke ọkọ ukan enye, ye ufọk esie, ye kpukpru se enye enyenede, ukụk? Afo ọmọdiọn̄ se ubọk esie anamde, inyene esie omonyụn̄ ọtọt ke isọn̄? Edi kam nyan ubọk fo, tụk kpukpru se enye enyenede; enye iditreke ndikpọn̄ fi an̄wa-an̄wa.”—Job 1:10, 11.

10. (a) Nnyịn isan̄a didie ifiọk ke Satan ama edemede eneni aban̄a edinam akpanikọ mbon en̄wen ke ẹsiode Job ẹfep? (b) Didie ke afo etiene abuana ke eneni aban̄ade itie edikara?

¹⁰ Nte ẹwụtde ke uwetn̄kpọ Bible oro, Satan ama edemede eneni aban̄a edinam akpanikọ, idịghe eke Job kpọt edi eke kpukpru mbon oro ẹnamde n̄kpọ Abasi—esịnede fi. Ke akpanikọ, ke etịn̄de aban̄a ubonowo ke ofụri ofụri Satan ọkọdọhọ Jehovah ete: “Kpukpru se owo [idịghe Job kpọt edi owo ekededi] enyenede ke owo edinọ ke ibuot uwem esie.” (Job 2:4) Nte afo omokụt ke afo emetiene abuana ke akpan eneni emi? Nte ẹwụtde ke Mme N̄ke 27:11, Jehovah ọdọhọ ete ke odu n̄kpọ oro afo ekemede ndinọ imọ—kpa n̄kpọ ndida mbọrọ Satan, andisụn̄i imọ. Kam kere—Andikara Ekondo okot fi ete editiene ọbọrọ akakan eneni eke kpukpru emana. Nso akwa mbiomo ye ifet ke afo enyene ntem! Nte afo emekeme ndinam se Jehovah oyomde emi oto fi? Job ama anam. (Job 2:9, 10) Kpa ntre ke Jesus ọkọrọ ye anana-ibat mbon en̄wen ke ofụri mbụk, esịnede ediwak uyen, ẹkenam. (Philippi 2:8; Ediyarade 6:9) Afo n̄ko emekeme ndinam oro. Nte ededi, kûnam ndudue uban̄a emi, afo unyeneke ndida san̄asan̄a ke n̄kpọ emi. Ebede ke usụn̄ edinam fo, afo oyowụt  m̀mê imọ ida inọ Satan ke isụn̄i esie m̀mê ida inọ Jehovah ke ibọrọ esie. Anie ke afo edimek ndida nnọ?

Jehovah Ekere Aban̄a Fi!

11, 12. Nte enen̄ede ebehe Jehovah m̀mê afo ememek ndinam n̄kpọ esie m̀mê umekke? Nam an̄wan̄a.

¹¹ Nte se afo emekde enen̄ede ebehe Jehovah? Nte mbon oro ẹnamde akpanikọ iwakke ikem se enye adade ọnọ Satan ibọrọ? Edi akpanikọ, Satan ọkọdọhọ ete ke owo ndomokiet inamke n̄kpọ Jehovah ke ntak ima, kpa edori ikọ oro ẹma ẹkewowụt ke edi nsu. Edi, Jehovah oyom fi ada ke n̄kan̄ imọ ke eneni aban̄ade itie edikara koro enye ekere aban̄a fi nte owo. Jesus ọkọdọhọ ete: “Idịghe uduak Ete mbufo ke heaven ete kiet ke otu n̄kpri nditọwọn̄ emi akpatak.”—Matthew 18:14.

¹² Nte an̄wan̄ade, Jehovah enyene udọn̄ ke usụn̄ uwem emi afo emekde. Ke akande oro, edimek fo otụk enye. Bible anam an̄wan̄a ete ke nti m̀mê ndiọi edinam owo ẹsinen̄ede ẹtụk Jehovah. Ke uwụtn̄kpọ, ke ini nditọ Israel ẹkesọn̄de ibuot ndien ndien, emi ama ‘abiak’ Jehovah. (Psalm 78:40, 41, NW) Mbemiso Ukwọ eyo Noah, ke ini ‘idiọkn̄kpọ owo okokponde ke isọn̄, esịt ama ayat’ Jehovah. (Genesis 6:5, 6) Kere se emi ọwọrọde. Edieke afo emekde ukwan̄ usụn̄ uwem, afo emekeme ndinam Andibot fi okop ubiak. Emi iwọrọke ite ke Abasi edi mmemmem owo mîdịghe ke ntụk esikara enye. Utu ke oro, enye ama fi onyụn̄ ekere aban̄a mfọnọn̄kpọ fo. Ke n̄kan̄ eken, ke ini afo anamde se inende, Jehovah okop idatesịt. Enye ikopke idatesịt n̄kukụre koro enye enyene ibọrọ efen ndinọ Satan edi n̄ko koro enye idahaemi ekeme ndidi Andinọ fi utịp. Ndien emi edi se enye oyomde ndidi. (Mme Hebrew 11:6) Nso ima ima Ete ke Jehovah edi ntem ọnọ fi!

Uwak Edidiọn̄ Idahaemi

13. Didie ke ndinam n̄kpọ Jehovah ada mme edidiọn̄ edi idem idahaemi?

¹³ Mme edidiọn̄ emi ẹsụn̄ọde ẹto edinam n̄kpọ Jehovah idịghe se ẹdinyenede n̄kukụre ke ini iso. Idem idahaemi ediwak uyen ke otu Mme Ntiense Jehovah ẹkop idatesịt ye uyụhọ, ye eti ntak. Andiwet psalm ekewet ete: “Mme ewụhọ Jehovah ẹnen, ẹdat owo esịt.” (Psalm 19:8) Jehovah ọdiọn̄ọ se ifọnde ye nnyịn akan owo ekededi. Ebede ke prọfet Isaiah, Jehovah ọkọdọhọ ete: “Ami ndi Jehovah Abasi fo, emi n̄kpepde fi usụn̄ udori, nda fi usụn̄ eke afo edisan̄ade. Afo akpakam akpan̄ utọn̄ ke mbet mi! Ndien emem fo ekpebiet akpa mmọn̄, edinen  ido fo ekpebiet mbufụt inyan̄.”—Isaiah 48:17, 18.

14. Didie ke mme edumbet Bible ẹkeme ndin̄wam fi ndifep ubiak otode ukama isọn?

¹⁴ Ndidu uwem ke n̄kemuyo ye mme edumbet Bible ayan̄wam fi ndifep ekese ubiak ye iduọesịt. Ke uwụtn̄kpọ, Bible ọdọhọ ete ke mbon emi ẹyomde ndidi mbon inyene “ẹda ediwak mfụhọ ẹnọ idem mmọ unan.” (1 Timothy 6:9, 10) Nte ubọkn̄ka fo ekededi omosobo idiọk utịp ntem owụtde nte itie N̄wed Abasi emi edide akpanikọ? Ndusụk n̄kparawa owo ẹmeduọ ẹdụk akwa isọn n̄kukụre koro mmọ ẹyomde ndisịne mme ọwọrọetop mbufa ọfọn̄ ndinyụn̄ ndep mbufa ukwakutom ilektrik. Ndibiom mbiomo edikpe akwa udori anyan ini ke mme n̄kpọ oro afo mûnyeneke okụk ndidep edi usụn̄ edidu ke ufụn emi akamade ubiak!—Mme N̄ke 22:7.

15. Ke mme usụn̄ ewe ke mme edumbet Bible ẹkpeme fi ẹbiọn̄ọ mme ubiak ẹsisụn̄ọde ẹto oburobụt ido idan̄?

¹⁵ Kere n̄ko ban̄a oburobụt ido idan̄. Ke isua kiet kiet ke ofụri ererimbot, anana-ibat mme uyen oro mîdọhọ ndọ ẹsiyomo idịbi. Ndusụk ẹsiman nditọ emi mmọ mînyeneke udọn̄ m̀mê ukeme ndibọk. Mbon eken ẹsision̄o idịbi ndien nte utịp ẹsinyene ubieresịt oro obiomde ikpe. Ndien odu n̄kparawa owo emi ẹnyenede udọn̄ọ oro ẹmende ẹto idan̄, utọ nte AIDS. Nte ededi, ye owo emi ọdiọn̄ọde Jehovah, ndiọkn̄kan utịp edidi itie ebuana esie ye Jehovah ndibiara. * (Galatia 5:19-21) Ye eti ntak, Bible ọdọhọ ete: “Mbufo ẹfehe ẹbọhọ use.”—1 Corinth 6:18.

Ndinam N̄kpọ “Abasi Inemesịt”

16. (a) Nnyịn isan̄a didie ifiọk ke Jehovah oyom fi adara uyen fo? (b) Ntak emi Jehovah enịmde mme ndausụn̄ ọnọ fi nditiene?

¹⁶ Bible etịn̄ aban̄a Jehovah nte “Abasi inemesịt.” (1 Timothy 1:11, NW) Enye oyom fi okop inemesịt n̄ko. Ke akpanikọ, Ikọ esie ọdọhọ ete: “O akparawa, dara ke uyen fo; yak esịt fo onyụn̄ enem fi ke usen emi afo edide akparawa.” (Ecclesiastes 11:9) Edi Jehovah ese ebe idahaemi onyụn̄ ekeme ndikụt mme utịp anyan ini nti ye ndiọi edu uwem. Oro edi ntak enye ọnọde fi item ete: “Nyụn̄ ti Andibot fi ke ini afo edide akparawa, ke ini ukụt mîka-idịghe kan̄a, ke mme isua eke afo edidọhọde ete,  ‘N̄kwe inem ke esịt,’ mîka-isịmke fi.”—Ecclesiastes 12:1.

17, 18. Didie ke uyen Christian kiet eketịn̄ nte imọ ikopde inemesịt ndinam n̄kpọ Jehovah, ndien didie ke afo ekeme ndinyene ukem inemesịt oro?

¹⁷ Mfịn, ediwak uyen ẹnyene akwa inemesịt ke ndinam n̄kpọ Jehovah. Ke uwụtn̄kpọ, Lina emi edide isua 15 ọdọhọ ete: “Ami mmenyene uku ye ukpono idemowo. Mmokop nsọn̄idem koro mmen̄wọn̄ke sika mmennyụn̄ ndaha n̄kpọsọn̄ ibọk. Mmenyene eti ndausụn̄ emi ẹnọde ẹbe ke esop ndin̄wam mi ndin̄wana ye akama-ndịk mfịghe Satan. Mmesikop idatesịt ke ntak itie ebuana oro ọbọpde-bọp emi isinyenede ke Ufọkmbono Obio Ubọn̄. Ke ọfọnde akan kpukpru, mmenyene akakan idotenyịn nsinsi uwem ke isọn̄.”

¹⁸ Ukem nte Lina, ediwak uyen Christian ẹmen̄wana ọkpọsọn̄ en̄wan mbuọtidem, ndien emi ada idatesịt ọsọk mmọ. Mmọ ẹdiọn̄ọ ẹte ke uwem mmimọ—kpa ye oro akamade n̄kpọ-ata ke ndusụk idaha—enen̄ede enyene uduak ye eti ini iso. Ke ntre, ka iso ndinam n̄kpọ Abasi emi enen̄erede ekere aban̄a mfọnọn̄kpọ fo. Nam esịt esie adat, ndien enye ayanam fi okop idatesịt idahaemi ye ke nsinsi nsinsi!—Psalm 5:11.

[Mme Ikọ idakisọn̄]

Nte Afo Emeti?

• Nso n̄kpọndịk ke afo osobo oto Satan kpa “andidiọk”?

• Didie ke afo ekeme ndinam esịt Jehovah adat?

• Didie ke Bible owụt ke Jehovah ekere aban̄a fi?

• Nso idi ndusụk edidiọn̄ oro ẹsisụn̄ọde ẹto edinam n̄kpọ Jehovah?

[Mme Mbụme Ukpepn̄kpọ]

[Ekebe/Ndise ke page 13]

Ayak Esisịt Edinen Owo Akpatuak Ukot Ọduọ

Asaph ekedi ọwọrọiso Levite emi ekesibrede ikwọ ke temple Jehovah ke Israel eset. Enye ama akam etịm mme ikwọ oro ẹkesikwọde ke an̄wan̄wa utuakibuot. Nte ededi, kpa ye mme n̄wọrọnda ifetutom esie, ke esisịt ini Asaph ama okụt nte ndiọi edu mme ubọkn̄ka esie, emi ẹketiede nte ẹbiat mbet Abasi ye unana edibọ ufen, ẹdọn̄de imọ. Ke ukperedem, Asaph ama enyịme ete: “Osụk esisịt ukot ọkpọfiọnọde mi; osụk ata esisịt ikpat ekpefebede mi. Koro n̄kefịbede mbon iseri ufụp, n̄kụt ifụre mme idiọk owo.”—Psalm 73:2, 3.

Ke ukperedem, Asaph ama aka edisana ebiet Abasi ọkọbọn̄ akam aban̄a n̄kpọ emi. Ke ọtọn̄ọde ndise n̄kpọ ke usụn̄ eke spirit, enye ama edi edidiọn̄ọ ete ke Jehovah asasua idiọkn̄kpọ ye ke, nte ini akade, mme idiọkowo ye nti owo ẹyedọk se mmọ ẹtọde. (Psalm 73:17-20; Galatia 6:7, 8) Ke akpanikọ, mme idiọkowo ẹdu ke mfọfiọnọ ebiet. Ke akpatre, mmọ ẹyeduọn̄ọ ke ini Jehovah edisobode editịm n̄kpọ unana uten̄e Abasi emi.—Ediyarade 21:8.

[Mme ndise ke page 15]

Jehovah enen̄ede ekere aban̄a mfọnọn̄kpọ fo, ke adan̄aemi uduak Satan edide ndisobo fi

[Ndise ke page 16]

Ediwak uyen ẹmenyene akakan inemesịt ebe ke ndidiana ye ekemmọ mme Christian nnam n̄kpọ Jehovah