Mme Mbụme Ẹtode Mme Andikot

Ke Mme Hebrew 2:14 (NW), ntak emi ẹkotde Satan “enye emi ekemede ndida n̄kpa ndi”?

Ke nditịn̄ ibio ibio, ikọ Paul ọkọwọrọ nte ke Satan ke idemesie m̀mê isụn̄utom esie, ekeme ndinam mme owo ẹkpan̄a. Ke n̄kemuyo ye oro, Jesus okokot Satan “owot-owo toto ke editọn̄ọ.”—John 8:44.

Mfịna ekeme ndidemede mban̄a Mme Hebrew 2:14 ke ntak nte ndusụk edikabade ẹsịnde enye, ẹdọhọde nte ke Satan akama “odudu n̄kpa” m̀mê “odudu ndiwot owo.” (King James Version; New International Version; Jerusalem Bible) Mme utọ edikabade oro ẹkeme ndinam etie nte ke Satan enyene odudu oro mînyeneke adan̄a ndiwot owo ekededi oro enye emekde. Nte ededi, ana in̄wan̄-in̄wan̄ nte ke oro idịghe ntre. Edieke oro ekpedide ntre, enen̄ede etie nte ke enye ọkpọkọsọhi mme andituak ibuot nnọ Jehovah efep ke isọn̄ anyan ini ko.—Genesis 3:15.

Ikọ Greek oro ẹkabarede “odudu ndiwot owo” ke ndusụk edikabade ye “ekemede ndida n̄kpa ndi” ke New World Translation edi “kraʹtos tou tha·naʹtou.” Tou tha·naʹtou edi orụk ikọ oro ọwọrọde “n̄kpa.” Kraʹtos akpan akpan ọwọrọ “odudu ye ukeme.” Nte ekemde ye Theological Dictionary of the New Testament, enye ada aban̄a “odudu m̀mê ukeme oro ẹnyenede ndida nnam n̄kpọ utu ke ndida mban̄a nte ẹdade enye ẹnam n̄kpọ.” Ntem, ke Mme Hebrew 2:14, Paul idọhọke ke Satan enyene akakan odudu ndiwot owo. Utu ke oro, enye etịn̄ aban̄a ukeme Satan ndida n̄kpa ndi.

Didie ke Satan ada ukeme ‘ndida n̄kpa ndi’ anam n̄kpọ? Ke n̄wed Job, nnyịn imokot iban̄a idaha kiet oro ekemede ndidi isio ke ndusụk udomo. Mbụk oro ọdọhọ ke Satan akada oyobio ‘owot’ nditọ Job. Nte ededi, tịm fiọk ete ke Satan ekekeme ndinam emi n̄kukụre ebe ke unyịme Abasi, koro ẹkeyom ndibiere akpan eneni. (Job 1:12, 18, 19) Ke akpanikọ, Satan ke idemesie ikekemeke ndiwot Job. Owo ikọnọhọ enye odudu ndinam oro. (Job 2:6) Emi owụt nte ke okposụkedi ke ndusụk idaha, Satan esiwotde mbon oro ẹnamde akpanikọ, iyomke nnyịn ikop ndịk nte ke enye ekeme ndida uwem nnyịn ini ekededi oro enye oyomde.

Satan n̄ko esida mme owo ndiwot ekemmọ owo. Ntem, ediwak Christian ẹmekpan̄a ke ntak mbuọtidem mmọ, ndusụk mmọ ẹdide se mme adama-idat otu mbon ntịme ẹwotde, mîdịghe ikpọ owo ukara m̀mê mme oburobụt ebiereikpe ẹnọde uyo ẹte ẹwot mmọ ye unana ntak.—Ediyarade 2:13.

Ke adianade do, Satan ke ndusụk idaha esida n̄kpa edi ebe ke ndida mme mmeme owo nnam n̄kpọ. Ko ke edem ke eyo Israel, prọfet Balaam ama ọdọhọ mbon Moab ete ẹtap nditọ Israel man “ẹdue Jehovah.” (Numbers 31:16) Oro ama osụn̄ọ ke n̄kpan̄a nditọ Israel ẹwakde ẹbe 23,000. (Numbers 25:9; 1 Corinth 10:8) Mfịn, ndusụk owo n̄ko ẹyak idem ẹnọ “n̄kari” Satan, ẹnyụn̄ ẹtap mmọ ẹsịn ke oburobụt ido idan̄ m̀mê mme edinam unana uten̄e Abasi eken. (Ephesus 6:11) Edi akpanikọ, utọ mbon oro isiwakke nditaba uwem mmọ ke ndondo oro. Edi mmọ ẹdu ke itiendịk editaba nsinsi uwem, ndien ke ntre Satan ada n̄kpa ọsọk mmọ.

Idem okposụkedi nnyịn ifiọkde ukeme oro Satan enyenede ndinọ unan, iyomke nnyịn ikop ndịk iban̄a enye nte mîdotke. Ke ini Paul ọkọdọhọde ke Satan ekeme ndida n̄kpa ndi, enye n̄ko ama ọdọhọ ke Christ akakpa man ‘osobo Satan onyụn̄ emen ubọhọ ọnọ mmọ emi ẹma ẹkedu ke itie ufụn ke ofụri uwem mmọ ọnọ ndịk n̄kpa.’ (Mme Hebrew 2:14, 15) Ih, Jesus ama ekpe ufak ndien ke ntem osiode ubonowo oro ẹnịmde ke akpanikọ ke ufụn idiọkn̄kpọ ye n̄kpa.—2 Timothy 1:10.

Nte ededi, enyene ndịk ndikere nte ke Satan ekeme ndida n̄kpa ndi, edi nnyịn imenyene mbuọtidem nte ke Jehovah ekeme ndikọk unan ekededi oro Satan ye mme isụn̄utom esie ẹdide ntak. Jehovah ọsọn̄ọ ọnọ nnyịn ete ke Jesus oro ẹkenamde eset ‘ayabiat utom Satan.’ (1 John 3:8) Jehovah ọyọnọ Jesus odudu ndinam mme akpan̄kpa ẹset ndien ke ntem osobode n̄kpa ke idemesie. (John 5:28, 29) Nte ini akade, Jesus ke n̄wọrọnda usụn̄ oyowụt udomo odudu Satan ebe ke ndisịn enye ke editụn̄ọ ukpe. Ke akpatre, ẹyesobo Satan ke nsinsi.—Ediyarade 20:1-10.