Nte Afo Emenyene ‘Edu Edibet’?

“Nso orụk owo ke mbufo ẹkpedi ke edisana ido ye ke uten̄e Abasi? mbufo emi ẹtiede ẹbet ẹnyụn̄ ẹsọn̄ọde ẹyom edidi Usen Abasi.”—2 PETER 3:11, 12.

1, 2. Didie ke nnyịn ikpanam edinyene ‘edu edibet’ usen Jehovah an̄wan̄a?

 KERE nte ubon etiede ebet isenowo ndidi udia ke ufọk mmọ. Ini oro ẹkedọhọde mmọ ẹdi ke asan̄a ekpere usọp usọp. N̄wan ke esịn ukeme nditem udia n̄kụre. Ebe ye nditọ ke ẹn̄wam ndikụt ke ẹben̄e kpukpru n̄kpọ ẹnịm. Kpukpru owo ẹkop nduaidem. Ih, ofụri ubon oro ke ẹtie ye ọkpọsọn̄ udọn̄ ẹbet isenowo ndidi ndisịm ke ẹnyụn̄ ẹdọri enyịn ndidia inem inem udia nnyụn̄ nnyene ufiop ufiop ebuana ọtọkiet.

² Nte mme Christian, nnyịn itie ibet n̄kpọ oro akam edide akpan n̄kpọ akan. Nso idi oro? Kamse, kpukpru nnyịn itie ibet “Usen Abasi”! Tutu enye edi, oyom nnyịn itie nte prọfet Micah, emi ọkọdọhọde ete: “Nyetịn̄ enyịn ke Jehovah: nyebet Abasi emi anyan̄ade mi.” (Micah 7:7) Nte oro owụt editie ifu? Baba-o. Ekese utom ẹdu ndinam.

3. Nte 2 Peter 3:11, 12 ọdọhọde, nso edu ke mme Christian ẹkpenyene?

³ Apostle Peter an̄wam nnyịn ndinyene nnennen edu ke adan̄aemi itiede ibet. Enye ọdọhọ ete: “Nso orụk owo ke mbufo ẹkpedi ke edisana ido ye ke uten̄e Abasi? mbufo emi ẹtiede ẹbet ẹnyụn̄ ẹsọn̄ọde ẹyom edidi Usen Abasi.” (2 Peter 3:11, 12) Tịm fiọk ete ke Peter mi ikenyeneke eyịghe iban̄a orụk owo oro nnyịn ikpedide. Ke leta iba oro enye akadade odudu spirit Abasi ewet, enye ama etịn̄ orụk owo oro mme Christian ẹkpedide. Enye n̄ko ama eteme mmọ ete ẹka iso ẹnyene “edisana ido ye . . . uten̄e Abasi.” Okposụkedi n̄kpọ nte isua 30 ẹma ẹkebe tọn̄ọ nte Jesus Christ ọkọnọ idiọn̄ọ “akpatre ini eyo emi,” ikanaha mme Christian ẹtre ndidu ke ukpeme. (Matthew 24:3) Mmọ ẹkenyene ‘nditie mbet nnyụn̄ nsọn̄ọ nyom’ edidi usen Jehovah.

4. ‘Ndisọn̄ọ nyom edidi Usen Abasi’ abuana nso?

⁴ Ke ata ata usụn̄, ikọ Greek oro ẹkabarede ‘ndisọn̄ọ nyom’ mi ọwọrọ “ndinam ọsọp.” Nte ededi, nnyịn ke ata ata usụn̄ ikemeke ndinam usen Jehovah ‘ọsọp edi.’ Kamse, nnyịn ‘ifiọkke usen m̀mê hour’ oro Jesus Christ edidide edibiere ikpe ọnọ mme asua Ete esie. (Matthew 24:36; 25:13) N̄wed ndụn̄ọde kiet anam an̄wan̄a nte ke orụn̄ ikọedinam ikọ oro ẹkabarede “ndinam ọsọp” mi ọwọrọ “‘ndinam awara’ ndien ke ntem enyene  n̄kpet n̄kpet ebuana ye ‘ndinyene ifịk, ndinam utom, ndinen̄ede n̄kere mban̄a n̄kpọ.’” Ntre Peter ekesịn udọn̄ ọnọ ekemmọ mme andinịm ke akpanikọ ete ẹsịn ifịk ẹyom edidi usen Jehovah. Mmọ ẹkeme ndinam emi ke ndikere mban̄a enye kpukpru ini. (2 Peter 3:12) Sia “akwa usen Jehovah emi enyenede ndịk” enen̄erede asan̄a ekpere idahaemi, akpana nnyịn inyene ukem edu oro.—Joel 2:31.

Ẹtie Ẹbet ye “Edisana Ido”

5. Didie ke nnyịn ikeme ndiwụt ke nnyịn imesịn ifịk iyom ndikụt “Usen Abasi”?

⁵ Edieke nnyịn isịnde ifịk iyom ndibọhọ usen Jehovah, nnyịn iyowụt emi ebe ke ndinyene “edisana ido ye . . . uten̄e Abasi.” Ikọ oro “edisana ido” ekeme ndinam nnyịn iti item Peter emi: “Nte nditọ nsụk-ibuot, ẹkûkama aba idem ekekem ye mme idiọk udọn̄ eke mbufo ẹkenyenede, ke adan̄aemi ẹnanade ifiọk; edi kpa nte Andikot mbufo edide Edisana, mbufo nde ẹkabade ẹsana ke ofụri edu uwem mbufo; koro ẹwet ntem ẹte, Mbufo ẹdisana, koro Ami ndide edisana.”—1 Peter 1:14-16.

6. Man idi edisana, nso ke ana nnyịn inam?

⁶ Man idi edisana, ana nnyịn ika iso imụm edisana idaha eke ikpọkidem, ekikere, ido uwem, ye eke spirit ikama. Ndi nnyịn ke itịm idem iben̄e “Usen Abasi” ebe ke ndinịm idem nnyịn asana nte mbon oro ẹkerede enyịn̄ Jehovah? Idịghe mmemmem n̄kpọ mfịn ndisọn̄ọ nnyene utọ edisana idaha oro koro idaha ido uwem ererimbot ke aka iso ndisụhọde. (1 Corinth 7:31; 2 Timothy 3:13) Nte akamba ukpụhọde odu ke idaha ido uwem nnyịn ye eke ererimbot? Edieke mîdụhe, nnyịn imenyene ntak ndikere mban̄a emi. Ndi ekeme ndidi nte ke idaha ido uwem nnyịn, okposụkedi okon̄de akan eke ererimbot, ke osụhọde? Edieke edide ntre, oyom nnyịn inam n̄kpọ ye iwụk ndinen̄ede se ikwan̄ade man inem Abasi esịt.

7, 8. (a) Didie ke nnyịn ikeme ndikpu ndikụt ufọn edinyene “edisana ido”? (b) Ekeme ndiyom inam nso edinen̄ede?

⁷ Sia ẹma ẹketọn̄ọ ndiwụt mme ndise idan̄ ke Intanet ẹnyụn̄ ẹkemede ndise mmọ idem ke esịt ubet, ndusụk mbon oro mîkenyeneke ifet ini kiet ko ndikụt utọ oburobụt n̄kpọ oro ẹmekụt “mme ifet unam idan̄ oro mînyeneke adan̄a” idahaemi, ntre ke abiausọbọ kiet ọdọhọ. Edieke nnyịn ikpodụn̄ọrede mme utọ ndedehe ikpehe Intanet oro, nnyịn ke akpanikọ ikpofụmi item Bible oro ọdọhọde ete ‘ikûtụk n̄kpọ ndek.’ (Isaiah 52:11) Nte nnyịn ikpenen̄ede ‘iyom edidi Usen Abasi’? Mîdịghe nte nnyịn ke ekikere nnyịn ikpakam isesịk usen oro inịm, ikerede ite ke ọkpọkọm idada mme ndek ndek n̄kpọ isabade ekikere nnyịn, ke nnyịn isụk inyenyene ini ndinam idem nnyịn asana? Edieke nnyịn inyenede mfịna ke afan̄ emi, nnyịn ikpenyene ndisọsọp n̄kpe Jehovah ubọk ite ‘akabade nnyịn enyịn man ikûkụt obukpo n̄kpọ; onyụn̄ ada usụn̄ esie enịm nnyịn uwem’!—Psalm 119:37.

⁸ N̄wakn̄kan ke otu Mme Ntiense Jehovah, n̄kpri ye ikpọ, ke ẹsọn̄ọ ẹmụm n̄kokon̄ idaha ido uwem Abasi ẹkama ẹnyụn̄ ẹfep mme oburobụt n̄kpọ etabi ererimbot emi. Ke ẹfiọkde nte ini nnyịn edide usọp usọp ẹnyụn̄ ẹfiọkde ẹban̄a item Peter oro nte ke “Usen Ọbọn̄ edibuat nte inọ,” mmọ ẹka iso ndinyene “edisana ido.” (2 Peter 3:10) Mme edinam mmọ ẹwụt ke mmọ ke ‘ẹtie ẹbet ẹnyụn̄ ẹsọn̄ọ ẹyom edidi Usen Abasi.’ *

 Ẹtie Ẹbet ye “Uten̄e Abasi”

9. Nso ke uten̄e Abasi okponụk nnyịn ndinam?

⁹ “Uten̄e Abasi” n̄ko edi akpan n̄kpọ edieke anade nnyịn isọn̄ọ iyom usen Jehovah. “Uten̄e Abasi” esịne mbak Abasi oro onụkde nnyịn ndinam se inende ke enyịn esie. Edisọn̄ọ nyịre ye Jehovah edi se inụkde owo ndinyene utọ uten̄e Abasi oro. Edi uduak esie nte “kpukpru owo ẹnyene edinyan̄a, ẹnyụn̄ ẹsịm ifiọk akpanikọ.” (1 Timothy 2:4) Abasi “iyomke baba owo kiet atak, edi oyom kpukpru owo ẹtua n̄kpọfiọk ẹkabade esịt.” (2 Peter 3:9) Ntre, ndien, nte uten̄e oro nnyịn iten̄ede Abasi ikponụkke nnyịn ndisịn ọkpọsọn̄ ukeme ndin̄wam mme owo ẹkpep ẹban̄a Jehovah ẹnyụn̄ ẹkpebe enye?—Ephesus 5:1.

10. Ntak emi nnyịn ikpekpemede ibiọn̄ọ “abian̄a inyene”?

¹⁰ Uwem nnyịn ediyọhọ ye edinam uten̄e Abasi edieke ibemde iso iyom Obio Ubọn̄ Abasi. (Matthew 6:33) Emi abuana nnyịn ndinyene ekikere oro adade ukem ukem mban̄a mme n̄kpọ obụkidem. Jesus ama odụri owo utọn̄ ete: “Ẹtịm ẹkpeme idem mbufo ke kpukpru orụk edisịn esịt ke n̄kpọ owo: koro owo enyene se enyenyene, uwem esie isịneke enye ke ubọk.” (Luke 12:15) Okposụkedi ekemede ndidi ọkpọsọn̄ n̄kpọ ndikere ke ima okụk ekeme ndikịm nnyịn enyịn, ọkpọfọn nnyịn ndifiọk nte ke ‘ekikere n̄kpọ eyo emi ye abian̄a inyene’ ẹkeme ‘ndibaba ikọ’ Abasi. (Matthew 13:22) Ekeme ndisọn̄ ndinyene mme n̄kpọ udu uwem. Ntre, ke ndusụk ikpehe ererimbot, ediwak owo ẹkere ke man idu inem uwem, mmimọ inyene ndiwọrọ n̄ka idụt oro oforode akan, ikpọn̄de ubon mmimọ ke ndusụk isua. Ndusụk ikọt Abasi ẹsikam ẹkere n̄kpọ ke usụn̄ emi. Ke ndiwọrọ n̄ka idụt en̄wen, mmọ ẹkeme ndinọ mme ubon mmọ mme n̄kpọ udu uwem eyomfịn oro ẹnamde uwem enem. Nte ededi, nso ikeme nditịbe nnọ idaha eke spirit mbonima mmọ oro mmọ ẹkpọn̄de ke ufọk? Ke owo oro akamade itieibuot ke ufọk nte ọfọnde mîdụhe, nte mmọ ẹyenyene idaha eke spirit oro ẹyomde man ẹbọhọ usen Jehovah?

11. Didie ke eren kiet oro ọkọwọrọde idụn̄ man okoyom utom okowụt ke uten̄e Abasi enen̄ede edi akpan n̄kpọ akan inyene?

¹¹ Eren Philippines oro ọkọwọrọde idụn̄ man okoyom utom ama ekpep Bible ye Mme Ntiense Jehovah ke Japan. Ke ekpepde aban̄a mbiomo oro N̄wed Abasi ọnọde ibuotufọk, enye ama edi edifiọk ke oyom in̄wam ubon imọ ẹkabade ẹdi mme andituak ibuot nnọ Jehovah. (1 Corinth 11:3) N̄wan esie ke idụn̄ ama enen̄ede ọbiọn̄ọ obufa ido ukpono esie okonyụn̄ oyom enye odu do onyụn̄ esinọ okụk edi utu ke ndinyọn̄ ndi ufọk ndikpep ubon esie mme edinịm ke akpanikọ esie oro ẹkọn̄ọde ke Bible. Nte ededi, ekikere kaban̄a nte ini edide usọp usọp ye edikere mban̄a mbonima esie ẹma ẹnụk enye ndinyọn̄ n̄ka ufọk. Enye ndida ime ye ima nnam n̄kpọ ye mbonubon esie ama enyene utịp. Nte ini akakade, ubon esie ama adiana kiet ke utuakibuot akpanikọ, ndien n̄wan esie ama odụk utom ukwọrọikọ uyọhọ ini.

12. Ntak emi nnyịn ikpenịmde mme n̄kpọ eke spirit akpa ke uwem?

¹² Ẹkeme ndimen idaha nnyịn ndomo ye  eke mbon oro ẹdude ke ufọk oro ikan̄ atade. Nte okpowụt ifiọk ndifehe idat idat n̄kanade man ẹsion̄o inyene obụkidem ke utọ ufọk oro ikan̄ atade do emi onyụn̄ ekperede ndiwụre? Utu ke oro, nte ata akpan n̄kpọ ikpedịghe ndinyan̄a uwem—eke nnyịn, eke ubon nnyịn, ye eke mbon en̄wen oro ẹdụn̄ọde ke ufọk oro? Ọfọn, idiọk editịm n̄kpọ emi ke asan̄a usọp usọp ekpere nsobo esie, ndien uwem ẹdu ke itiendịk. Sia ifiọkde emi, ke akpanikọ nnyịn ikpenyene ndinịm mme n̄kpọ eke spirit akpa inyụn̄ isịn esịt inam utom unyan̄a uwem eke edikwọrọ Obio Ubọn̄ ifịk ifịk.—1 Timothy 4:16.

Oyom ‘Inana Ntọi’

13. Nso idaha ke nnyịn ikpoyom ndidu ke ini usen Jehovah edide edisịm?

¹³ Ke ọsọn̄ọde etịn̄ ufọn edinyene edu edibet, Peter ọdọhọ ete: “Ndima, sia mbufo ẹtiede ẹbet mme n̄kpọ emi, ẹnyene ifịk ndien, man [Abasi] ekpesịm mbufo nte ẹtiede ke emem, ẹnana ntọi, ẹnyụn̄ ẹnana ndo ke enyịn Esie.” (2 Peter 3:14) Ke adianade ye item oro enye ọkọnọde ete inyene edisana ido ye uten̄e Abasi, Peter ọsọn̄ọ etịn̄ ufọn edidi se Jehovah okụtde nte mme owo oro ọsọn̄urua iyịp Jesus eyetde ẹsana. (Ediyarade 7:9, 14) Emi oyom owo enyene mbuọtidem ke uwa Jesus onyụn̄ akabade edi asan̄autom Jehovah oro ayakde idem ọnọ onyụn̄ anade baptism.

14. Nso ke ‘ndinana ntọi’ abuana?

¹⁴ Peter eteme nnyịn ete inyene ifịk man enye ekpesịm nnyịn nte ‘inanade ntọi.’ Nte imekpeme ọfọn̄idem Christian nnyịn oro edide ido m̀mê edu uwem nnyịn man anana ntọi, ererimbot okûnyụn̄ eyet mbat? Ke ini nnyịn ikụtde mbat ke ọfọn̄ nnyịn, nnyịn imesidomo ndisio mbat emi usọp usọp. Edieke edide ọfọn̄ oro nnyịn inen̄erede ima, nnyịn imesitịn̄ enyịn iyet enye. Nte nnyịn imesinam ukem oro edieke ndusụk mmeme m̀mê edu uwem nnyịn esịnde mbat ke ndamban̄a ọfọn̄idem Christian nnyịn?

15. (a) Ntak emi nditọ Israel ẹkenyenede ndinam nyeriye ndian ke mben ọfọn̄idem mmọ? (b) Ntak emi mme asan̄autom Jehovah eke eyomfịn ẹdide isio?

¹⁵ Nditọ Israel ẹkenyene ndinam ‘nyeriye ndian ke mben ọfọn̄-idem mmọ’ nnyụn̄ ndian “awawa erebin ke nyeriye mben oro.” Ntak-a? Man mmọ ẹti mbet Jehovah, ẹnam mmọ, ẹnyụn̄ “ẹdi edisana” ẹnọ Abasi mmọ. (Numbers 15:38-40) Nte mme asan̄autom Jehovah eke eyomfịn, nnyịn idi isio ye ererimbot koro nnyịn inịmde ibet ye mme edumbet Abasi. Ke uwụtn̄kpọ, nnyịn imọsọn̄ọ inyene edisana ido uwem, imada iyịp nte edisana n̄kpọ, imonyụn̄ isịn kpukpru orụk ukpono ndem. (Utom 15:28, 29) Ediwak owo ẹsikpono nnyịn ke nnyịn ndisọn̄ọ mbiere nditre ndisabade idem nnyịn.—James 1:27.

Oyom ‘Inana Ndo’

16. Nnyịn ‘ndinana ndo’ abuana nso?

¹⁶ Peter ọdọhọ n̄ko ete ke ẹkpenyene ndikụt nnyịn nte ‘inanade ndo.’ Didie ke ikeme ndinam oro? Ẹkeme ndiyet ntọi mfep edi owo ikemeke ndiyet ndo. Ndo owụt ke n̄kpọ enyene unan. Apostle Paul ama ọnọ ekemmọ mme Christian ke Philippi item ete: “Ke edinam kpukpru n̄kpọ ẹtre nsụkuyo ye eneni; man mbufo ẹkûnyene ubiom-ikpe, ẹkûnyụn̄ ẹnyene ndudue, edi ẹdi nditọ Abasi eke ẹnanade ndo ke ufọt n̄kakwan̄a ye idiọk emana; emi mbufo ke ẹyayama ke otu mmọ nte  ntantafiọn̄ ke ererimbot.” (Philippi 2:13-16) Edieke nnyịn inamde item emi, nnyịn iyefep nsụkuyo ye eneni iyonyụn̄ inam n̄kpọ Abasi ye eti uduakesịt. Ima oro imade Jehovah ye mbọhọidụn̄ nnyịn oyonụk nnyịn nte nnyịn ikwọrọde “gospel Ubọn̄ Abasi emi.” (Matthew 22:35-40; 24:14) Akan oro, nnyịn iyaka iso nditan̄a eti mbụk idem okposụkedi ekemede ndidi mme owo ke ofụri ofụri ifiọkke ntak oro nnyịn inyịmede ndida ini ye odudu nnyịn n̄n̄wam mme owo ẹkpep ẹban̄a Abasi ye Ikọ esie, kpa Bible.

17. Nso ikpedi uduak nnyịn ke ini inyanarede ibịne mme ifetutom ke esop Christian?

¹⁷ Sia iyomde ẹkụt nnyịn nte ‘inanade ndo,’ nnyịn iyanam ọfọn ndidụn̄ọde uduakesịt nnyịn ke kpukpru se inamde. Nnyịn imọkpọn̄ ibụk ibụk usụn̄ unam n̄kpọ ererimbot, utọ nte edibịne inyene m̀mê odudu. Edieke edide nnyịn ke inyanade ibịne mme ifetutom ke esop Christian, uduakesịt nnyịn akpakam edi eti ndien ima oro imade Jehovah ye mbon en̄wen akpakam edi se inụkde nnyịn kpukpru ini. Ọnọ nsịnudọn̄ ndikụt nte iren eke spirit oro ‘ẹyomde ndida idaha ufọk Abasi’ ẹnamde ntre ye idatesịt ẹnyụn̄ ẹnyenede udọn̄ ndisụhọde idem nsan̄a utom nnọ Jehovah ye ekemmọ mme andinịm ke akpanikọ. (1 Timothy 3:1; 2 Corinth 1:24) Ke akpanikọ, mbon oro ẹdotde ndinam utom nte mbiowo ‘ẹkpeme udịm-erọn̄ Abasi ke ima esịt, inamke emi iban̄a mbukpo udori, edi ẹnam ke edinyịme esịt; inyụn̄ ibreke odudu ye mmọ emi ẹkeyakde ẹsịn mmọ ke ubọk, edi ẹnịm idem nte uwụt-n̄kpọ ẹnọ mme erọn̄.’—1 Peter 5:1-4.

Oyom ‘Itie ke Emem’

18. Mme edu ewe ke ẹnen̄ede ẹda ẹdiọn̄ọ Mme Ntiense Jehovah?

¹⁸ Ke akpatre, Peter asian nnyịn ete yak ẹkụt nnyịn nte ‘itiede ke emem.’ Man idu uwem ekekem ye se ẹyomde emi, oyom itie ke emem ye Jehovah ye mbọhọidụn̄ nnyịn. Peter ọsọn̄ọ etịn̄ ufọn edinyene ‘ufiop-ufiop ima ke otu idem nnyịn’ ye ufọn editie ke emem ye ekemmọ mme Christian. (1 Peter 2:17; 3:10, 11; 4:8; 2 Peter 1:5-7) Man ika iso itie ke emem, ana nnyịn inyene ima ke otu idem nnyịn. (John 13:34, 35; Ephesus 4:1, 2) Ẹsikụt ima ye emem nnyịn akpan akpan ke ini inịmde ikpọ mbono ofụri ererimbot. Ke akamba mbono kiet ke Costa Rica ke 1999, anyam n̄kpọurua kiet ke an̄wambehe ubomofụm ama ayat esịt koro Mme Ntiense n̄kann̄kụk oro ke unana edidiọn̄ọ ẹkekwide itie mbubehe esie ke adan̄aemi ẹdarade mme andidụk mbono oro ẹkedide ẹdibehe. Nte ededi, ke ọyọhọ usen iba enye ama okụt ima ye emem oro mme andidụk mbono oro ẹkedarade mi ẹkewụtde, okposụkedi emi Mme Ntiense n̄kann̄kụk oro mîkọfiọkke mmọ. Ke akpatre usen, anyam n̄kpọurua oro ama etiene adara mmọ onyụn̄ eben̄e ukpepn̄kpọ Bible.

19. Ntak emi edide akpan n̄kpọ ndiyom emem ye ekemmọ mme andinịm ke akpanikọ?

 ¹⁹ Nnyịn ndiyom emem ye nditọete nnyịn eke spirit ke ofụri esịt ekeme ndiwụt udomo oro nnyịn itiede ibet usen Jehovah ye obufa ererimbot oro enye ọn̄wọn̄ọde. (Psalm 37:11; 2 Peter 3:13) Yak idọhọ ke ọsọn̄ nnyịn nditie ke emem ye ekemmọ andinịm ke akpanikọ. Nte nnyịn imekeme ndikụt idem nnyịn nte idụn̄de ke emem ye enye ke Paradise? Edieke eyenete enyenede utọk ye nnyịn, nnyịn ikpenyene ndisọsọp ‘nnam emem ye enye.’ (Matthew 5:23, 24) Edi akpan n̄kpọ ndinam oro edieke nnyịn iyomde nditie ke emem ye Jehovah.—Psalm 35:27; 1 John 4:20.

20. Ke mme usụn̄ ewe ke nnyịn ikpowụt ‘edu edibet’?

²⁰ Nte nnyịn ke idem nnyịn ke ‘itie ibet inyụn̄ isọn̄ọ iyom edidi Usen Abasi’? Nnyịn iwụt ke enen̄ede ọdọn̄ nnyịn ndikụt utịt idiọkido ebe ke ndika iso nsana ke oburobụt ererimbot emi. Akan oro, nnyịn iwụt ke imenen̄ede iyom edidi usen Jehovah ye uwem ke idak ukara Obio Ubọn̄ ebe ke ndinyene uten̄e Abasi. Ndien nnyịn iwụt idotenyịn nnyịn ndidu uwem ke emem emem obufa ererimbot ke ndiyom emem ye ekemmọ mme andituak ibuot idahaemi. Ke utọ usụn̄ oro, nnyịn iwụt ke imenyene ‘edu edibet’ imonyụn̄ ‘isọn̄ọ iyom edidi Usen Abasi.’

[Ikọ idakisọn̄]

Nte Afo Emeti?

• ‘Ndisọn̄ọ nyom edidi Usen Abasi’ ọwọrọ nso?

• Didie ke edu uwem nnyịn owụt ke imenyene ‘edu edibet’?

• Ntak emi “uten̄e Abasi” edide akpan n̄kpọ?

• Nso ke ana nnyịn inam man Jehovah okụt nnyịn nte ‘itiede ke emem, inana ntọi, inyụn̄ inana ndo’?

[Mme Mbụme Ukpepn̄kpọ]

[Ndise ke page 11]

Ẹwụt ‘edu edibet’ ke ndinyene edisana ido

[Mme ndise ke page 12]

Utom ukwọrọikọ Obio Ubọn̄ edi utom unyan̄a uwem

[Ndise ke page 14]

Nte nnyịn itiede ibet usen Jehovah, ẹyak nnyịn iyom emem ye ekemmọ owo