“Ẹkûbọp Idem Utịn̄e-Utịn̄e”

NTE afo ekemede ndikụt ke ndise emi, camel ye ayara enan̄ oro ẹsụk ẹfụn̄de isọn̄ mi ikopke idem inem. Ọkpọnọ oro ọbọpde mmọ adian kiet—oro ẹkenamde ẹnọ unam iba oro ẹdade ukem ukem ẹnyụn̄ ẹnyenede ukem odudu—ọnọnọ unam iba emi ufen. Ke ekerede aban̄a mme utọ unam emi, Abasi ama ọdọhọ nditọ Israel ete: “Kûbọp enan̄ ye ass ọtọ kiet ufụn̄ isọn̄.” (Deuteronomy 22:10) Ukem edumbet emi abuana edibọp ayara enan̄ ye camel ndian kiet.

Nte ido edide, ọtọin̄wan̄ isiyakke ufene esie ọbọ utọ ufen oro. Edi edieke enye mînyeneke nyara enan̄ iba, enye ekeme ndida ufene iba oro enye enyenede adian kiet ofụn̄ isọn̄. Nte an̄wan̄ade, se ọtọin̄wan̄ eke ọyọhọ isua ikie 19 oro okụtde ke ndise emi ekebierede ndinam edi oro. Sia mme ufene emi mîdaha ukem ukem, mînyụn̄ idobike ukem ukem, unam oro mîtịmke ikop odudu enyene ndisịn ọkpọsọn̄ ukeme man asan̄a ikpat kiet ye enye oro etịmde okop odudu, ndien utom eyenen̄ede akak enye oro etịmde okop odudu.

Apostle Paul akada uwụtn̄kpọ utịn̄e utịn̄e mbọbọ ndinọ nnyịn ata akpan ukpepn̄kpọ. Enye ekewet ete: “Ẹkûbọp idem utịn̄e-utịn̄e ye mmọ eke mînịmke ke akpanikọ. Nso udeme ke edinen ido enyene ye ukwan̄ido? Nso ebuana ke un̄wana enyene ye ekịm?” (2 Corinth 6:14, 15) Didie ke Christian ekeme ndibọp idem utịn̄e utịn̄e ye owo?

Usụn̄ kiet edidi edieke Christian emekde ndidọ owo oro mînịmke se enye enịmde ke akpanikọ. Utọ mbọbọ oro idiyakke mmọ mbiba ẹkop inem uwem, mmọ ẹyesineni eneni ke mme akpan n̄kpọ.

Ke ini Jehovah ọkọtọn̄ọde ndọ, utom oro enye ọkọnọde n̄wanndọ ekedi ndidi andinyan̄a oro ‘ekemde’ ye erenowo. (Genesis 2:18) Kpasụk ntre, ebede ke prọfet Malachi, Abasi ama etịn̄ aban̄a n̄wanndọ nte “nsan̄a.” (Malachi 2:14) Andibot nnyịn oyom mme ọdọ ndọ ẹdiana kiet ke n̄kan̄ eke spirit, ẹbiom mbiomo ọtọkiet ẹnyụn̄ ẹdia ufọn ndọ ukem ukem.

Ke ndidọ “owo Abasi ikpọn̄-ikpọn̄,” Christian owụt ukpono ọnọ item Ete nnyịn eke heaven. (1 Corinth 7:39) Emi esịn itiat idakisọn̄ ọnọ ndọ oro adianade kiet, emi ekemede ndida itoro ye ukpono nsọk Abasi, nte mme ọdọ ndọ ẹnamde n̄kpọ ẹnọ enye nte mme “ata nsan̄a-utom” ke san̄asan̄a usụn̄.—Philippi 4: 3.

[Ebiet Ẹdade Ndise Ẹto ke page 32]

Camel ye ayara enan̄: Ẹda ẹto n̄wed oro La Tierra Santa, Eboho 1, 1830