Didie ke Afo Ekeme Ndinam Nti Ubiere?

“ENYENE-IBUOT owo oyokop, onyụn̄ ọkọrọ ke se ẹkpepde,” ntre ke Solomon, edidem Israel eset ọkọdọhọ. Ndusụk ini, ata ediwak nnyịn imesinam mme ubiere oro mîwụtke eti ibuot n̄kukụre koro ikesịnde ndikpan̄ utọn̄ ke item mbon en̄wen.—Mme N̄ke 1:5.

Ke ukperedem, ẹma ẹwet mme ikọ Solomon oro, ọkọrọ ye “tọsịn n̄ke ita” efen ẹdọn̄ ke Bible. (1 Ndidem 4:32) Nte nnyịn imekeme ndibọ ufọn ke ndifiọk nnyụn̄ nnam mme ikọ ọniọn̄ esie? Ih. Mmọ ẹkeme ndin̄wam nnyịn ‘ibụre eti ibuot ye item; itịm ifiọk ikọ asian; inyụn̄ ida item mbufiọk, eti ido, ye ikpe, ye se inende’ inam n̄kpọ. (Mme N̄ke 1:2, 3) Ẹyak nnyịn ineme edumbet ition oro ẹkọn̄ọde ke Bible oro ẹkemede ndin̄wam nnyịn inam nti ubiere.

Kere Ban̄a Utịp Anyan Ini

Ndusụk ubiere ẹsikama ikpọ utịp. Ke ntre, domo ndida n̄kụt se mme utịp emi ẹdidide. Kûyak mme ufọn ibio ini ẹkịm fi enyịn tutu edi se afo mûkwe ndiọi utịp anyan ini oro ubiere emi ekemede ndida ndi. Mme N̄ke 22:3 eteme ete: “Ọniọn̄ owo okụt idiọk-n̄kpọ, ndien edịbe: edi mme ọkọi ẹbe ẹka iso, ndien ẹda ufen.”

Ọkpọfọn ndiwewet se mme utịp ibio ini ye utịp anyan ini emi ẹdidide. Se ikemede ndidi utịp ibio ini ke ndimek ndinam orụk utom kiet ekeme ndidi ndibọ eti okụk ọfiọn̄ nnyụn̄ n̄kop inem utom oro. Edi, nte ekeme ndidi utịp anyan ini esie eyesịne edinyene utom oro mîkamake eti ini iso? Ndi ubiere emi nte ini akade ekeme ndiyom fi ọwọrọ aka ebiet efen, ndusụk ọwọrọde ọkpọn̄ mme ufan m̀mê ubon? Nte emi ekeme ndinam fi okodụn̄ ke idiọk n̄kann̄kụk m̀mê ndinen̄ede nnana inem tutu uwem odorode fi? Kere ban̄a nti ye ndiọi utịp esie, nyụn̄ biere se idide akpan n̄kpọ ikan.

Nọ Idemfo Ini Oro Ekemde

Ubiere oro ẹnamde ke ibụmede ẹkeme mmemmem mmemmem ndikabade ndi ubiere oro mîwụtke eti ibuot. Mme N̄ke 21:5 ọdọhọ ete: “Ekikere mme ọsọp-ubọk ẹkọ uwak ikpọn̄-ikpọn̄: edi kpukpru owo ibụmede ẹkọ unana ikpọn̄-ikpọn̄.” Ke uwụtn̄kpọ, mme uyen oro ẹduọde ẹdụk nnan nnan ima ẹkpenyene ndida ini nnam ndụn̄ọde mbemiso ẹbierede ndidọ ndọ. Mîdịghe ntre, mmọ ẹkeme ndikụt akpanikọ oro esịnede ke se William Congreve, ewetmbre owo England eke ntọn̄ọ ntọn̄ọ ọyọhọ isua ikie 18 ọkọdọhọde, ete: “Edieke ibụmerede idụk ndọ, nnyịn imekeme nditua n̄kpọfiọk ke ima ikosụhọde itie.”

Nte ededi, ndinọ idem ini oro ekemde iwọrọke ndinam ubịghi. Enen̄ede owụt eti ibuot ndinam ndusụk ubiere usọp usọp nte ẹkekeme. Ndibiat ini nte mîdotke ekeme ndinam  akamba n̄kpọ atak nnyịn m̀mê mbon en̄wen. Ndisịk ubiere nnịm ekeme ndidi ubiere ke idemesie—enye oro mîkam iwụtke eti ibuot.

Nyịme Ndibọ Item

Sia idaha iba mîkemeke ndidi ata ukem, ekeme ndidi owo iba idiwakke ndibiere n̄kpọ ukem ukem ke ini mmọ ẹsobode ukem mfịna. Kpa ye oro, ọfọn ndikop nte mbon en̄wen ẹkenamde ubiere ke mme n̄kpọ oro ẹbietde eke nnyịn. Bụp nte mmọ idahaemi ẹsede ubiere oro mmọ ẹkenamde mi. Ke uwụtn̄kpọ, edieke oyomde ndimek mbubehe oro akpanamde, dọhọ mbon oro ẹma ẹkenanam mbubehe emi ẹtịn̄ ufọn ye idiọk oro mbubehe emi akamade ẹnọ fi. Nso idi mme ufọn oro mmọ ẹnyenede ẹto ndikemek ndinam mbubehe emi, ndien nso idi mme mfịna m̀mê mme n̄kpọndịk oro emi ekemede ndikama?

Ẹteme nnyịn ẹte: “Unana item esịn uduak okpu: edi ke mbon item ẹwakde, mmọ ẹsọn̄ọ ẹda.” (Mme N̄ke 15:22) Nte ededi, ke ini iyomde item inyụn̄ ikpepde n̄kpọ ito se iketịbede inọ mbon en̄wen, oyom nnyịn itịm idiọn̄ọ ke edi nnyịn inyene ndinam akpatre ubiere nnyụn̄ nyọ sededi oro ubiere emi edidade edi.—Galatia 6:4, 5.

Tiene Ubieresịt Oro Ẹtịmde Ẹnọ Ukpep

Ubieresịt ekeme ndin̄wam nnyịn ndinam ubiere ke n̄kemuyo ye mme akpan edumbet oro nnyịn imekde ndida ndu uwem. Emi ọwọrọ ke Christian enyene ndinọ ubieresịt esie ukpep man ubiere esie asan̄a ekekem ye ekikere Abasi. (Rome 2:14, 15) Ikọ Abasi asian nnyịn ete: “Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” (Mme N̄ke 3:6) Nte ededi, odu ndusụk n̄kpọ oro owo iba—emi ẹnyenede ubieresịt oro ẹtịmde ẹnọ ukpep—ẹkemede ndinyene nsio nsio ekikere ke ntem ẹnamde nsio nsio ubiere.

Edi, ubieresịt oro ẹtịmde ẹnọ ukpep idiyakke owo ada utọ ifụre oro anam n̄kpọ ke ini enyenede ndinam ubiere ke mme n̄kpọ oro Ikọ Abasi akpande nnennen nnennen. Ke uwụtn̄kpọ, ubieresịt oro owo mîdaha mme edumbet Bible inọ ukpep ekeme ndiyak eren ye n̄wan ẹdụn̄ kiet mbemiso ndọ man ẹdomo ẹse m̀mê mmimọ imodot ye kiet eken. Mmọ ẹkeme ndikere ke imanam eti ubiere, ẹkerede ke emi akpan mmimọ ndibụmede ndụk ndọ oro mîwụtke eti ibuot. Ekeme ndidi esịt idibiomke mmọ. Edi, owo ekededi oro enyenede ekikere Abasi kaban̄a idan̄ ye ndọ idibiereke ndinam utọ oburobụt ndomonse emi.—1 Corinth 6:18; 7:1, 2; Mme Hebrew 13:4.

Nte Ubiere Fo Otụkde Mbon En̄wen

Ediwak ini, mme ubiere fo ẹkeme nditụk mbon en̄wen. Ntre kûdede ukokoi unam ubiere oro mîwụtke eti ibuot—m̀mê ndinam ndisịme ubiere—oro ekemede ndibiat ọsọn̄urua itie ebuana fo ye mme ufan fo, iman fo, m̀mê ke akande kpukpru, itie ebuana fo ye Abasi. Mme N̄ke 10:1 ọdọhọ ete: “Enyene-ibuot eyen adat ete esịt: edi ndisịme eyen edi mfụhọ eka esie.”

Ke n̄kan̄ eken, fiọk ete ke ndusụk ini esiyom owo emek ndusụk ufan onyụn̄ adianade ọkpọn̄ mbon eken. Ke ndinam an̄wan̄a, afo emekeme ndibiere ndisịn n̄kani ekikere ido ukpono oro afo ekenyenede edi oro ọfiọkde idahaemi ke ikemke ye N̄wed Abasi. Mîdịghe afo emekeme ndibiere ndinam ikpọ ukpụhọde ke edu uwem fo koro ọdọn̄de fi ndida mme edumbet Abasi oro afo ekpepde idahaemi ndu uwem. Ekeme ndidi ubiere fo idinemke ndusụk ufan  m̀mê iman fo esịt, edi ubiere ekededi oro enemde Abasi esịt edi eti ubiere.

Da Eti Ibuot Nam Akakan Ubiere

Se mme owo ke ofụri ofụri mîdiọn̄ọke edi nte ke kpukpru owo mfịn ẹnyene ndimek uwem m̀mê n̄kpa. Nditọ Israel eset oro ẹkenamde nna ke adan̄a Isọn̄ Un̄wọn̄ọ ke 1473 M.E.N. ẹkenyene ukem n̄kpọ emi ndimek. Moses emi ekedide etịn̄ikọ ke ibuot Abasi ama ọdọhọ mmọ ete: “Mmada uwem ye n̄kpa, edidiọn̄ ye isụn̄i, nnịm fi ke iso; mek uwem, ndien, man afo ye nditọ fo ẹdu uwem: man afo ama Jehovah Abasi fo onyụn̄ okop uyo esie, onyụn̄ eyịre ye enye: koro enye edide uwem fo, ye uniọn̄ mme usen fo: man afo odụn̄ ke isọn̄ emi Jehovah ọkọn̄wọn̄ọde ọnọ mme usọ, Abraham, ye Isaac, ye Jacob, ete iyọnọ mmọ.”—Deuteronomy 30:19, 20.

Ntịn̄nnịm ikọ ye ubatini Bible ẹwụt ẹte ke nnyịn idu uwem ke “ndiọkeyo” ye nte ke “idaha ererimbot emi ke okpụhọde.” (2 Timothy 3:1; 1 Corinth 7:31, NW) Ukpụhọde oro ẹkebemde iso ẹtịn̄ mi edisịm utịt ke ini ẹdisobode mbiara editịm n̄kpọ eke owo emi ẹfep, emi edikpọn̄de itie ọnọ edinen obufa ererimbot Abasi.

Nnyịn imekpere ndibe ndụk obufa ererimbot oro. Ndi afo eyebe odụk man ekenyene nsinsi uwem ke Obio Ubọn̄ Abasi? Mîdịghe nte ẹyesọhi fi ẹfep ke isọn̄ ke ini ẹdisobode editịm n̄kpọ Satan emi ẹfep? (Psalm 37:9-11; Mme N̄ke 2:21, 22) Edi afo enyene ndibiere nte edidude uwem, ndien ubiere emi edi n̄kpọ n̄kpa ye uwem. Nte afo akpama ẹnọ fi un̄wam ke nte akpanamde eti ubiere, kpa ubiere oro owụtde eti ibuot?

Ndimek uwem abuana edibem iso n̄kpep mme n̄kpọ oro Abasi oyomde. Ke ata ediwak idaha, mme ufọkabasi ẹkpu ndinam ẹdiọn̄ọ mme n̄kpọ oro Abasi oyomde mi nnennen nnennen. Mme adausụn̄ mmọ ẹsiwak nditụn mme owo usụn̄ man ẹnịm nsu ke akpanikọ, ẹnyụn̄ ẹnam mmọ ẹnam mme n̄kpọ oro mînemke Abasi esịt. Mmọ inamke mme owo ẹfiọk ufọn oro odude ke owo ndibiere ndituak ibuot nnọ Abasi “ke spirit ye ke akpanikọ.” (John 4:24) Ntre ata ediwak owo ituakke ibuot inọ Abasi ke spirit ye ke akpanikọ. Edi tịm fiọk se Jesus eketịn̄de emi: “Owo eke mîdaha ye Ami an̄wan̄wana ye Ami, owo eke mînyụn̄ ibokke ye Ami asasuan.”—Matthew 12:30.

Mme Ntiense Jehovah ẹkop idatesịt ndin̄wam mme owo ẹnen̄ede ẹnyene ifiọk Ikọ Abasi. Mmọ ẹsinyene nneme Bible ofụri ini ye mme owo kiet kiet m̀mê ye otu, ke ini ye ke ebiet oro mme owo emi ẹmekde. Mbon oro ẹyomde ndibọ ufọn nto utọ ndutịm emi ẹkpenyene ndisobo ye Mme Ntiense ke n̄kann̄kụk mmọ mîdịghe ẹwet n̄wed ẹnọ ẹsọk mme andisio Enyọn̄-Ukpeme emi.

Nte ededi, ekeme ndidi ndusụk mmọ ẹnyenyene esisịt ifiọk ẹban̄a se Abasi oyomde. Ekeme ndidi mmọ ẹkam ẹnenịm ke Bible edi n̄wed akpanikọ oro ẹkemede ndiberi edem. Kpa ye oro, ediwak mmọ ẹmesịk ubiere ediyak idem nnọ Abasi ẹnịm. Ntak-a? Mmọ ẹkeme ndinyene ediwak ntak oro ẹsịnde mmọ ẹnam emi.

Nte ekeme ndidi mmọ ifiọkke ke edi akpan n̄kpọ ndinam emi? Jesus ama etịn̄ in̄wan̄-in̄wan̄ ete: “Idịghe kpukpru owo emi ẹkotde Mi ẹte, Ọbọn̄, Ọbọn̄, ẹdidụk ke Obio Ubọn̄ Heaven; edi owo eke anamde uyo Ete Mi emi odude ke heaven.” (Matthew 7:21) Ifiọk Bible kpọt ikemke; oyom ẹnanam n̄kpọ. Akpa esop Christian ama enịm uwụtn̄kpọ. Nnyịn ikot iban̄a ndusụk owo ke akpa isua ikie ite: “Ke adan̄aemi mmọ ẹnịmde eti etop Philip emi enye ọkwọrọde aban̄a Ubọn̄ Abasi ye enyịn̄ Jesus Christ ke akpanikọ, mmọ ẹna baptism, irenowo ye iban n̄ko.” (Utom 2:41; 8:12) Ntem, edieke owo enyịmede Ikọ Abasi ke ofụri esịt, enịmde se enye etịn̄de ke akpanikọ, onyụn̄ odude uwem ke n̄kemuyo ye mme edumbet Abasi, nso ibiọn̄ọ enye ndina baptism nte idiọn̄ọ uyakidem esie nnọ? (Utom 8:34-38) Nte ededi, man Abasi enyịme enye, ana enye anam usio-ukot emi ke unyịmesịt ye ke idatesịt.—2 Corinth 9:7.

Ndusụk owo ẹkeme ndikere ke ifiọk oro mmimọ inyenede ekpri akaha ndidi se mmimọ iyakde idem inọ Abasi. Edi, kpukpru owo oro ẹtọn̄ọde obufa utom ẹsinyene esisịt ifiọk.  Ewe anamutom emi edide ata ọkpọdọhọ ke se imọ idiọn̄ọde mfịn ke imọ ikọdiọn̄ọ ke ini imọ ikọtọn̄ọde-tọn̄ọ? Ndibiere ndinam n̄kpọ Abasi akam oyom owo enyene ifiọk aban̄a mme akpan ukpepn̄kpọ ye mme edumbet Bible onyụn̄ enyene udọn̄ ofụri esịt ndidu uwem ekekem ye mmọ.

Ndi ndusụk owo ẹsibiat ini ndinam ubiere ke ntak ẹfehede ndịk ke mmimọ idikemeke ndidu uwem ekekem ye ubiere emi? Ediwak n̄kpọ oro owo anamde ẹsisan̄a ye ndịk edikụt edikpu. Eren oro ebierede ndidọ ndọ nnyụn̄ ntọn̄ọ ubon ekeme ndikere ke imọ itịmke idot, edi ndinam n̄kpọ mban̄a oro ekeme ndinụk enye ndinam ofụri se enye ekekeme. Kpasụk ntre, akparawa oro enyenede obufa n̄wed-unyịme uwat ubomisọn̄ ekeme ndikop ndịk edisobo mbabuat n̄kpọntịbe ubomisọn̄—akpan akpan edieke enye ọdiọn̄ọde ke n̄kparawa ẹsiwak ndisobo mbabuat n̄kpọntịbe ubomisọn̄ n̄kan ikpọ owo. Nte ededi, ifiọk emi ekeme ndinyene ufọn nnọ enye, anamde enye enen̄ede etịn̄ enyịn ke uwat. Nditre ndibọ n̄wed-unyịme uwat ubomisọn̄ idikọkke mfịna emi ke baba usụn̄ kiet!

Mek Uwem!

Bible owụt ke ibịghike ndutịm ukaraidem, ndutịm unyamurua, ye ndutịm ido ukpono ofụri ererimbot emi ye mbon oro ẹnọde enye ibetedem ẹyebe ẹfep. Edi, mme owo oro ẹdade eti ibuot ẹmek uwem ẹnyụn̄ ẹdude uwem ẹkekem ye se mmọ ẹmekde ẹyebọhọ. Nte mbon oro ẹdidade ẹtọn̄ọ n̄ka obufa ererimbot, mmọ ẹyetiene ẹbuana ke ndinam isọn̄ akabade edi paradise nte Abasi okoyomde ke akpa. Nte afo akpama nditiene mbuana ke idara idara utom emi Abasi ọnọde ndausụn̄?

Ke edide ntre, biere ndikpep Ikọ Abasi. Biere ndikpep mme n̄kpọ oro Abasi oyomde man enem enye esịt. Biere ndinam mme n̄kpọ oro. Ke akande kpukpru, biere ndisọn̄ọ nyịre ke ubiere oro tutu esịm akpatre. Ke nditịn̄ ibio ibio, mek uwem!

[Mme ndise ke page 4]

Nọ idemfo ini oro ekemde ndinam akpan ubiere

[Ndise ke page 5]

Bọ item ke ini oyomde ndimek ubọkọkọ

[Mme ndise ke page 7]

Mbon oro ẹbierede ndinam n̄kpọ Abasi idahaemi ẹyetiene ẹbuana ke ndinam isọn̄ akabade edi paradise