“Mma N̄kụt Itieufan, Ima, ye Edikere Mban̄a”

“MBUFO ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35) Kpa nte Jesus ọkọdọhọde, ima ama akabade edi se ẹdade ẹdiọn̄ọ itie nditọete akpa mme Christian. Ke ini ekewetde n̄wed ke se iwakde ikan isua ikie ke Christ ama akakpa, Tertullian ama okot oto mbon oro mîdịghe mme Christian nte ẹdọhọde ẹte: ‘Sese nte mmọ ẹmade kiet eken ẹnyụn̄ ẹben̄ede idem ndikpa nnọ kiet eken.’

Nte ẹkeme ndisụk n̄kụt utọ ima oro ke ererimbot? Ih. Ke uwụtn̄kpọ, kere ban̄a leta oro ọfis n̄kọk itieutom Mme Ntiense Jehovah ke Brazil ọkọbọde. Andikewet leta oro, kpa n̄wan ekerede Marília, ekewet ete:

“Ke adan̄aemi n̄kodụn̄de ke Villa Mercedes, Argentina, eka mi, emi edide kiet ke otu Mme Ntiense Jehovah, ama ọdọn̄ọ ewan̄kọ ọkpọ oro akanamde enye ọdọn̄ọ akpauben̄ ọtọn̄ọde ke isịn osụhọde. Ke akpa ọfiọn̄ itiaita oro enye akanade ke nna udọn̄ọ, Mme Ntiense ke Villa Mercedes ẹma ẹse ẹban̄a enye ke ima ima usụn̄ oro owụtde edikere mban̄a. Mmọ ẹma ẹse ẹban̄a kpukpru n̄kpọ, ẹnịm ufọk esie asana ẹnyụn̄ ẹtem udia ẹnọ enye. Idem ke adan̄aemi okodude ke ufọkibọk, owo ama esidu ye Mama kpukpru ini, uwemeyo ye okoneyo.

“Ami ye Mama ima ifiak inyọn̄ọ Brazil, ebiet emi enye osụk okopde nsọn̄idem sụn̄sụn̄. Mme Ntiense ke ebiet emi nnyịn idụn̄de ke ẹnam kpukpru se mmọ ẹkemede idahaemi ndin̄wam Mama okop nsọn̄idem.”

Marília eberi leta esie ntem: “Mmenyịme nte ke ami ndịghe Ntiense, edi mma n̄kụt itieufan, ima, ye edikere mban̄a ke otu Mme Ntiense.”

Ih, mme owo ẹsụk ẹdodu oro ẹnyenede ata ima Christian. Ke ndinam ntre, mmọ ẹwụt odudu oro ukpepn̄kpọ Jesus ekemede ndinyene ke uwem nnyịn.