Mme Mbụme Ẹtode Mme Andikot

Ntak emi Elisha ekeben̄ede ‘udeme spirit Elijah iba’?

Esisịt ini mbemiso Elijah okokụrede utom esie nte prọfet ke Israel, ekpri prọfet oro Elisha ama eben̄e enye ete: “Mbọk, yak nnyene udeme spirit fo iba.” (2 Ndidem 2:9) Ke nditịn̄ ke usụn̄ eke spirit, etie nte Elisha okoyom udeme iba oro ẹkesinọde akpan. (Deuteronomy 21:17) Edidụn̄ọde mbụk oro ibio ibio ayanam emi an̄wan̄a onyụn̄ an̄wam nnyịn ndikpep n̄kpọ nto se iketịbede.

Ke etienede ndausụn̄ Jehovah, prọfet Elijah ama eyet Elisha aran nte andida itie esie. (1 Ndidem 19:19-21) Ke n̄kpọ nte isua itiokiet, Elisha ama asan̄a utom ọnọ Elijah ke edinam akpanikọ onyụn̄ ebiere ndinam emi tutu esịm akpatre. Idem ke akpatre usen emi Elijah akanamde utom nte prọfet ke Israel, Elisha ama aka iso ndidu ye eteufọk esie. Okposụkedi Elijah akakpakde Elisha ete etre nditiene imọ, ekpri prọfet oro ama ọdọhọ utịm ikata ete: “Ndikpọn̄ke fi.” (2 Ndidem 2:2, 4, 6; 3:11) Ke akpanikọ, Elisha ekese akamba prọfet oro nte ete esie eke spirit.—2 Ndidem 2:12.

Nte ededi, Elisha ikedịghe n̄kukụre eyen eke spirit oro Elijah ekenyenede. Elijah ye Elisha ẹma ẹsisan̄a ye otu iren oro ẹkediọn̄ọde nte “nditọ mme prophet.” (2 Ndidem 2:3) Mbụk oro ke Udiana Ndidem owụt ke “nditọ” emi n̄ko ẹma ẹnyene n̄kpet n̄kpet itie ebuana ye Elijah, kpa ete mmọ eke spirit. (2 Ndidem 2:3, 5, 7, 15-17) Kpa ye oro, nte andida itie emi ẹyetde aran, Elisha ekedi andiwọrọ iso n̄kan ke otu nditọ Elijah eke spirit—enye eketie nte akpan. Ke Israel eset, ẹkesinọ akpan udeme inyene ete esie iba, ke adan̄aemi ẹkesinọde nditọ eken udeme kiet kiet. Ntem, Elisha ekeben̄e udeme inyene eke spirit Elijah iba.

Ntak emi Elisha ekeben̄ede n̄kpọ emi ini oro? Koro enye ekeben̄ede idem nditọn̄ọ ọkpọsọn̄ utom—kpa edida itie Elijah nte prọfet ke Israel. Elisha ama ọfiọk nte ke man ibiom mbiomo oro akasan̄ade ye ọkpọsọn̄ utom emi, imọ imoyom odudu eke spirit oro akande ukeme imọ, kpa odudu oro Jehovah ikpọn̄ ekekemede ndinọ. Ikoyomke enye efehe ndịk kpa nte Elijah mîkefeheke. (2 Ndidem 1:3, 4, 15, 16) Ntem, enye ama eben̄e udeme spirit Elijah iba, kpa spirit uko eke ‘efịbede ufụp eti-eti ọnọ Jehovah’—nti edu emi spirit Abasi anamde ẹnyene. (1 Ndidem 19:10, 14) Elijah ọkọbọrọ didie?

Elijah ama ọfiọk nte ke Elisha ekeben̄e n̄kpọ oro Abasi ikpọn̄ ekemede ndinọ. Ntre Elijah ama ọbọrọ ye nsụhọdeidem ete: “Afo emeben̄e ọkpọsọn̄ n̄kpọ: ama okụt nte ẹmende mi ẹbọ fi, oyosu ntre ọnọ fi.” (2 Ndidem 2:10) Ndien, ke akpanikọ, Jehovah ama ayak Elisha okụt nte idio emende Elijah ọdọk enyọn̄. (2 Ndidem 2:11, 12) Ẹma ẹnọ se Elisha ekeben̄ede. Jehovah ama ọnọ enye spirit oro enye okoyomde man anam obufa utom esie onyụn̄ akan mme idomo oro enye ekenyenede ndisobo.

Mfịn, mme Christian oro ẹyetde aran (ẹsikotde ndusụk ini otu Elisha) ye kpukpru mme asan̄autom Abasi ẹkeme ndibọ ekese nsịnudọn̄ nto mbụk Bible emi. Ke ndusụk idaha, ekeme nditie nnyịn nte nnyịn ikemeke inyụn̄ idotke ndinam obufa utom oro ẹnọde nnyịn, mîdịghe nnyịn imekeme ndinana uko ndika iso n̄kwọrọ Obio Ubọn̄ ke ini isobode n̄kaiso unana udọn̄ m̀mê ubiọn̄ọ ke efakutom nnyịn. Edi, edieke nnyịn iben̄ede Jehovah un̄wam, enye ọyọnọ nnyịn edisana spirit oro nnyịn iyomde man ikan mme n̄kpọ-ata inyụn̄ iyọ mme ukpụhọde idaha. (Luke 11:13; 2 Corinth 4:7; Philippi 4:13) Ih, kpa nte Jehovah ọkọsọn̄ọde Elisha idem kaban̄a n̄kpọsọn̄ utom esie, enye ayan̄wam kpukpru nnyịn, ikpọ ye n̄kpri, ndinam utom nnyịn mma.—2 Timothy 4:5.