Kpeme Idem ke Abian̄a
Kpeme Idem ke Abian̄a
“Ẹkpeme mbak owo ekededi edidu, eke adade . . . ikpîkpu abian̄a . . . obụme mbufo.”—COLOSSAE 2:8.
1-3. (a) Mme uwụtn̄kpọ ewe ẹwụt ke abian̄a ọnyọni odụk se ikperede ndidi kpukpru ikpehe uwem? (b) Ntak emi idem mîkpakpaha nnyịn iban̄a abian̄a emi odude ke ererimbot?
“ANIE ke otu mbufo ke akanam owo oro enye akamade ikpe esie mîsụhu nsu inọ?” Ke ndusụk isua emi ẹkebede, akamba ekpep ibet kiet ama obụp mbụme emi ke ndụn̄ọde oro enye akanamde. Nso ikedi ibọrọ? Enye anam an̄wan̄a ete: “Ke otu ediwak tọsịn mme ekpeibet, ekpeibet kiet kpọt ke akanam owo mîsụhu nsu inọ.” Ntak-a? “Ekpeibet emi ndikosụk ntọn̄ọ utom ke akamba usiakifia ekedi oro ndien enye ikakamake ikpe owo ndomokiet kan̄a.” Ifiọk n̄kpọntịbe emi owụt akama-mfụhọ akpanikọ kiet—nsu ye abian̄a ẹdi ọsọ n̄kpọ ke ererimbot mfịn.
2 Abian̄a awak orụk ndien enye ọnyọni odụk se ikperede ndidi kpukpru ikpehe uwem eyomfịn. Ndutịm usuanetop ọyọhọ ye ediwak uwụtn̄kpọ abian̄a—mbon mbre ukara ndisu nsu mban̄a se mmọ ẹnamde, nta mme abatokụk ye mme ekpeibet ndisiak udori oro usiakifia adiade okpon akan nte edide, mme asuanetop n̄kpọurua ndibian̄a mme andidep, mme okot owo ikpe ke esop ndidia mbon insurance n̄wo, ke ndikam nsiak ibat ibat. Ndien abian̄a eke ido ukpono odu n̄ko. Mme ọkwọrọ ederi ẹtụn ediwak owo usụn̄ ke ndikpep mme nsunsu ukpepn̄kpọ, utọ nte ukpọn̄ ikpaha ke nsinsi, hell ikan̄, ye Abasi-Ita-ke-Kiet.—2 Timothy 4:3, 4.
3 Nte akpana iyak kpukpru mme abian̄a emi ẹkpa nnyịn idem? Baba. Bible ama ọtọt aban̄a “ukperedem ini” emi ete: “Ndiọi owo ye mbon abian̄a ẹyedọdiọn̄ ẹdiọk ẹka iso, ẹbian̄a owo, owo ẹyenyụn̄ ẹbian̄a mmọ.” (2 Timothy 3:1, 13) Nte mme Christian, ana nnyịn idu ke edidemede iban̄a mme abian̄a abian̄a ekikere oro ẹkemede ndiwọn̄ọde nnyịn n̄kpọn̄ akpanikọ. Mbụme iba ẹsiwak ndidemede: Ntak emi abian̄a ọyọhọde ntem mfịn, ndien didie ke nnyịn ikeme ndikpeme mbiọn̄ọ ndidi se ẹbian̄ade?
Ntak Emi Abian̄a Ọyọhọde Ntem Mfịn?
4. Didie ke Bible anam an̄wan̄a ntak emi abian̄a ọyọhọde ererimbot?
4 Bible enen̄ede anam an̄wan̄a ntak emi abian̄a ọyọhọde ntem ke ererimbot. Apostle John ekewet ete ke “ofụri ererimbot onyụn̄ esịne ke ubọk andidiọk.” (1 John 5:19) “Andidiọk” oro edi Satan kpa Devil. Jesus ama etịn̄ aban̄a enye ete: “Enye . . . ikonyụn̄ isọn̄ọke ida ke akpanikọ, koro enye mînyeneke akpanikọ ke esịt esie. Ke ini enye osude nsu, enye osio se idude ke esịt esie etịn̄: koro enye edi osu-nsu, ye ete nsu.” Do, nte edi n̄kpọ n̄kpaidem nte ererimbot emi enyenede edu, ido, ye abian̄a abian̄a edu owo emi akarade enye?—John 8:44; 14:30; Ephesus 2:1-3.
5. Didie ke Satan enen̄ede esịn ukeme ndibian̄a mme owo ke utịt ini emi, ndien mmanie akpan akpan ẹdi iso en̄wan esie?
5 Ke utịt ini emi, Satan ke enen̄ede esịn ukeme. Ẹma ẹsio enye ẹduọk ke isọn̄. Enye ọfiọk ete ini imọ edi ibio, ntre enye asan̄a ye “akwa ifụtesịt.” Sia enye ebierede ndisobo adan̄a ediwak owo nte enye ekekeme, enye ke ‘abian̄a ofụri ererimbot.’ (Ediyarade 12:9, 12) Satan isibian̄ake owo ke ndusụk ini kpọt. Utu ke oro, enye esisịn ofụri ukeme kpukpru ini ndibian̄a ubonowo. * Enye esida kpukpru abian̄a abian̄a usụn̄ unam n̄kpọ eke enye ọfọfiọk—esịnede n̄kari ye etabi—ndinam ikike mmọ eke mînịmke ke akpanikọ ekịm nnyụn̄ nnam mmọ ẹdian̄ade ẹkpọn̄ Abasi. (2 Corinth 4:4) Etubom abian̄a emi enen̄ede ebiere ndita mbon oro ẹtuakde ibuot ẹnọ Abasi “ke spirit ye ke akpanikọ.” (John 4:24; 1 Peter 5:8) Kûdede ufre ke Satan enen̄ede ọdọhọ ete: ‘Mmekeme ndiwọn̄ọde kpukpru owo n̄kpọn̄ Abasi.’ (Job 1:9-12) Ẹyak nnyịn ineme ndusụk “n̄kari Satan” ye nte ikemede ndikpeme idem mbiọn̄ọ mmọ.—Ephesus 6:11.
Kpeme Biọn̄ọ Abian̄a Mbon Mfiakedem
6, 7. (a) Nso ke mbon mfiakedem ẹkeme ndidọhọ? (b) Didie ke N̄wed Abasi enen̄ede owụt uduak mbon mfiakedem?
6 Ke anyan ini idahaemi, Satan amada mbon mfiakedem ndibian̄a mme asan̄autom Abasi. (Matthew 13:36-39) Mbon mfiakedem ẹkeme ndidọhọ ke ituak ibuot inọ Jehovah ndien ke imenịm Bible ke akpanikọ, edi mmọ ẹsịn esop esie oro ẹkụtde ke enyịn. Ndusụk mmọ ẹmekam ẹfiak ẹbịne mme ukpepn̄kpọ oro mînọhọ Abasi ukpono, emi “Akwa Babylon” kpa ukara ererimbot eke nsunsu ido ukpono ekpepde. (Ediyarade 17:5; 2 Peter 2:19-22) Ke idak ndausụn̄ spirit Abasi, mme andiwet Bible ẹma ẹda n̄kpọsọn̄ ikọ ẹyarade mme uduak ye usụn̄ unam n̄kpọ mbon mfiakedem emi.
7 Nso idi uduak mbon mfiakedem emi? Ata ediwak mmọ iyụhọke ye sụk ndikpọn̄ ido ukpono emi mmọ ini kiet ko ẹkekerede ke edi akpanikọ. Ediwak ini, mmọ ẹsiyom ndinam mbon efen ẹwọrọ ẹtiene mmimọ. Utu ke ndiwọrọ n̄koyom nnyụn̄ nnam mme mbet idemmọ, ediwak mbon mfiakedem ẹsiyom ‘ndidụri mme mbet [oro edi, mme mbet Christ] ntiene idemmọ.’ (Utom 20:29, 30) Apostle Paul ama ọsọsọp odụri owo utọn̄ aban̄a mme nsunsu andikpep emi ete: ‘Ẹkpeme mbak owo ekededi edibụme mbufo.’ (Colossae 2:8) Nte emi iwụtke se ediwak mbon mfiakedem ẹdomode ndinam? Nte andimụm owo ke ukat emi emende owo oro mîdụhe ke ukpeme ọkpọn̄ ubon esie, mbon mfiakedem ẹsiyom mme andibuana ke esop oro ẹnịmde ikọ mmọ ke akpanikọ, ẹdomode ndimen mmọ n̄kpọn̄ otuerọn̄.
8. Mme usụn̄ ewe ke mbon mfiakedem ẹsida ẹnam n̄kpọ man ẹyọhọ uduak mmọ?
8 Mme usụn̄ ewe ke mbon mfiakedem ẹsida ẹnam n̄kpọ man ẹyọhọ uduak mmọ? Mmọ ẹsiwak ndiyụrọde ikọ, nditịn̄ se mîdịghe ofụri akpanikọ, ẹnyụn̄ ẹsu ata ata nsu. Jesus ama ọfiọk ke mme owo ‘ẹyetịn̄ kpukpru orụk idiọk-n̄kpọ ke nsu’ ẹdian mme anditiene imọ. (Matthew 5:11) Utọ ubi ubi mme andibiọn̄ọ emi ẹyetịn̄ se mîdịghe akpanikọ man ẹbian̄a mbon efen. Apostle Peter ama odụri owo utọn̄ aban̄a mbon mfiakedem emi ẹditịn̄de “ikọ abian̄a,” ẹdisuande “mme abian̄a abian̄a ukpepn̄kpọ” (NW), ẹdinyụn̄ ‘ẹyụrọrede N̄wed Abasi’ man ẹyọhọ uduak mmọ. (2 Peter 2:3, 13; 3:16) Ke mfụhọ, mbon mfiakedem ẹkụt unen ke ‘ndibiat mbuọtidem ndusụk owo.’—2 Timothy 2:18.
9, 10. (a) Didie ke nnyịn ikeme ndikpeme man mbon mfiakedem ẹdibian̄a nnyịn? (b) Ntak emi nnyịn mîkpokopke editịmede esịt edieke anade ẹnen̄ede se nnyịn ifiọkde iban̄a uduak Abasi?
9 Didie ke nnyịn ikeme ndikpeme man mbon mfiakedem ẹdibian̄a nnyịn? Ebe ke ndinam item Ikọ Abasi emi ọdọhọde ete: “Ẹkama enyịn ẹse mmọ emi ẹtọde ubahade ke otu mbufo, ẹnyụn̄ ẹnamde n̄kpọ ẹsịn owo ẹduọ, mînyụn̄ isan̄ake ikekem ye edikpep eke ẹkekpepde mbufo ẹte ẹnam. Ẹdian̄ade ẹkpọn̄ mmọ.” (Rome 16:17) Nnyịn ‘idian̄ade ikpọn̄ mmọ’ ebe ke ndisịn mme ekikere mmọ—edide mmọ ke idemmọ ẹtịn̄, edide ikot ke n̄wed, m̀mê ke Intanet. Ntak emi nnyịn inamde n̄kpọ ntre ye mmọ? Akpa, koro Ikọ Abasi ọdọhọ nnyịn inam ntre, ndien nnyịn imenịm ke akpanikọ ite ke Jehovah esinen̄ede ekere aban̄a mfọnọn̄kpọ nnyịn kpukpru ini.—Isaiah 48:17, 18.
10 Ọyọhọ iba, nnyịn imama esop emi ekpepde nnyịn ọsọn̄urua akpanikọ emi anamde nnyịn inen̄ede idi isio ye Akwa Babylon. Ke ukem ini oro, nnyịn imọfiọk ke nnyịn inyeneke kan̄a ọyọhọ ifiọk iban̄a uduak Abasi; ẹmeka iso ndinen̄ede se nnyịn ifiọkde ke ediwak isua emi ẹbede. Mme Christian oro ẹnamde akpanikọ ẹnyịme ndibet Jehovah kaban̄a mme utọ edinen̄ede oro. (Mme N̄ke 4:18) Kan̄a ke emi, nnyịn idiwọrọke ikpọn̄ esop emi Abasi okopde inemesịt ndida nnam n̄kpọ, koro nnyịn imokụt in̄wan̄-in̄wan̄ uyarade edidiọn̄ esie ke esop emi.—Utom 6:7; 1 Corinth 3:6.
Kpeme Ndibian̄a Idem
11. Ntak emi mme anana-mfọnmma owo ẹnyenede ntụhọ edibian̄a idem?
11 Mme anana-mfọnmma owo ẹnyene ntụhọ emi Satan esisọpde ndida nnam n̄kpọ—edibian̄a idem. Jeremiah 17:9 ọdọhọ ete ke “esịt abian̄a akan kpukpru n̄kpọ, onyụn̄ abiara fap.” Ndien James ekewet ete: “Idomo iduọ esịm kpukpru owo ke adan̄aemi idiọk udọn̄ atapde enye odụri.” (James 1:14) Edieke esịt atapde nnyịn, enye ekeme nditap nnyịn ndinam idiọkn̄kpọ, anamde idiọkn̄kpọ emi etie nte se iyede ye se mînọhọ unan. Utọ ekikere oro edi abian̄a, koro ediyak idem nnọ idiọkn̄kpọ esida nsobo edi ke akpatre.—Rome 8:6.
12. Ke mme usụn̄ ewe ke edibian̄a idem ekeme ndikọk afia nnọ nnyịn?
12 Edibian̄a idem ekeme ndikọk afia nnọ nnyịn mmemmem mmemmem. Abian̄a abian̄a esịt emi ekeme ndidomo ndiwụt ke ndiọi edu uwem oro inyenede enen m̀mê ọnọde ntak kaban̄a akwa idiọkn̄kpọ oro inamde. (1 Samuel 15:13-15, 20, 21) Esịt nnyịn oro abiarade ekeme n̄ko ndiyom mme usụn̄ ndiwụt nte ke ido oro edemerede eyịghe enen. Ke uwụtn̄kpọ, kere ban̄a unọ idem inemesịt. Ndusụk unọ idem inemesịt ẹfọn ẹnyụn̄ ẹnem. Nte ededi, ediwak se ererimbot emi owụtde—ke ndise senima ye mme edinam ekebe ndise ye ke ikpehe Intanet—ẹdi ndedehe ye oburobụt. Edi mmemmem n̄kpọ nnyịn ndisọn̄ọ ndọhọ ke imekeme ndise ndedehe edinam unọ idem inemesịt ye unana afanikọn̄. Ndusụk owo ẹkam ẹkere ẹte, “Enye ifịnake ubieresịt mi, ntre nso ikwan̄a?” Edi mme utọ owo oro “ẹbian̄a idem.”—James 1:22.
13, 14. (a) Uwụtn̄kpọ N̄wed Abasi ewe owụt ke ubieresịt nnyịn isiwakke ndinọ nnyịn eti ndausụn̄? (b) Didie ke nnyịn ikeme ndikpeme mbiọn̄ọ edibian̄a idem?
13 Didie ke nnyịn ikeme ndikpeme mbiọn̄ọ edibian̄a idem? Akpa kan̄a, ana nnyịn iti ite ke ubieresịt owo idịghe se ẹkemede ndiberi edem kpukpru ini. Kere se iketịbede inọ apostle Paul. Mbemiso enye akakabarede edi Christian, enye ama ọkọbọ mme anditiene Christ. (Utom 9:1, 2) Eyedi ubieresịt esie ikafịnake enye ini oro. Nte ededi, ana in̄wan̄-in̄wan̄ nte ke ubieresịt esie ama otụn enye usụn̄. Paul ọkọdọhọ ete: ‘N̄kanam emi ke unana ifiọk, ke ini mmen̄kenịmke ke akpanikọ.’ (1 Timothy 1:13) Ntre, ndusụk unọ idem inemesịt ndikam ntre ndifịna ubieresịt nnyịn iwọrọke ite ke se nnyịn inamde enen. Sụk eti ubieresịt emi ẹdade Ikọ Abasi ẹtịm ẹnọ ukpep ekeme ndinọ eti ndausụn̄.
14 Edieke anade nnyịn ifep edibian̄a idem, ndusụk nti ekikere ẹdu emi anade nnyịn iti. Da akam dụn̄ọde idemfo. (Psalm 26:2; 2 Corinth 13:5) Editịm ndụn̄ọde idemfo ekeme ndinam fi okụt ufọn edinam mme ukpụhọde ke ekikere m̀mê ke usụn̄ uwem fo. Kpan̄ utọn̄ nọ mbon efen. (James 1:19) Sia ndụn̄ọde idemowo esikọn̄ọde ke ọkpọkpọ ekikere, owụt eti ibuot ndikpan̄ utọn̄ nnọ ikọ esịt akpanikọ emi mme ekemmọ Christian oro ẹkọride ẹsịm ọyọhọ idaha ẹtịn̄de. Edieke afo anamde mme ubiere m̀mê anamde n̄kpọ ke usụn̄ oro edemerede eyịghe ke enyịn ekemmọ mme andinịm ke akpanikọ oro ẹdade ukem ukem, ẹnyụn̄ ẹnyenede mbufiọk, afo emekeme ndibụp idemfo, ‘Nte ekeme ndidi ntịmke nnọ ubieresịt mi ukpep mîdịghe nte esịt ababian̄a mi?’ Da Bible ye mme n̄wed ẹkọn̄ọde ke Bible bọk idemfo kpukpru ini. (Psalm 1:2) Ndinam ntre ayan̄wam fi ndinam mme ekikere, edu, ye mme ntụk fo ẹdu ke n̄kemuyo ye mme edumbet Abasi.
Kpeme Biọn̄ọ Mme Nsu Satan
15, 16. (a) Ke ukeme oro enye esịnde ndibian̄a nnyịn, mme nsu ewe ke Satan ada anam n̄kpọ? (b) Didie ke nnyịn ikeme ndifep ndidi se ẹdade mme utọ nsu oro ẹbian̄a?
15 Satan esida nsio nsio nsu ndibian̄a nnyịn. Enye esidomo ndinam nnyịn inịm ke inyene obụkidem ẹnọ inemesịt ye uyụhọ, edi emi esikam awak ndikama mfụhọ ye edikpu. (Ecclesiastes 5:10-12) Enye akpama ndinam nnyịn inịm ke idiọk ererimbot emi ayaka iso odu ke nsinsi, okposụkedi in̄wan̄-in̄wan̄ uyarade odude nte ke nnyịn idu uwem ke “ukperedem ini.” (2 Timothy 3:1-5) Satan esinam mme owo ẹkere ke afanikọn̄ ndomokiet idụhe ke ndibịne oburobụt usụn̄ uwem, idem okposụkedi mme oyom-inemesịt ẹsiwakde ndidọk ndiọi utịp. (Galatia 6:7) Didie ke nnyịn ikeme ndifep ndidi se ẹdade mme utọ nsu oro ẹbian̄a?
16 Kpep n̄kpọ to mme uwụtn̄kpọ Bible. Bible ọdọn̄ọ mme ntọt uwụtn̄kpọ ẹban̄ade mbon oro Satan akadade mme nsu esie abian̄a. Mmọ ẹma ẹma mme n̄kpọ obụkidem, ẹfre enyịn ẹban̄a ini oro mmọ ẹkedude uwem, mîdịghe ẹma ẹyak idem ẹnọ oburobụt ido—kpukpru emi ẹkesụn̄ọ ke ndiọi utịp. (Matthew 19:16-22; 24:36-42; Luke 16:14; 1 Corinth 10:8-11) Kpep n̄kpọ to mme uwụtn̄kpọ eke eyomfịn. Edi n̄kpọ mfụhọ nditịn̄ nte ke ini ke ini, ndusụk mme Christian ẹsifre nte ini edide usọp usọp ẹnyụn̄ ẹkere ke mmimọ imataba eti n̄kpọ ke ndinam n̄kpọ Abasi. Mmọ ẹkeme ndikpọn̄ akpanikọ ẹbịne inua-okot inem uwem. Nte ededi, mme utọ owo oro ẹdu “ke mfọfiọnọ ebiet,” koro ebebịghi m̀mê awawara mmọ ẹyebọ utịp edu uwem unana uten̄e Abasi mmọ. (Psalm 73:18, 19) Owụt eti ibuot nnyịn ndikpep n̄kpọ nto ndudue mbon en̄wen.—Mme N̄ke 22:3.
17. Ntak emi Satan esịnde udọn̄ ọnọ nsu oro nte ke Jehovah imaha inyụn̄ ikereke iban̄a nnyịn?
17 Odu nsu efen emi Satan adade anam n̄kpọ uforo uforo—ndidọhọ ke Jehovah imaha inyụn̄ idaha nnyịn ke n̄kpọ. Satan amada ediwak tọsịn isua ekpep n̄kpọ aban̄a mme anana-mfọnmma owo. Enye etịm ọfiọk ke iduọesịt ekeme ndinam idem emem nnyịn. (Mme N̄ke 24:10) Ntem, enye esịn udọn̄ ọnọ nsu oro nte ke nnyịn iwọrọke n̄kpọ ke enyịn Abasi. Enye ekere ke edieke ‘ẹyịbide nnyịn ẹduọk ke isọn̄’ ndien nnyịn inịm ke Jehovah ikereke iban̄a nnyịn, nnyịn imekeme ndikpa mba. (2 Corinth 4:9) Oro akam edi se akwa Andibian̄a emi oyomde! Didie ndien ke nnyịn ikeme ndikpeme mbiọn̄ọ ndidi se ẹdade nsu Satan emi ẹbian̄a?
18. Didie ke Bible ọsọn̄ọ ima oro Jehovah amade nnyịn?
18 Tie kere se Bible etịn̄de aban̄a ima oro Abasi amade nnyịn. Ikọ Abasi ada mme in̄wan̄-in̄wan̄ uwụtn̄kpọ oro ẹtụkde owo ndisọn̄ọ nnọ nnyịn nte ke Jehovah etịm ọfiọk nnyịn onyụn̄ ama nnyịn owo kiet kiet. Enye ada mmọn̄eyet fo esịn ke “ekpeme” esie, ọwọrọde ke enye okụt onyụn̄ eti eyet oro afo atuade nte afo esịnde ọkpọsọn̄ ukeme ndisọn̄ọ nda. (Psalm 56:8) Enye ọfiọk ini eke “esịt obụn̄ọde” fi ndien enye emekpere fi ke mme utọ ini oro. (Psalm 34:18) Enye ọfiọk kpukpru n̄kpọ aban̄a fi, esịnede ibat ‘kpukpru idet ibuot fo.’ (Matthew 10:29-31) Ke akande kpukpru, Abasi ‘ama ọnọ ikpọn̄-ikpọn̄ Eyen emi Enye obonde’ ke ibuot fo. (John 3:16; Galatia 2:20) Ke ndusụk idaha, ekeme ndisọn̄ fi ndinịm ke mme utọ itie N̄wed Abasi oro ẹnyene n̄kpọ ndinam ye afo ọkpọkpọ. Nte ededi, ana nnyịn inịm ikọ Jehovah ke akpanikọ. Enye oyom nnyịn inịm ke imọ imama nnyịn owo kiet kiet, idịghe sụk nte otu.
19, 20. (a) Ntak edide akpan n̄kpọ ndifiọk nnyụn̄ nsịn nsu Satan oro nte ke Jehovah imaha fi? (b) Didie ke esenyịn kiet oro asan̄ade-san̄a esin̄wam mbon mmemidem?
19 Fiọk nyụn̄ sịn nsu. Edieke afo ọfiọkde ke owo esisu nsu, afo emekeme ndikpeme idem fo man enye edibian̄a fi. Ntre n̄ko, ndikam mfiọk ke Satan oyom fi enịm ke akpanikọ nte ke Jehovah imaha fi ekeme ndidi akamba un̄wam. Ke ndinam n̄kpọ mban̄a ibuotikọ Enyọn̄-Ukpeme oro okodụride owo utọn̄ aban̄a n̄kari Satan, Christian kiet ọkọdọhọ ete: “N̄kọfiọkke ke Satan esidomo ndida mme ntụk mi nnam idem emem mi. Ndifiọk emi ọnọ mi nsịnudọn̄ ndin̄wana ye mme ntụk emi.”
20 Kere ban̄a ifiọkutom esenyịn kiet oro asan̄ade-san̄a ke idụt kiet ke Edem Usụk America. Ke ini enye anamde utom ubọkerọn̄ ke idem ekemmọ mme andinịm ke akpanikọ oro ẹkopde mmemidem, enye esibụp mmọ ete, ‘Nte afo emenịm Abasi-Ita-ke-Kiet ke akpanikọ?’ Owo oro okopde mmemidem mi esibọrọ, ‘Baba,’ ọfiọkde ke emi edi nsu kiet oro Satan osude. Ekem, ebiowo oro asan̄ade-san̄a mi esibụp ete, ‘Nte afo emenịm hell ikan̄ ke akpanikọ?’ Ibọrọ esisụk edi, ‘Baba!’ Do, ebiowo oro asan̄ade-asan̄a mi esisian mmọ ete ke odu nsu Satan kiet emi owo mîsisọpke ifiọk. Enye esidụri ntịn̄enyịn mmọ owụt page 249, ikpehe ekikere 21, ke n̄wed oro San̄a Kpere Jehovah, * emi owụtde ke edi nsu ndidọhọ nte ke Jehovah imaha nnyịn nte owo kiet kiet. Esenyịn oro asan̄ade-san̄a mi ọtọt nti utịp ẹtode edin̄wam mbon mmemidem ẹfiọk ẹnyụn̄ ẹsịn nsu Satan emi.
Kpeme Idem ke Abian̄a
21, 22. Ntak emi nnyịn mînanake ifiọk iban̄a abian̄a abian̄a usụn̄ unam n̄kpọ Satan, ndien nso ikpedi ubiere nnyịn?
21 Ke akpatre ini eke ukperedem ini emi, idịghe n̄kpọ n̄kpaidem nte ke Satan ayaka iso ndisuan ekese nsu ye abian̄a. Nte enemde, Jehovah iyakke nnyịn inana ifiọk iban̄a mme abian̄a abian̄a usụn̄ unam n̄kpọ Satan. Bible ye mme n̄wed ẹkọn̄ọde ke Bible, emi “asan̄autom emi anamde akpanikọ, onyụn̄ enyenede ọniọn̄” osiode ẹtịm ẹyarade ndiọi usụn̄ unam n̄kpọ Devil. (Matthew 24:45) Sia ẹma ẹkebem iso ẹdụri nnyịn utọn̄, nnyịn imeben̄e idem ibet se iditịbede.—2 Corinth 2:11.
22 Ntem, ẹyak nnyịn ikpeme ibiọn̄ọ mme ekikere mbon mfiakedem. Nnyịn ikpakam ibiere ndifep n̄kari n̄kari afia edibian̄a idem. Ẹnyụn̄ ẹyak nnyịn ifiọk inyụn̄ isịn kpukpru nsu Satan. Ke ndinam ntre, nnyịn iyekpeme itie ebuana nnyịn ye “Abasi akpanikọ,” emi asuade abian̄a.—Psalm 31:5; Mme N̄ke 3:32.
[Mme Ikọ idakisọn̄]
^ ikp. 5 Kaban̄a orụk ikọedinam oro ẹkabarede ‘ke abian̄a’ ke Ediyarade 12:9, n̄wed ndụn̄ọde kiet ọdọhọ ke enye “owụt edinam oro akade-ka iso emi ama akakabade edi edu ofụri ini.”
^ ikp. 20 Mme Ntiense Jehovah ẹsio.
Nte Afo Emeti?
• Ntak emi abian̄a ọyọhọde ntem ke ererimbot mfịn?
• Didie ke nnyịn ikeme ndikpeme man mbon mfiakedem ẹdibian̄a nnyịn?
• Didie ke nnyịn ikeme ndikpeme mbiọn̄ọ ntụhọ ekededi aban̄ade edibian̄a idem?
• Didie ke nnyịn ikeme ndikpeme man Satan okûbian̄a nnyịn?
[Mme Mbụme Ukpepn̄kpọ]
[Ndise ke page 17]
Kûbian̄a idemfo kaban̄a unọ idem inemesịt
[Mme ndise ke page 18]
Man ekpeme ọbiọn̄ọ edibian̄a idem, da akam dụn̄ọde idemfo, kpan̄ utọn̄ nọ mbon en̄wen, ndien da Ikọ Abasi bọk idemfo kpukpru ini