Mme Mbụme Ẹtode Mme Andikot

• Sia edisana spirit Abasi mîdịghe owo, didie ke nnyịn ikeme ndiyat enye esịt?

Apostle Paul ekewet ete: “Ẹkûnyụn̄ ẹyat Edisana Spirit Abasi esịt.” (Ephesus 4:30) Ndusụk owo ẹkere ke ikọ emi owụt ke edisana spirit edi owo. Nte ededi, mme n̄wed oro “akama-ukpọhọde, emi anamde akpanikọ,” osiode ẹsiwak ndinọ uyarade N̄wed Abasi ye eke mbụkeset oro ẹwụtde ke mme Christian eset ikadaha edisana spirit nte owo m̀mê nte abasi oro edide n̄ka ye Ata Edikon̄ onyụn̄ edide ubak inua-okot Abasi-Ita-ke-Kiet. * (Luke 12:42) Ntre, Paul ikowụtke ke edisana spirit Abasi edi owo.

Edisana spirit Abasi edi anamutom odudu esie oro owo mîkemeke ndikụt. (Genesis 1:2, NW) Jesus ekenyene ndida “Edisana Spirit” nnịm owo baptism, kpa nte John akadade mmọn̄ enịm owo baptism. (Luke 3:16) Ke Pentecost 33 E.N., “Edisana Spirit [ama] ọyọhọ” n̄kpọ nte mbet 120 ke idem—ana in̄wan̄-in̄wan̄ nte ke idịghe owo ẹkeyọhọ mmọ ke idem. (Utom 1:5, 8; 2:4, 33) Mbon oro ẹkeyetde aran do ẹkenyene idotenyịn eke heaven, ndien spirit Abasi ama ada mmọ usụn̄ ndidu uwem edinam akpanikọ. (Rome 8:14-17; 2 Corinth 1:22) Spirit emi osion̄o nti mbun̄wụm onyụn̄ an̄wam mmọ ndifep “ubọk-utom obụkidem” oro ẹkemede ndinam owo ataba unyịme Abasi.—Galatia 5:19-25.

Edieke nnyịn idide mme asan̄autom Abasi oro ẹnyenede idotenyịn ndidu uwem ke isọn̄, owo idaha edisana spirit iyet nnyịn aran. Kpa ye oro, nnyịn imekeme ndinyene ukem udomo edisana spirit Abasi oro mbon oro ẹnyenede idotenyịn eke heaven ẹnyenede. Ntem, nnyịn n̄ko imekeme ndiyat spirit Abasi esịt. Edi didie?

Edieke nnyịn ifụmide item N̄wed Abasi oro ẹkedade edisana spirit ẹwet, oro akpanam nnyịn inyene mme edu oro ẹsụn̄ọde ke edikokoi nnam idiọk ndian edisana spirit, editaba mfọn Jehovah, ye nsobo ke akpatre. (Matthew 12:31, 32) Ekeme ndidi nnyịn inamke akwa idiọkn̄kpọ kan̄a, edi nnyịn imekeme nditọn̄ọ ndisan̄a ke idiọk usụn̄, kpa usụn̄ oro ekemede ndinam nnyịn itọn̄ọ ndinam mme n̄kpọ oro ẹtuahade ye ndausụn̄ spirit Abasi. Ke mme utọ idaha oro, nnyịn iyat edisana spirit esịt.

Didie ndien ke nnyịn ikeme nditre ndiyat spirit Abasi esịt? Nnyịn inyene ndinen̄ede n̄kpeme ekikere ye mme edinam nnyịn. Ke  leta oro enye ekewetde ọnọ ẹsọk mbon Ephesus, ke ibuot esie 4, apostle Paul ama akpan nsu, ediyat esịt mbịghi, editie ifu, ye editịn̄ mme ndek ndek ikọ. Edieke edide ima ‘imen obufa owo isịne’ ekem ifiak iduọ inyịne ke mme n̄kpọ oro ima ikọkpọn̄, nso ke oro ọkpọwọrọ? Oro ọkpọwọrọ ndifụmi item Ikọ Abasi, kpa Bible, oro ẹkedade odudu spirit ẹwet. Ke ndinam ntre, nnyịn ikpayat edisana spirit esịt.

Ke Ephesus ibuot 5, nnyịn imokot item Paul aban̄ade edifep idiọk udọn̄ idan̄. Enye eteme ekemmọ mme andinịm ke akpanikọ n̄ko ete ẹtre ndek ndek ido ye ndisịme ikọ. Edieke nnyịn mîyomke ndiyat edisana spirit Abasi esịt, ana nnyịn inyene emi ke ekikere ke ini imekde unọ idem inemesịt. Ntak emi nnyịn ikpowụtde udọn̄ ke mme utọ n̄kpọ ntre ebe ke nditịn̄ n̄kpọ mban̄a mmọ, ndikot n̄wed mban̄a mmọ, nnyụn̄ nse mme ndise ẹban̄ade mmọ ke ekebe ndise m̀mê ke ebiet efen?

Nte ededi, nnyịn imekeme ndiyat edisana spirit esịt ke nsio nsio usụn̄. Spirit Jehovah anam emem odu ke esop, edi edieke nnyịn ikpasan̄ade itịn̄ idiọk ikọ-edem m̀mê ndisiak isio n̄ka ke esop, nte oro ikpedịghe ndin̄wana mbiọn̄ọ edidianakiet oro spirit Abasi esịnde udọn̄ ọnọ? Ke nditịn̄ in̄wan̄-in̄wan̄, nnyịn ikpayat edisana spirit esịt, ukem nte mbon oro ẹketọde ubahade ke esop Corinth. (1 Corinth 1:10; 3:1-4, 16, 17) Nnyịn n̄ko ikpayat edisana spirit esịt edieke nnyịn ikoide-koi itre ndikpono iren oro ẹkedade spirit Abasi ẹmek ke esop.—Utom 20:28; Jude 8.

Do, nte an̄wan̄ade, ọfọn ndikere nte nnyịn idude uwem ye nte inamde n̄kpọ ke ima ikọfiọk se idide ndausụn̄ edisana spirit nte ẹwụtde ke Bible ye ke esop Christian. Ẹyak nnyịn “[ibọn̄] akam ke Edisana Spirit” n̄ko, isan̄a ke ndausụn̄ esie, inyụn̄ ika iso idu uwem ekekem ye se Ikọ Abasi eke odudu spirit etịn̄de. (Jude 20) Nnyịn ikpakam ibiere nditre ndiyat edisana spirit esịt edi ikam ika iso iyak enye ada nnyịn usụn̄, ke ntem idade ukpono isọk edisana enyịn̄ Jehovah.

• Jesus Christ ekemen nte ọsọn̄de owo inyene ndidụk Obio Ubọn̄ odomo ye nte edide ọkpọsọn̄ n̄kpọ camel ndibe ke odudu abiabon. Ndi Jesus eketịn̄ aban̄a ata camel ye ata abiabon ukịmọfọn̄?

Mbụk emi odu itie ita ke Edisana Ŋwed Abasi Ibom, ndien mmọ mbita ẹdi ukem. Nte Matthew obụkde, Jesus ọkọdọhọ ete: “Edi mmemmem n̄kpọ ye camel ndibe ke odudu abiabon, akan owo inyene ndidụk ke Obio Ubọn̄ Abasi.” (Matthew 19:24) Kpasụk ntre, Mark 10:25 okot ete: “Edi mmem-mmem n̄kpọ ye camel ndibe ke odudu abiabon, akan owo inyene ndidụk ke Obio Ubọn̄ Abasi.” N̄ko n̄ko, Luke 18:25 ọdọhọ ete: “Edi mmem-mmem n̄kpọ ye camel ndibe ke odudu abiabon, akan owo inyene ndidụk ke Obio Ubọn̄ Abasi.”

Ndusụk n̄wed ndụn̄ọde ẹnọ ekikere ẹte ke “odudu abiabon” ekedi ekpri inuaotop oro okodude ke otu ikpọ inuaotop ke Jerusalem. Edieke ẹkeberide akamba inuaotop, ẹma ẹsiberede ekpri inuaotop. Ẹdọhọ ke camel ama ekeme ndibe do. Ndi se Jesus ekenyenede ke ekikere edi oro?

Nte an̄wan̄ade, idịghe. Anaedi Jesus eketịn̄ aban̄a abiabon ukịmọfọn̄. Sia abiabon eset oro ẹkedade ọkpọ unam ye ukwak ẹnam ẹkedude ke ikpehe oro, enyene ndidi ediwak owo ẹma ẹnyene enye ke ufọk mmọ.

Ediwak mme ewetn̄wed ukabadeikọ ẹnyịme ye ekikere emi. Ẹda ikọ Greek (rha·phisʹ)  oro ẹkabarede ‘abiabon’ ke Matthew 19:24 ye Mark 10:25 ẹto ikọedinam oro ọwọrọde “kịm.” Ndien ẹsida ikọ Greek (be·loʹne) oro ẹkabarede abiabon ke Luke 18:25 ẹtịn̄ ẹban̄a ata abiabon oro asiakidem esidade ekịm owo idem. Vine’s Expository Dictionary of Old and New Testament Words ọdọhọ ete: “Etie nte ndikere ke ‘odudu abiabon’ oro ada aban̄a n̄kpri inuaotop edi ekikere eyomfịn; idụhe n̄kpọ ndomokiet ndiwụt ke ẹma ẹnyene utọ ekikere emi ke eset. Ke nditịn̄ ikọ ntem, Ọbọn̄ okoyom ndiwụt se idide ọkpọsọn̄ n̄kpọ inọ owo ndien ufọn idụhe ndidomo ndinam enye etie nte se mîsọn̄ke ebe ke ndikere ke abiabon oro ẹtịn̄de ẹban̄a idịghe ata abiabon.”—1981, Eboho 3, page 106.

Ndusụk owo ẹkere ke ẹkpenyene ndikabade “camel” ke mme ufan̄ikọ emi nte “urụk.” Ikọ Greek oro ẹkabarede nte urụk (kaʹmi·los) ye camel (kaʹme·los) ẹbiet kiet eken. Nte ededi, ikọ Greek oro ẹkabarede “camel,” utu ke enye oro ẹkabarede “urụk,” odu ke Matthew 19:24 ke n̄kani uwetn̄kpọ Greek eke Gospel Matthew (ikpan̄wed Sinai, eke Vatican Nọ. 1209, ye eke Alexandrine) oro ẹsụk ẹdude idahaemi. Nte mbụk ọdọhọde, Matthew ekebem iso ewet Gospel esie ke usem Hebrew ndien ekeme ndidi enye ke idemesie akakabarede enye esịn ke usem Greek. Enye ama enen̄ede ọfiọk se Jesus eketịn̄de aban̄a, ntre enye akada nnennen ikọ.

Mmọdo, Jesus eketịn̄ aban̄a ata abiabon ukịmọfọn̄ ye ata camel. Enye eketịn̄ emi ndisọn̄ọ n̄wụt nte ekemede ndisọn̄ owo ndinam n̄kpọ. Edi nte ikọ Jesus ọkọwọrọ ke owo inyene ndomokiet ikemeke ndidụk Obio Ubọn̄? Baba, owo ikpenyeneke ndida ikọ Jesus ke ata ata usụn̄. Enye akada ikọ oro anamde n̄kpọ enyene udobi ndiwụt ke kpa nte ata camel mîkemeke ndibe ke odudu ata abiabon ukịmọfọn̄, ntre n̄ko ke owo inyene oro ọsọn̄ọde eyịre ke mme inyene esie mînyụn̄ iyakke Jehovah edi akpa ke uwem esie mîkemeke ndidụk Obio Ubọn̄.—Luke 13:24; 1 Timothy 6:17-19.

Jesus eketịn̄ ikọ emi ke ndondo oro ekpri ọbọn̄ oro ekedide owo inyene ekesịnde akwa ifet oro ẹkenọde enye ndidi mbet Jesus. (Luke 18:18-24) Owo inyene oro etịmde ama inyene esie akan mme n̄kpọ eke spirit ikemeke ndidori enyịn ndinyene nsinsi uwem ke Obio Ubọn̄ Abasi. Edi, ndusụk mbon inyene ẹma ẹkabade ẹdi mme mbet Jesus. (Matthew 27:57; Luke 19:2, 9) Ntre, owo inyene oro ebuenede m̀mê ekerede aban̄a unana esie ke n̄kan̄ eke spirit emi onyụn̄ oyomde un̄wam Abasi ekeme ndinyene edinyan̄a.—Matthew 5:3; 19:16-26.

[Ikọ idakisọn̄]