Ntọt Mme Anditan̄a Obio Ubọn̄

Ẹti “Mbon Unọmọ Oro Ẹma Ẹkefre”

KE NTỌN̄Ọ ntọn̄ọ isua 2001, Haykaz, eyen isua 15 emi edide kiet ke otu Mme Ntiense Jehovah, ama aka ekese mbuwed kiet aban̄ade “Mbon Unọmọ Oro Ẹma Ẹkefre” ke Bern, Switzerland, mbuwed emi owụt ukọbọ oro Mme Ntiense Jehovah ẹkesobode ke ini ukara Nazi. Ke enye ama akasan̄a ese mme mbuwed emi, Haykaz ama ọdọhọ ete: “Mmesikop mban̄a mme ibak ibak mfiomo ye ndutụhọ oro Mme Ntiense Jehovah ẹkekụtde ke ini ukara Nazi, edi emi edi akpa ini oro n̄kokụtde ata ndise ye mme n̄wed oro ẹwụtde se iketịbede ini oro. Mbuwed emi, se mbon oro ẹkekụtde n̄kpọntịbe emi ẹkewetde, ye se mme ewetmbụk eset ẹwetde ẹdian ke mbuwed emi ẹma ẹnen̄ede ẹtụk mi.”

Nte ini akakade, ke ini ẹkedọhọde Haykaz, emi odude ke sekọndri, ewet mbụk ke ibuot nsan̄a ubet ukpepn̄kpọ esie, enye ekemek ibuotikọ emi, “Mme Ntiense Jehovah—Mbon Unọmọ Ukara Nazi Oro Ẹma Ẹkefre.” Andikpep mmọ ama enyịme ibuotikọ emi onyụn̄ ọdọhọ Haykaz ada n̄kpọ oto mme n̄wed ererimbot n̄ko. Oro ama adat Haykaz esịt. Enye ọkọdọhọ ete: “Ke ndụn̄ọde oro n̄kanamde, mma nsion̄o mbio mbio n̄kpọ oro ndusụk n̄wed ẹtịn̄de ẹban̄a se iketịbede inọ Mme Ntiense Jehovah ke ini ukara Nazi. Mma nnyụn̄ n̄wet se n̄kokụtde ke mbuwed ‘Mbon Unọmọ Oro Ẹma Ẹkefre.’ Se n̄kewetde, emi ekedide page 43, ama esịne mme ndise.”

Ke November 2002, Haykaz ama okot se enye ekewetde ọnọ mme nsan̄a ufọkn̄wed, mme andikpep, mbonubon, ye mme ufan esie. Ke oro ebede, ikpehe mbụme ye ibọrọ ama etiene, ndien emi ama ọnọ enye ifet nditịn̄ se enye enịmde ke akpanikọ, emi ẹkọn̄ọde ke Bible. Ke ini n̄kaiferi kiet ke otuowo okobụpde enye ntak emi enye ekemekde ibuotikọ oro, Haykaz ama ọbọrọ ete ke ediwak n̄wed mbụk isisiakke enyịn̄ Mme Ntiense Jehovah ye nte ke imọ ikoyom mme owo ẹfiọk nte Mme Ntiense ẹkesọn̄ọde ẹda ẹn̄wana ẹban̄a mbuọtidem mmọ nte mme Christian. Nso utịp ke nneme oro ekenyene?

Haykaz ọkọdọhọ ete: “Idem ama akpa mme nsan̄a ufọkn̄wed mi. Mmọ ikọfiọkke ke ẹma ẹkọbọ Mme Ntiense Jehovah nte otu idiọk idiọk ntre. N̄ko-n̄ko, ediwak mmọ ikọfiọkke ke Mme Ntiense oro ukara Nazi ọkọdọn̄de ke itienna ekikere ẹma ẹsidian san̄asan̄a idiọn̄ọ oro ẹkotde purple triangle.”

Ke enye ama okokot mbụk esie ama, Haykaz ama enyene ifet efen efen ndinyene nneme ye nsan̄a ubet ukpepn̄kpọ esie nnyụn̄ nneme mme idaha Mme Ntiense Jehovah oro ẹkọn̄ọde ke Bible kaban̄a edikịm iyịp nsịn ke idem, ọkpọsọn̄ mmịn, ye ido uwem. Haykaz ọkọdọhọ ete: “Owo mmọ ndomokiet ikasakke mi nsahi.” Akan oro, idahaemi, ẹsịn se Haykaz ekewetde ke itie ubon n̄wed ufọkn̄wed. Oro idiyakke mme owo ẹfre uko oro Mme Ntiense Jehovah ẹkenyenede.