Anie Edi “Ata Abasi, Onyụn̄ Edi Nsinsi Uwem”?

JEHOVAH, Ete Ọbọn̄ nnyịn Jesus Christ, edi ata Abasi. Enye edi Andibot, emi ọnọde mbon oro ẹmade enye nsinsi uwem. Ntre ke ediwak mbon oro ẹkotde ẹnyụn̄ ẹnịmde Bible ke akpanikọ ẹdibọrọ mbụme oro ẹbụpde ke ibuotikọ emi. Ke akpanikọ, Jesus ke idemesie ọkọdọhọ ete: ‘Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.’—John 17:3.

Edi, ediwak mme aka ufọkabasi ẹda ikọ emi ke isio isio usụn̄. Ẹda ibuotikọ emi ẹto 1 John 5:20, emi ọdọhọde ubak ubak ete: “Nnyịn inyụn̄ idu ke ata Abasi, kpa ke Eyen Esie Jesus Christ. Enye emi edi ata Abasi, onyụn̄ edi nsinsi uwem.”

Mbon oro ẹnịmde ukpepn̄kpọ Abasi-Ita-ke-Kiet ẹdọhọ ke ikọ oro, “Enye emi” (houʹtosʹ), kpa adaitie ikọenyịn̄ oro owụtde n̄kpọ oro ẹtịn̄de ẹban̄a, anyan ubọk owụt akpatre owo oro ẹsiakde enyịn̄ ke ufan̄ikọ emi, kpa Jesus Christ. Mmọ ẹdọhọ ke Jesus edi “ata Abasi, onyụn̄ edi nsinsi uwem.” Nte ededi, utọ ekikere emi atuaha ye se idude ke mme itie eken ke N̄wed Abasi. Ndien ediwak nta mme ekpepn̄kpọ mban̄a Bible inyịmeke ye ekikere mme ekpep ukpepn̄kpọ Abasi-Ita-ke-Kiet emi. B. F. Westcott, emi ekpepde n̄wed ke Ufọkn̄wed Ntaifiọk Cambridge ekewet ete: “[Adaitie ikọenyịn̄ oro, houʹtosʹ] enen̄ede owụt owo oro ẹkebemde iso ẹsiak, idịghe owo oro ẹsiakde ke ukperedem, ndien se mme apostle ẹkenyenede ke ekikere edi emi.” Ntem, owo oro apostle John ekenyenede ke ekikere ekedi Ete Jesus. Erich Haupt, eyen Germany oro edide ekpep ukpepn̄kpọ ido ukpono, ekewet ete: “Ẹnyene ndibiere m̀mê [houʹtosʹ] oro ẹdade ẹtịn̄ ikọ anyan ubọk owụt owo oro ẹsiakde ke ukperedem . . . m̀mê enye oro ẹkebemde iso ẹsiak, kpa Abasi. . . . Etie nte ndidọhọ ke ikọ emi aban̄a ata Abasi kierakiet enen̄ede odu ke n̄kemuyo ye akpatre item oro ẹnọde ẹte ikpeme idem ke ndem, ndien emi enen akan ndidọhọ ke enye owụt ke Christ edi Abasi.”

N̄wed oro, A Grammatical Analysis of the Greek New Testament, emi Pontifical Biblical Institute eke Rome osiode ọdọhọ ete: “[Houʹtosʹ]: emi edide ata utịtikọ 1 John 5:18-20, enen̄ede ekpere ndiwụt owo emi edide ata Abasi akpanikọ, ke edide isio ye ukpono ndem (1Jo 5 ufan̄ikọ 21).”

Houʹtosʹ oro ẹsiwakde ndikabade nte “enye,” “oro,” m̀mê “enye emi,” isiwakke ndidi ekperedem owo oro ẹsiakde enyịn̄ ke se ẹketịn̄de. Mme itien̄wed efen ẹwụt emi. Ke 2 John 7, apostle emi ekewetde akpa n̄wed John ekewet ete: “Ediwak mbon abian̄a ẹma ẹwọn̄ọ ẹkedụk ke ererimbot, kpa mmọ emi mînyịmeke ite, Jesus Christ ama edi ke obụkidem. Utọ owo oro [houʹtosʹ] edi owo abian̄a ye andibiọn̄ọ Christ.” Mi, owo ikemeke ndidọhọ ke ikọ oro, “utọ owo oro” ada aban̄a Jesus—sia ẹsiakde enyịn̄ esie ukperedem. Nte an̄wan̄ade, “utọ owo oro” ada aban̄a mbon oro ẹkan̄de Jesus. Kpukpru mmọ nte otu ẹdi “owo abian̄a ye andibiọn̄ọ Christ.”

Apostle John ekewet ke Gospel esie ete: ‘Kiet ke otu owo mbiba oro ẹkopde se John etịn̄de onyụn̄ etienede Jesus edi Andrew eyen-eka Simon Peter. Enye, [houʹtosʹ] ebem iso okụt eyen-eka esiemmọ Simon.’ (John 1:40, 41) Ana in̄wan̄-in̄wan̄ nte ke “enye” oro ẹtịn̄de ẹban̄a mi idịghe owo oro ẹsiakde ukperedem ke ufan̄ikọ emi, edi edi Andrew. Ke 1 John 2:22, apostle John ada ukem adaitie ikọenyịn̄ emi etịn̄ ikọ ke ukem usụn̄ emi.

Luke n̄ko ada ukem adaitie ikọenyịn̄ emi etịn̄ ikọ ke ukem usụn̄ emi ke Utom 4:10, 11 (NW) ete: “Edi enyịn̄ Jesus Christ eyen Nazareth, emi mbufo ẹkekọn̄de ke eto, edi emi Abasi akanamde eset ke n̄kpa, edi enye emi esịn owo emi ada mi ke iso mbufo ye nsọn̄idem. Emi [houʹtosʹ]  edi ‘itiat oro mbufo mme ọbọpufọk mîkadaha ke n̄kpọ, emi amakabade edi etubom inụk.’” Nte an̄wan̄ade, adaitie ikọenyịn̄ oro “emi” idaha iban̄a owo oro ẹkenamde idem ọsọn̄ mi, okposụkedi ẹsiakde enyịn̄ esie ekpere houʹtosʹ, oro edi, “emi.” Ke akpanikọ, “emi,” oro ẹtịn̄de ẹban̄a ke Ut 4 ufan̄ikọ 11 ada aban̄a Jesus Christ, eyen Nazareth, emi edide “itiat inụk” emi ẹbọpde esop Christian ẹdori ke enye.—Ephesus 2:20; 1 Peter 2:4-8.

Utom 7:18, 19 n̄ko owụt emi, ọdọhọde ete: “Edidem efen, emi mîfiọkke Joseph, adaha ada ke Egypt. [Enye; houʹtosʹ] anam n̄kpọ n̄kari-n̄kari ye orụk nnyịn.” “Enye” emi ekefịkde mme Jew ikedịghe Joseph, edi ekedi Pharaoh, edidem Egypt.

Mme utọ ufan̄ikọ oro ẹsọn̄ọ se Daniel Wallace, eyen ukpepn̄kpọ usem Greek, eketịn̄de aban̄a usem Greek ete ke “enyịn̄ owo oro ẹsiakde ẹkpere [adaitie ikọenyịn̄ oro anyande ubọk owụt n̄kpọ] isiwakke ndidi enye emi andiwet n̄wed ekenyenede ke ekikere.”

“Ata Abasi”

Nte apostle John ekewetde, Jehovah, emi edide Ete Jesus Christ edi “ata Abasi.” Enye edi ata Abasi kierakiet, kpa Andibot. Apostle Paul ama enyịme ye emi ke ndikọdọhọ nte: “Nnyịn imenyene Abasi kiet kpọt, emi edide Ete, emi kpukpru n̄kpọ ẹtode enye ẹwọn̄ọ.” (1 Corinth 8:6; Isaiah 42:8) Ntak efen emi owụtde ke Jehovah edi “ata Abasi” oro ẹtịn̄de ẹban̄a ke 1 John 5:20 edi koro enye edi Ntọn̄ọ akpanikọ. Andiwet psalm okokot Jehovah “Abasi akpanikọ” sia Enye anamde akpanikọ ke kpukpru se Enye anamde, mînyụn̄ ikemeke ndisu nsu. (Psalm 31:5; Exodus 34:6; Titus 1:2) Ke etịn̄de aban̄a Ete esie eke heaven, Eyen esie ọkọdọhọ ete: “Ikọ Fo edi akpanikọ.” Ndien kaban̄a se enye ekekpepde, Jesus ọkọdọhọ ete: “Ukpep-n̄kpọ eke nnọde idịghe Okịm, edi edi eke Andidọn̄ Mi.”—John 7:16; 17:17.

Jehovah n̄ko edi “nsinsi uwem.” Enye edi Obube Mmọn̄ uwem, kpa Enye oro ọnọde owo uwem nte enọ oro owo mîdotke ebe ke Christ. (Psalm 36:9; Rome 6:23) Oro edi ntak apostle Paul ọkọdọhọde ke Abasi edi ‘Andinọ mmọ emi ẹyomde Enye utịp.’ (Mme Hebrew 11:6) Abasi ama ọnọ Eyen esie utịp ke ndinam enye eset ke n̄kpa, ndien Ete esie ọyọnọ mbon oro ẹnamde n̄kpọ Esie ke ofụri esịt utịp nsinsi uwem.—Utom 26:23; 2 Corinth 1:9.

Ke emi, nso ikpedi ubiere nnyịn? Nnyịn idọhọ ke Jehovah ikpọn̄-ikpọn̄ edi “ata Abasi, onyụn̄ edi nsinsi uwem.” Enye ikpọn̄ odot ndibọ san̄asan̄a utuakibuot nto mbon oro enye okobotde.—Ediyarade 4:10b.