‘Mmokop Inemesịt Mban̄a Ukpep Oro N̄kọbọde’

IDEM ama akpa ekpri Kazuna ke ini andikpep esie ọkọdọhọde enye etiene etie udomo edinọ utịn̄ikọ ke Ikọmbakara. Ẹkediomi udomo oro ẹnọ kpukpru ufọkn̄wed sekọndri ke Isuo Hokkaido ke edere edere Japan, edi akananam owo ikosioho eyen ufọkn̄wed ndomokiet ke ufọkn̄wed mme Kazuna etiene etie udomo emi. Idem ama enyek Kazuna ke usen udomo oro sia enye ekenyenede nditie udomo emi ye n̄kpọ nte nditọ ufọkn̄wed 50. Idem ama enen̄ede enyek enye ke ini okokụtde ke owo iba oro ẹdibierede andikan ke udomo emi ẹkedi mbon emi usem emana mmọ edide Ikọmbakara.

Ẹma ẹkot enyịn̄ mme andikakan, ẹtọn̄ọde ye akpatre andikan. Idem ama akpa Kazuna ke ini ẹkekotde enyịn̄ esie ke akpatre nte andimen akpa. Enye ye andikpep esie, emi eketiede ekpere enye, ẹma ẹse kiet eken ke n̄kpaidem. Idem okosụk akpakpa Kazuna ke ini enye ọkọdọkde aka itie edinam ọkọbọ enọ esie nte andimen akpa.

Kazuna etịn̄ ye idatesịt ete: “Ukpep oro esop Jehovah ọnọde ke Ufọkn̄wed Utom Ukara Abasi anam mmen akpa ke udomo emi. Mmenen̄ede n̄kop inemesịt ndibọ ukpep emi.” Ufọkn̄wed Utom Ukara Abasi oro Kazuna abuanade toto ke ini enye ekedide eyenọwọn̄ edi kiet ke otu mbono esop oro Mme Ntiense Jehovah ẹsinịmde. Nte enye okosụk etịmde idem ọnọ udomo emi, Kazuna ama esinen̄ede ọnọ ntịn̄enyịn ke nte ẹkpekamade ukwak utịn̄ikọ, nte ẹkpetịn̄de ikọ ẹsịn ufiop, nte ẹkpedade idem ẹtịn̄ ikọ, nte ẹkpesede otuowo, ye mme n̄kpọ efen efen oro ẹsikpepde ke Ufọkn̄wed Utom Ukara Abasi.

Mbọk nnyịn imokot fi ite edise nte ẹsinịmde ufọkn̄wed emi, emi ẹsinịmde kpukpru urua ke Ufọkmbono Obio Ubọn̄ Mme Ntiense Jehovah. Di dikụt ke idemfo nte n̄kpri ye ikpọ ẹbọde ufọn. Ẹtịm ufọkn̄wed emi ẹnọ kpukpru owo. Ke oyomde ndifiọk enye oro ekperede fi akan, mbọk bụp Mme Ntiense Jehovah ke mbọhọ mbufo.